Read Ngombale Galâtə 2 Bible Online

Galâtə 2 - Ngombale bible

Galâtə 2

¹Ə́ pou ndêi nguʼ ntsap kwo lə̂ ləghə̂m, paghʼ Pənə́páasʉ pəʉ lə̂ Yelúsalêm; ə́ ngǐ lə̌r, m mbyê Tîtə ə́ ncóghʼ nzəm məŋ.

²Ə́ ngǐ pə̌ʉ lə̂ wó yə́rə́, ə́ pə̂ ghíʼ Sê lǎʼ ńgó, n ngʉ́ yə́rə́. N nkə̂u Yelúsalêm, pəkə̌m Cûʼtə pye Kəlísto kəitə ńnyáŋ pə́ lə̂ záp yʉʼ; n ntə̂ʉ mbi páp, ə́ ndeʼtə́ gháp Nkəʉ Shʉʼʉ yi n ntsətə mbó pye pi káa gháp pə̂ gháp pəyúda. N ndə laʼ gháp yə́rə́, ńté no káa n ndə pə́ nkôŋ ghâa ńgó faʼ zâa yi n nkə faʼ mə́ kəʉ yi m mə̌ fǎʼ mpfu wo lêi fe.

³Ngaŋə-jyêʼ-no ghaa Tîtə pə̂ tə mbə́ pə́ ŋuu Gərêghʼ, lə́ káa pə fárə yé yé ńgó a wó ngʉ̌ pə pûʼ yé, â poŋə́ pə́ ŋuu Kəlísto;

⁴tə mbaa pə́ ghíʼ pəcó pətáŋ məlaa ńgó gháp pye Kəlísto lə pə́ ndôu ńgó pə pûʼ yé, ə́ só ńkə́u təcər paghʼ ghíʼ mənâŋ, ə́ mə́ ndôu lə̂ njwó ghíʼ paghʼ pi káa paghʼ pyér nzûʼ wághʼ ləpə̌ʉ pəyúda, ńté ńgó paghʼ lar mbəʉ zághʼ lə́ Yěso, ghʉ məno mághʼ; ə́ mbou mə́ ndôu lə̂ ngʉ́ paghʼ kə́ ncí mbə̂ʉ, ə́ mbə́i məpuʼ lə̂ ləpə̌ʉ pəyúda zêi.

⁵Lə́, káa paghʼ pə̂i wághʼ có no yi gháp lǎʼ, tə mbaa pə́ məyʉʼ; ə́ ndaghʼ ḿbôghʼ ńgó mboʼ gháp kə́pə no lə́nə́ʉ yi ə́ pə́ cər Nkəʉ Shʉʼʉ tə lə́u pei kə̂ nzûʼ wéi zěi ghíʼ ə́ yǎa mə́ ntúŋu ńgó mboʼ pei zûʼ po.

⁶Ə́ ngwǒ lə́ pye pi pə́ lə jwô gháp ghíʼ pəkə̌m ndə̂ Sê, mə́i káa gháp lə póu kə́ ntâghʼ gháp có ləpə̌ʉ shwî yi n ngwo ŋə̌i mə́u. Ə zə̂u yi gháp lə pə́ zêi kâa lə pə́ ndâʼ yé ghâa có zə̂u. Ńté no ə́ pə́ mbi Sê káa cǒ ŋuu lêi yé cǒ.

⁷Gháp lə pəi njwô pə́ ńgó Sê lə tsóʼ ghâa ə́ ntə́u ghâa ńgó n ngwó ntsə́tə́ Nkəʉ Shʉʼʉ mbó pye pi káa gháp pə̂ gháp pəyúda; ə́ ndʉŋ-ndʉŋ ghíʼ a lə tsóʼ Pyêh ə́ ntə́u yé ńgó a wo ntsətə́ Nkəʉ Shʉʼʉ mbó pəyúda.

⁸Ə Sê yi a lə ghʉ̌ Pyêh cʉ̂ʼ ngaŋə-ntə̂u Yěso, lə̂ ntsətə́ Nkəʉ Shʉʼʉ mbó pəyúda, lə̂ lə kə́ ngʉ́ ncʉ̂ʼ ngaŋə-ntə̂u, lə̂ ntsətə́ Nkəʉ Shʉʼʉ mbó pye pi káa gháp pə̂ gháp pəyúda.

⁹Jâghʼ gháp Pyêh, ə́ ngʉ́ Jâŋ pi gháp pə́ ghíʼ məntôu cər Cûʼtə pye Kəlísto lə lei lə̂ poŋə-ntə̂ʉ tə́ ndaghʼə yi Sê ghwǒ nzəm məŋ, ə́ mbə́i ńgó Sê lə̂ lə cóghʼ zêi yo faʼ mbó məŋ. Gháp lə ləi tə njí yə́rə́, ə́ tsêʼtə pô zâa, ə́ nkə́ ntsêʼtə́ yi Pənə́páasʉ lə́wó, lə̂ ndághʼ ńnyarə́ ńgó Paghʼ pə pǎp ghwo tâʼ ntsʉ lə̂ faʼ. Ə́ fú yə́rə́, ə́ ntsúŋtə́ ńgó paghʼ wo pə́ tsətə Nkəʉ Shʉʼʉ mbó pye pi káa gháp pə̂ gháp pəyúda, gháp pə́ ntsə́tə záp mbó pəyúda.

¹⁰Gháp lə cʉ́ʼ ntúŋu pə́ tâʼ zə̂u mbó paghʼ, ə́ ńgó paghʼ lə̌i nkə́u, koo paghʼ lyəghʼə lə̂ ntóutə́ pəpûŋ pi ə́ pə́ cər cûʼtə záp, ə́ túsoŋ Yelúsalêm, n ndə kə́u nkə́ ngʉ́ yə́rə́ lə̂ ntə̂ʉ ghâa tsəm.

¹¹Lə́ Pyêh ghʉ̂ ntó tə nkə́u Antyǒshə, n ntə̂ʉ mbi lâʼ, ə́ sáʼ yé lə̂ zə̂u yi a ghʉ zěi, ńté ńgó a lə yaa fǎa no.

¹²Ə no yi a lə fǎa zěi pə́ ńgó, pəcó pye pi Jâghʼ lə tə́u gháp lə ghí tó, Pyêh gháp pə pye Kəlísto pi káa gháp pə́ pəyúda pə̂ tə̂m zə̂u ńzʉ́. Pye pêi lei tə ntó, a jî lə̂ nkhʉ̂ pye pi káa gháp pə̂ gháp pəyúda; ə́ mə́ mbôghʼ ńgó pəyúda pêi wo jwó ghíʼ a ghʉ yə́rə́.

¹³Pəcó pəyúda jwô zə̂u yi Pyêh pə̌ ngʉ zěi, ə́ fəiʼi záp; ə́ ncʉ́ʼ ngʉ̂ záp pə́ ghíʼ zʉ́, ə́ pə̂ pə̌ tə Pənə́páasʉ zêʼ yé nkə́u lə́ páʼtə́ wei.

¹⁴N ndə jwó ńgó káa gháp pə́ ŋə̂i gháp ndʉŋ-ndʉŋ ghíʼ no lə́nə́ʉ yi ə́ fû lə̂ Nkəʉ Shʉʼʉ pə́ ndǎʼ, n ntə̂ʉ mbi lâʼ ə́ ndǎʼ lə́ Pyêh ngô: «Gho yi o pə̌ ŋuu pəyúda o kə́ pə́ yaʼa, ə́ ngʉ̂ pə́ ghíʼ pye pi káa gháp pə̂ gháp pəyúda, káa pə́ ghʉ gho ghíʼ ŋuu Pəyúda. O pou ntâghʼ cʉ́ŋə́ nzəm pye pi káa gháp pə̂ gháp pəyúda lə̂ ngʉ́ ghíʼ pəyúda áa?»

¹⁵Ə́ lə̌i ngwó lə́ paghʼə, mə́i paghʼə pəyúda tə fú leʼé lə́jí, káa paghʼə pə̂ wághʼə pye pi káa gháp pə́ Pəyúda, ə́ pye pi káa gháp pə́ ŋə̂i gháp ghíʼ ləpə̌ʉ Sê pə́ ntúŋú.

¹⁶Lə́ mə́ njî ńgó Sê fûŋ ŋuu ńgó ŋuu ndʉŋ-ndʉŋ mbi zʉ́, ńté pə̂ pə̂i-ntə̂ʉ yé nzəm Kəlísto, kâa pə̂ yé ńté ńgó a pə̌ ŋə̌i ghíʼ ləpə̌ʉ Mə̌usə̂i pə́ ntúŋú. Ə̂ zə̂u yi ə́ lə ghʉ̌, paghʼ zághʼ lə côghʼ ntə̂ʉ wághʼ lə́ Yěso Kəlísto ghíʼ Sê wo leitə́ lə̂ pə̂i-ntə̂ʉ zághʼ nzəm Kəlísto, ə́ cʉ́ʼ fúŋ wághʼ ńgó pye ndʉŋ-ndʉŋ mbi zʉ́, tə lə́u ə́ pə̂ yé pə́ no paghʼ ŋə̌i ghíʼ ləpə̌ʉ Mə̌usə̂i pə́ ntúŋú po. Ńté ńgó mboʼ Sê fûŋ yé ŋuu ńgó ŋuu ndʉŋ-ndʉŋ mbi zʉ́ ńté pə́ ghíʼ a ghʉ̌ zə̂u tsəm yi ləpə̌ʉ Mə̌usə̂i pə́ ntúŋú po.

¹⁷Lə́ paghʼ lə̌i mbə́i no Yěso Kəlísto, ə́ ndaghʼ ńdôu ńgó Sê fûŋ wághʼ ńgó pye ndʉŋ-ndʉŋ mbi zʉ́, pəyúda póu mə́ ndâʼ ńgó paghʼ pəghaŋə məfaa ghíʼ pye pi káa gháp pə̂ gháp pəyúda, ə́ laghʼ ḿbə́ ńgó Yěso Kəlísto ŋuu yi a ghʉ pə́ faa no kəʉ hó? Ə ngə́! Kâa pə̂ yé yə́rə́.

¹⁸Ŋuu lə̌i ndə̂ʼ lə̂ nkə́ mbóu mə́ ŋə̂i ghíʼ ləpə̌ʉ pə́ ntúŋú, ńté no kâa pə́ mpfútə yé yé lə̂ mbə́ ŋuu ndʉŋ-ndʉŋ mbi Sê, ə́ mbou nyáŋ tə nkə́ ncí mbə̂ʉ mə́ ŋə̂i ghíʼ zěi pə́ ntúŋú, mə́i ngaŋ ghʉ zə̂u yi kâa pôŋ yé Sê.

¹⁹Ńté ńgó ə́ pə́ lə̂ no ləpə̌ʉ, ə́ mbə́ ńgó n ndə kwʉ́ mə́, tû-mbəʉ ləpə̌ʉ zêi lə́ lə kə̂ njwí ghâa, ńjí ńgó n ncʉ̌ʼ ndaghʼ ləcǐ-mbî ghâa, ə́ fâʼ pə́ mbó Sê. N ndə lar mbəʉ zaa lə́ Kəlísto, pə́ naa wághʼ zʉ́ nkʉ̌ʉ lə̂ tʉ̌-mbʉ̂ŋtə.

²⁰M mbə̌ tə mə́ ncî ndəu ndesé, lə́ káa pə́ cî wó pə́ məŋ, Kəlísto lə̂ pə̌ wó, ə́ ndei lə́ məŋ. Ńté ńgó ləcǐ-mbî ghâa yi ŋuu-məsoŋ yi mpfu wo, n ncʉ̌ʼ ncî wěi pə́ lə̂ pə̂i-ntə̂ʉ nzəm Môu Sê yi a lə kǒŋ ghâa tə ŋə́ tû yé ńté ghâa.

²¹Kâa m mə́ nkôŋ ghâa lə̂ ngʉ́ poŋə-ntə̂ʉ Sê tə́ ndaghʼə yi a ghwǒ nzəm məŋ, ə́ lei fe. Ńté ńgó Sê lə̌i ndêi pə́ lə̂ mbə̂u yi ŋuu laghʼ ńŋə̂i ghíʼ ləpə̌ʉ pə́ ntúŋú mboŋə́ fúŋ ŋuu ńgó ŋuu ndʉŋ-ndʉŋ mbi zʉ́, ə́ laghʼ ḿbə́ ńgó ləwʉ̂ Kəlísto kâa lə pfûtə yé wághʼə lə̂ có zə̂u.