Read Ngombale 2 Korêŋtə 3 Bible Online

2 Korêŋtə 3 - Ngombale bible

2 Korêŋtə 3

¹Paghʼ laʼ gháʼa ə́ ndághʼ nji-jǐ lə̂ ndâʼ wéi pye pi paghʼ pə̌ pěi? Kəʉ ə́ pə́ ntúŋu ńgó paghʼ pfú ŋwaʼa yi a leʼtə pye pi paghʼ pə̌ pěi ghíʼ pəcó pye ghʉ mboŋə́ lǎghʼ tô mbi pei? Kəʉ mpfú wěi pə́ mbó pei, ə́ mboŋə́ lǎghʼ wo có yʉʼ lǎʼ no Sê lə́ pəcó pye?

²Pei lə̂ gháʼá mbə́ waghʼ ŋwaʼa, yi pə́ lə ŋwáʼá cər ntə̂ʉ paghʼ, pye pə́tsəm pə́ njí, ə́ mbou mə́ fúŋ.

³Ə̂ŋ! Mboʼ pə́ laghʼ pə̂ nyôghʼ, ə́ njwó ńgó pêi ŋwaʼa yi Kəlísto lə ŋwaʼá, ə́ ntə́u wághʼ paghʼ tô ŋə́, káa lǎghʼ pə̂ ləkoŋ-ŋwaʼa ńŋwáʼá, ə́ ngǐ ŋwaʼá, ə́ ndeitə́ lə̂ Zəghʼə Sê yi a pə̌ ntəʉ, káa ŋwáʼá ndəu pətǎfərə́ pi ləghǒ, ə́ ŋwaʼá pə́ lə́ pətǎfərə́ mbap mbəʉ ŋuu-məsoŋ, ə́ ndəu məntə̂ʉ méi.

⁴Paghʼ laʼ no lə̂ faʼ zághʼ gháʼa, ńté ńgó paghʼ laghʼ mbə̂u yi paghʼ lǎr mbəʉ zághʼ lə́ Kəlísto, ə́ fú mə́ njî ńgó Sê pə̂i no zághʼ.

⁵Káa paghʼ pə́ ndâʼ ńgó mboʼ paghʼ lâghʼ ndʉ̌ʉ-ndʉʉ mətəʉ waghʼ kûʼ lə̂ ngʉ̂ có zə̂u, ə Sê lə̂ ŋə̂ wághʼ mətəʉ, paghʼ lâghʼ ńfâʼ faʼ yo.

⁶Zʉ́ lə́ kə ghʉ̌ paghʼ kûʼ lə̂ mbə́ pəghaŋə-faʼ cər kaa shwî, lə́u zêi kaa pə̂ yé yi ə́ fû lə̂ no yi pə́ ŋwaʼá cər pəŋwaʼa po, ə́ mbə́ pə́ yi ə́ fû lə̂ Zəghʼə Sê. Ləpə̌ʉ yi pə́ lə ŋwaʼá ghʉ pə́ kwʉ̂ kwʉ̌, lə́ ə Zəghʼə ghʉ pə́ pə̂ wó.

⁷Pei pə̌ njî zéi ghíʼ no ləpə̌ʉ lə pə́, ə́ lə pə́ ləpə̌ʉ yi kâa pə́ ngwô yé ncí wó, pə́ ŋwaʼa lə́ pətǎfərə́ ləghǒ, ə́ ghʉ pə́ kwʉ̂ kwʉ̌. Tə mbaa yə́rə́, ə faʼ lə̂ no ləpə̌ʉ lə ghwo ləghûʼ tə lə́u mbə́ yé yi mboʼ ŋuu Ísə́lahêl fə̂iʼ fəiʼí ə́ shə́rə́ mənyôghʼ mé ə́ náŋtə́ sʉ̂ Mə̌usə̂i po, ńté ńgó nkeʼ Sê lə pə́ kwâr sʉ̂ zʉ́, ə́ nkêʼ yʉʼ. Tə ləghûʼ lə̌i ndə pə́ lə̂ kaa yi ə́ ghʉ pə́ kwʉ̂ kwʉ̌ ndwuŋ wo;

⁸mə́i ə́ wo kə́u lə̂ kaa yi ə́ fû lə̂ Zəghʼə ə́ cʉ́ʼ fú pə́ gháʼá?

⁹Tə kaa yi ə́ lə ghʉ pə́ kwʉ̂ kwʉ̌ lə̌i ndə ghwô ləghûʼ ndwuŋ wo gháʼá, mə́i ə́ wo kə́u lə̂ kaa yi ə́ ghʉ̂ paghʼə pə̂ ndʉŋ-ndʉŋ mbi Sê, ə́ ngwo ləcwôr ə́ cʉ́ʼ fú pə́ gháʼá?

¹⁰Mboʼ paghʼə pə̂i ndâʼ ńgó ləghûʼ yi mpfu wo fǔ ngáʼ tə yi ntsəmbi kâa lə pə̂ yé có zə̂u.

¹¹Ńté no zə̂u yi ə́ lêi-lěi lə̌i ndə ghwô ləghûʼ, mə́i ə yi láʼ cí pə̂ wó, ə́ wo ghwǒ lěi yə́rə́.

¹²Paghʼ tə̂ʉ mbi lâʼ ə́ ndaʼ no tə́ pôghʼ có zə̂u, ńté ńgó paghʼ pə̌ njî ńgó no yi paghʼ laʼ zěi ə̂ no lə́nə́ʉ.

¹³Káa paghʼ pə́ ngʉ̂ wághʼ ghíʼ Mə̌usə̂i, yi a lə so nkwə̌ tû zʉ́, ə́ ndaghʼ ńkə́ʼtə pye Ísə́lahêl lə̂ njwó ghíʼ ləghûʼ yi kâa pə́ ngwô yé ncí wó, wo mě sʉ̂ zʉ́.

¹⁴Lə́, ə́ lə pə́ mpfu wêi, có zə̂u tsághʼə jîno záp. Tə nkə́u leʼé wo, gháp lei tə mə́ fûŋ ndwuŋu kaa, ə nkwə̌ zêi kə̂ ntsághʼə pə̂ jîno záp; ŋuu lə̌i ndə́iʼ lǎr mbəʉ ye lə́ Kəlísto po, nkwə̌ zêi ŋéʼe yé sʉ̂ zʉ́ po.

¹⁵Tə nkə́u leʼé wo, gháp lei tə mə́ fûŋ ŋwaʼa Mə̌usə̂i, cǒ nkwə̌ pou məntə̂ʉ máp.

¹⁶Lə́ ŋuu lei tə shə́rə́ ńtsə́ʉ nzəm Nde, ə nkwə̌ zêi ŋéʼe.

¹⁷Ńté ńgó Nde gháʼá mbə́ Zəghʼə Ndêi-lěi, ə yʉʼ tsəm yi Zəghʼə Nde pə́ wó, có zə̂u yi mboʼ kə̂ nkə́ʼtə́ ŋuu kə̂ mbyêr yé yʉʼ wó po.

¹⁸Paghʼə pə́tsəm pi nkwə̌ zêi kə ŋéʼé mə́ sʉ̂ paghʼə, lə ghʉ ləghûʼ Nde cʉ̂ʼ mə́ mbûʼ lə́ paghʼə ə́ mbə̂ʉ nzəm, ə́ ndʉŋ-ndʉŋ ghíʼ nkeʼ pûʼ lə́ mə́lam, ə́ mbə̂ʉ nzəm lə̂. Nde yi a pə̌ Zəghʼə a pə̌ ngʉ̂ paghʼə kə́p mbə̂u, ə́ ncʉ́ʼ mbə̂ ghíʼ zʉ́, ləghûʼ ye yi a pə̌ lə́ paghʼə kə̂ ncʉ́ʼ mə́ nkʉ́ʼʉ́ kʉʼʉ́.