Read Ngombale 2 Korêŋtə 10 Bible Online

2 Korêŋtə 10 - Ngombale bible

2 Korêŋtə 10

¹Məŋ Pôl, n ngwo lǎghʼ ghíʼ Yěso Kəlísto pwórə́ gháʼate ə́ mbou mbə́ ngaŋə poŋə-ntə̂ʉ, ə́ lǎʼ wéi tâʼ no: ə̂ kwaʼ məŋ Pôl wə̂ yi pə́ leʼtə ńgó ə́ pə̂ mpfu yi n ntǒ tə ntə́ʉ təcər pei, n nywôtə nywotə́; ə́ mbou ndə́r tə ntə́ʉ ndǐ təsə, n ndâʼ no tə́ pôghʼ lə̂.

²M mə̌ mbə̂uʼ mbô ŋə́ lə́ pei ńgó koo pei ghʉ lə̂ mbə̂u yi n ngʉ̌ tó lâʼ pei, ə́ sáʼ wéi saʼá; ńté no n ngʉ̌ tó sáʼ pye pi gháp lâʼ ńgó paghʼ ghʉ zághʼ zə̂u tsəm, ə́ ndághʼ ńdôu pə̂ pəi ghíʼ maa wǒwó.

³Kwaʼ lə́nə́ʉ, paghʼ kə̌ mbə̂ zághʼ pə̂ pye-mə́soŋ ghíʼ pəcó, lə́ zaghʼ mbə̂u lə̂ ndághʼ ńdwóʼó, kâa kə́ mbə̂ yé yi pye-mə́soŋ.

⁴Ə́ ngə́, məzə̂u mi paghʼ laghʼ ńdwóʼó, káa pə̂ yé mi pye-mə́soŋ, mətəʉ mi paghʼ laghʼ ńdwóʼó fû pə́ mbó Sê; ńté no paghʼ wo lǎghʼ vǒghʼ zə̂u tsəm yi ə́ pə́ ntə̂i tû mbó Sê. Paghʼ pə̌ mbə̂ghʼ məkwaŋtə mi məlaa,

⁵ə́ mə́ mbə̂ghʼ məzə̂u mə́tsəm mi pye laghʼ ńŋáʼtə́, ə́ ntôʼ pye lə̂ njí no Sê; ə́ mə́ sáʼ təʉ ńkə́pə məkwaŋtə mi pye ghwǒ məntə̂ʉ páp, ə́ ngʉ̌ pêi pə́ pye cʉ̂ʼ nzûʼ pə̂ ntsʉ Kəlísto.

⁶Pei lə̌i ndéi tə fú cʉ́ʼ mə́ nzûʼ pə̂ ndaʼ ntsʉ Kəlísto lə́ maa zə̂u ntsəm, mə́i paghʼ wo tághʼ ngwôʼ tû ŋuu ntsəm yi a pə̌ ntə̂i tû.

⁷Pei wo zéi lə̂ zə̂u tsəm, ə́ náŋtə́ pə̂ nzəm pěi. Lə́ ŋuu lə̌i mə́ ndâʼ ńgó â ŋuu Kəlísto, a tsúŋu nkwáŋə́ tû yé, ə́ njí ńgó paghʼ kə̌ mbə̂ zághʼ pə̂ pye Kəlísto ghíʼ zʉ́.

⁸Ńté no n ndə̌i mbə́i ndǎghʼ mətəʉ mi Nde lə ŋə́ lə́ paghʼ ə́ ŋáʼtə́ tə nzéʼ pə̂ ndaghʼə, ə sə̂ʉ kô ye ghâa po. A lə ŋə́ pə́ lə̂ ndághʼ ńgʉ̌ ńgó cûʼtə zéi nkʉ́ʼʉ́ ńdə̌r lə̂ mbi, káa a lə ŋə̂ yé pə́ ńgó pə́ lághʼ ńsǎŋ zěi.

⁹Káa m mə́ nkôŋ ghâa ŋwáʼá pəŋwaʼa pâa pə́ ghíʼ n ndaghʼ ńgwərə́ wéi wərə́.

¹⁰M mə̌ njî ńgó pəcó pye pə́ ndaʼ ngô: «Pôl ŋwáʼá pəŋwaʼa pé, ə́ sáʼ cər wó gháʼate, ə tsâr yé təi cər wó gháʼate; lə́ ə́ mbou ntó tə ntə́ʉ sê pə́ tû-mbəʉ yé, ə́ nyótə́ nyotə́; no yi a pou ndáʼ kə̂ mbyér ngwô yé ləshəghʼ po.»

¹¹Lə́ ŋuu yi a tsâr yə́rə́ tsúŋú ńjí ńgó paghʼ lə̌i mbə́ ndǐ təsə ə́ mə́ ndâʼ məno cər pəŋwaʼa pághʼ, mə́i paghʼ ghʉ̌ tó tə pə́ mbəʉ pei, ə́ kə́ ghʉ̌ pə̂ məno mi paghʼ lǎʼ cər pəŋwaʼa pághʼ pêi.

¹²Kwaʼ lə́nə́ʉ, mboʼ paghʼ lʉ̂ŋtə wághʼ kəʉ fə̂iʼ mbəʉ zághʼ lə̂ pye pi gháp shərə ndêʼtə pye pi gháp pə́ pěi pə́ páp po. Ghâp məghəghəʉ: gháp pyê pəfəiʼ páp pə́ páp, ə́ ndaghʼ ńfə̂iʼ mbəʉ záp, ə́ mbou ndʉ̂ŋtə mbəʉ záp təcər páp.

¹³Lə́ ngwǒ lə́ paghʼ, mə́i paghʼ wo ŋáʼtə wághʼ tə zéʼ ndaghʼə po; tə ncʉ́ʼ yə́rə́, paghʼ ghí pə́ ŋáʼtə́, ə́ ndǎghʼ pə̂ məyʉʼ mi Sê lə cóghʼ mbó paghʼ ghíʼ paghʼ wo ghwǒ; a lə ghʉ, paghʼ lə̂r tə nkə́u mbaa lâʼ pei.

¹⁴Ə́ tə́i ngáʼá mbə́ yi paghʼ laa kə́ tó lâʼ pei, mə́i paghʼ lə̌i ntó mpfu wo, ə́ pə̂ ńgó paghʼ zêʼ məndaghʼə faʼ mághʼ; ńté no paghʼ lə pə́ pəluŋ-mbi lə̂ ndághʼ Nkəʉ Shʉʼʉ Yěso Kəlísto ńtó lâʼ pei.

¹⁵Ə́ pə̂ yə́rə́, mboʼ paghʼ zêʼ wághʼ məndaghʼə, ə́ ndǎghʼ faʼ pye mə́ndeʼe ńŋáʼtə ńgó ə̂ zághʼ po. Ə́ ncʉ́ʼ yə́rə́, paghʼ ghwô pə̂ nkwaŋtə shʉʼʉ ńgó pə̂i-ntə̂ʉ zéi ghʉ̌ kʉ́ʼʉ́ ghúʼ, ə no paghʼ lə lǎʼ zěi, ə̂ lâr məŋaŋə təcər pei ghíʼ ə́ pə́ ntúŋú.

¹⁶Ə̂ lêi yə́rə́, paghʼ poŋə́ lǎghʼ Nkəʉ Shʉʼʉ fú lə́ pei, ə́ lə̌r lə̂ məcó məlâʼ mi ə́ zéʼ wéi ə́ mbə́ mbi; tə́ lǎghʼ məfaʼ mi pəcó pye fǎʼ lə̂ máp məyʉʼ ńŋáʼtə́.

¹⁷Pə́ yaa mbəi ŋwáʼá cər ŋwaʼa Sê ngô: «Ŋuu lə̌i mə́ nkôŋ ŋáʼtə́, a laghʼ pə̂ zə̂u yi Nde ghʉ̌, ə́ ŋáʼtə́.»

¹⁸Ńté no káa ŋuu yi zʉ́ lə́ leʼtə zə̂u yi a ghʉ zěi, lə̂ pə́ yé ŋuu yi pə́ wo pə́i no yé; lə́ pə́ wo pə́i pə̂ no ŋuu yi Nde lə̂ leʼtə zə̂u yi ngaŋ ghʉ zěi.