Read Ngombale 2 Korêŋtə 1 Bible Online

2 Korêŋtə 1 - Ngombale bible

2 Korêŋtə 1

¹Məŋ Pôl yi Sê lə kǒŋ ńgó m mbə́ ngaŋə-ntə̂u Yěso Kəlísto, paghʼ fə̌r wághʼə Timotêi ŋwaʼá ŋwaʼa wo, ə́ ŋə́ lə̂ cûʼtə pye Sê yi ə́ pə́ túsoŋ Korêŋtə, mbaa lə́ pəpə́i no Sê pə́tsəm pi gháp pə́ lə̂ sʉ̂ Akayî.

²Ńgó Tə́ waghʼə Sê gháp Nde waghʼə Yěso Kəlísto ghwô poŋə-ntə̂ʉ yi tə́ ndaghʼə nzəm pei, ə́ ncóghʼ mə́shwítə məntə̂ʉ pei.

³Ə́ poŋ ńgó paghʼə pə́ ngúʼtə Sê, ə́ zʉ́ yi a pə̌ Tə́ pə Nde waghʼə Yěso Kəlísto, ə́ mbə́ Tə́ yi a pə̌ ngaŋə-tsâa-mə́jʉ̂ŋ, ə́ mbou mbə́ Sê yi a zaghʼ nci nyôghʼ wághʼə lə̂ məno mə́tsəm.

⁴Ə́ zʉ́ yi a zaghʼ nci nyôghʼ wághʼə ə́ mpfu tsəm yi paghʼə pə̌ ngeʼtə́, ńjí ńgó ə́ lei lə̂ mbə̂u yi a laghʼ ńzâghʼ nci nyôghʼ wághʼə, paghʼə kûʼ zághʼə lə̂ nzâghʼ nci nyôghʼ pye pi məno mbə̂u lə̂ mbə̂u pə́ ncə̂r gháp; ə́ ngí pə́ zaghʼ nci nyôghʼ gháp yə́rə́, ə́ nzǎghʼ lə̂ mbə̂u yi Sê lə lǎghʼ ńzâghʼ wághʼə nci nyôghʼ lə́wó.

⁵Ə́ ndʉŋ-ndʉŋ ghíʼ paghʼə pə Kəlísto pə́ nǎa njwô ngwôʼ gháʼate lə̂, ə́ kə́ mbə́ pə́ yə́rə́ ghíʼ Sê wo leitə́ lə́ zʉ́, ə́ zǎghʼ nci nyôghʼ wághʼə gháʼate.

⁶Paghʼ lə̌i mə́ njwô ngwôʼ, mə́i pei wo zʉ́ pəi zěi, ə Sê lêitə́ mə́u, ə́ nzǎghʼ nci nyôghʼ wéi, ə́ ghʉ̌ pei ghwô ləcwôr. Sê lə̌i nzâghʼ nci nyôghʼ wághʼ, mə́i a zaghʼ gháʼá wéi, ə́ ghʉ̌ yə́rə́, pei kûʼ lə̂ shə̂ghʼ mbə̂u ngwôʼ yi paghʼ zághʼ pə́ shəghʼ zěi ə́ mpfu yi ə pə̌ kə̂u wághʼ.

⁷Ə kwaŋtə shʉʼʉ yi paghʼ ghwǒ nzəm pei, ə̂ yi tə́ kə̂p, ńté no paghʼ tsuŋu mə́ njî ńgó ə mbə̂u yi pei laghʼ ńjwô zéi ngwôʼ lə́wó, ə Sê pə̌ nzaghʼ nci nyôghʼ wéi zéi lə́wó ghíʼ a zaghʼ wághʼ.

⁸Pəfə̌r, paghʼ pə̌ nkoŋ ńgó pei jí ngwôʼ yi paghʼ kə jwó zěi cər paghʼə-ngoŋ Azî. Paghʼ kə jwô ngwôʼ wó jwǒ tə ə́ lei mətəʉ mághʼ. Tə káa jî wághʼ ńgó mboʼ paghʼ ghi fú wó ə́ mbyér ntəʉ.

⁹Lə́ paghʼ lə pə́ njî ńgó pə́ tághʼ mə́ ńgó pə́ wo jwí wághʼ, ə́ pə̂ yə́rə́ káa paghʼ kə́ ngwô wághʼ có kwaŋtə lə̂ nzôŋ tû zághʼ pə́ paghʼ, ə́ ncʉ́ʼ nyér no pághʼ tsəm pə́ mbó Sê yi a ghʉ pəpfû zʉ̂ʉ lə̂ ləwʉ̂.

¹⁰Zʉ́ yi a lə kwárə́ wághʼ ntsʉ mbə̂u ləwʉ̂ zêi, a ghʉ̌ kə́ cí kwárə́ wághʼ lə̂ məcó məngaghʼə mi ndeʼe. Ə̂ŋ paghʼ fǔ mə́ njî ńgó a ghʉ̌ kə́ cí kwarə́ wághʼ,

¹¹ə́ ghǐ kwarə́ wághʼ, zéi pô pə́ mə́u, ńté no pei zéi pə́ sʉ̂ʉtə Sê tû paghʼ. Ə̂ pə́ yə́rə́, Sê zúʼ məsʉ̂ʉtə mi pye tə nzáa ghʉ̌ ńté wághʼ; ə́ ŋə́ zə̂u yi a lə ghʉ̌ ndaʼá mə́u lə̂ ngʉ́ ŋə́ lə́ paghʼ, ə́ zǎghʼ nci nyôghʼ wághʼ, pye tə nzáa leitə́ mə́u, ə́ ŋə́ nkhwo lə́ zʉ́ ńté tû zághʼ.

¹²Ə́ wo lə́ waghʼ lənyâŋ təcər pye-mə́soŋ, mə́i zághʼ zə̂u yi ə́ ghʉ paghʼ ghwô lətsei, ə́ pə́ ńgó paghʼ pə̌ ngʉ pə̂ zə̂u yi ə́ fû mbó Sê. Káa paghʼ pə́ fútə wághʼ cǒ ŋuu, paghʼ laghʼ pə̂ ntə̂ʉ lěi, ə́ ndâʼ no lə́ pye-mə́soŋ; ə́ pə̂ yə́rə́, paghʼ ghi nyáŋ, lə́u kwaŋtə zághʼ pə̂ fêʼ yé wághʼ po; ə̂ ghíʼ paghʼ lə fǎʼ təcər pei, ə́ ngǐ pə́ fǎʼ, ə jîno yi paghʼ kə laghʼ fâʼ pə̂ pə́ yi Sê, káa pə́ yé yi pye-mə́soŋ.

¹³Ə̂ zə̂u yi ə́ ghʉ̌, káa paghʼ pə́ ŋwáʼa wághʼ có no yi ndeʼe ńŋə́ lə́ pei, tə ndyéʼ yi pei pə̌ fúŋ, ə́ mbou mə́ nzúʼ lo. N nkwaŋ ńgó pei wo fú zúʼ tə wǒ lyəghʼtə́,

¹⁴ńté no pei lə fú ntû wó, ə́ njǐ lə̂ nzúʼ mbə̂u ŋuu yi m mbə̌ wěi; ə́ táa pə́ leʼé yi Yěso wo pə̌ʉ tó, n ngí pə́ mbó pei, ə́ pə̂ zéi zə̂u lətsei, pei kə́ mbə̂ zâa lə́wó.

¹⁵N ndə pə́ njî ńgó ə́ ghʉ̌ pə́ pə́ yə́rə́, ə̂ zə̂u yi ə́ lə ghʉ̌, n ngwô kwaŋtə lə̂ ntsə̌mbi ntó lâʼ pei, ə́ ngʉ nkə́ ncí ntó, ńjí ńgó n ngʉ pei tsêi mpfu pwô.

¹⁶Ə́ lə pə́ yə́rə́ m mə̂ ndôu lə̂ mə́ ndə́r lə́ Masedwânə, ə́ nkə́u ńtə́ʉ lâʼ pei, ə́ ngʉ mə́ nkwó ə́ nkə́ ncí ntə́ʉ. N ndə ghíʼi ngʉ́ yə́rə́, mə́i pei lə tóutə́ ghâa lə̂ ləŋəi ghâa ndə̂u Yudêi.

¹⁷Pei kwaŋ ńgó n ndə ghí kwǎŋ no zêi yo, ə́ nkwǎŋ pə́ lə̂ ngwâghʼ áa? Kəʉ pei kwaŋ ńgó jîno zâa pə́ ghíʼ yi pye nzʉ̂ tə ə́ pə̂ yi m mboʼ ndâʼ ńgó n ngwo ghʉ̌ no pə́ məŋ, lə́u mbou n ngʉ̂ ghâa po áa?

¹⁸Ə ngə́! Káa paghʼ kə kə̂p wághʼ có zə̂u lə̂ no yi paghʼ kə jyéʼ wéi zěi. Ə Sê pə̌ nji.

¹⁹Ńté ńgó Yěso Kəlísto Môu Sê yi paghʼ pə Silásʉ lə́ Timotêi lə lǎʼ no yé lâʼ pei, káa a pə́ ndâʼ yé no, ə́ mbóu nkə́p. A lə tó mbə́ pə́ ŋuu yi a laʼ no káa pə́ kə̂p yé.

²⁰Yěso ŋuu yi a ghʉ zə̂u tsəm yi Sê lə ghʉ̌ ndaʼá mə́u lə̂ ngʉ́ ŋə́ lə́ pye pé pəutə. Ə́ pə̂ yə́rə́, paghʼə lâghʼ ləjôghʼ ye ńdâʼ ńgó Ámeŋ[1] lə̂ ndághʼ ńŋə́ ləghûʼ mbó Sê.

²¹Ńté ńgó zʉ́ Sê tû-mbəʉ yé lə́ ŋə́ wághʼə mətəʉ lə̂ ndághʼ ńtsə́ʉ nzəm Yěso Kəlísto. Zʉ́ Sê lə́ lə tsóʼ wághʼə.

²²A lə kə́ ncí ncóghʼ ləiʼi yé lə́ paghʼə, ə́ ncóghʼ Zəghʼə Ndêi-lěi yé məntə̂ʉ paghʼə, ə́ laghʼ mbə̂ nduŋ-mbi zə̂u lə̂ məzə̂u mi a lə ghʉ̌ ndaʼá mə́u lə̂ ngʉ́ ńŋə́ lə́ paghʼə.

²³Káa n ndə kə́ ntô ghâa lâʼ pei Korêŋtə gháʼá, ə́ mbóghʼ lə̂ ntó ə́ ngághʼə́ wéi. Ə Sê pə̌ njí; n ndə̌i ndâʼ gháʼa, n ndaghʼ ńtâŋ məlaa, a jwî ghâa.

²⁴Káa paghʼ pə́ nkôŋ wághʼ pə̂ fárə́ wéi fárə́, pei poŋə́ pə́i no yi pei ghwǒ lə̂ mbə́i, ńté ńgó pei yaa mə́ ngwǒ pə̂i-ntə̂ʉ nzəm Yěso Kəlísto, paghʼ lou pə̂ lə̂ ntóutə́ wéi, lətsei wei kʉʼʉ ńdə̂r lə̂ mbi.