Read Ngombale 2 Korêŋtə 2 Bible Online

2 Korêŋtə 2 - Ngombale bible

2 Korêŋtə 2

¹Pei zûʼ zə̂u yi ə́ lə ghʉ̌, n ndə̂ʼ lə̂ nkə́ ncí ntó lâʼ pei, ə́ mbóghʼ lə́ pə́ yi mboʼ n ntô ngʉ́ sʉ̂ wéi shʉ̂ŋ.

²Ńté ńgó n ndə̌i ngʉ́ sʉ̂ wéi shʉ́ŋ, wǒ ŋuu pou ŋə́ ghâa lətsei? Ŋuu yi məŋ ngʉ̌ sʉ̂ yé shʉ̂ŋ, mboʼ a myaghʼə́ ŋə́ ghâa lətsei?

³Ə̂ zə̂u yi ə́ kə ghʉ̌, n ŋwáʼa pə́ ŋwaʼa ńŋə́ lə́ pei lə̂ mbə̂u yi n nkə ŋwáʼa lə̂: káa n ndə pə́ nkôŋ ghâa lə̂ ntó tə nkə́u lâʼ pei, ə́ njwó pye pi gháp yǎa ngwǒ lə̂ ngʉ́ n ntsêi, gháp cʉ̂ʼ ngʉ́ sʉ̂ ghâa shʉ̂ŋ shʉŋə́. N ntsuŋu mə́ njî ńgó n ndə̌i mbə́ cər lətsei, mə́i pei wo kə́ pə̂ zéi cər lətsei lə́wó.

⁴Ə̂ŋ n ndə ghí ŋwaʼá ŋwaʼa wêi ńŋə́ lə́ pei, ə́ ndǎghʼ pə̂ nci nyôghʼ, ntə̂ʉ ghâa pə̂ nzáŋ gháʼate, mbəʉ zaa pə̂ ncátə́; n ndə ŋwáʼa yə́rə́, káa lǎghʼ tsâa pə́ ńgó pei shʉ́ŋʉ́ sʉ̂ wéi, lə́ n ndə laghʼ ńdôu pə́ ńgó pei jí mbə̂u yi n ndǎghʼ ńkǒŋ wéi.

⁵Ə́ lə̌i mbə́ yi ŋuu lə ghʉ no yi mboʼ ə́ záŋə pye, mə́i káa a lə ghʉ̂ yé pə́ lə́ məŋ, a lə ghʉ̂ lə́ cûʼtə zéi tsəm; ə́ mbə̂ có, mə́i káa a kə ghʉ̂ yé lə́ pye pə́tsəm, lə́ ə́ nkə́ ngʉ́ lə́ pye tə nzáa təcər pei.

⁶Pye tə nzáa təcər pei kə sáʼ yé, ə̂ kûʼ yə́rə́.

⁷Ə́ cʉ́ʼ mə́ ntúŋu mpfu wo pə́ ńgó pei lyə́ghʼə́ ńŋə́ lə́ zʉ́, ə́ mbou ntóutə́ yé, ə́ mbóghʼ lə́ pə́ yi mboʼ a fʉ̂ tə́sə́ʉ, pə̂i-ntə̂ʉ yé pwôr.

⁸Ə́ pə̂ yə́rə́, m mə̂ ndáʼ ńgó pei ghʉ́ tə a jí ńgó pei kə̌ mbyér mə́ nkôŋ yé kǒŋ.

⁹Yo pəi mbə́ zə̂u yi ə́ kə ghʉ̌, n ŋwáʼa ŋwaʼa wo ə́ ŋə́ lə́ pei: n ndə laghʼ môu wéi lə̂ njwó ńgó kəʉ pei gháʼa mbyér nkûʼ lə̂ nzúʼ ntsʉ ghâa lə́ maa no tsəm yi m mə̌ ndaʼ lə́ pei.

¹⁰Pei lə̌i ndyə́ghʼə́ wʉ no ŋuu ńŋə́ lə́ zʉ́, n nkə̂ ndyəghʼə zâa ńŋə́ lə́ zʉ́ lə́wó. Lə́ n ndə̌i ngwô lə̂ ndyə́ghʼə́ məfaa ŋuu, ə́ nkə́ ndyə́ghʼə́, mə́i n ntə̂ʉ gháʼá mbi Kəlísto, ə́ ndyə́ghʼə́ lə̂ ndághʼ ḿpfútə́ wéi,

¹¹ə́ mbóghʼ lə́ pə́ yi mboʼ Sə́tə mâʼ wághʼə ńzʉ́; ńté ńgó káa paghʼə yaa mbəi mə́ múŋu wághʼə məkwaŋtə tə́poŋ mi a ghwǒ měi nzəm paghʼə.

¹²N ndə tó ńkə́u túsoŋ Tərowásʉ lə̂ ndêʼtə́ Nkəʉ Shʉʼʉ Kəlísto, ə́ njwó, ə Nde ŋə̂ ghâa məsʉ̂ tə nzáa lə̂ ndághʼ ngʉ̌ faʼ zêi.

¹³Ə́ pə̂ tə mbə́ yə́rə́, lə́ mbəʉ zâa kə̂ ncátə catə́, ńté no káa n ndə jwô ghâa fə̌r wághʼə Tîtə. Ə̂ zə̂u yi ə́ lə ghʉ̌, n ncʉ̂ʼ ndáʼá pye Tərowásʉ laʼá, ə́ ndə́r ghâa lə̂ Masedwânə lə̂ ndôu yé.

¹⁴Lə́, paghʼ wo kə́ ŋə́ pə́ nkhwo mbó Sê ńté no paghʼ lə̌i mbə́i mbə́ pə́ ghó, mə́i a wo ghʉ̌ paghʼ pə́ pə́ lə́ mənzoŋ Kəlísto, ə́ yaa ngǐ pə́ mə́i kwaʼ zʉ́ Kəlísto maʼ mə́ ntso, ə́ nzʉ́. Zʉ́ Sê leitə́ lə́ paghʼ ńgʉ̌ pə́ jî Kəlísto yʉʼ tsəm pə́ ghíʼ zə̂u yi pə́ tou, jaghʼə́ zěi kôʼ ńsâr yʉʼ tsəm lə̂.

¹⁵Paghʼə yaa mbə́ mbó Sê, ə́ mbə́ ghíʼ ləmə́ndaa yi jaghʼə́ zěi pǒŋ, ə́ yi Kəlísto ŋə̌ mbó Sê; paghʼə pə́ yə́rə́ mbó pye pi gháp pə́ lə̂ laŋə́-ndə̂u ləcwôr mbaa mbó pye pi gháp pə́ lə̂ laŋə́-ndə̂u ləcwî.

¹⁶Jaghʼə́ zêi pə́ mbó pəcó pye, ə́ mbə́ jaghʼə́ ləwʉ̂ yi ə́ côghʼ gháp cər ləwʉ̂, ə́ mbou mbə́ mbó pəcó pye, ə́ mbə́ jaghʼə́ ləcwôr yi ə́ côghʼ gháp cər ləcwôr. Tə mboʼ wǒ ŋuu kûʼ lə̂ fáʼ faʼ zêi?

¹⁷Káa paghʼ pə̂ wághʼ ghíʼ pye tə nzáa pi gháp laghʼ tsâr Sê ńgʉ zə̂u mətǎa záp; lə́ paghʼ laghʼ zághʼ pə̂ ntə̂ʉ lěi ńdâʼ, ə́ mbə́ pye pi Sê lə̂ lə tə́u gháp. Paghʼ ghí pə́ lǎʼ, Sê pə̂ njwô wághʼ, paghʼ pôu ndár mbəʉ zághʼ lə́ Kəlísto.