Read Ngombale 1 Korêŋtə 7 Bible Online

1 Korêŋtə 7 - Ngombale bible

1 Korêŋtə 7

¹Paghʼə láʼ no mpfu wo lə̂ no yi pei lə ŋwaʼá ə́ ntúŋú ghâa ngô: «Ə́ poŋ ghíʼ mboʼ ŋuu mbiŋə ghwotə mbəʉ ye lə̂ nûŋ gháp məngyě[2].»

²Lə́ ə́ nkə́ ncʉ́ʼ yi pye-mə́soŋ pə̂u pə̌u nzóʼ; ə́ ncʉ́ʼ yə́rə́ wǒwó ŋuu mbiŋə zôʼ ye məngyě, wǒwó məngyě zôʼ ye ndə̌u.

³Ə́ poŋ ńgó ŋuu mbiŋə ghʉ́ zə̂u yi a ghwǒ lə̂ ngʉ́ lə̂ ngwě ye, məngyě ghʉ́ zə̂u yi a ghwǒ lə̂ ngʉ́ lə̂ ndə̌u ye.

⁴Káa məngyě ghwô yé lə̂ ndághʼ mbəʉ ye ńgʉ́ zə̂u yi a kǒŋ, ə mbəʉ ye, ə̂ yi ndə̌u ye. Ə́ kə́ mbə́ ndʉŋ-ndʉŋ ghíʼ ŋuu mbiŋə kâa ghwô yé lə̂ ndághʼ mbəʉ ye ńgʉ́ zə̂u yi a kǒŋ, ə mbəʉ ye gháʼá mbə́ yi ngwě ye.

⁵Koo ŋuu mbiŋə zôŋ mbəʉ ye mbó ngwě ye, koo məngyě zôŋ mbəʉ ye mbó ndə̌u ye. Tə ndyéʼ ghíʼ mboʼ pei pə̂ cǒ mpfu, ə́ ngwǒ tâʼ ntsʉ ə́ nkǒŋ koŋə́ ə́ shə́ghʼ ə́ nyáŋ yə́rə́, ə́ mə́ sʉ́ʉtə́ Sê. Zêi mpfu lêi, pei pôu nkə́ nyáŋ pə́ ghíʼ pei kə yaa ncí nyáŋ, ə́ mbóghʼ ghíʼ mboʼ pei kâa lə̂ shə̂ghʼ, Sə́tə kə̂u təcər pei ə́ nkwáʼtə́ wéi.

⁶Káa yo pə̂ yé pə̂ có ləpə̌ʉ yi n ŋə̂ lə́ pei, n ndaʼ wéi pə́ ghíʼ pei lə̌i ngʉ́, ə́ poŋ.

⁷Ə́ lə̌i tə́i mêi lə́ məŋ, ŋuu tsəm pə̂ ghíʼ məŋ; lə́ ə Sê pǒu wǒwó, ə́ ŋə̂ ye yi ə́ kǔʼ lə́ zʉ́. Ə yi cǒ ŋuu pə́ ghíʼ a wo zóʼ, ə yi cǒ ŋuu pə̂ ghíʼ a wo nyâŋ yé pə́ yə́rə́.

⁸N ndaʼ lə́ pəcwi gháp pə pəpfǒghʼ-pəngyě ńgó mboʼ gháp nyáŋ ghíʼ məŋ, ə́ poŋ.

⁹Lə́ gháp kə́ ndə́iʼ kuʼ gháp lə̂ ngwôtə́ mbəʉ záp po, gháp zôʼ. Mboŋə́ nzóʼ, ə́ nděi ghíʼ mboʼ o nyâŋ tə́ zôʼ, lə́ ə́ mə́ ntsâa no nzǒʼ.

¹⁰Ə́ ngwǒ lə́ pye pi gháp zóʼ mə́, m mə̂ ndâʼ gháp no yi Nde lə lǎʼ ngô: «Koo məngyě kwâr nzǒʼ»,

¹¹a lə̌i nkwár nzǒʼ, koo a kə̂ mbóu nzôʼ cǒ ŋuu ndeʼe; tə ncʉ́ʼ yə́rə́, gháp ndə̌u ye myaghʼ sǎʼ, a pə̂ʉ ncə́r yé. Koo ŋuu mbiŋə zûŋ ngwě ye.

¹²Ə́ ngwǒ lə́ pəcó pye, mə́i yo kâa pə́ tsâr Nde, yo ndʉʉ tsâr ghâa, ə́ mbə́ ngô: ŋuu lə̌i mbə́ ŋuu Kəlísto, ə́ ngwǒ məngyě yi kâa pə̂ yé ŋuu Kəlísto, lə́ ə́ mbə́i ńgó gháp zʉ́ nyáŋ, koo a zûŋ yé yé.

¹³Məngyě póu mbə́ ŋuu Kəlísto, ə́ ngwǒ ndə̌u ye yi káa a pə̂ yé ŋuu Kəlísto, lə́ ə́ mbə́i ńgó gháp zʉ́ nyáŋ, koo a kwar yé nzǒʼ.

¹⁴Ńté ńgó məngyě yi káa a pə̂ yé ŋuu Kəlísto lâghʼ ghíʼ a lǎr mbəʉ yé lə̂ ndə̌u ye yi a pə̌ ŋuu Kəlísto, ə́ mbə́ mbəʉ Sê. Ə́ ngwǒ lə́ ŋuu mbiŋə yi káa a pə̂ yé ŋuu Kəlísto, a lâghʼ ghíʼ ngwě ye pə̌ ŋuu Kəlísto, ə́ mbə́ mbəʉ Sê. Ə́ tə́i ndə̌iʼ pə́ yə́rə́ po, mə́i káa ghəpə́ záp pə̂ gháp mbəʉ Sê, lə́ gháp pou mbə́ mpfu wo, ə́ mbə́ mbəʉ Sê.

¹⁵Lə́ ŋuu yi káa a pə́ yé ŋuu Kəlísto pə́ fâghʼ mbəʉ ye, pə́ nyêr yé a fâghʼ; ńté ńgó ə́ wo lə́ zêi mbə̂u nzǒʼ, káa có zə̂u yi ə́ nâatə́ gháp zʉ́ pə̂ yé wó. Ə Sê lə yaa fúŋ wághʼə lə̂ nyáŋ pə́ lə̂ mbwórə.

¹⁶Gho məngyě yi o pə̌ ŋuu Kəlísto, o yaa mə́ ndǎghʼ hó ə́ njí ńgó o ghʉ̌ ghʉ̌ tə ndə̂u gho cwór? Gho ŋuu mbiŋə yi o pə̌ ŋuu Kəlísto, o lâghʼ hó njí ńgó o ghʉ̌ ghʉ̌ tə ngwě gho cwór?

¹⁷Ə́ poŋ ńgó wǒwó kə́ mə́ ncî mbî pə́ lə̂ mbə̂u yi Sê lə ŋə́ lə́ zʉ́, ə́ mbou nyáŋ pə́ lə̂ yé lənyǎŋ yi Sê lə ghí fúŋ yé a nyâŋ mə́u. Ə̂ ntǎghʼ yi m mə̌ ŋə̂ cər məndə̂ cûʼtə pye Kəlísto mə́tsəm ńgó gháp ghʉ́ yə́rə́.

¹⁸Sê lə̌i ngí fúŋ ŋuu, mə́i pə́ púʼ mə́ yé ghíʼ pə́ pûʼ pəyúda, koo ngaŋ lâʼ ńgó káa a pə́ lə̂ nou pəyúda; ə́ kə́ mbə́ yi Sê lə ghí fúŋ ŋuu, mə́i pə́ kə́ púʼ yé yə́rə́, koo a lâʼ ńgó pə puʼ yé a cʉ́ʼ ŋuu pəyúda.

¹⁹Ə mbúʼ ŋuu kəʉ ntítə́ púʼ ŋuu kâa pə̂ yé có zə̂u, ə no pə́ pə̂ ŋə̂i lə̂ məntǎghʼ Sê ghíʼ ə́ pə́ ntúŋú.

²⁰Ə́ lə̌i mbə́ yi Sê lə ghí fúŋ ŋuu a nyâŋ lə́ zarə́ mbə̂u, a kə̂ nyáŋ pə́ yə́rə́.

²¹Ə Sê lə ghí fúŋ gho o pə̂ puʼ mo? Ə́ nkə́ mbə́ yi o kə pə́ puʼ, koo o pûʼ mbəʉ zô ńté yə́rə́; lə́ ə́ nkə́ mbə́ yi saa kwar tə o cʉ̂ʼ fou-ndʉʉ, o zʉ̂ pəi zěi[3].

²²Ńté no ŋuu yi Nde ghí fúŋ yé a pə̂ puʼ, a kwâr ndə̂ puʼ no tə́poŋ, ə́ ncʉ́ʼ fou-ndʉʉ, ə́ ndaghʼ ḿbə̂ ŋuu Kəlísto. Fou-ndʉʉ yi Kəlísto fǔŋ yé cʉ̂ʼ yé puʼ Kəlísto.

²³Ə Sê lə laghʼ zə̂u lətəi-ndwuŋ ńtsǔʼ wéi ndə̂ puʼ, ə́ ngʉ̌ pei cʉ̂ʼ pəfou-ndʉʉ. Koo pei cʉ̂ʼ məpuʼ pye-mə́soŋ.

²⁴Pəfə̌r pâa, wǒwó pə́ mbi Sê ə́ nkə́ mbə́ pə́ ghíʼ Sê lə ghí fúŋ yé a pə̂.

²⁵Ə́ wo lə̂ no yi ə́ náŋtə́ pye pi gháp kə́ zóʼ, mə́i káa n ngwô ghâa no yi ə́ fú mbó Nde lə̂ ndáʼ wéi, n ndaghʼ ghíʼ Sê lə lǎghʼ tsâa-mə́jʉ̂ŋ yé ntsóʼ ghâa, ə́ ndaghʼ ghâa ngʉ̌ ŋuu yi mboʼ a lâʼ no pə́ zûʼ, ə́ ndáʼ ngô:

²⁶«Lə̂ mbə̂u yi ngwôʼ lǎghʼ mbə́ pěi mpfu wo, n njwô zâa ńgó ə́ lə̌i mbə́ yi o kə́ zóʼ, mboŋə́ o nyâŋ gho yə́rə́.

²⁷Ə́ lə̌i mbə́ yi o zoʼ mə́, koo o zûŋ ngwě gho. Ə́ mbə́ yi o kə́ zóʼ, koo o zôʼ ghô.

²⁸Lə́ ə́ mbə́ yi o lə̌i nzóʼ, ə́ pə̂ yé no tə́poŋ po. Môu-ngwəngou póu nzóʼ, ə́ pə̂ yé no tə́poŋ po. Lə́ pei jí ńgó pei wo lěi tə zóʼ, ə́ pə́ cər ngwôʼ leʼé tsəm, n ntsâa zâa pə́ ńgó koo pei kə́u mbə̂u ngwôʼ zei.»

²⁹Pəfə̌r pâa nzəm Kəlísto, m mə̌ ndaʼ wéi ńgó zâʼ nzʉ̂ woghʼ mə́. Lə̂ fú mpfu wo, mbiŋə pi gháp zóʼ mə́ nyáŋ pə́ mpfu ghíʼ gháp kə́ zóʼ.

³⁰Pye pi gháp yǎa mə́ ntsə́rə́ nyáŋ ghíʼ pye pi káa gháp pə́ ntsə́rə gháp; pye pi gháp pə́ ntsěi nyáŋ ghíʼ káa gháp pə́ ntsêi gháp; pye pi gháp zə́u mə́ məzə̂u nyáŋ ghíʼ pye pi məzə̂u mi gháp zə́u lei, káa ə̂ pə̂ yé máp;

³¹ə pye pi gháp pə́ nzʉ̂ pəi cər nzʉ̂ yo, nyáŋ ghíʼ mpfu yi káa gháp pə́ nzʉ̂ gháp. Ńté no nzʉ̂ yo kâa pə̂ yé yi ə láʼ kə́ cí pə̂ pə́ wó.

³²M mə̌ ntsâa ńgó pei nyáŋ tə́ pə́ fʉ̂ có no. Ŋuu yi káa a ghwô yé məngyě tághʼ tû yé pə́ lə̂ məfaʼ Nde, ə́ ndághʼ ńdǒu pə́ lə̂ ngʉ́ zə̂u yi ə́ wo pǒŋ Nde.

³³Lə́, ə́ ngwǒ lə́ ŋuu yi a zoʼ mə́, a tâghʼ tû yé pə́ lə̂ məno nzʉ̂, ə́ ndághʼ ńdôu lə̂ ngʉ́ zə̂u yi ə́ wo poŋə́ ngwě ye;

³⁴ə́ pə̂ yə́rə́, məkwaŋtə mé kâa tə̂ʉ yé lə́ tâʼ no môʼ. Məngyě yi a kə́ zóʼ kəʉ pə́ môu-ngwəngou tâghʼ tû yé pə́ lə̂ məno Nde; ńté ńgó a pə̌ ntsâa lə̂ mbə́ ŋuu Nde lə̂ zə̂u tsəm yi a pə̌ ngʉ̌ mbaa yi a pə̌ nkwǎŋ; lə́, ə́ ngwǒ lə́ məngyě yi a zóʼ mə́, mə́i a tâghʼ tû yé pə́ lə̂ məzə̂u nzʉ̂, ə́ ndághʼ ńdôu lə̂ ngʉ́ zə̂u yi ə́ wo pǒŋ ndə̌u ye.

³⁵N ndaʼ wéi mwo məno gháʼá lə̂ ndághʼ ḿpfútə́ wéi, kâa n ndâʼ pə́ lə̂ ndághʼ ńdə̌ʼ ləkei zéi. M mə̌ tsâa ńgó pei káŋ zə̂u yi ə́ fú mbə̌u lə́ pei, ə́ fú mêʼ mbəʉ zei pə́ lə̂ faʼ Nde.

³⁶Môu-ngwəsəu lə̌i ntúŋú no tû ngwě yé, no yé pə́ tû zʉ́ gháʼate, a pə́ mbôghʼ ńgó pə́ wo cí ndə̂ ntʉ̂ŋtə məno tû mé ghíʼ ə́ pə́ ntúŋu, a ghʉ̂ có no yi kâa yáa mə́ ntúŋu ńgó a ghʉ́ zěi, ə́ ncʉ́ʼ yə́rə́, a ghʉ̂ ghíʼ a kǒŋ. A lə̌i ngʉ́ yə́rə́, mə́i káa a ghʉ̂ yé có no tə́poŋ.

³⁷Lə́, môu-ngwəsəu lə̌i nyáŋ tə nkwâŋ cər ntə̂ʉ zʉ́ ńgó a wo zôʼ yé po, lə́u kə́ ghʉ yé zə̂u yi kâa pə́ ntúŋu yé lə̂ ngʉ́ lə́ môu-məngyě po, a lə̌i nkwâŋ yə́rə́ cər ntə̂ʉ zʉ́ tə́ ghó pə́ ŋə́ʼtə́ yé ŋəʼtə́, ə́ ngwotə́ mbəʉ ye, mə́i a ghʉ̂ shʉʼʉ ghíʼ káa a zôʼ yé məngyě lêi.

³⁸Ə́ pə̂ yə́rə́, ŋuu yi a zǒʼ məngyě ghʉ ə́ poŋ; lə́ ŋuu yi káa a zôʼ ye məngyě ghʉ ə́ poŋ ńdêi.

³⁹Məngyě yi a zoʼ mə́ ghwo lə̂ nkə́ mbə́ pə́ mbó ndə̌u yé mpfu yi a pyěr wó. Ndə̌u ye póu nkwʉ́, a zôʼ ŋuu yi a kǒŋ, lə́ ngaŋ ghwô lə̂ nkə́ mbə́ pə́ ŋuu Kəlísto.

⁴⁰Lə́, n nkwaŋ zâa ńgó a lə̌i nyáŋ tə́ kə́ ncí nzóʼ, mə́i a ghʉ̂ shʉʼʉ. M mbou nkə́ nkwâŋ zâa ńgó Zəghʼə Sê pə́ lə́ məŋ zâa lə́wó.