Read Ngombale 1 Korêŋtə 9 Bible Online

1 Korêŋtə 9 - Ngombale bible

1 Korêŋtə 9

¹Ə́ njí ńgó mboʼ n ngʉ̂ ghâa ghíʼ n nkǒŋ po pé? Ə́ njí ńgó kâa m mbə́ ngaŋə-ntə̂u Yěso pé? Ə́ njí ńgó kâa n ndə jwô ghâa zâa Nde waghʼə Yěso pé? Pei lə ghí jí ŋuu yi Nde pə̌ zʉ́, káa fú pə́ lə̂ faʼ yi n ndə fǎʼ zěi mbó zʉ́ mo?

²Pəcó pye lə̌i mə́ ndâʼ ńgó káa məŋ mbə́ ngaŋə-ntə̂u Yěso, mə́i mə̂ŋ wěi mbó pei. Pei lar mbəʉ lə́ Nde gháʼá, ə́ pə̂ ləiʼi yi ə́ nyárə ńgó mə̂ŋ ngaŋə-ntə̂u Yěso.

³Yo mbə̂u yi n ndaghʼ ńzôŋ tû zâa mbó pye pi gháp tô məlǒʼ lə̂ zâa mbə̂u yi ndaghʼ ńfâʼ.

⁴Ə́ njí ńgó káa paghʼ ghwô wághʼ lə̂ pfú zə̂u ńzʉ́ ə́ mbǒu ńnó ńté faʼ zághʼ pé?

⁵Ə́ njí ńgó káa paghʼ ghwô wághʼ lə̂ ngí pə́ ŋə̌i ə́ ncóghʼ cǒ məngyě yi a pə̌ ŋuu Kəlísto nzəm paghʼ â pə́ ngwě wághʼ ghíʼ pəcó pəghaŋə-ntə̂u, mbaa pəfə̌r Nde, lə́ Sefásʉ ghʉ pé?

⁶Kəʉ ə́ pə́ ńgó paghʼ Pənə́páasʉ lə́ pə́ pye pi gháp ghwǒ lə̂ fâʼ mboŋə́ zʉ́?

⁷Pei lə mə́ njwó ghó ghíʼ sóghəi pə̌ tyer ntso, ə́ shə́rə nzʉ̂ pə́ paa zʉ́? Pei lə mə́ njwó ŋuu pî tʉ̌ ə́ zə̂m, a títə́ zʉ́ məntǎa měi mo? Tə mboʼ ŋuu pə̂ nzághʼə mbuŋu mənye ə́ ntítə́ kéi mə́lə̂ghʼ lə̂ mbə̂ʉ máp ə́ nó mo?

⁸Lə́ kâa m mbyê ghâa fəiʼ pə̂ ndaʼ lə̂ məno mi ə́ leitə təcər pye-mə́soŋ, ńté ńgó ləpə̌ʉ Mə̌usə̂i kə́ mə́ ndâʼ yé pə́ yə́rə́.

⁹Ńté no ləpə̌ʉ Mə̌usə̂i pə́ ndaʼ ngô: «Koo pei pə̂ ndâghʼ foŋ mbə̂uʼ ngəsâŋ-ncʉ̂ŋ, ə́ ncóghʼ kə̂ʉ ntsʉ zʉ́.» Pei kwaŋ ńgó Sê lə laʼ yə́rə́ ə́ ndaghʼ ńtsâa pə̂ məjʉ̂ŋ məfoŋ mo?

¹⁰Káa a lə lâʼ yé yə́rə́ ńtê pə́ wághʼə mo? Kwaʼ lə́nə́ʉ pə́ lə ŋwáʼa yo tsâr ńté pə́ wághʼə. Ŋuu yi a jʉ̂ʼ nye gháp ŋuu yi a pyê məzʉ̂ ńŋə̂ ndə̂ ghí pə́ fǎʼ, ə́ mə́ njî ńgó gháp wo ghwo záp zə̂u lə̂ zə̂u yi ə́ kwǎr nkâʼ.

¹¹Paghʼ lə pi mbî zə̂u yi ə́ fǔ mbó Sê təcər pei, paghʼ lə̌i mbóu ngáʼá ə́ ngwǒ lə̂ məzə̂u méi, ə́ ngwǒ məcó ghíʼ zə̂u yi paghʼ lâghʼ ńkwâr nkâʼ ə́ pə̂ ńgó paghʼ fǔ nzʉ́ pəi zéi gháʼate áa?

¹²Məzə̂u mi pye pfûtə mbó pei, káa paghʼ lə̂ yáa ngwǒ lə̂ mpfú měi mo? Lə́ paghʼ kə́ pfû wághʼ zə̂u mbó pei. Paghʼ pə̌ shə̌ghʼ, ə́ mbóghʼ lə̂ ngʉ́ zə̂u yi ə́ wo kə́ʼtə́ pye lə̂ nzúʼ Nkəʉ Shʉʼʉ Kəlísto.

¹³Káa pei pə́ njî ńgó məzʉ̂ pye pi gháp faʼ məndə̂ Sê fû pə́ məndə̂ Sê mo? Káa pə́ jî ńgó pənuŋú-poʼ Sê ghwô záp zə̂u lə̂ zə̂u yi gháp nuŋu lənuŋú poʼ Sê mo?

¹⁴Ə́ kə́ mbə́ ndʉŋ-ndʉŋ ghíʼ Nde lə tsuŋtə́ ńgó məzʉ̂ pye pi gháp tsətə Nkəʉ Shʉʼʉ kə́ nkwár pə́ lə̂ faʼ ntsə́tə́ Nkəʉ Shʉʼʉ.

¹⁵Lə́ ə́ ngwǒ lə́ məŋ, mə́i n ndə ghwo lə̂ ntúŋú zə̂u mbó pei, lə́ n ndaa kə́ túŋu ghâa có. Lə́ kâa n nkə́ mbóu ŋwáʼa wo ŋwaʼa gháʼa lə̂ ndághʼ ndǎʼ ńgó pei jí lə̂ ŋə́. Ə́ lə̌i ncʉ́ʼ yi ŋuu ghʉ́, n nyér zâa zə̂u yi ndaghʼ ńtsêi, ə́ ncʉ́ʼ yə́rə́ n nkwʉ̂.

¹⁶Ə́ pə́ mbó məŋ, ə ntsə́tə́ Nkəʉ Shʉʼʉ kâa pə̂ yé có zə̂u yi n ngwǒ lə̂ ndághʼ ńŋáʼtə́. Ńté no ə̂ faʼ yi n ngwǒ lə̂ fâʼ. N ndə̌i ndə́iʼ tsətə́ Nkəʉ Shʉʼʉ po, mə́i n khwor gháʼá ndou.

¹⁷Ə́ tə́i mbə́ faʼ yi n ndə túŋú pə́ məŋ lə̂ fâʼ, mə́i n ngwo lə̂ pfú məntsoʼó-faʼ mâa. Lə́ ghíʼ cǒ lə́ghʉ yi ndeʼe kâa kə́ mbə̂ yé wó lə̂, ə́ pə́ mbó məŋ, ə́ mbə́ pyeʼ yi ə́ tə́ʉ tû məŋ, n ngwô lə̂ mbyêʼ.

¹⁸Məntsoʼó-faʼ mâa hó? Ə̂ ntsə́tə́ Nkəʉ Shʉʼʉ tə́ pfû zə̂u. N ntsətə pə́ tə pfǔ zə̂u yi ə́ yǎa mə́ ntúŋu ńgó m mpfú.

¹⁹Cǒ wei kə́ ŋə̂ʼtə yé ghâa ńgó n ngʉ́ có zə̂u. N nkə nkoŋ pə́ məŋ ə́ mbə́i puʼ ŋuu ntsəm lə̂ ngʉ́ pye tə nzáa cʉ́ʼ pye Kəlísto.

²⁰Ə́ pə̂ mpfu yi m mə̌ faʼ təcər pəyúda, n nyâŋ ghíʼ ŋuu pəyúda, ə́ ndághʼ ńdôu lə̂ ngʉ́ gháp cʉ̂ʼ pye Kəlísto. N ndei tə nkə́u təcər pye pi gháp pə́ ŋəi lə̂ ləpə̌ʉ Mə̌usə̂i, ə́ nkə́ ngʉ̂ zâa ghíʼ ŋuu yi a ŋəi lə̂ ləpə̌ʉ Mə̌usə̂i, ə́ njí ńgó n ndei mə́u, ə́ ngʉ̌ gháp cʉ̂ʼ pye Kəlísto. Ə́ nyáŋ yə́rə́, lə́ káa pə̂ yé ńgó ləpə̌ʉ Mə̌usə̂i lə́ ghwǒ ghâa.

²¹Ə́ pə̂ mpfu yi m mə̌ faʼ təcər pye pi káa gháp pə́ ŋə̂i gháp ghíʼ ləpə̌ʉ Mə̌usə̂i pə́ ntúŋú, n nyâŋ zâa ghíʼ páp, lə̂ ndághʼ ndǒu ńgó pye pi káa gháp pə́ ŋə̂i ghíʼ ləpə̌ʉ Mə̌usə̂i pə́ ntúŋú cʉ́ʼ pye Kəlísto. Lə́ káa ə̂ pə́ ndághʼ ńdaʼ yé ńgó kâa m mə́ ŋə̂i ghâa ghíʼ ləpə̌ʉ Sê pə́ ntúŋú, n nkə̌ mə́ ŋə̂i pə́ ghíʼ zěi pə́ ntúŋú, ńté ńgó m mə̌ ŋəi lə̂ ləpə̌ʉ Kəlísto.

²²Ə́ pə̂ mpfu yi m mə̌ faʼ təcər pye pi pə̂i-ntə̂ʉ záp pwôr, n ngʉ̂ ghíʼ mpfu yi pə̂i-ntə̂ʉ zâa pwôr, ə́ ngʉ yə́rə́ ndághʼ ńdǒu məsʉ̂ lə́ pə́ yi pye pi pə̂i-ntə̂ʉ záp pwôr cʉ́ʼ kwaʼ pye Kəlísto. Ŋuu lə̌i mbə́ pə́ gháʼá, n ndû lə̂ nyáŋ ghíʼ zʉ́, lə̂ ndághʼ ńgʉ̌ ńgó có ntâʼ pye cwór.

²³N ngʉ mwo məfaʼ mə́tsəm, ə́ ndaghʼ ńdôu ńgó Nkəʉ Shʉʼʉ sâr yʉʼ tsəm, mbaa ndághʼ ńdou lə̂ ngwô mâa məzə̂u shʉʼʉ mi ə́ fû lə̂ Nkəʉ Shʉʼʉ.

²⁴Pei pə̌ ntsuŋu njî ńgó ə́ pə́ yʉʼ yi pəkhʉ̌-mə́ndʉ pə́ wó, ŋuu ntsəm pə̂ nkhʉ́, lə́ tâʼ ŋuu lə́ páp lə̂ pfû zə̂u yi pə́ tsuŋtə́ lə̂ ŋə́ lə́ ŋuu yi a zʉ̌. Ghíʼ ə́ kə́ mbə́ lə̂, pei khʉ́ lə̂ mbə̂u yi pei wo zʉ́.

²⁵Pəkhʉ̌-mə́ndʉ ghí pə́ tsuŋtə mbəʉ záp lə̂ ngwó nkhʉ̌ məndʉ, ə́ ndə̌ʼ məzə̂u tə nzáa, ə́ njí mbə̂u yi gháp lǎghʼ ghwǒ mbəʉ záp. Ə́ ngʉ yə́rə́, ə́ mə́ ndôu lə̂ ngwô nkaghʼə yi pə́ sô tû ŋuu yi a zʉ̌[5], lə́ kâa nkaghʼə zêi pə́ cî yé, paghʼə ghʉ zághʼə yə́rə́ lə̂ ndághʼ ḿpfú nkaghʼə yi ə táa cí pə̂ pə́ wó.

²⁶Ə̂ zə̂u yi ə́ ghʉ̌, m mə̌ nkhʉ ndʉ, káa mei ghâa měi khʉ̌; n ngí pə́ khʉ̌, nyôghʼ mâa tə̂ʉ lə̂ zə̂u yi məŋ ndʉŋ zěi. M mbə́ ghíʼ ŋuu yi a tə́mə nkor, ə́ yi káa a pə́ mâʼ yé pô ə̂ lêi fe.

²⁷M mə̌ ngwotə mbəʉ zâa gháʼate, ə́ ngʉ̌ ə zûʼ mbó məŋ ghíʼ puʼ, ə́ mbóghʼ lə́ pə yi mboʼ n ntsə̂tə Nkəʉ Shʉʼʉ lə́ pye, pə́ táa ngí kə́u cər Ləfou Sê, ə́ mbeʼé ghâa ńtághʼ pěi.