Read Ngombale Galâtə 3 Bible Online

Galâtə 3 - Ngombale bible

Galâtə 3

¹Pei pye Galâtə, pêi məghəghəʉ áa? Ə́ lei gháʼá pei pə́i ńgó pə côŋ tû zéi? Lə́ mə́i n ndə leʼtə́ wéi mbə̂u yi Yěso Kəlísto lə lǎghʼ ńkwʉ́ lə̂ tʉ̌-mbʉ̂ŋtə, tə́ ə́ cʉ̂ʼ shwí pə́ ghíʼ pei lə tə́ʉ yʉʼ wó ə́ mə́ njwó.

²M mə̌ nkoŋ ńgó pei pwôr wo tâʼ no yi ngwo ntúŋú pei lo: Zəghʼə Ndêi-lěi lə pə́ ghíʼi nkə́u lə́ pei ńté pə̂ no yi pei ŋə́i ghíʼ ləpə̌ʉ pəyúda pə́ ntúŋú kəʉ ńté pə̂ no yi pei zǔʼ Nkəʉ Shʉʼʉ ə́ mbə́i?

³Jîno zéi ghʉ gháʼá mboŋə́ cwí ndwuŋ wo? Ə no yi pei lə lǎghʼ Zəghʼə Sê ńjǐ, pei cʉ́ʼ lǎghʼ pə́ ndʉʉ mətəʉ wei lə̌r tə ə́ wǒ kə́u lyəghʼtə́ mpfu wo áa?

⁴Pei kwaŋ ńgó Zəghʼə Ndêi-lěi lə kə́u lə́ pei, ə́ ngʉ́ pei ghʉ̂ məno shʉʼʉ gháʼá, ə́ lei pə̂ fefe mo? Ə ngə́! Mboʼ ə́ lə pə̂ yé yə́rə́ fefe po.

⁵Sê lə côghʼ Zəghʼə yé lə́ pei, ə́ mbou mə́ ngʉ̂ mənkəʼə məno təcər pei, pei kwâŋ ńgó a ghʉ yə́rə́ ńté pə̂ no pei ghʉ̌ zə̂u yi ləpə̌ʉ pə́ ntuŋú kəʉ ńté pə̂ no yi pei zǔʼ Nkəʉ Shʉʼʉ ə́ mbə́i áa?

⁶Pə́ ŋwaʼa cər ŋwaʼa Sê ńté Ábələhâm ngô: «A lə ghwo pə̂i-ntə̂ʉ nzəm Sê, Sê lêitə́ mə́u ə́ fúŋ yé ńgó ŋuu ndʉŋ-ndʉŋ mbi zʉ́.»

⁷Pei tsúŋú mə́ njí ńgó pye pi gháp pə̂i no Sê, lə́ gháʼá mbə́ kwaʼ ngər-ndə̂ Ábələhâm.

⁸Pə́ lə ŋwáʼá cər ŋwaʼa Sê ńgó pye pi káa gháp pə̂ gháp pəyúda ghʉ̌ pə̌i no Kəlísto, Sê lâghʼ gháp ńgʉ́ pye pi gháp pə́ ndʉŋ-ndʉŋ mbi zʉ́. Ə̂ zə̂u yi ə́ lə ghʉ̌ Sê zâʼ nzʉ̂ ə́ tsətə́ Nkəʉ Shʉʼʉ zêi yo mbó Ábələhâm ngô: «N ngʉ̌ lěi lə́ gho, ə́ ncóghʼ mbwórə lə́ pye məlâʼ məntsəm ndəu ndesé.»

⁹Ábələhâm lə ghwo pə̂i-ntə̂ʉ nzəm Sê, Sê côghʼ mbwórə lə́ zʉ́; ə́ kə́ mbə́ ndʉŋ-ndʉŋ ghíʼ wǒwó yi a ghwǒ pə̂i-ntə̂ʉ nzəm Sê, a ghʉ̌ kə́ cóghʼ mbwórə lə́ zʉ́ yé lə́wó pə́ ghíʼ Ábələhâm.

¹⁰Ə Sê ghʉ̌ cóghʼ ndou tû ŋuu ntsəm yi a kwaŋ ńgó a ghʉ̌ lěi pə́ lə̂ mbə̂u yi a laghʼ ńŋə̂i ghíʼ ləpə̌ʉ pə́ ntúŋú, ə́ fúŋ yé ńgó ŋuu ndʉŋ-ndʉŋ mbi zʉ́. Ńté no pə́ lə ŋwaʼa cər ŋwaʼa Sê ngô: «Ŋuu lə̌i ndə́iʼ ŋə̌i mpfu tsəm ghíʼ ləpə̌ʉ tsəm yi pə́ ŋwáʼá cər ŋwaʼa Sê pə́ ntúŋú po, mə́i Sê wo cóghʼ ndou tû zʉ́.»

¹¹Ə́ yaa mbə́ lə́nə́ʉ ńgó mboʼ Sê fûŋ yé ŋuu ńgó ŋuu ndʉŋ-ndʉŋ mbi zʉ́ ńté pə́ ńgó a ŋəi ghíʼ ləpə̌ʉ pə́ ntúŋú po, ńté ńgó pə́ ŋwáʼá cər ŋwaʼa Sê ngô: «Ŋuu yi a láʼ cí pə̂ wó, â ŋuu yi a ghwǒ pə̂i-ntə̂ʉ nzəm Sê, ə̂ pə́ yə́rə́, â fûŋ yé ńgó ŋuu ndʉŋ-ndʉŋ mbi zʉ́.»

¹²Kâa ləpə̌ʉ pəyúda gháp no pə̂i-ntə̂ʉ nzəm Yěso Kəlísto cwíʼi gháp lə̂ có no. Ə̂ ghíʼ pə́ lə ŋwáʼá cər ŋwaʼa Sê ngô: «Ŋuu yi a ghʉ̌ zə̂u tsəm yi ləpə̌ʉ pəyúda pə́ ntúŋú lə̂ wo láʼ pə́ wó.»

¹³Ghíʼ ləpə̌ʉ ghʉ paghʼə khwôr pə̂ ndou lə̂, Kəlísto lə tó ə́ mpfú lətə̌ʉ zághʼə, Sê côghʼ ndou tû zʉ́, ə́ ngʉ́ yə́rə́ lə̂ ndághʼ ńzə́u tû zághʼə, tə ə́ pə̂ yi mboʼ Sê lâʼ nkə́ ncôghʼ yé ndou tû paghʼə po. Ə́ pə̂ ghíʼ pə́ lə ŋwáʼá cər ŋwaʼa Sê ngô: «Sê côghʼ ndou tû ŋuu yi pə́ kʉ̌ʉ yé lə̂ tʉ̌.»

¹⁴Kəlísto lə ghʉ yə́rə́, ə́ ndaghʼ ńdôu ńgó məzə̂u shʉʼʉ mi Sê lə ghʉ̌ ndaʼá mə́u lə̂ ngʉ́ ŋə́ lə̂ ngər Ábələhâm, ə pye pi káa gháp pə́ Pəyúda ghʉ́ ngwo záp, ə́ ndeitə́ lə̂ pə̂i-ntə̂ʉ yi gháp ghwǒ nzəm Yěso Kəlísto. Ə́ nkə́ ncí ndághʼ ńdou ńgó paghʼə pə́tsəm pi paghʼə ghwǒ pə̂i-ntə̂ʉ nzəm zʉ́, ghʉ́ ngwǒ Zəghʼə Ndêi-lěi yi zʉ́ Sê lə ghʉ̌ ndaʼá mə́u lə̂ ŋə́ lə̂.

¹⁵Pəfə̌r pâa nzəm Kəlísto, n ngwo pyé tâʼ fəiʼ lə̂ məno mi leitə təcər pye-mə́soŋ mpfu tsəm, ə́ lǎghʼ ghʉ̌ pei zúʼ no zêi yo. Pye pə́pwô lə̌i nyáŋ sê ndǎʼ no tə fár lə̂ ləghǒ, ŋuu pôu myaghʼə́ ndə̂ʼ mo, ə́ nkə́ nkʉ́ʼʉ có zə̂u mə́u mo?

¹⁶Ə́ kə́ mbə́ pə́ yə́rə́ mbó Sê, a lə ghʉ̌ ndaʼá mbó Ábələhâm tə mbaa lə́ ŋuu yi a ghʉ̌ poŋə́ jí yé. Ŋwaʼa Sê kâa pə́ ndâʼ yé ngô: «Tə mbaa pye pi a ghʉ̌ poŋə́ jí gháp» ghíʼ mpfu yi zêi zə̂u yaa mbə́ yi pye tə nzáa lə́ ghʉ̌ ghwǒ. A lə laʼ ngô: «Ə́ mbó tâʼ ŋuu lə̂ ngər-ndə̂ zô» gháʼá, ə́ ndaʼ pə́ tâʼ ŋuu yi a ghʉ̌ poŋə́ jí, wêi ŋuu pə̂ Kəlísto.

¹⁷N ndáʼ gháʼá, ə́ ndaghʼ ńdâʼ ngô: Sê gháp Ábələhâm lə lâʼ no tə fár lə̂ ləghǒ, ə́ pou ndêi nguʼ nkʉ ləkwo lə̂ mə̂m tárə́, Sê tə̂u ləpə̌ʉ ŋə́ mbó pye Ísə́lahêl. Ləpə̌ʉ zêi kâa lə və́rə́ yé zə̂u yi Sê lə ghʉ̌ ndaʼá mə́u lə̂ ngʉ́ ŋə́. Ləpə̌ʉ lə ghíʼi mbə́ghʼ no zêi, mə́i no yi Sê lə ghʉ̌ ndaʼá mə́u mbó Ábələhâm lə lei fe.

¹⁸Ə́ lə̌i ndə pə́ yi mboʼ Sê ghi ŋə́ zə̂u ŋuu ńté pə́ ghíʼ a pə̌ ŋəi ghíʼ ləpə̌ʉ pə́ ntúŋú, mə́i ə́ cʉ́ʼ mbə́ ńgó kâa ŋə̂ yé ńté pə́ ghíʼ a lə ghʉ̌ ndaʼá mə́u lə̂ ŋə́. Sê lə lei lə̂ zə̂u yi a lə ghʉ̌ ndaʼá mə́u mbó Ábələhâm lə̂ ŋə́ lə́ zʉ́, ə́ nyarə́ yé poŋə-ntə̂ʉ tə́ ndaghʼə yi a ghwǒ nzəm zʉ́.

¹⁹Ghíʼ ə́ kə́ mbə́ yə́rə́ lo, tə Sê lə ŋə̂ ləpə̌ʉ mbó Pəyúda ńté hó? A lə ŋə̂ ləpə̌ʉ lə pə́ yi pə́ wo fú mə́u ə́ jí məno mi pə́ lə̌i ngʉ́ ə́ poŋə́ yé yé po. A lə ŋə̂ yə́rə́, lə́ pə́ yi pye wo ghwǒ ə́ lǎghʼ ńnyáŋ, ə́ pə́ zʉ̂ʼtə mpfu yi tâʼ ŋuu lə̂ ngər-ndə̂ Ábələhâm yi Sê lə ghʉ̌ ndaʼá ə́ ntê yé lêi wo tó. Sê lə tə́u pəcwôʼ pə́ ńgó gháp tó ntsə́tə́ ləpə̌ʉ zêi mbó pye-mə́soŋ, gháp tô ntsə́tə́ mbó tâʼ ŋəi kəm, a tô ntsə́tə́ mbó lâʼ.

²⁰Lə́, no lə̌i mbə́ yi ə́ nâŋtə pə́ tâʼ ŋuu, káa pə kə́ ngwô yé lə̂ ndôu ŋuu yi a wo ŋə̌i kə̌m lə̂ no zêi, Sê lə pə́ pə́ zə́ghʼə́-zʉ́, ə́ mpfu yi a lə ghʉ ndaʼá mbó Ábələhâm.

²¹Ə́ laghʼ ḿbə́ ńgó mboʼ ləpə̌ʉ toʼ zə̂u yi Sê lə ghʉ̌ ndaʼá mə́u lə̂ ngʉ́ ŋə́ lə́ paghʼə? Ə́ ngə́! Kâa pə̂ yé yə́rə́! Sê lə ghíʼi ŋə̂ có ləpə̌ʉ yi mboʼ pye-mə́soŋ ŋəi mə́u mbə́ wó, mə́i mboʼ gháp pə̂ pye ndʉŋ-ndʉŋ mbi zʉ́.

²²Lə́ ŋwaʼa Sê pə̌ ndaʼ ńgó pye pə́tsəm ndəu nzʉ̂, ə̂ məpuʼ məfaa, ńjí ńgó ə́ lei yə́rə́, Sê ŋə̂ zə̂u yi a lə ghʉ̌ ndaʼá mə́u lə̂ ngʉ́ ŋə́ lə́ ŋuu tsəm yi a ghwǒ pə̂i-ntə̂ʉ nzəm Yěso Kəlísto.

²³Ə no pə̂i-ntə̂ʉ nzəm Kəlísto lə ghí tó, paghʼə pə̂ məpuʼ ləpə̌ʉ tə ndáʼ ngwó nkə́u mpfu yi Sê lə tə́u Yěso Kəlísto, paghʼə pə̂i no yé.

²⁴Ə́ pə̂ yə́rə́, ləpə̌ʉ lə ghwo lə̂ mə́ mbâp wághʼə, tə nkə́u mpfu yi Kəlísto wo tó paghʼə lêi lə̂ pə̂i-ntə̂ʉ nzəm zʉ́, ə́ mbə́ pye ndʉŋ-ndʉŋ mbi Sê.

²⁵Lə́, tə fú ghíʼ paghʼə lə jǐ lə̂ ngwô pə̂i-ntə̂ʉ nzəm Kəlísto, káa paghʼə kə́ ngwô wághʼə lə̂ nkə́ nzúʼ mbó ləpə̌ʉ zêi.

²⁶Pei pə́tsəm yaa mbəi mbə́ ghəpə́ Sê, ńté ghíʼ pei pə̌i no Yěso Kəlísto, ə́ mbou ndár mbəʉ zei lə́ zʉ́.

²⁷Ə́ pə̂ yə́rə́ ńté ńgó pei lə leitə́ lə̂ pfû-nci, pei pə Kəlísto təmtə ncʉ́ʼ tâʼ, ə́ lei yə́rə́ pei cʉ̂ʼ mbə́ pə́ ghíʼ zʉ́.

²⁸Ə́ pə̂ yə́rə́, pei pə́tsəm cʉ̂ʼ tâʼ zə̂u mbi Sê, tə́ ə́ pə̂ yi mboʼ pə́ kə̂ njóghʼ mbéʼe yé ngô: wo ŋuu, ŋuu pəyúda, wo ŋuu kâa pə́ ŋuu pəyúda, wo ŋuu puʼ, wo ŋuu kâa pə́ yé puʼ; wo ŋuu â ŋuu mbiŋə, wo ŋuu pə̂ məngyě. Pei pə́tsəm təmtə lə́ Yěso Kəlísto, ə́ ncʉ́ʼ tâʼ ŋuu.

²⁹Ghíʼ pei pye Kəlísto lə̂, ə́ laghʼ ńdâʼ ńgó pei ngər-ndə̂ Ábələhâm, pei ghʉ̌ kə́ ghwo zéi zə̂u tsəm yi Sê lə ghʉ̌ ndaʼá mə́u lə̂ ngʉ́ ŋə́ lə́ páp.