Read Ngombale 2 Korêŋtə 6 Bible Online

2 Korêŋtə 6 - Ngombale bible

2 Korêŋtə 6

¹Paghʼ laghʼ no yi paghʼ pə Sê fâʼ, ə́ sʉ́ʉtə́ wéi ńgó koo pei ghʉ̂ ə zə̂u shʉʼʉ yi Sê lə tsáa wéi ŋə́ lə́ pei lei fe.

²Ńté ńgó Sê laʼ ngô: «Ə mpfu lə kuʼ yi ngwo ghʉ̌ no shʉʼʉ lə́ gho, n nzûʼ nji zô, ə leʼé lə kuʼ mbó məŋ lə̂ ngʉ́ ô cwôr, n ntô mpfútə́ gho.» Jwô! kwaʼ mpfu yi Sê wo pfútə́ ghô kuʼ mə́; yo leʼé yi Sê ghʉ̌ paghʼə cwór.

³Ə́ ngwǒ lə́ paghʼ pəghaŋə-ntə̂u, mə́i káa paghʼ pə́ ngʉ̂ wághʼ có zə̂u yi mboʼ ə́ ghʉ ŋuu kôtə mə́u, ə́ mpfúŋ, pə́ fû mə́u ndaghʼ ńzôutə́ faʼ zághʼ.

⁴Tə ncʉ́ʼ yə́rə́, paghʼ pə̂ lə́ maa zə̂u tsəm, ə́ nyarə́ ńgó pâghʼ pəghaŋə-faʼ Sê: ə́ ndeitə́ lə̂ mbə̂u yi paghʼ laghʼ ńgwô shəghʼ-ntə̂ʉ gháʼate ə́ mpfu yi ngwôʼ cə̌r wághʼ, ə́ mpfu yi pâghʼ cə́r wághʼ, ə́ mpfu yi no pə́ ntsə wághʼ;

⁵pə́ kə mə́ sə́u wághʼ, ə́ ncóghʼ wághʼ tsâŋ, pə́ kə twótə́ mə́ lâʼ mǎʼ nzəm paghʼ, ə́ ndǎghʼ məfaʼ tə̌i ńfárə́ wághʼ, paghʼ lê tə́ lê, ə́ mbǒu nyáŋ tə́ zʉ́ zə̂u.

⁶Paghʼ laghʼ pə́ lənyâŋ waghʼ ńnyárə ńgó paghʼ kwaʼ pəghaŋə-faʼ Sê: paghʼ ghwo ntə̂ʉ lěi, ə́ ngwǒ jîno yi ə́ fû mbó Sê, ə́ ngʉ̌ shəghʼ-ntə̂ʉ, paghʼ ghwo poŋə-ntə̂ʉ nzəm pye-mə́soŋ, ə́ nzʉ̂ʼtə zághʼ zə̂u tsəm pə́ mbó Zəghʼə Ndêi-lěi, ə́ ngwǒ nkoŋə yi kâa pə̂ yé nkoŋə mənyôghʼ nzəm pye-mə́soŋ,

⁷Paghʼ laʼ zághʼ pə̂ no lə́nə́ʉ. Ə zə̂u yi paghʼ ghʉ nyárə pə̂ mətəʉ Sê, Paghʼ laghʼ pə̂ no yi ə́ pə́ ndʉŋ-ndʉŋ, ə́ ngʉ̂ mághʼ məkoŋ mi paghʼ laghʼ ńkə̂m ntso, ə́ mbou ndághʼ ńdwóʼó.

⁸Pəcó pye ghí pə́ ŋə̂ məkuʼ mághʼ, pəcó pə̂ ngwâghʼ wághʼ; pəcó pye ghí pə́ kʉ̂ʉ wághʼ tə́poŋ, pəcó pə̂ nkʉ̂ʉ wághʼ shʉʼʉ. Pə́ nâŋ wághʼ pə́ ghíʼ paghʼ pə̌ pə̂ pəghaŋə məlaa, lə́ paghʼ pə̂ ndâʼ pə̂ no-lə́nə́ʉ.

⁹Pə́ pə̂ múŋu wághʼ lə́ ntsuŋú mə́ njî wághʼ; ə́ mə́ ndâghʼ wághʼ fûŋ pəpfû-sê, lə́ paghʼ pə̂ pə̂ ntəʉ; pə́ pə̂ ŋə̂ wághʼ ngwôʼ, lə́ káa jwí yé wághʼ.

¹⁰Pə́ pə̂ nâŋ wághʼ, ə́ shwî pə́ ghíʼ paghʼ pə̌ fʉ có no, lə́ paghʼ pə̂ wághʼ pə́ cər lətsei; ə́ mə́ ndâghʼ wágh fûŋ pəpûŋ, lə́ pye tə nzáa pou mə́ ndêitə lə́ paghʼ ə́ ngwô zə̂u. Ə́ mə́ nâŋ wághʼ ghíʼ pye pi káa gháp ghwô gháp có zə̂u, lə́ paghʼ ghwo zə̂u tsəm.

¹¹Pəsə̌u pághʼ pi lətəi-ndwuŋ, pei pye Korêŋtə paghʼ kə laʼ wéi no lə́nə́ʉ tə́ lwo có, ə́ mbou fú ŋéʼé ntə̂ʉ wághʼ nyárə́ wéi.

¹²Káa paghʼ pə́ ndə̂ʼ wághʼ lə̂ kôŋ wéi, có zə̂u lə̌i mə́ nkə̂ʼtə wéi lə̂ nkôŋ wághʼ, mə́i ə́ fû pə́ mbó pei.

¹³Ə̂ zə̂u yi ghʉ̌ n ngwo lǎʼ wéi yo no ghíʼ ŋuu laʼ no lə̂ ghəpə́ yé lə̂: Pei ŋéʼé ntə̂ʉ wéi nyárə́ wághʼ, ə́ nkǒŋ wághʼ ghíʼ paghʼ koŋ wéi zéi.

¹⁴Koo pei pətəpə̌i-no Yěso təm jǒghʼ, ə́ ntə̂m ku ŋə̂i, ə́ ngʉ̌ tâʼ zə̂u. Tə mboʼ no shʉʼʉ gháp no tə́poŋ təm ku ŋə̂i gháʼá? Kəʉ mboʼ nkeʼ gháp nzə̌m təmtə mbə́ tâʼ yʉʼ gháʼá?

¹⁵Kəʉ mboʼ Yěso gháp Mbelyâr tsâr nzúʼú? Mboʼ ŋuu Kəlísto gháp təpə̌i-no Sê ghwo tâʼ kwaŋtə mo?

¹⁶Mboʼ pə́ laʼ ńgó ndə̂ Sê gháp pə məzə̂u mi pə́ ghûʼtə fûŋ ńgó məsê ə̂ tâʼ zə̂u gháʼa gháʼá? Ńté ńgó paghʼə gháʼá mbə́ ndə̂ Sê yi a pə̌ ntəʉ, ə́ ndʉŋ-ndʉŋ ghíʼ Sê lə lǎʼ ngô: «N ngʉ̌ cʉ́ʼ nyâŋ pə́ təcər páp, ə́ pə́ ŋəi təcər páp; n ngʉ̌ pə́ Sê zap gháp pə́ pye pâa.»

¹⁷Ə̂ zə̂u yi ə́ ghʉ̌, «Sê pə̂ ndâʼ ńgó pei fú təcər páp nkwâr ə́ fǎghʼ mbəʉ zei lə́ páp; koo pei kə̂u có zə̂u yi ə́ ghwǒ lǒʼ, ə̂ lêi yə́rə́ n ngʉ́ mpfú wéi.

¹⁸N ngʉ̌ pə́ Tə́ wei, pei pə́ ghəpə́ zâa pi mbiŋə mbaa pi pəngyě, Nde Sê yi a ghwǒ mətəʉ mə́tsəm lǎʼ yə́rə́.»