Read Ngombale Galâtə 1 Bible Online

Galâtə 1 - Ngombale bible

Galâtə 1

¹Məŋ Pôl, ngaŋə-ntə̂u Yěso Kəlísto, məŋ ŋwaʼá ŋwaʼa wo. N ngí pə́ ngaŋə-ntə̂u Yěso Kəlísto, káa pye-mə́soŋ lə̂ lâghʼ ghâa ńgʉ̌ wěi, káa leitə ghâa pə́ lə̂ cǒ ŋuu pə́ wěi, Yěso Kəlísto gháp Tə́ waghʼə Sê lə́ lə lǎghʼ ghâa ńgʉ̌ wěi; Yěso Kəlísto wêi, ə Sê lə ghʉ a zʉ̂ʉ lə̂ ləwʉ̂.

²Paghʼ pə pəfə̌r pi gháp pə́ yaʼa pə́ ntsêʼtə məcûʼtə pye Kəlísto mi ə́ pə́ cər paghʼə-ngoŋ Galâtə.

³Ńgó Tə́ waghʼə Sê gháp Nde waghʼə Yěso Kəlísto ghwô poŋə-ntə̂ʉ yi tə́ ndaghʼə nzəm pei, ə́ ncóghʼ mə́shwítə məntə̂ʉ pei.

⁴Kəlísto wêi lə ŋə̂ tû yé pə́ zʉ́ lə̂ ndághʼ ńkwarə́ wághʼə lə̂ məfaa waghʼə, ə́ mbou mpfú wághʼə mbó mətəʉ tə́poŋ mi ə́ sâʼ nzʉ̂ yo, ə́ pə̂ faʼ yi Tə́ waghʼə Sê lə pə́ nkôŋ ńgó â fáʼ zěi.

⁵Paghʼə ghúʼtə Sê lə̂ mənguʼ mənguʼ! Ə̂ pə́ yə́rə́.

⁶Ə́ fú nkəʼə́ ghâa gháʼate ghíʼ pei lêi-lěi ntə́m nzəm ńŋə́ lə́ Sê, ə́ ncʉ́ʼ nzûʼ pə́ nkəʉ yi ndeʼe ə́ ndághʼ ńfûŋ Nkəʉ Shʉʼʉ, lə́ mə́i Sê zêi lə lâghʼ poŋə-ntə̂ʉ yé yi tə̂ ndaghʼə ə́ ndeitə́ lə́ Kəlísto ə́ fúŋ wéi, ə́ ndághʼ wéi ńgʉ̌ pye pé.

⁷Kwaʼ lə́nə́ʉ cǒ Nkəʉ Shʉʼʉ yi ndeʼe kâa pə̂ yé wó; ə pye lə́ pə́ wó mə́ mbə̂u tû zéi, ə́ ndou lə̂ nkə́p Nkəʉ Shʉʼʉ yi náŋtə́ Kəlísto.

⁸Lə́ ə́ lə̌i mbə́ pə́ wǒ ŋuu, kəʉ paghʼ, kəʉ pə́ tâʼ cwôʼ Sê yi a fǔ tʉ̌-lə́pû, ə́ ntó mə́ ntsə̂tə cǒ nkəʉ yi ndeʼe tə ə lə́iʼ kə́ pə́ pə̂ Nkəʉ Shʉʼʉ yi Kəlísto po, ə Sê côghʼ ndou tû zʉ́!

⁹Paghʼ kə laʼ mə́ wéi, m mbou mbyə́ghʼə́ nkə́ ncí mə́ ndâʼ wéi mpfu wo ngô: ŋuu lə̌i ntó ndáʼ wéi cǒ nkəʉ yi kâa pə́ yé Nkəʉ Shʉʼʉ yi pei lə pə́i zěi, ə Sê côghʼ ndou tû zʉ́!

¹⁰Pei kwâŋ ńgó n ngʉ gháʼa ndághʼ ńdou ńgó pye-mə́soŋ pə́i no zâa mo? Ə ngə́, n ndou pə́ ńgó gháp pə́i no Sê. Pei kwaŋ ńgó n ndou ńgó no zâa poŋə́ pye-mə́soŋ mo? N ntə̌i mə́ ndôu ńgó no zâa poŋə́ gháp, mə́i kâa m mbə̂ ghâa ngaŋə-faʼ Kəlísto.

¹¹Pəfə̌r pâa nzəm Kəlísto, məŋ ndaʼ wéi ńgó Nkəʉ Shʉʼʉ yi n ndə lǎʼ wéi, kâa pə̂ yé yi ə́ fǔ mbó ŋuu-məsoŋ.

¹²Kâa cǒ ŋuu-məsoŋ lə̂ lə côghʼ yé wěi tû məŋ, kâa cǒ ŋuu kə́ ndâʼ yé ghâa no yi wěi laghʼ ńdâʼ, lə́ Yěso Kəlísto lə̂ lə kěʼ ghâa.

¹³Pei lə zúʼ ghíʼ pə́ leʼtə cǐ yi n ndə ghwǒ ə́ mpfu yi n ndə pyér mə́ ngûʼtə Sê pə́ lə̂ mbə̂u yi pəyúda. Pei pə̌ njî mbə̂u yi n ndə laghʼ ńŋə̂ ngwôʼ mbó cûʼtə pye Sê, mbaa mbə̂u yi n ndə laghʼ ńsâʼ təʉ lə̂ mbə́ghʼ cûʼtə zêi.

¹⁴Ə́ wo lə̂ ngúʼtə́ Sê lə̂ mbə̂u yi Pəyúda, n ntə̂ʉ tû-mbi təcər nkaŋ zâa, lə̂ məno mə́tsəm mi pə́ lə ghʉ měi. Ə́ ngwǒ lə́ nôghʼ lâʼ yi pətə́ paghʼ lə jyéʼ wághʼ, n ntə̂i mə́u, ə́ mbou nzáŋə mbəʉ ə́ nděi nkaŋ zâa ntsəm.

¹⁵Lə́, n ndə pyér pə́ ləpəm mə́ ghâa, Sê tsôʼ ghâa, ə́ ngʉ mbóu ndǎghʼ poŋə-ntə̂ʉ yé yi tə́ ndaghʼə ńfúŋ ghâa, ə́ ndaghʼ ghâa ńgʉ̌ ngaŋə-faʼ ye.

¹⁶Ə leʼé lə kuʼ mbó zʉ́, a ghʉ̂ məŋ njî ŋuu yi Môu ye pə̌ wěi, lə́ pə́ yi n ngwo leʼtə́ no Môu ye wêi mbó pye pi káa gháp pə̂ gháp pəyúda. N ndə ghí wǒ pə́ leʼtə yə́rə́, káa pfû ghâa ntǎghʼ mbó cǒ ŋuu,

¹⁷káa kə́ kóʼ ghâa wǒ Yelúsalêm pfú ntǎghʼ mbó pye pi gháp lə pyə̌ghʼ mbə́ pəghaŋə-ntə̂u Yěso Kəlísto, m mboŋə́ pə̂ zâa. Lə́, n ndə lêi-lěi ndə́r lə̂ cər paghʼə-ngoŋ Arabî, ə́ ngʉ mbóu fú wó ə́ mbə̌ʉ lə́ túsoŋ Damásʉ.

¹⁸Ə́ lei nguʼ tárə́, m mbə̂ʉ ńkóʼ lə̂ Yelúsalêm lə̂ njí ŋuu yi pə́ fûŋ yé ńgó Pyêh, ə́ nkə́u wó paghʼ zʉ́ ghʉ leʼé ntsap taa lə̂ ləghə̂m;

¹⁹kâa jwô ghâa cǒ ngaŋə-ntə̂u Yěso Kəlísto, tə ndyéʼ Jâghʼ, fə̌r Nde Yěso.

²⁰Ə no yi n ŋwaʼa ńŋə̂ lə́ pei lo ə̂ no lə́nə́ʉ, n ntə̌ʉ pə́ mbi Sê ndǎʼ, káa n ndághʼ ńtâŋ ghâa məlaa.

²¹Ə́ fú Yelúsalêm, ə́ ndə́r lə̂ cər paghʼə-ngoŋ Silə̂i, ə́ mbou ndə́r lə̂ cər paghʼə-ngoŋ Silisî.

²²Ə́ ghí pə́ mə́i məcûʼtə pye-Kəlísto mi Yudêi laa kə́ sâp gháp ləjôghʼ lə́ məŋ.

²³Lə́, ə́ nzúʼ pə́ ghíʼ pə́ leʼtə ngô: «Ŋuu yi a lə pə̂ cǒ mpfu ə́ ŋə̂ pye Kəlísto ngwôʼ lə̂ pə̂ mpfu wo, ə́ ncʉ́ʼ ŋáa ndêʼtə pə̂ Nkəʉ Shʉʼʉ lə̂ no pə̂i-ntə̂ʉ nzəm Yěso Kəlísto, ə́ Nkəʉ Shʉʼʉ yi a lə sâʼ mətəʉ lə̂ mbə́ghʼ lə̂.»

²⁴Ə́ pə̂ yə́rə́, gháp cʉ̂ʼ mə́ ngûʼtə Sê ńté ghâa.