Read Ngombale 2 Korêŋtə 11 Bible Online

2 Korêŋtə 11 - Ngombale bible

2 Korêŋtə 11

¹Mboʼ pei shə̂ghʼ məŋ nyêʼ ntsár ghíʼ pə? Ə̂ŋ pei shə̂ghʼ!

²N nkôŋ wéi tə káa kə́ pǒu kôŋ ghâa lə̂ njwó ghíʼ pei pə pəcó pye pi ndeʼe pə́ ntʉ̂ŋtə no, ə́ pə̂ nkoŋə yi fǔ mbó Sê. N ndə pə́i ńgó n ngwo ŋə́ wéi ndə̂ nzǒʼ, ə́ mbó tâʼ ndə̂u moʼ yi a pə̌ Kəlísto. Ə́ mbou mə́ ndôu ngí ŋə́ wéi lə́ zʉ́, pei pə̂ ghíʼ môu məngyě yi a kə́ jî yé no ŋuu mbiŋə lə̂; ə́ mbə́ tə̂ lǒʼ.

³Ə́ ndʉŋ-ndʉŋ ghíʼ nô lə lǎghʼ píʼí fútə́ Êvə a fâa no lə̂, m mə̌ mbóghʼ ńgó mboʼ ŋuu ndeʼe côŋ tû zéi, lə́u pei kə̂ mbyér wéi pye pi gháp ghí pə́ laʼ ńgó gháp jî gháp pə́ ndaʼ Kəlísto, ə́ ndaghʼ ńdâʼ no lə́nə́ʉ po.

⁴Məŋ ndâʼ gháʼa, ńté no m mə̌ njwô ńgó, ŋuu lə̌i ndêi tə ntó ə́ ndâʼ wéi no ńté cǒ Yěso yi ndeʼe, lə́u a pə̂ yé yi paghʼ lə lǎʼ wéi no yé po, pei fátə mbə́i pə́i. Ə́ mbou mə́ njwó, ŋuu tô ndáʼ no ndeʼe ńté Zəghʼə Ndêi-lěi, kəʉ ńté pə̂ Nkəʉ Shʉʼʉ, lə́u ə́ pəutə yé lə̂ məno mi pei lə pyə̌ghʼ mbə́i po, pei pə̂i pə̌i.

⁵Lə́, m mə̌ nkwâŋ ńgó pye pə̂ pi pei fûŋ ghap ńgó «pəghaŋə-ntə̂u Yěso pi jwǐ» lə̂, káa gháp lêi gháp ghâa lə̂ có zə̂u.

⁶Mboʼ ə́ pə̂ no lə́nə́ʉ ńgó m mə̌ tsâr zâa, ə́ mbə́ptə pəptə́, lə́ ə́ mbə́ lə̂ njí no Sê yi məŋ njyêʼ pye zěi, mə́i kâa n ngwô ghâa có lǒʼ. Ə́ pə́ mə́ məmpfu tə nzáa ghíʼ a ŋə̌ saa, paghʼ lâghʼ məmbə̂u tə nzáa, ə́ nyarə́ wéi ńgó paghʼ jî.

⁷N ndə ghí leʼtə́ wéi Nkəʉ Shʉʼʉ yi Sê, káa pfû ghâa có zə̂u mbó pei, n ndə shúʼú mbəʉ zâa mbi pei lə̂ ndághʼ ńŋáʼá wéi ńŋə́ tʉ́. N ndə ghʉ yə́rə́ gháʼá, ə́ pə̂ no tə́poŋ mo?

⁸N ndə pə́ ngʉ̂ faʼ Sê lâʼ pei, ə́ mbə́i məcó məcûʼtə pye Kəlísto lə́ pə̂ ŋə̂ nkâp lə́ məŋ ndághʼ ńtôutə ghâa, n ncʉ̂ʼ nzʉ̂ pə́ pâa páp lə̂ ndághʼ ńfǎʼ mbó pei, tə ə́ pə̂i yi mboʼ pə́ laʼ ńgó n ndə ghʉ gháp cʉ̂ʼ pəpûŋ.

⁹N ndə láʼ ncí lâʼ pei cǐ, ə́ mbə́ tə mə́ mbúŋ, lə́ káa cǒ ŋuu lâʼ wei tôutə yé ghâa. Ńté no pəfə̌r pi gháp lə fú Masedwânə lə tó ŋə́ zə̂u tsəm yi ə́ lə pə́ mbûŋ mbó məŋ. N ndə lə̂ʼ ghâa lə̂ mbə́ pyeʼ yi ə́ tə́ʉ tû pei lə́ maa zə̂u tsəm, lə́ ə́ láʼ pə̂ ghâa pyeʼ yi ə́ tə́ʉ tû cǒ wei có leʼé po.

¹⁰N ndei lə̂ no lə́nə́ʉ Kəlísto yi ə́ pə́ cər ntə̂ʉ məŋ, m mə̂ ndâʼ ngô: n ngwo nyêr ghâa cǒ ŋuu cər paghʼə-ngoŋ Akayî fû yé ntə̂ʉ məŋ ńkwárə́ zə̂u yi n ndaghʼ ńŋáʼtə́ po. Mboʼ n ndâʼ mbə̂ ghâa có leʼé, ə́ mpfû zə̂u mbó cǒ ŋuu wei po.

¹¹Ńté hó n ndâʼ yə́rə́? Tə n ndaʼ yə́rə́ gháʼa, ńté no káa n nkôŋ ghâa no zéi áa? Ə Sê pə̌ ntsuŋú njî ńgó n nkoŋ wéi!

¹²N ndáʼ kə́ ghwo pə̂ cǐ zâa yi n ngwǒ mpfu wo, lə̂ ndághʼ ńzáʼ məku pye pi gháp lou nděi-ntáŋ lə̂ ndághʼ ńŋáʼtə́ ńgó paghʼ pə pǎp naa fâʼ pə́ tâʼ mbə̂u.

¹³Pêi pye káa pə̂ gháp pəghaŋə-ntə̂u Kəlísto. Gháp pə́ pə̂ pəghaŋə-faʼ məfutə́ pi gháp tâŋ məlaa ńgó gháp pəghaŋə-ntə̂u Yěso. Gháp fú mə́ ngʉ̌ tə ə́ pə́ yi pə́ lə̌i njwó gháp, pə́ lâʼ ńgó ghâp pəghaŋə-ntə̂u Kəlísto.

¹⁴Káa ə́ pə̂ yé có no yi mboʼ ə́ kə́ʼə pye kə́ʼə́, ńté no Sə́tə pə̌ nyáŋ tə shə́rə́, ə́ cʉ́ʼ mbə̂ pə́ ghíʼ tâʼ cwôʼ Sê yi a fû yʉʼ yi nkeʼ pə̌ wó.

¹⁵Ə́ yaa káa pə́ kə́ʼə yé pye lə̂ njwó ghíʼ pəghaŋə-faʼ Sə́tə shə́rə tə pə́ ncʉ̂ʼ njwó gháp, ə́ ndǎʼ pə́ ńgó ghâp pəghaŋə-faʼ Sê yi a pə̌ ngaŋə no-lə́nə́ʉ. Lə́, ə́ táa ghǐ lyəghʼtə́, məntsoʼó-faʼ máp pə̂utə́ lə̂ ndǎp-məno gháp.

¹⁶M mə̌ mbyə́ghʼə́ ndâʼ ngô: koo cǒ ŋuu wei kwaŋ ńgó məŋ pə. Ə́ nkə́ nkôŋ pei kwâŋ, ə́ mbə́i ńgó mə̂ŋ pə, ńjí ńgó ə́ lei yə́rə́, n nyéʼ ŋáʼtə́ ghâa.

¹⁷Ghíʼ n ngwǒ lə̂ ŋáʼtə́ lə̂, ə no yi n ngwo ndǎʼ wó mpfu wo, kâa m mə́ ngwô ghâa ntsár wó lə̂ mbə̂u yi Nde pə̌ nkǒŋ; n ngwo fú tsár pə́ ghíʼ pə.

¹⁸Pye tə nzáa ghí pə́ ŋáʼtə́, ə́ ŋáʼtə pə́ lə̂ məzə̂u mi ə́ pə́ mi pye-mə́soŋ, ghíʼ ə́ kə́ mbə́ yə́rə́ lə̂, n ngwo kə́ ŋáʼtə zâa lə́wó.

¹⁹Pei pi pei ghwǒ jîno, pei pə̌ ntôutə məpə!

²⁰Pei pə̌ shə̌ghʼ, ə́ mbə́i pye laghʼ wéi ńgʉ̂ məpuʼ máp; pei lôu pə́ zʉ̂, ə́ njû zə̂u péi tsəm, ə́ ngwâghʼ wéi, ə́ sə̂u pô nyôghʼ pei, pei pə̂i pə̌i.

²¹Ə sə̂ʉ fú mə́ nkô ghâa gháʼate, ghíʼ paghʼ kə púŋ shəghʼ-ntə̂ʉ lə̂ ndághʼ ńdǎʼ wéi no ghíʼ páp. Lə́, ŋuu lə̌i nyéʼ fəiʼ-fəiʼí mə́ ndôu ndághʼ zə̂u ńŋáʼtə́ mbi məŋ, mə́i n ngwo ŋáʼtə́ lěi yé, ə́ tsár ghíʼ pə lə̂.

²²Gháp pə́ ndaʼ ńgó gháp pəyúda mo? Mə̂ŋ zâa cǒ; kəʉ ńgó gháp ghəpə́ Ísə́lahêl mo? Mə̂ŋ zâa cǒ; ə́ ńgó gháp pye ngər-ndə̂ Ábələhâm? Mə́i m mbə̂ zâa cǒ;

²³Kəʉ ńgó ghâp pəghaŋə-faʼ Kəlísto, mə́i n ngwo tsár kwaʼ ghíʼ pə lə̂, ə́ lǎʼ ngô: m mbəi mbə́ ngaŋə-faʼ Kəlísto tə ndéi gháp pə́tsəm. Ə́ lǎʼ yə́rə́, ńté no n ntáŋə mə́ cər faʼ zêi ə́ ndêi gháp; ə́ ndǎghʼ ndwuŋ məku yi n nkə́u mə́ tsâŋ ńděi gháp; ə́ ndǎghʼ ndwuŋ məmpfu mi pə́ sə́u ghâa tə n ntə̂ʉ lə̂ nkwʉ́, ə́ ndêi gháp.

²⁴Ə́ pə́ mə́ məku mə́ntaa ghíʼ pəyúda sə́u ghâa məngwaa ntsap ləpfuʼú lə̂ mə̂m tárə́.

²⁵Pəlóma pou ndághʼ məngwaa ńsə́u ghâa məku mə́ntárə́. Ə́ ndǎghʼ məghǒ ńtsə́r ghâa tâʼ mpfu ə́ ndôu lə̂ njwí ghâa, ə́ pə́ mə́ məku mə́ntárə́ ghíʼ kənyúʼ lǒu lə̂ ndághʼ ghâa ḿməiʼí nci. N njoghʼ mə́ ndəu mə̂i-nci tâʼ ntə̌ʉ-nəu gháp tâʼ lətwûʼ.

²⁶Ə́ wo lə̂ ndwuŋ ləŋəi yi n ndə ŋə̌i, n ndə təi nkwʉ́ cər mənci mi kóʼ tə sâr yʉʼ, ə́ mpfú mbó pətsǒŋ, ə́ mpfúŋ mbó pəfə̌r pâa pəyúda mbaa pi káa gháp pə́ pəyúda; ə́ ngwǒ məngaghʼə cər mətúsoŋ, ə́ ngwǒ məngaghʼə cər pəkoŋə-məkwaʼá; ə́ ngwǒ məngaghʼə cər pəmə̂i-nci, ə́ ngwǒ məngaghʼə təcər pye pi gháp tâŋ məlaa ńgó gháp pəfə̌r nzəm Yěso Kəlísto.

²⁷N ndə ghʉ məfaʼ mi ə́ tə̌i gháʼate, tə nzúʼ ə́ fú nkáa; ə́ pə̂ cǒ mpfu, n ndê pə́ tə lê. Ə nji ghi pə́ zâŋ ghâa, ndě nci pə̂ nzə̂u ghâa, tə ə́ pə̂ cǒ mpfu, n ngwô lə̂ ncʉ́ʼ nyâŋ pə̂ nji ə́ sʉ̂ʉtə Sê. Ə fwôghʼ pə̂ kô ghâa, m mbûŋ ndǐ yi mboʼ m mâʼ.

²⁸Káa məŋ ndâʼ ghâa wéi kwaʼ ntəʉ no, ə zə̂u yi kwaŋtə zâa tə̂ʉ mə́u leʼé tsəm, ə̂ no məcûʼtə pye Kəlísto mi ə́ pə́ yʉʼ tsəm.

²⁹Ŋuu Kəlísto lə̌i mə́ mbwór, n nzûʼ, ə́ shwî ghâa pə́ ghíʼ m mə́ mbwôr zâa lə́wó. Ŋuu Kəlísto pou ncwí pə̂i-ntə̂ʉ yé, n nzûʼ tə́poŋ gháʼate.

³⁰Ə́ lə̌i mbə́ yi mboʼ məŋ ŋâʼtə, mə́i n ngwo lǎghʼ pə́ ləpwôr ghâa ńŋáʼtə́.

³¹Ə Sê yi a pə̌ Tə́ pə Nde Yěso, ə́ zʉ́ Sê yi pə́ ghwǒ lə̂ ngúʼtə́ yé lə̂ mənguʼ mənguʼ pə̌ njî ńgó káa m mə́ ntâŋ ghâa məlaa.

³²Ə́ lə pə́ mpfu yi n ndə pə́ túsoŋ Damásʉ, ngə́mnaa yi a lə zûʼ mbó fou Aretásʉ ghʉ̂, pə́ pə̂ mbâp məntsʉ nkâʼ mə́tsəm lə̂ ngôu ghâa.

³³Lə́ pə́ côghʼ ghâa cər kəkaghʼ, ə́ shóghʼə́ ghâa lə̂ tôghʼ yi ə́ pə́ lə̂ tâa-nkâʼ, ə́ shúʼú ghâa ńŋə́ sê, m mboŋə́ cwór.