Read Ngombale 2 Korêŋtə 5 Bible Online

2 Korêŋtə 5 - Ngombale bible

2 Korêŋtə 5

¹Ńté no paghʼə tsuŋu mə́ njî ńgó ə jûŋ yo yi paghʼə cî cər wó lo, n ndaʼ gháʼá mbəʉ zághʼə yi paghʼə ghwǒ ndəu ndesé yo lo lə̌i ndêi tə nkə́mə́, mə́i Sê wo ŋə́ wághʼə ndə̂ tʉ̌-lə́pû. Lə́u pə̂ yé ndə̂ yi pye-mə́soŋ lə́ kə́r po, ə́ mbə́ pə́ yi Sê lə̂ kə́r, ə́ mbə́ yi láʼ cí pə̂ pə́ wó.

²Paghʼə pə̂ mpfu wo, məno pə̂ fâr wághʼə paghʼə pə̂ ngêʼtə́ cər jûŋ zei, ńté no paghʼə pə̌ ntsâa gháʼate lə̂ mbə́ cər ndə̂ zaghʼə yi tʉ̌-lə́pû, lə̂ mbə́ cər wó ghíʼ ŋuu yi a pə̌ cər ndǐ shwî yi a mǎʼ lə̂;

³paghʼə lə̌i ngʉ́ yə́rə́, paghʼə pə̂ pye pi gháp mǎʼ məndǐ ə́ nkə́ mbə̂ wághʼə ntsəmə po.

⁴Ńté no ə́ pə̂ mpfu yi paghʼə pyěr mə́ cî cər jûŋ yi ndəu nzʉ̂ yo, məno pə̂ fâr wághʼə, paghʼə pə̂ ngêʼtə́. Ə́ pə́ lə́nə́ʉ ńgó káa paghʼə pə́ nkôŋ wághʼə ńgó pə fú lə́ paghʼə, ə́ nkwarə́ yo mbap mbəʉ. Paghʼə lou pə́ lə̂ mâʼ ndǐ yi tʉ̌-lə́pû mə́u, ńjí ńgó mbəʉ yi kâa pə́ kwʉ́ yé, ə́ mi yi ə́ pə́ nkwʉ́.

⁵A lə kə́ ncí ncóghʼ ləiʼi yé lə́ paghʼə, ə́ ncóghʼ Zəghʼə Ndêi-lěi yé məntə̂ʉ paghʼə, ə́ laghʼ mbə̂ nduŋ-mbi zə̂u lə̂ məzə̂u mi a lə ghʉ̌ ndaʼá mə́u lə̂ ngʉ́ ńŋə́ lə́ paghʼə.

⁶Ə̂ zə̂u yi ə́ ghʉ̌, paghʼ kə̂ mə́ sâʼ pə̂ təʉ, ə́ shə̂ghʼ, ə́ mə́ njî ńgó paghʼ lə̌i ndáʼ ndə́iʼ fú cər jûŋ yo kwǎr po, ə́ pə̂ ńgó paghʼ kə́ cʉ́ŋə wághʼ tə mbáatə́ Nde, ńgó paghʼ pyěr pə́ ndǐ təsə.

⁷Ńté no paghʼ ŋəi pə́ lə̂ no yi paghʼ pə̂i zěi nzəm Kəlísto, káa paghʼ ŋə̂i wághʼ pə́ lə́ yi paghʼ jwô zěi.

⁸Paghʼ pə̌ sâʼ təʉ, ə́ shə̌ghʼ, ə́ mbou mə́ ntsâa lə̂ nkwâr cər mbəʉ yo, ə́ ngwǒ ncʉ́ʼ ncî pə́ mbəʉ Nde.

⁹Ə̂ zə̂u yi ə́ ghʉ̌ paghʼ pə̂ sâʼ təʉ lə̂ nkə́ mə́ ngʉ̂ pə̂ zə̂u yi ə́ wo poŋə́ yé, ə́ mpfu yi paghʼ pyěr cər mbəʉ zêi, mbaa mpfu yi paghʼ fǔ cər wó nkwâr.

¹⁰Ńté no paghʼ pə́tsəm ghʉ̌ lěi mbi Yěso Kəlísto mpfu yi a wo feʼ pye, a ŋə̂ ntsoʼó-faʼ yi wǒwó lə̂ zə̂u yi a lə ghʉ̌ ə́ poŋ, kəʉ lə́ yi a lə ghʉ̌ káa ə̂ pôŋ; ə́ mpfu yi a lə pyér mə́ ncî cər mbəʉ zêi.

¹¹Ghíʼ paghʼ pə̌ njî zə̂u yi ləpôghʼ Nde pə̌ zěi lə̂, paghʼ lou pə̂ məsʉ̂ lə̂ ngʉ́ pei kə̂ njî zéi lə́wó. Sê pə̌ ntsúŋú njî wághʼ, paghʼ pôu mə́ nkwâŋ ńgó pei pə́ cər məntə̂ʉ pei, ə́ nkə́ ntsúŋú mə́ njî pye paghʼ pə̌ pěi.

¹²Káa paghʼ pə́ ndôu lə̂ nkə́ ncí mbyə́ghʼə́ ndâʼ wéi pye pi paghʼ pə̌ pěi pə́ paghʼ. Paghʼ lou pə̂ məsʉ̂ lə́ pə́ yi mboʼ pei nyâŋ ngwô lətsei ńté wághʼ. Ńjí ńgó ə́ lei yə́rə́, pei jî ghíʼ pei wo pwǒr no mbó pye pi gháp nyêr məno mi ə́ pə́ cər ntə̂ʉ, ə́ ndâghʼ pə́ mi nzəm pěi ńŋáʼtə́.

¹³Ńté no pye lə̌i mə́ fûŋ wághʼ ńgó məpə, mə́i paghʼ měi, lə̂ ndághʼ ńdǒu ńgó faʼ Sê ŋə̂i. Ə́ nkə́ mbə́ yi jîno zághʼ pə́ wó, mə́i pei wo zʉ́ pəi.

¹⁴Nkoŋə Kəlísto lə fú mə́ nzʉ́ wághʼ, ńté no paghʼ pə̌ ntsúŋú njî ńgó tâʼ ŋuu moʼ lə kwʉ́ lə̂ tû pye pə́tsəm, ə́ laghʼ ḿbə́ ńgó gháp pə pye pə́tsəm lə nǎa nkwʉ́.

¹⁵A lə kwʉ́ lə̂ tû ŋuu ntsəm, ńjí ńgó ə́ lei yə́rə́, pye pi gháp pyér ntəʉ, kə̂ mbyér ngʉ̂ gháp pə́ zə̂u yi gháp pə́ nkǒŋ po, ə́ ncʉ́ʼ ngʉ̂ pə̂ zə̂u yi ŋuu yi a lə kwʉ́ lə̂ tû záp, Sê pôu ngʉ́ a zʉ́ʉ pə̌ nkǒŋ.

¹⁶Ə̂ zə̂u yi ə́ ghʉ̌, káa paghʼ pyér mə́ njî wághʼ cǒ ŋuu lə̂ mbə̂u yi pye-mə́soŋ. Ə́ lə̌i mbə́ yi paghʼ kə jí Kəlísto lə̂ mbə̂u yi pye-mə́soŋ, mə́i káa paghʼ pyér mə́ njî wághʼ yé yə́rə́ mpfu wo.

¹⁷Ŋuu lə̌i ndêi tə ndâr mbəʉ yé lə́ Kəlísto, a cʉ̂ʼ mbə́ pə́ ŋuu shwî. Ə́ mbə́ cər ntə̂ʉ zʉ́, káa pyér pə̂ yé ghíʼ a kə yǎa mbə́, mə́i a jî gháʼá lənyâŋ yi shwî.

¹⁸Zə̂u pei tsəm fû mbó Sê yi a lə leitə́ lə́ Kəlísto, ə́ myǎghʼ mbəu yi ə́ lə pə́ təcər paghʼə pə pǎp, a lə pou ncóghʼ faʼ mbó paghʼ lə̂ ŋáa ndéʼtə́ mbó pye, ńgó ə sʉ̂ lə̂ ndághʼ ḿmyǎghʼ mbəu yi ə́ lə pə́ təcər páp pə pǎp kwar.

¹⁹Sê lə̂ lə pə́ lə́ Kəlísto, ə́ mə́ myâghʼ mbəu yi ə́ lə pə́ təcər páp pə pye-mə́soŋ, ə́ ngʉ yə́rə́ tə́ kwǎʼ məno tə́poŋ máp, tə ə́ kuʼ, a côghʼ tsâr laghʼ ḿmyâghʼ mbəu ntsʉ paghʼ.

²⁰Paghʼ tsâr gháʼa, ə́ ncʉ́ʼ ndághʼ ḿbə̂ pye pi Yěso Kəlísto tə̌u gháp lə̂ ŋə̂i kə̌m. Ə́ laghʼ gháʼa ḿbə́ ńgó Sê zʉ́ tû-mbəʉ ye lə́ fûŋ pye. Paghʼ pə̌ ndaghʼ ləjôghʼ Kəlísto sʉ̂ʉtə pye ńgó pə́i gháp pə Sê myâghʼ mbəu.

²¹Káa Yěso Kəlísto lə fâa yé có no, lə́ Sê khwôr məfaa wághʼə, ə́ ntághʼ tû zʉ́, ə́ ndaghʼ yé ńgʉ́ ngaŋə-məfaa, ə́ njí ńgó paghʼə wo lǎghʼ ghíʼ paghʼə lǎr mbəʉ zaghʼə lə́ Kəlísto, ə Sê jwó wághʼə ghíʼ pye pi gháp pə́ ndʉŋ-ndʉŋ mbi zʉ́.