Read Ngombale 1 Korêŋtə 8 Bible Online

1 Korêŋtə 8 - Ngombale bible

1 Korêŋtə 8

¹Ə́ wo lə̂ no mbap[4] yi pə́ lǎghʼ mǎʼ məsê, paghʼə pə́tsəm pə́ njî no mə́u ghíʼ pei lâʼ lêi. Lə́ jîno yi paghʼə ghwǒ lə̂ mbap zêi ghʉ paghʼə cʉ̂ʼ ŋâʼtə ŋaʼtə́, ə́ muŋú ńgó nkoŋə yi paghʼə ghwô təcər pəfə̌r lə́ kʉʼʉ pə̂i-ntə̂ʉ zághʼə nzəm Sê.

²Ŋuu lə̌i mə́ nkwâŋ ńgó a pə̌ njî có zə̂u, mə́i a kə́ tsúŋú njî yé tə ə́ kuʼ ghíʼ ə́ yǎa mə́ ntúŋu ńgó a jí.

³Lə́ ŋuu yi a pə̌ nkoŋ Sê, Sê fú mə́ mə́ njî yé.

⁴Ə no yi pə́ lou lə̂ njí pə́ ngô: paghʼə yaa ngwǒ lə̂ mpfár mbap yi pə́ lǎghʼ mǎʼ məsê mo? Paghʼə pə̌ njî ńgó məzə̂u mêi kâa pə̂ yé có zə̂u cər nzʉ̂ yaʼa, Sê pə̌ pə́ tâʼ môʼ.

⁵Tə mbaa ghíʼ məcó məzə̂u pə́ ləfaŋ mbaa ndəu ndesé pəcó pye pə̂ ndâʼ ńgó ə̂ məsê, ə́ leitə yə́rə́ gháp laʼ ńgó «məsê» zâa, «pənde» kə̂ nzáa pə́ yə́rə́.

⁶Ə́ ngwǒ lə́ paghʼə, paghʼə pə̂ njî ńgó Sê pə̂ pə́ tâʼ môʼ, ə́ mbə́ Tə́ waghʼə yi zə̂u tsəm fû pə́ mbó zʉ́, paghʼə pə̂ pye pé. Ə Nde kə̂ mbə́ pə́ tâʼ môʼ, ə́ mbə́ Yěso Kəlísto yi zə̂u tsəm ghí pə́ wó, zʉ́ lə́ ghʉ ə́ poŋə́ pə́ wó, paghʼə pôu ncî mbî ə́ ndwúʼu pə́ yé.

⁷Lə́ kâa ŋuu ntsəm təcər paghʼə fú mə́ njî yé ńgó məsê mêi kâa pə̂ yé məsê lə́nə́ʉ. Ə ndǐ kə́ sâghʼ ghíʼ pəcó pye təcər paghʼə lə pə́ ngwô lə̂ məyʉʼ mi pə́ ghûʼtə məzə̂u ə́ fûŋ ńgó məsê lêi. Ə́ pə̂ yə́rə́, gháp lei tə mə́ mpfâr mbap yi pə́ lǎghʼ ńgúʼtə́ məzə̂u mêi, ə́ pə̂ mbó páp, gháp pə̂ njî záp ńgó pə́ ŋə́ mbó kwaʼ məsê, məkwaŋtə máp feʼ gháp, ntə̂ʉ gháp yi ə́ pyér mbwôr pworə́ zûʼ mə́i ə́ khwor mə́ ncǔ.

⁸Məzʉ̂ kâa pə̂ yé zə̂u yi ə́ ghʉ Sê kʉ́ʼʉ nkôŋ wághʼə. Paghʼə lə̌i nzʉ́ měi, paghʼə zʉ̂ waghʼə có pəi po, ə́ ndə̌iʼ zʉ́ po, paghʼə cwî waghʼə có zə̂u po.

⁹Mboʼ pei ghʉ̂ zə̂u tsəm yi pei kǒŋ. Lə́ pei páa lə́ pə́ yi mboʼ zə̂u yi pei ghʉ̂ zěi, ə́ pə̂ yi pye pi pə̂i-ntə̂ʉ záp pyér mbwór wo kotə́ mə́u ə́ pfúŋ cər nkwaʼtə.

¹⁰Ńté no ŋuu yi pə̂i-ntə̂ʉ yé pyér mbwór lə̌i njwó gho yi o ghwǒ jîno, o nyáŋ cər ndə̂ məzə̂u mi pə́ ghûʼtə fûŋ ńgó məsê ə́ mə́ mpfâr zə̂u, mə́i ə́ wo títə́ cʉ́ŋə́ yé a pfâr yé lə́wó?

¹¹Ə̂ lêi yə́rə́, tâʼ fə̌r yi Yěso lə kwʉ́ ńté tû yé lêitə́ lə̂ zə̂u yi o pə̌ njî zěi, ə́ nkə́u cwí.

¹²Pei lə̌i ngʉ́ mbə̂u no tə́poŋ zêi lə́ pəfə̌r pei pi pə̂i-ntə̂ʉ záp pyér mbwór ə́ ndaghʼ ńgaghʼə́ gháp cər məntə̂ʉ máp mi ə́ pyér mbwôr pworə́, mə́i pei ghʉ gháʼá pə́ lə́ Kəlísto.

¹³Ə̂ zə̂u yi ə́ ghʉ̌, ə́ lə̌i mbə́ yi məzʉ̂ mi məŋ nzʉ̌ wo ghʉ̌ fə̌r ghâa pfúŋ cər nkwaʼtə, n ndâʼ nkə́ mpfâr ghâa mbap yi pə́ lǎghʼ ḿmǎʼ məsê po, ə́ mbóghʼ lə̂ ngʉ́ fə̌r ghâa cwî pə̂i-ntə̂ʉ yé ńté ghâa.