Read Ngombale 1 Korêŋtə 5 Bible Online

1 Korêŋtə 5 - Ngombale bible

1 Korêŋtə 5

¹M mə̌ nzúʼ pə́ pə̂ yʉʼ tsəm mə́ ndêʼtə məno tə́poŋ mi ə́ leitə təcər pei. Měi shwor tə pətəpə̌i-no Kəlísto kâa pə́i mə́ ngʉ̂ gháp yə́rə́. N nzǔʼ ńgó cǒ ŋuu təcər pei kə khwor ngwě tə́ yé ńcóghʼ ndə̂.

²Mbə̂u məno zêi pə̌ ndeitə yə́rə́ təcər pei, pei cʉ̂ʼ lə̂ nkhwór ləwʉ̂ ə́ ndǎa, ə́ fú təcər pei ə́ nzûŋ ŋuu wêi, ə́ ncʉ́ʼ mə́ ŋáʼtə ŋaʼtə́.

³Ə́ ngwǒ lə́ məŋ, mə́i pei pə̌ tə káa pə́ jwô wéi ghâa təcər pei lə̂ mənyôghʼ, lə́ paghʼə nâa ngwô tâʼ kwaŋtə. N ndaghʼ mə́ ləjôghʼ Yěso Kəlísto féʼ ŋuu wêi pə́ mpfu ghíʼ n ndə pə́ təcər pei mpfu yi a kə ghʉ mbə̂u no zêi tə nzáʼ ńgó,

⁴pei lə̌i nkə̂itə́ ńnyáŋ sê lə̂ ləjôghʼ Nde waghʼə Yěso Kəlísto, mə́i ə́ wo leitə́ lə́ tâʼ kwaŋtə yi paghʼə ghwǒ, m mbə̂ zâa nzəm pei. Paghʼə laghʼ mətəʉ Nde waghʼə Yěso Kəlísto,

⁵ə́ ncóghʼ yé mbó Sə́tə, â côŋ mbap mbəʉ ye, ə̂ táa mbə́ leʼé yi Nde ghʉ̌ pə̌ʉ tó lə̂ nzáʼ kôr təcər páp pə pye-mə́soŋ, ə Zəghʼə yé cwór.

⁶Káa pei yáa ngwo wéi lə̂ ŋáʼtə́! Pei tsuŋu mə́ njî ńgó məyʉʼ mvuŋ lə̂ ghʉ faalə̂i yi pə́ tsə̌p kôʼ.

⁷Pei kwárə́ ndwuŋu mvuŋ no tə́poŋ təcər pei, ə́ ncʉ́ʼ mbə́ ghíʼ faalə̂i shwî yi pə́ tsə̌p tə cóghʼ mvuŋ mə́u. Pei yaa mə́ mbəi mbə́ pətəlǒʼ tə fú ghíʼ pə́ lə lǎghʼ Yěso Kəlísto nuŋú poʼ Sê, a pə̂ ghíʼ waghʼə môu ndənzʉ lətsei Pásʉ́ka.

⁸Ə́ pə̂ yə́rə́, paghʼə zʉ́ lətsei Pásʉ́ka lə̂ mbələ̂ghʼ tə mvuŋ, lə̂ ntə̂ʉ yi ə́ pə́ ndéi, ə́ mbə́ yi ə́ laʼ no lə́nə́ʉ. Koo paghʼə pfâr mbələ̂ghʼ yi pə́ lǎghʼ ndwuŋu mvuŋ ńtsúŋú; ə́ mvuŋ məfaʼ tə́poŋ, ə́ mbou mbə́ yi məno tə́poŋ.

⁹N ndə tə́u ŋwaʼa ńŋə́ lə́ pei, ə́ ŋwáʼá cər wó ngô: «Pei páa lə́ pə́ yi mboʼ pei pə pye pi gháp pəu pə̌u nzóʼ təm no.»

¹⁰Kâa n ndə lâʼ gháʼá ńgó pei nâa nkhʉ̌ pye pi gháp pəu pə̌u nzóʼ pə́tsəm; káa laʼ pətsǒŋ pə́tsəm, káa laʼ pəghaŋə fúʼ-lóŋ pə́tsəm, káa kə́ laʼ pye pə́tsəm pi gháp ghûʼtə məzə̂u ə́ fûŋ ńgó ə̂ məsê. Ńté no pei lə̌i ngʉ́ yə́rə́, mə́i pei wo fú cər nzʉ̂, ə́ fú kwǎr kwarə́.

¹¹Ə ngə́, n ndə ŋwáʼa ńŋə́ lə́ pei pə́ ńgó pei páa ŋuu yi a pə́ təcər pei mə́ ndâʼ ńgó â fə̌r wei nzəm Kəlísto ə́ mbou mə́ mbə̂u pə̌u nzóʼ, ə́ mbə́ ntsǒŋ, ə́ mbə́ ngaŋə fúʼ lóŋ, ə́ mə́ ngûʼtə məzə̂u ńgó ə̂ məsê, ə́ mə́ ntâŋ məlaa, ə́ mbə́ pʉ̂ʉ-məluʼ, ə́ mbə́ ŋuu yi a tǎghʼ ləjôghʼ yé lə̂ no nkâp tə́sə́ʉ, koo pei pə mbə̂u ŋuu zêi pəi ntə́m zə̂u ńzʉ́.

¹²Paghʼ pə pye pi káa gháp pə́ pye Kəlísto yaa nkə́ ngwô hó tə məŋ fêʼ gháp? Ə Sê lə̂ ghwǒ lə̂ fêʼ gháp. Pei féʼ pə́ pye pi pei pə pǎp nǎa mbə́ ndə̂, ńté no ŋwaʼa Sê lâʼ ngô: «Pei fú təcər pei, ə́ nzúŋ ŋuu tə́poŋ.»