Read Ngombale 2 Korêŋtə 12 Bible Online

2 Korêŋtə 12 - Ngombale bible

2 Korêŋtə 12

¹Ə́ pə́ ntúŋu ńgó n nkʉ́ʼʉ́ ŋáʼtə́, m mə̌ njî ńgó ŋâʼtə kâa pôŋ yé. Lə́ n ngwo lǎʼ wéi məno mi Sê ŋěʼ nyôghʼ mâa n njwô ghíʼ ŋuu lê njwo lə̂.

²M mə̌ njî cǒ ŋuu Kəlísto yi Sê lə lǎghʼ yé ńdə́r tə nkə́u tʉ̌-lə́pû[3] tə ə́ pə́ mə́ nguʼ ntsap ləkwo lə̂ ləghə̂m. Lə́ kâa m mə́ njî ghâa ńgó kəʉ a lə kóʼ tə nkə́u tʉ̌-lə́pû lə́nə́ʉ, kəʉ a lə lê pə̂ njwo, mə́i kâa m mə́ njî ghâa, ndaʼ Sê lə̂ pə́ njí.

³Kəʉ ngaŋ lə gháʼa ndághʼ mbap mbəʉ yé ńdə́r, kəʉ a lə laghʼ pə̂ Zəghʼə yé ńdə́r, mə́i káa m mə́ njî ghâa. Ndaʼ Sê lə̂ pə́ njí.

⁴A lə̂r tə nkə́u tʉ̌-lə́pû, ə́ nzúʼ məcó mətsâr, ə́ pə̂ mi mboʼ ŋuu zûʼ yé no yi ə́ laghʼ ńdáʼ po. Ə́ mbou mbə́ mi pə́ tǒʼ ŋuu-məsoŋ ntsəm lə̂ fəiʼí měi.

⁵Mboʼ n ndâghʼ ngaŋ ńŋáʼtə́, lə́ ngwǒ lə́ məŋ mə́i mboʼ n ndaghʼ ghâa tû-mbəʉ zâa ńŋáʼtə́ po, ńté ńgó m mbwǒr tə́sə́ʉ.

⁶N ntə̌i mə́ nkôŋ lə̂ ndághʼ tû-mbəʉ zâa ńŋáʼtə́, mə́i káa n ndághʼ ḿbə̂ ghâa pə, ńté no n ngwo lǎʼ pə̂ no lə́nə́ʉ. Lə́, n ngwo ŋáʼtə ghâa po, ńté no m mə̌ mbôghʼ ńgó mboʼ pye jwô ghâa, ə́ nděi zə̂u yi gháp pə́ njwó n ngʉ̂, tə mbaa yi m mə̌ ndǎʼ.

⁷Mboʼ n ntə̂i ndâghʼ məzə̂u mi Sê lə ŋéʼé nyôghʼ mâa n njwô, ńŋáʼtə́. Lə́ Sê lə jwó yə́rə́, ə́ mbə́i ńgó ngaŋə-ntə̂u Sə́tə nyáŋ ə́ mə́ sə̂u ghâa, ə́ pə́ ghíʼ nzôŋ ndəu məŋ, ə́ nyáŋ mə́ sâptə ghâa, ə́ ndaghʼ ńkə́ʼtə ghâa lə̂ ŋáʼtə́.

⁸Ə̂ mpfu tárə́ ghíʼ n nsʉʉtə́ mə́ Sê ńgó â fú lə́ məŋ, ə́ kwárə́ zêi ngwôʼ,

⁹a pwôr lə́ məŋ ngô: «M mə̌ náŋtə ghô, ə́ mə́ mpfútə ghô, zô kuʼ yə́rə́, ńté no o lei tə mə́ mbwór, ə́ mboŋə́ lǎghʼ ńŋə́ ghâa sʉ̂ ghíʼ mətəʉ mâa wo tsuŋú fǎʼ ndəu gho.» Ə̂ zə̂u yi ə́ ghʉ̌, n nkôŋ lə̂ ndághʼ ghíʼ m mbwór lêi ńŋáʼtə́, ńté ńgó mətəʉ Yěso Kəlísto wo tó pə́ tôutə ghâa.

¹⁰Ə̂ zə̂u yi ə́ ghʉ̌, m mə̂ ntsêi mpfu yi m mə̌ mbwór; ə́ mpfu yi pə́ pə́ nzoutə ghâa, ə́ mpfu yi pə́ pə́ ngaghʼə ghâa, ə́ mpfu yi m mə̌ njwô ngwôʼ ńté Kəlísto, ńté ńgó n ndei tə mə́ mbwór, ə́ pə̂ mpfu yi n nzǔʼ ńgó n ngwo mətəʉ.

¹¹Ə́ yo n ncʉ̌ʼ ntsâr pə́ ghíʼ pə lo, lə́ pei lə̂ kə̂ ngʉ́. Pei lə̂ yǎa ngwǒ lə̂ ndêʼtə́ pye, ghíʼ faʼ zâa pə̂, ńté no m mbə̌ tə káa pə̂ ghâa có zə̂u, lə́ pye pi pei fûŋ gháp ńgó pəghaŋə-ntə̂u pi jwǐ lə̂, kâa gháp lêi gháp ghâa lə̂ có zə̂u.

¹²N ndə pə́ təcər pei, məno cə̂r ghâa gháʼate, lə́ n nkə̂ shə̂ghʼ shəghʼə́, ə́ ngʉ́ pei jwô mənkəʼə-məno, mbaa məndǎa-jwô-mə́no mi ə́ nyárə ńgó məŋ ngaŋə-ntə̂u Yěso Kəlísto.

¹³Ə pəi zâa yi məcó məcûʼtə pye-Kəlísto lə zʉ́ tə káa pei zʉ̂ zéi, ə̂ hó? Kəʉ ə́ pə́ pə́ ghíʼ kâa n ndə pfû ghâa nkâp zei ló? Pei lyə́ghʼə́ lə́ ə́ ŋə́ lə́ məŋ lə!

¹⁴N ntsuŋtə́ mə́ mbəʉ zâa ghíʼ n ngwo kə́ cí tó lâʼ pei mpfu wo, ə̂ lághʼ mbə̂ məku mə́ntárə́. N ngwo tó, lə́ pei tâŋ wéi cǒ cwí ńté ghâa po. N ntô pə́ ndǒu pei, kâa n ntô ndou məzə̂u méi. Ńté no káa ghəpə́ lə̂ ghwô gháp lə̂ ntsáp nkâp, ə́ ndoʼó lə́ pətə́ páp; pətə́ lə́ ghwǒ lə̂ ntsáp nkâp, ə́ ndoʼó lə̂ ghəpə́ záp.

¹⁵Ə́ ngwǒ lə́ məŋ, mə́i n ndə̌i ŋə́ zə̂u pâa tsəm tə mbaa tû zâa ńté wéi, ə́ poŋə́ ghâa poŋə́. Tə mboʼ m mə̂ nkôŋ wéi ndwuŋ wo, zei koŋə nzəm məŋ cʉ̂ʼ lə̂ ndə́r lə̂ mbi, ə́ ncʉ́ʼ cwótə-cwotə́ áa?

¹⁶Pei pə̌ mbə̂i ńgó káa n ndə pə̂ ghâa có pyeʼ ləkwêi péi. Lə́ pəcó pye pə̂ ndâʼ ńgó məŋ ngaŋə-jîno, ńgó n ndə laghʼ jîno ə́ mpfû nkâp zei.

¹⁷Ə̂ zə̂u yi ə́ ghʉ̌, m mə̂ ntúŋu wéi ńgó n ndə tə́u pye lâʼ pei gháʼá, cǒ ghap kə̂u futə́ wéi ə́ mpfû có zə̂u mbó pei ə́ ŋə́ lə́ məŋ mo?

¹⁸N ndə sʉ́ʉtə́ Tîtə, ə́ ntə́u yé lâʼ pei. Ə́ ngʉ̌ gháp tâʼ fə̌r yi pei tsuŋú mə́ njî yé lə̂, ə́ təm ku ŋə̂i. Tîtə lə kə́u fútə́ wéi ə́ mpfû có zə̂u mbó pei mo? Lə́u paghʼ zʉ́ ghwo pə́ tâʼ kwaŋtə péh? Lə́u ə́ nkə́ fâʼ pə́ tâʼ mbə̂u péh?

¹⁹Mboʼ pei kwâŋ ńgó paghʼ ŋwaʼa ndwuŋ mətsâr mwo ə́ ŋə̂ lə́ pei gháʼá ə́ ndaghʼ ńzôŋ pə̂ tû zághʼ mbó pei mo? Ə́ ngə́, koo pei kwâŋ yə́rə́. Paghʼ laʼ ńté ńgó paghʼ pəghaŋə-faʼ Kəlísto; ə́ ngǐ pə́ lǎʼ, Sê pə̂ nzúʼ. Pəsə̌u pághʼ pi lətəi ndwuŋ, paghʼ laʼ wéi yə́rə́, ə́ ndaghʼ ńdôu pə́ ńgó pə̂i-ntə̂ʉ zéi kʉ́ʼʉ́ ngúʼ ńdə́r lə̂ mbi.

²⁰M mə̌ mbôghʼ ńgó mboʼ n ngʉ̂ ntó tə nkə́u lâʼ pei, ə́ njwó pei pə̂ wéi ghíʼ m mə̌ nkoŋ ńgó pei pə́ po, lə́u n nkə̂ mbə̂ ghâa ghíʼ pei pə̌ nkoŋ ńgó m mbə́ po. M mə̌ mbôghʼ ńgó mboʼ n ngʉ̂ ngí ntó məzoŋə gháp pə fúʼ-lóŋ, záŋə-lóŋ gháp pə lʉŋtə, mənzou gháp pə ntáŋ ngə̂u, ləŋâʼtə gháp pə tághʼə́ pə̂ təcər pei.

²¹M mə̌ mbôghʼ ńgó mboʼ n ngʉ̂ ntó tə nkə́u lâʼ pei, Sê zâa shúʼu ndwuŋ ghâa mbi pei; n ncʉ̂ʼ mə́ ngeʼtə́ ńté tû pye pi gháp kə́ mbyér nkʉ́ʼʉ́ ngʉ̂ pə̂ məno tə́poŋ ghíʼ gháp lə yaa ngʉ̂ cǒ mpfu, ə́ ndəʼ gháp lə̂ nkə́p cǐ záp, ə́ nkə́ mə́ ngʉ̂ pə̂ məno sə̂ʉ mbaa məghap, ə́ nkʉʼʉ́ məno tə́poŋ mbə̂u lə̂ mbə̂u mi gháp lə ghʉ měi tə́ ghwotə́ mbəʉ zap.