Read Ngombale 2 Korêŋtə 4 Bible Online

2 Korêŋtə 4 - Ngombale bible

2 Korêŋtə 4

¹Ə Sê kə lâghʼ poŋə-ntə̂ʉ yé ńcóghʼ faʼ zêi yo mbó paghʼ; ə̂ zə̂u yi ə́ ghʉ̌, káa paghʼ pə́ nkâa wághʼ lə̂ faʼ.

²Paghʼ kə lə̂ʼ wághʼ məno mi ə́ lwǒ lwǒ mbaa mi ə́ pə́ maʼ sə̂ʉ; paghʼ faʼ pə́ tə ghʉ̌ píʼí, ə́ mbou káa pə́ laghʼ wághʼ məcó məno vuŋu tsâr Sê. Tə ncʉ́ʼ yə́rə́, paghʼ ghʉ̂ pə́ tsuŋu njí no lə́nə́ʉ, ə́ mbou nô zaghʼ ngwu lə̂ feʼ-no pye-mə́soŋ mbi Sê.

³Lə́, ə́ lə̌i mbə́ yi Nkəʉ Shʉʼʉ yi paghʼ leʼtə zěi, pə́ mbó pəcó pye ə́ mbyér pə́ cər nkwə̌, mə́i nkwə̌ pou zěi yə́rə́ pə́ mbó pye pi gháp khʉ Sê, ə́ ngwo nkə̂u cwí.

⁴Káa gháp pə́ nzûʼ gháp Nkəʉ Shʉʼʉ ə́ ncôghʼ ntə̂u mə́u, ńté no Sə́tə yi a pə̌ Sê yi nzʉ̂ yo kə púʼu jîno záp, ə́ ndaghʼ ńtôʼ gháp lə̂ njwó nkeʼ yi ə fû lə̂ Nkəʉ Shʉʼʉ, ə́ pə̂ yə́rə́, lə́u gháp jî gháp ghíʼ ləghûʼ Kəlísto pə̌ po, ə́ zʉ́ tû-mbəʉ yé yi a fǔ mbə́ ghíʼ Sê pə̌.

⁵Lə́, ə́ wo lə̂ no yi paghʼ leʼtə zěi, káa paghʼ ghíʼ pə́ ntsə́tə Nkəʉ Shʉʼʉ, ə́ ndaghʼ ńdôu ńgó pə jí wághʼ, paghʼ laghʼ ńdôu pə́ ńgó pə́ jí ńgó Yěso Kəlísto, â Nde. Ə́ ngwǒ lə́ paghʼ, mə́i paghʼ pə̌i lə̂ fáʼ mbó pei ńté Yěso.

⁶Ńté no Sê yi a lə lǎʼ ngô: «Ə nkeʼ kéʼ nzə̌m!» lə tó pə́ zʉ́ ə́ nkěʼ məntə̂ʉ mághʼə lə̂ ngʉ́ paghʼə jwô ləghûʼ ye, ə́ yi a ŋwaŋtə lə̂ sʉ̂ Kəlísto.

⁷Lə́, paghʼ pi paghʼ pyěʼ zêi yo fuʼ yi ə́ fú mbó Sê, ə ndəu paghʼ pə́ ghíʼ ə́ pə́ cər məngwǒŋ tsaʼá; lə̂ ndághʼ ngʉ̌ pye ji ńgó mêi mətəʉ tə̂ fəiʼi zěi wó, káa fû yé pə́ mbó paghʼ, ə́ ńgó ə́ fû pə́ mbó Sê.

⁸Ə ngwôʼ pə̌ fû məsʉ̂ məsʉ̂ ntó fâr wághʼ, lə́ káa pə́ ghôʼ yé wághʼ. Ə́ wo cǒ mpfu, káa paghʼ kə́ njî wághʼ ghíʼ paghʼ wo ghʉ̌, lə́ káa ə̂ pə́ pə́ ńgó no tsəm fú mě.

⁹Pə́ pə̂ ŋə̂ wághʼ məngaghʼə, lə́ káa Sê mêʼ yé wághʼ. Ə́ mə́ ntə̂m wághʼ sê, lə́ paghʼ kə̂ ndê pə́ sê.

¹⁰Paghʼ pə̂ mpfu tsəm, ə́ mə́ mbə̂i lə̂ nkwʉ́ mbə̂u ləwʉ̂ yi Yěso lə kwʉ́ zěi, ńjí ńgó ə́ lei yə́rə́ pə́ jwô ńgó lənyâŋ yi Yěso lə nyáŋ wěi kə̌ mbə̂ yé ndəu paghʼ lə́wó.

¹¹Paghʼ pi paghʼ pyěr ntəʉ, paghʼ pə̂ mpfu tsəm ńtə́ʉ pə́ ntsʉ ləwʉ̂ ńté Yěso, ńjí ńgó ə́ lei yə́rə́, pye jwô lənyâŋ Yěso lə̂ mbəʉ zaghʼ tə mbaa pə́ ghíʼ mbəʉ zêi, ə̂ yi ə́ ghʉ̌ kwʉ́.

¹²Ə́ pə̂ yə́rə́, ləwʉ̂ ghí pə́ soŋ nə̂r paghʼ ə́ pə́ faʼ yé faʼ, lənyâŋ kə̂ mə́ faʼ yé faʼ soŋ nə̂r pei.

¹³Ŋwaʼa Sê pə̌ ndâʼ ngô: «N ndə côghʼ ntə̂ʉ ghâa lə̂ Sê, ə̂ zə̂u yi ə́ ghʉ̌, n ndâʼ no.» Paghʼ kə laghʼ ghíʼ paghʼ kə ncôghʼ zághʼ ntə̂ʉ lə̂ Sê lə́wó pə́ lə́ zêi mbə̂u, ə́ ngwo zághʼ pə́ lə̂ ndâʼ no Sê.

¹⁴Paghʼ pə̌ ntsúŋú njî ńgó Sê yi a lə ghʉ̌ Nde Yěso zʉ̂ʉ lə̂ ləwʉ̂, táa ghʉ̌ paghʼ pə Yěso kə́ nzʉ̂ʉ zághʼ lə̂ ləwʉ̂ pə́ yə́rə́, ńté ńgó paghʼ lar mbəʉ zághʼə lə́ zʉ́, Sê ghʉ̂ paghʼə pə́tsəm kwatə, paghʼə pə Yěso nâa kəitə́, ə́ mbə́ tâʼ yʉʼ.

¹⁵Paghʼ shə̂ghʼ məno mə́tsəm mi Sê jwǒ ńgó ə́ kuʼ mághʼ lo, ə́ ndaghʼ ńtsâa pə́ ńgó pei zʉ́ pəi zěi, ə mbwórə Sê kə̂u lə́ pye tə nzáa, ndwuŋ pye pi gháp pə́ sʉ̂ʉtə Sê, ə́ mbaa yi pye pi gháp ŋə̂ nkhwo lə́ zʉ́ kə̂ nkʉ́ʼʉ́ nzâa yé lə́wó ńté ləghûʼ Sê.

¹⁶Ə̂ zə̂u yi ə́ ghʉ̌, káa paghʼ pə́ nkâa wághʼ lə̂ fâʼ; tə mbaa ghíʼ nkáŋ-mbəʉ wághʼ lə̌i mə́ mbwórə́ ncwótə məyʉʼ məyʉʼ, ntə̂ʉ wághʼ pə̂ cər wó ə́ nkə́ mbyə́ghʼə́ mbə̂ pə́ yi shwî maa leʼé ntsəm.

¹⁷Mə́ceʼé ngwôʼ yi paghʼ jwô zěi mpfu wo, káa kûʼ yé có zə̂u lə̂ tə́koʼ ləghûʼ tə́ ndaghʼə yi mboʼ a lâʼ mê yé po, ə́ yi zêi ngwôʼ laghʼ ńtsôʼ laŋə́-ndə̂u lə̂ ncághʼə́ wághʼ ncóghʼ cər wó.

¹⁸Ńté no zə̂u yi paghʼ lou, káa pə̂ yé yi pə́ pə́ ndaghʼ nyôghʼ ńjwó. Ə zə̂u yi pə́ pə́ njwó kâa pə́ ncî yé, lə́ zə̂u yi káa pə pə́ ndâghʼ yé nyôghʼ ńjwó pə̂ tə lǎʼ mé.