Read Ngombale 2 Korêŋtə 8 Bible Online

2 Korêŋtə 8 - Ngombale bible

2 Korêŋtə 8

¹Pəfə̌r, paghʼ pə̌ nkoŋ ńgó pei jí mbə̂u yi Sê kə lǎghʼ nyárə́ poŋə-ntə̂ʉ yé yi tə́ ndaghʼə mbó pye Kəlísto pi Masedwânə.

²Ə ngwôʼ kə kə́u pye Kəlísto pi Masedwânə gháʼate; gháp pə̂ tə mə́ mbûŋ puŋú lə́, ə́ ngwǒ tə́koʼ lətsei məntə̂ʉ páp tə nkôŋ gháp koŋə́ ŋə́ məzə̂u tə ə́ zâa zǎa.

³Məŋ ndaʼ zə̂u yi n nkə jwó pə́ məŋ, gháp kə ŋə̂ ndwuŋ yi gháp kǔʼ mə́u tə mbə́i nděi yə́rə́, lə́ ə́ nkoŋ gháp koŋə́ ńŋə́.

⁴Gháp kə sʉ́ʉtə́ wághʼ gháʼate, ńgó paghʼ pə́i gháp ŋə̂ záp zə̂u lə̂ ndághʼ ḿpfûtə pye Sê pi Yelúsalêm.

⁵Gháp kə ghʉ tə ndêi ghíʼ paghʼ kə pə́ nkwâŋ zághʼ, ńté ńgó gháp kə yaa ntsə̌mbi ŋə́ lənyâŋ ghap mbó Nde, ə́ pou kûʼ lə̂ nzúʼ ntsʉ wághʼ lə̂ no tsəm yi paghʼ wo lǎʼ lə́ páp. Ə́ pə̂ ghíʼ Sê pə̌ nkǒŋ.

⁶Ə̂ zə̂u yi ə́ kə ghʉ̌, paghʼ sʉ̂ʉtə Tîtə ńgó a kə́ ncí ngwó lâʼ pei, ə́ myághʼə́ yo faʼ poŋə-ntə̂ʉ yi a lə ghʉ̌ pei jî lo.

⁷Ə́ pə́ lə̂ zə̂u tsəm, pei lə̂ nyárə fəiʼ shʉʼʉ: pei ghwo pə̂i-ntə̂ʉ nzəm Yěso Kəlísto, pei kûʼ lə̂ ndâʼ tsâr yé, ə́ njí no lə́nə́ʉ tsəm yi náŋtə́ no ye, ə́ ngwǒ zaŋə-mbəʉ lə̂ zə̂u tsəm, ə́ ngwǒ nkoŋə nzəm paghʼ. Ə́ pə̂ yə́rə́, pei kə́ ncí nyárə́ fəiʼ shʉʼʉ lə́ faʼ poŋə-ntə̂ʉ zêi.

⁸Kâa n ndâʼ gháʼá ńgó pei ghʉ́ pə̂ zə̂u yi m mə̌ nkǒŋ, n ndaʼ wéi pə́ ghíʼ məcó məcûʼtə pye Kəlísto kə zaŋə́ mbəʉ ńgʉ̂, n ndaghʼ ndôu ńgó pei ghʉ́ zei mbə̂u tə pə fú mə́u, ə́ njwó ńgó pei yaa ngwǒ nkoŋə lə́nə́ʉ nzəm pye-mə́soŋ.

⁹Ńté ńgó pei pə̌ njî poŋə-ntə̂ʉ yi tə́ ndaghʼə yi Nde wághʼə Yěso Kəlísto ghwǒ nzəm paghʼə. A lə pə́ ngaŋə-zə̂u, lə́ ə́ mbə́i lə̂ mbə́ mbûŋ ńté wéi, lə̂ ngʉ́ pei lêi lə̂ pûŋ yé, ə́ ncʉ́ʼ pye pi Sê ŋə̂ məzə̂u lə́ páp gháʼate.

¹⁰N ndaʼ wéi gháʼa zâa kwaŋtə yi n ngwǒ lə̂ zêi yo no nkâp, ə́ lə pə́ mpfu wo, ə́ nguʼ gháʼá, pei lə̂ pə̂ pəluŋ-mbi lə̂ ngwô kwaŋtə ńgó mboʼ pə́ ŋə̂ zə̂u ńdaghʼ ḿpfútə́ pye Kəlísto; pêi lə̂ ghwǒ lə̂ njî. Ə zə̂u yi pei lə̌i ngʉ́ ə́ poŋ,

¹¹ə́ pə́ ghíʼ pei wo myǎghʼ faʼ yi pei lə jǐ lêi. Ə́ pei ghí myǎghʼ faʼ zêi, wǒwó ŋə́ pə̂ yé zə̂u yi a kǔʼ mə́u. Ə́ ndʉŋ-ndʉŋ ghíʼ pei lə lǎghʼ zaŋə-mbəʉ kwâŋ lə̂, pei kə́ ndághʼ pə̂ zaŋə-mbəʉ ńgʉ́ yə́rə́.

¹²Ŋuu ŋə̂ zə̂u lə̂ ntə̂ʉ shʉʼʉ, ə Sê ghí pə̂i zə̂u yi ngaŋ ŋə̌, ə́ fú pə́ lə̂ yi ngaŋ ghwǒ. Káa a pə́ fû yé lə́ yi káa ngaŋ ghwô yé.

¹³Kâa n ndâʼ ńgó pei ŋə́ lə́ pəcó pye tə mbûŋ zéi. Ə́ laghʼ mbə́ pə́ ńgó pə ghʉ́ tə wǒwó ghwô ye məyʉʼ.

¹⁴Ə́ pə̂ mpfu wo, məzə̂u méi zâa tə nzéʼ; pei wo lə́ mi ə́ zéʼ lêi, ə́ ŋə̂ məcó lə́ pye pi gháp pə́ mbúŋ; ńté ńgó mboʼ ə́ ghʉ mbə́ có leʼé, gháp ghwô tə ə́ zêʼ; pei pə̂ mbúŋ, gháp kə̂ ŋə̂ záp mi ə́ zéʼ lə̂ máp məzə̂u lə́ pei lə́wó; pei pə pǎp cʉ̂ʼ ndághʼ ńgwǒ zə̂u ndʉŋ-ndʉŋ.

¹⁵Ə̂ lághʼ mbə̂utə́ lə̂ no yi pə́ lə ŋwáʼá cər ŋwaʼa Sê ngô: «Ŋuu yi a lə lǒghʼ zə̂u tə ə́ zâa, kâa lə mêʼ yé có, ŋuu yi a lə lǒʼ zə̂u ə́ khwôghʼ kâa kə́ mbûŋ yé có.»

¹⁶Ləghûʼ pə́ mbó Sê ghíʼ a kə ghʉ̌ ńgó Tîtə kə́ ngwô zaŋə-mbəʉ lə̂ məno méi pə́ ghíʼ paghʼ!

¹⁷Ə̂ zə̂u yi ə́ lə ghʉ̌, paghʼ lâʼ lə́ zʉ́ ńgó â kə́ ncí mbə̂ʉ lâʼ pei náŋtə́ wéi, a fátə mbə́i. Káa a tô yé ńté pə́ no paghʼ tə̌u yé, a lə yaa mə́ nkwâŋ lə̂ ntó ńjwó wéi, mbəʉ ye záŋə mə́u gháʼate.

¹⁸Paghʼ tə̌u yé gháp cǒ tâʼ fə̌r yi məcûʼtə pye-Kəlísto fə́tə́ yé gháʼate, ńté mbə̂u yi a laghʼ ńtsə́tə́ Nkəʉ Shʉʼʉ.

¹⁹Ə́ yaa ngí pə́, mə́i məcûʼtə pye-Kəlísto kə tsóʼ yé ńgó paghʼ pə pǎp tə̂m ku ŋə̂i, ə́ fǎʼ faʼ poŋə-ntə̂ʉ yo, ə́ pə̂ faʼ yi paghʼ ghwǒ lə̂ fâʼ, ə́ ndághʼ ńgʉ ləjôghʼ Nde ghûʼ, mbaa lə̂ ndághʼ ńgʉ̌ pə́ jî ńgó paghʼ ghwo ntə̂ʉ shʉʼʉ lə̂ ndághʼ ḿpfútə́ pye-mə́soŋ.

²⁰Nkâp yo zǎa, káa paghʼ pə́ nkôŋ ńgó pə jwô có lǒʼ lə̂ mbə̂u yi paghʼ laghʼ ńgwô zěi.

²¹Ńté ńgó paghʼ pə̌ nkoŋ lə̂ ngʉ́ zə̂u yi ə́ ghǐ poŋə́ Sê, ə́ kə́ poŋə́ pye-mə́soŋ lə́wó.

²²Paghʼ tə̌u gháp pə Tîtə, ə́ nkʉʼʉ́ có fə̌r waghʼə, a pə̂ ŋuu yi paghʼ náŋtə́ mə́ yé lə̂ məno tə nzáa, ə́ njwó a pə̂ ngaŋə zaŋə-mbəʉ lə̂ mpfútə́ pəcó pye. A pou mbə́ mpfu wo, ə́ nkʉ́ʼʉ́ nzáŋə́ mbəʉ lə̂ məno méi ńté ńgó a pəi mə́ no zéi tə ntə́m nzəm yé ńŋə́ lə́ pei.

²³Ə́ ngwǒ lə́ Tîtə, mə́i â ngaŋə-ku ghâa ə́ mbou mbə́ ŋuu yi a tôutə ghâa lə̂ mpfútə́ wéi. Ə́ ngwǒ lə́ pəcó pye pə́pwô, mə́i ghâp pye pi məcûʼtə pye-Kəlísto tə́u gháp lə̂ ngʉ́ ləjôghʼ Kəlísto ghûʼ.

²⁴Gháp lə̌i tó, pei nyárə́ gháp ńgó pei ghwo kwaʼ nkoŋə yi no lə́nə́ʉ nzəm páp. Ə̂ lêi yə́rə́, məcûʼtə pye-Kəlísto mi ə́ tə́u gháp jí ńgó paghʼ laghʼ wéi ńŋâʼtə mbi páp gháʼá, ə́ pə̂ no-lə́nə́ʉ.