Read Ngombale 2 Korêŋtə 7 Bible Online

2 Korêŋtə 7 - Ngombale bible

2 Korêŋtə 7

¹Pəfə̌r pâa pi lətəi ndwuŋ, ghíʼ Sê lə ghʉ̌ ndaʼá mə́u lə̂ ngʉ́ ŋə́ mwo məno ńté wághʼə lə̂, ə́ pə́ ntúŋu ńgó paghʼə nkhʉ̂ məno mi kâa pôŋ yé Sê, ə́ mi paghʼə ghʉ-ghʉ̌ mbaa mi paghʼə kwaŋ kwaŋə́, ə́ ndǎghʼ lə́ pə́ yi paghʼə pə̌ tə́ lǒʼ ńdə́r lə̂ mbi tə ngwó ndyə̂ghʼtə́, ə́ ngǐ pə́ ghʉ̌, ə́ mə́ mbôghʼ Sê.

²Pei ghʉ̂ tə paghʼ jí ńgó pei pə̌ koŋ wághʼ. Paghʼ kə́ ghʉ̂ wághʼ có no tə́poŋ lə́ ŋuu, cǒ ŋuu laa kə́ mêʼ yé pə̂i-ntə̂ʉ yé nzəm Kəlísto ńté wághʼ, paghʼ laa kə́ fútə wághʼ ŋuu ḿpfú zə̂u yé.

³Káa məŋ ndâʼ yo no pə́ lə̂ ndághʼ ńcóghʼ fər paa pei. N nkə mə́ nyáa ndǎʼ wéi ńgó n nkoŋ wéi tə myâghʼ ntə̂ʉ ghâa, ə no zéi fú mbə́ ntə̂ʉ paghʼ tə ə́ pə̂ yi paghʼə lə̌i mə́ nzûʼ pə̂ shʉʼʉ, kəʉ ə́ mbə́ pə́ ntsʉ ləwʉ̂, paghʼə lə̂ kə̂ nâa mbə́.

⁴N ndə fú mə́ ntə́m nzəm zâa ńŋə́ lə́ pei, n ngwo lə̂ ndághʼ wéi ńŋáʼtə́. M mə̌ njwô ngwôʼ gháʼate, ə́ nkə́ mə́ shə̂ghʼ shəghʼə́; ə́ mbou mbə́ cər tə́koʼ lətsei.

⁵Ńté ńgó tə fú ghíʼ paghʼ lə kə́u Masedwânə, paghʼ laa kə́ zə́tə́; ə ngwôʼ cə̂r wághʼ mbə̂u lə̂ mbə̂u. Ə pye ghi pə́ pěi, ə́ pə́ lwóʼo wághʼ, mənzoʼ mághʼ pə̂ ntsoʼó, paghʼ pə̂ mbóghʼ.

⁶Lə́, ə Sê yi a zaghʼ nci nyôghʼ pye pi gháp pə́ ntsə́rə́, laghʼ ghíʼ Tîtə tǒ, ə́ nzǎghʼ nci nyôghʼ wághʼ.

⁷Káa a lə laghʼ yé pə́ ndaʼ ghíʼ Tîtə kə tó, a lə kə́ ndǎghʼ ghíʼ pei lə zǎghʼ yé nci nyôghʼ, ə́ nzâghʼ wághʼ lə́wó. A lə laʼ ghâa mbə̂u yi pei pə̌ ndaghʼ ńtsâa lə̂ nkə́ ncí njwó ghâa, ə́ mbə̂u yi pei laghʼ ńfʉ̂ məno tə́poŋ mi pei lə ghʉ̌ lə́ məŋ, mbaa mbə̂u yi pei laghʼ nzáŋə mbəʉ zei lə̂ nzôŋ məno mâa. N nzûʼ yə́rə́, lətsei kʉ́ʼʉ ngáʼ ntə̂ʉ məŋ.

⁸Ə́ lə̌i mbə́i mbə́ pə́ yi ŋwaʼa yi n ndə lǔŋ mbi ntə́u ńŋə́ lə́ pei lə̂, lə ghʉ pei shʉ́ŋə məsʉ̂, mə́i kâa m mə́ fʉ̂ ghâa no mə́u mpfu wo. N ndə yaa fʉ̌ no mə́u, ńté ńgó n ndə zúʼ ńgó no ŋwaʼa wêi lə ghʉ pei nyêʼ shʉ́ŋə́ məsʉ̂ méi.

⁹Tə mbaa yə́rə́, m mbə́ pə́ cər lətsei ńté ŋwaʼa wêi yi n nkə ŋə́ lə́ pei lêi. Káa tsěi ńté pə́ no pei kə shʉ́ŋə́ məsʉ̂ méi, lə́ ə́ ntsěi ńté ghíʼ pei kə shʉ́ŋə́ məsʉ̂ méi, ə́ ndeitə́ mə́u, ə́ nkə́p cǐ zéi. Ə mbə̂u yi pei kə lǎghʼ ńshʉ́ŋə́ məsʉ̂ méi, kə pə́ mbə̂u yi Sê pə̌ nkǒŋ. Ə́ laghʼ mbə́ ńgó káa paghʼ kə́ ghʉ̂ wághʼ có no tə́poŋ lə́ pei.

¹⁰Ńté no mbə̂u yi Sê pə̌ nkǒŋ ńgó ŋuu lághʼ ńshʉ́ŋə́ sʉ̂ yé, ə̂ yi ə́ ghʉ ngaŋ kə̂p cǐ yé, ə́ ngwô ləcwôr, ə́ mbou nkə́ nfʉ̂ yé po. Lə́ nshʉ́ŋə́ sʉ̂ pə́ lə̂ mbə̂u yi pye cər nzʉ̂, kâa pə́ ngʉ̂ yé ŋuu kə́p cǐ yé, ə́ cʉ́ŋə ŋuu ŋə̂ pə́ lə̂ ləwʉ̂.

¹¹Pei náŋtə́ mpfu wo ńjwó məno shʉʼʉ mi Sê kə lěi lə̂ mbə̂u shʉ́ŋə́ sʉ̂ yi a kǒŋ, ə́ ngʉ̌ lə́ pei. Pei jwó ə́ mbə̂u yi pei laghʼ ńzáŋə mbəʉ mpfu yi ə no pə́ sê, ə́ mbə̂u yi pei laghʼ nzáŋə mbəʉ ńtúŋu ńgó pə lyə́ghʼə́ məfaa wei ńŋə́ lə́ pei, ə́ mbə̂u yi pei laghʼ ńfʉ̂ ńté ghâa, ə́ mbə̂u yi pei laghʼ ḿbôghʼ no, ə́ mbə̂u yi pei laghʼ ńtsâa lə̂ nkə́ ncí njwó ghâa, ə́ mbə̂u yi pei laghʼ ńzáŋə mbəʉ, ə́ mbə̂u yi pei laghʼ ńtâghʼ ngwôʼ tû ŋuu yi a fǎa no. Pei kə laghʼ məsʉ̂ mə́tsəm ńnyárə́ ńgó káa pei lə pə́ njî wéi có no tə́poŋ lə̂ no zêi yo.

¹²Kâa n nkə ŋwaʼá ghâa ŋwaʼa wo ńté ŋuu yi a kə fǎa no, kəʉ ńté ŋuu yi pə́ kə ghʉ̌ no tə́poŋ lə́ zʉ́. N nkə ŋwaʼa, ə́ ndaghʼ ńdôu pə́ ńgó pei tə́ʉ mbi Sê, ə́ njwó mbə̂u yi pei laghʼ ńfátə lə̂ no zághʼ.

¹³Ə̂ zə̂u yi ə́ ghʉ̌, ə mbə̂u yi pei kə lǎghʼ ḿpfú no yo kə zâghʼ nci nyôghʼ wághʼ. Káa ə pə́ pə̂ ndaʼ no zêi yi ə́ kə zǎghʼ nci nyôghʼ wághʼ, paghʼ lə kə́ mbou ngwô tə́koʼ lətsei ńté ghíʼ Tîtə lə kə́ mə́ ntsêi yé; mbaa pei zéi pə́tsəm lə kə́ mbou ngʉ́ ntə̂ʉ wághʼ shwítə lə́wó.

¹⁴Ə́ lə̌i mbə́ yi n ndə laghʼ ləjôghʼ zéi ə́ nyéʼ ŋáʼtə́ mbi Tîtə, mə́i a kə tó lâʼ pei, káa pei kə lâghʼ wéi sə̂ʉ nkó ghâa. Ə zə̂u yi paghʼ kə lǎghʼ ləjôghʼ zéi ńŋáʼtə́ mə́u mbi Tîtə, ə́ lə pou nkwǎr pə̂ no lə́nə́ʉ, ə́ ndʉŋ-ndʉŋ ghíʼ paghʼ pə̂ maa mpfu tsəm, ə́ nkə́ ndâʼ wéi pə̂ no lə́nə́ʉ.

¹⁵Ə́ pə̂ yə́rə́, Tîtə lêi tə nkʉ́ʉtə́ mbə̂u yi pei kə lǎghʼ nzúʼ ntsʉ yé, ə́ ndǎghʼ shúʼu-mbəʉ ḿpfú yé, ə́ ŋə́ məkuʼ mé, ə́ fú nkôŋ no zéi gháʼate.

¹⁶N ngwo lətsei ntə̂ʉ məŋ, ńté ńgó mboʼ n ntə̂ʉ lə̂ zə̂u tsəm mpfu wo, ə́ ntə́m nzəm zaa ńŋə́ lə́ pei tə́ pôghʼ có zə̂u.