Read Ngombale 2 Korêŋtə 13 Bible Online

2 Korêŋtə 13 - Ngombale bible

2 Korêŋtə 13

¹N ngwo ntó wó lâʼ pei mpfu wo gháʼá, ə́ lághʼ ḿbə̂ məku mə́ntárə́. N ngwo tó pə ghí fěʼ no tsəm, pye pə́pwô káa pə́tárə́ lâʼ no mə́u, ə́ ndʉŋ-ndʉŋ ghíʼ Ŋwaʼa Sê pə̌ ndǎʼ.

²N ngwo no yi n ngwo lǎʼ lə́ pye pi gháp lə ghʉ̌ no tə́poŋ lə̂ nduŋ-mbi mpfu yi n ndə tó lâʼ pei mbaa lə́ ŋuu tsəm; n ndə yaa ndǎʼ gháp lə̂ mbâatə mpfu pwô ghíʼ n ndə tó lâʼ pei. Lə́ lə̂ mpfu wo yi káa m mbə̂ ghâa təcər pei lo, n ngwo kə́ cí lǎʼ; n ngwo tó tə kə́u lâʼ pei, ə́ pwôtə ghâa cǒ ŋuu po.

³Pei pə̌ ndou njwó ləiʼi yi ə́ nyarə ńgó məno mi məŋ ndâʼ měi, ə́ fú mbó Yěso, pei wo jwó měi. Kəlísto wo lə̂ məno méi, káa pwór; a pə̌ nyarə mətəʉ mé təcər pei.

⁴Ə̂ no lə́nə́ʉ ńgó a lə pwôr mbəʉ ye, pə́ kʉʉ yé lə̂ tʉ̌-mbʉ̂ŋtə; lə́ a pə̂ leʼé wo mbə́ ntəʉ ə́ ndeitə́ lə̂ mətəʉ Sê. Ə́ leitə ghíʼ paghʼ pə pǎp naatə́ ncʉ́ʼ tâʼ ŋuu lə̂, paghʼ kə̂ mbwôr zághʼ lə́wó; lə́ paghʼ wo kə́ laghʼ zaghʼ mbə̂u yi paghʼ laghʼ ńgwô wéi, ə́ nyarə́ wéi ńgó paghʼ pə Kəlísto pə̂ ntəʉ; ə́ pə̂ mətəʉ Sê.

⁵Tû-mbəʉ zéi, pei náŋ məno mi pei ghʉ měi, ə́ njwó ńgó kəʉ pei gháʼa mə́ ŋə̂i ndʉŋ-ndʉŋ lə̂ no Kəlísto yi pei kə pə́i zěi? Ə́ lə̌i ndə́iʼ pə́ yə́rə́ po, ə́ laghʼ ḿbə́ ńgó káa pei pə̂ wéi pye Kəlísto.

⁶Ə́ pə̂ yə́rə́, n nkwâŋ ńgó pei wo pə́i ńgó paghʼ kə faʼ kwaʼ shʉʼʉ.

⁷Paghʼ pə̌ sʉ̂ʉtə Sê ńgó koo a nyêr wéi pei ghʉ̂ có no tə́poŋ; káa m mə́ ndaghʼ ńdôu pə́ lə̂ ngʉ́ pei jwô ńgó pâghʼ ngaŋə-ntə̂u Yěso Kəlísto, paghʼ tsâa pə́ ndaʼ ńgó pei ghʉ̂ məfaʼ shʉʼʉ, tə mbaa pə́ ghíʼ faʼ zághʼ pə́ pə́ ghíʼ faʼ yi pə́ wâghʼ waghʼə́.

⁸Ńté no káa paghʼ ghwô wághʼ lə̂ nkə́ʼtə́ no-lə́nə́ʉ Sê, paghʼ ghwo pə́ lə̂ ntóutə́.

⁹Paghʼ lə̌i mə́ mbwór, lə́ pei pə́ ntə̂itə́; ə́ poŋə́ wághʼ gháʼate. Ə́ pə̂ yə́rə́, paghʼ pə̂ mpfu tsəm, ə́ mə́ sʉ̂ʉtə Sê ńgó pei pə́ tə́ lǒʼ mbi zʉ́.

¹⁰Ə̂ zə̂u yi ghʉ̌, m mbyêr pə́ ndǐ təsə, ə́ ŋwáʼá ŋwaʼa wo ńŋə́ lə́ pei: ə́ ndaghʼ ḿbôghʼ lə́ pə́ yi mboʼ n ntô tə nkə́u lâʼ pei, ə́ ncʉ́ʼ ndághʼ mətəʉ mi Nde lə ŋə́ lə́ məŋ sáʼ wéi saʼá. Nde lə ŋə́ ghâa mətəʉ pə́ lə̂ ndághʼ ńgʉ̌ cûʼtə zéi lər lə̂ mbi, káa a lə ŋə́ yé ghâa mətəʉ pə́ lə̂ ndághʼ ńsǎŋ saŋə́.

¹¹Lə̂ mpfu wo pəfə̌r pâa, m myaghʼtə mə́. Pei nyáŋ cər lətsei, pei lághʼ məfaʼ shʉʼʉ méi ńdə́r lə̂ mbi; pei sáʼ təʉ lə̂ mbə́ tə́ lǒʼ təcər pei, pei pə́ ntôutə mbəʉ zéi təcər pei, pei ghwô tâʼ ntsʉ, ə́ nyáŋ lə̂ mbwórə, ə̂ lêi yə́rə́, ə Sê yi a ghwǒ nkoŋə gháp mbwórə pə́ təcər pei.

¹²Pei tsêʼtə́ mbəʉ zéi təcər pei, ə́ mbáʼá ghíʼ pye Sê. Pye Kəlísto pə́tsəm pi pə́ yaʼa tseʼtə́ wéi.

¹³Ə Nde Yěso Kəlísto pə́ ncôghʼ mbwórə lə́ pei pə́tsəm, ə nkoŋə Sê mbaa Zəghʼə Ndêi-lěi yi ə́ təmtə wághʼə kə́ mbə̂ pə́ təcər pei pə́tsəm.