Read Ngombale 2 Korêŋtə 9 Bible Online

2 Korêŋtə 9 - Ngombale bible

2 Korêŋtə 9

¹Ə́ wo lə̂ no zə̂u yi pə́ ghwǒ lə̂ máʼ ńdaghʼ ḿpfútə́ pye Kəlísto pi Yelúsalêm, mə́i káa n nyáa ngwô ghâa lə̂ nkə́ njóghʼ ŋwáʼá ŋwaʼá ə́ ŋə́ lə́ péi;

²ńté ńgó m mə̌ njî mbə̂u yi pei lǎghʼ ńgwǒ poŋə-ntə̂ʉ, tə n nkə mə́ ndághʼ wéi ńŋáʼtə́ mbi pye-Kəlísto pi Masedwânə, ə́ ndâʼ ngô: «Ə́ pə́ mə́ mpfu wo tâʼ nguʼ, ghíʼ pəfə̌r pi paghʼə-ngoŋ Akayî tsuŋtə́ mə́ mbəʉ záp tə ntə́ʉ lə̂ mâʼ záp zə̂u laghʼ ḿpfútə́ pye Kəlísto pi Yelúsalêm.» Ə mbə̂u yi pei laghʼ ńzáŋə mbəʉ lə̂ ŋə́ zə̂u, lə́ lə pə̌i ncʉ́ŋə́ pəcó pye təcər páp, gháp poŋə́ jǐ záp lə̂ ŋə́.

³Ə̂ zə̂u yi ə́ ghʉ̌, n ntə̂u pəfə̌r pwo pə́tárə́ lâʼ pei; ə́ ndaghʼ ńdôu ńgó koo məno mi paghʼ lə lǎʼ mbi páp ə́ ndaghʼ ńŋáʼá ndwuŋ wéi ghʉ̂ nkwâr məlaa. M mə̌ ntsâa lə̂ ntáa ngǐ ntó, mə́i pei tsuŋtə mə́ zéi zə̂u tə ə́ pəu kwaʼ ghíʼ n ndə lǎʼ gháp.

⁴Ńté ńgó n ndə̌i ngʉ́ mə́ ntó, pəcó pye Masedwânə tsə́ʉ nzəm məŋ, ə́ nkə́u njwó ńgó pei kə́ mâʼ zéi zə̂u tə ə́ pəu, mə́i sə̂ʉ wo kó wághʼ lə̂ mbə̂u yi paghʼ lə lǎghʼ ńŋáʼá ndwuŋ wéi mbi páp, ə́ pə̌i kó wéi tə lěi wághʼ.

⁵Ə̂ zə̂u yi ə́ ghʉ̌, n nsʉ̂ʉtə pəfə̌r pwo ńgó gháp pyə̂ghʼ lâʼ pei, ə́ ntóutə́ wéi, pei pə pǎp kə̂itə́ zêi zə̂u yi pei lə lǎghʼ poŋə-ntə̂ʉ zéi ḿbə́i lə̂ ŋə́. Ńjí ńgó n ndǎʼ ngǐ tó, mə́i ə́ pəu mə́; ə́ pə fú mə́u njwó ńgó pei ŋə̌ lə̂ poŋə-ntə̂ʉ zéi tə lə́u pə́ fárə yé wéi fárə́ po.

⁶Pei tsúŋú njí ńgó ŋuu lə̌i mbî zə̂u ə́ khwóghʼ, mə́i a ghʉ̌ kə́ pyé ə̂ khwóghʼ. Ŋuu póu mbǐ zə̂u ə́ záa, a ghʉ̌ nkə́ mbyé ə́ zâa lə́wó.

⁷Ə́ pə̂ yə́rə́, ə́ mə́ ntúŋu ńgó wǒwó ŋə̂ yé zə̂u ghíʼ ntə̂ʉ yé lǎʼ, tə́ pə́ nzáŋə lóŋ, tə́ ghó pə́ fárə́ yé farə́; ńté ńgó Sê koŋ no ŋuu yi a ghí pə́ ŋə̂ zə̂u, ə́ ŋə́ lə̂ lətsei.

⁸Ńté ńgó ə Sê ghwo mətəʉ lə̂ ndághʼ ńŋə́ wéi məzə̂u shʉʼʉ mbə̂u lə̂ mbə̂u, ńjí ńgó pei pə̂ mpfu tsəm, ə́ mə́ ngwô zə̂u tsəm yi pei pə̌ nkǒŋ, ə́ mbou ngwô tə ə́ kuʼ ghíʼ mboʼ pei lâghʼ ńsʉ́ŋ məno shʉʉ mə́tsəm.

⁹Ə́ laghʼ ḿbə̂utə lə̂ no yi pə́ lə ŋwaʼá cər ŋwaʼa Sê ngô: «A ghaptə məzə̂u mé mi shʉʼʉ mbó pəpûŋ, poŋə-ntə̂ʉ yé ə̂ yi tə́ láʼ mé[2].»

¹⁰Ə Sê ŋuu yi a ŋə̂ mbi zə̂u lə́ ngaŋə nkâʼ, ə́ mbou ŋə̂ yé məzʉ̂ a zʉ̂. A wo ŋə́ wéi mbi zə̂u tsəm yi pei pə̌ nkǒŋ, ə́ pǒu ghʉ̌ ə̂ zə́r, ńjí ńgó pei laghʼ poŋə-ntə̂ʉ, ə́ nkʉʼʉ́ ńŋə́ məzə̂u lə́ pye.

¹¹Ə́ ghʉ̌ lěi yə́rə́, ə́ pei cʉ́ʼ pəghaŋə-zə̂u, ńjí ńgó pei ghwo məzə̂u mbə̂u lə́ mbə̂u lə̂ ndâghʼ ńfǎʼ məfaʼ poŋə-ntə̂ʉ. Ə̂ lêi yə́rə́, pye tə nzáa ŋə́ nkhwo mbó Sê gháʼate, ńté məzə̂u mi pei tə̌u ńŋə́ lə́ páp.

¹²Ńté ńgó məzə̂u mi pei tə̌u ńŋə́ lə́ páp lêi, ə́ wo pfútə́ gháp lə̂ məzə̂u mi ə́ yǎa mə́ mbûŋ gháp, ə́ pǒu ghʉ̌ pye tə nzáa kʉ́ʼʉ́ ŋə́ nkhwo mbó Sê gháʼate, ńté zə̂u yi pei ŋə̌ lə́ páp.

¹³Gháp wo jwó mbə̂u yi pei lǎghʼ ńsáʼ təʉ lə̂ faʼ yo, ə́ ŋə́ ləghûʼ mbó Sê, ńté ńgó pei kə zûʼ Nkəʉ Shʉʼʉ Yěso Kəlísto, ə́ mbǒu mə́ ngʉ̂ ghíʼ ə́ yǎa mə́ ntúŋú. Gháp wo kə́ cí ŋə́ nkhwo mbó Sê gháʼate, ńté ghíʼ pei lǎghʼ poŋə-ntə̂ʉ zéi ńgáptə́ məzə̂u méi ə́ ŋə̂ máp, ə́ nkə́ ncí ŋə́ mi pəcó pye.

¹⁴Gháp wo kǒŋ no zéi gháʼate, ə́ pǒu nyáŋ pə́ sʉ̂ʉtə Sê tû pei; ńté ńgó a ŋə̂ məzə̂u shʉʼʉ tə́ fəiʼ zéi wó lə́ pei, pei ghwô poŋə-ntə̂ʉ gháʼate.

¹⁵Paghʼə ŋə́ nkhwo mbó Sê ńté zə̂u shʉʼʉ tə́ fəiʼ zěi wó yi a lə ŋə́ lə́ paghʼə.