Read Ngombale 1 Korêŋtə 6 Bible Online

1 Korêŋtə 6 - Ngombale bible

1 Korêŋtə 6

¹Ə́ lei gháʼá ŋuu Kəlísto gháp cǒ ghwô məfeʼ təcər páp, ə́ ncʉ́ʼ lə̂ ngwó njwó pye Sê gháp tsuŋtə, ə́ ndaghʼ ngwó njwó pə́ pətəpə̌i-no Sê ńgó gháp tsúŋtə́?

²Káa pei pə́ njî ńgó pye Sê lə̂ ghʉ̌ fěʼ pye nzʉ̂ mo? Ə́ lə̌i mbə́ yi pei lə̂ ghʉ̌ fěʼ pye nzʉ̂, lə́u pei pôu kûʼ wéi lə̂ ntʉ́ŋtə́ pôu məno təcər pei po áa?

³Káa pei pə́ njî ńgó paghʼə lə̂ ghʉ̌ fěʼ pəcwôʼ Sê mo? Tə mpfu sə́ʼə́ lə̂ məno nzʉ̂ yo.

⁴Pei ghwô məfeʼ təcər pei, ə́ ngwo njwó pye pi pye Kəlísto kâa pə́ kwaʼ gháp gháp nou no ńgó gháp fêʼ áa?

⁵Məŋ ndaʼ gháʼá ńgó ə sə̂ʉ kó wéi; ńjí ńgó ə́ fú mbə́ təcər pei gháʼá, káa tâʼ njino fú mbə́ yé wó yi mboʼ a fêʼ məno méi áa?

⁶Ŋuu Kəlísto gháp cǒ yaa ngwô no, ə́ ndaghʼ ńgwó ńtə́ʉ mbi pətəpə̌i-no Sê ńgó gháp fêʼ áa!

⁷Məfeʼ yaa mbə̂ təcər pei gháʼá ə́ ndaghʼ nyárə ńgó cûʼtə zéi kâa pə́ ŋə̂i yé. Mboʼ pei pə̂i pə́ nyíʼi wéi po mo? Mboʼ ŋuu lâghʼ təʉ mpfú zə̂u zéi, pei nyêr lə́ zʉ́ po mo?

⁸Pei lə̂ pou nyíʼi pye, ə́ ndaghʼ təʉ ńgôu məzə̂u máp mpfú, lə́ gháp pə̂ pəfə̌r péi!

⁹Káa pei pə̂ njî ńgó pye pi gháp ghʉ məno tə́poŋ ghʉ̌ kə́u gháp cər Ləfou Sê po mo? Koo pei fûtə mbəʉ zéi; pəpə̌u-nzóʼ, pəghúʼtə́ məzə̂u mi pə́ fûŋ ńgó məsê, pəghʉ̌-məghap, pəghʉ̌ məshwi-shwí məno, mbaa mbiŋə pi gháp shərə nzôʼ təcər páp gháp pə pəngyě pi gháp shə́rə nzôʼ záp təcər páp lə́wó;

¹⁰mbaa pətsǒŋ, mbaa pye pi gháp tághʼ ləjôghʼ záp lə̂ nkâp tə́sə́ʉ, məpʉ̂ʉ-məluʼ, pye pi gháp kʉ́ʉ pəcó tə́poŋ gháp pə pəlǎghʼ təʉ ḿpfú məzə̂u pye táa kə̂u gháp cər Ləfou Sê po.

¹¹Ə̂ ghíʼ pəcó pye təcər pei kə yǎa mbə́. Lə́ Sê kə soghʼ wéi lə́ mêi məno, ə́ ndǎghʼ wéi ngʉ́ pye pé; Sê zaghʼə kə leitə́ lə́ Nde waghʼə Yěso Kəlísto, ə́ ndághʼ Zəghʼə yé ńgʉ́ pei cʉ̂ʼ pye ndʉŋ-ndʉŋ mbi zʉ́.

¹²Pəcó pye pə́ təcər pei, wǒwó lə́ páp pə̂ ndâʼ ńgó mboʼ a ghʉ zə̂u tsəm ghíʼ a kǒŋ; lə́ m mə̌ ndâʼ ńgó mboʼ zə̂u tsəm pfûtə yé ghâa po. Ə́ mə́ ndâʼ ńgó mboʼ a ghʉ zə̂u tsəm ghíʼ a kǒŋ; lə́ mboʼ m mbə̂i ghâa tə có zə̂u laghʼ ghâa ńgʉ̌ puʼ yé po.

¹³Pei kə̌ ncí mə́ ndâʼ ngô: «Pə́ lə tsúŋu məzʉ̂ ńté ləpəm, ə́ ntsuŋú ləpəm ńté məzʉ̂.» Ə Sê ghʉ̌ cǒŋ ləpəm, ə́ kə́ cǒŋ məzʉ̂ lə́wó. Lə́ káa Sê lə tsúŋu yé mbəʉ ńgó pə laghʼ ńgʉ̌ zə̂u tsəm yi pə́ pə́ nkǒŋ; mbəʉ ŋuu gháʼá mbə́ yi Nde, Nde pə̂ ŋwár wěi.

¹⁴Ə Sê yi a lə ghʉ̌ Nde zʉ̂ʉ lə̂ ləwʉ̂, ghʉ̌ kə́ lǎghʼ mətəʉ mé ghʉ̌ paghʼə zʉ̂ʉ zághʼə lə̂ ləwʉ̂ lə́wó.

¹⁵Káa pei pə́ njî ńgó məmbəʉ méi gháʼá mbə́ məyʉʼ mbəʉ Kəlísto mo? N ngwo lǎghʼ məyʉʼ mbəʉ Kəlísto ghʉ̌ məyʉʼ mbəʉ kwarə-məngyě mo? Ə́ ngə́!

¹⁶Káa pei pə́ njî ńgó ŋuu mbiŋə gháp kwarə-məngyě lei tə nûŋ ə́ ncʉ́ʼ mbə́ pə́ tâʼ mbəʉ mo? Ńté no tsâr Sê laʼ ngô: «Gháp pə́pwô cʉ́ʼ tâʼ mbap mbəʉ.»

¹⁷Lə́ ŋuu lə̌i ndár mbəʉ ye lə́ Nde cər ntə̂ʉ zʉ́, gháp zʉ́ cʉ̂ʼ tâʼ Zəghʼə.

¹⁸Pei páa lə̂ ndághʼ mbəʉ zei ńgʉ́ zə̂u tsəm yi pei kǒŋ! Məcó məno tə́poŋ mi pye ghʉ̂ měi, ə́ lyəghʼtə pə́ nzəm pěi. Lə́ ŋuu yi a laghʼ mbəʉ ye ńgʉ̂ zə̂u tsəm yi a kǒŋ, coŋ gháʼá pə́ ndʉʉ mbəʉ ye.

¹⁹Káa pei pə́ njî ńgó mbəʉ zei gháʼá mbə́ ndə̂ Zəghʼə Ndêi-lěi mo? Ə Zəghʼə Ndêi-lěi yi Sê lə ŋə́ lə́ pei cî cər mbəʉ zei. Káa pei ghwô wéi mbəʉ zei pə́ pei.

²⁰Ə Sê lə ŋə̂ zə̂u lətəi-ndwuŋ ə́ ndághʼ ńkwárə́ waghʼə ndə̂ pûʼ. Ghíʼ ə́ kə́ mbə́ yə́rə́ lə̂, pei lâghʼ mbəʉ zéi ńgúʼtə́ Sê.