Read Ngombale Galâtə 4 Bible Online

Galâtə 4 - Ngombale bible

Galâtə 4

¹Ə zə̂u yi n ndou lə̂ ntsúŋú ndǎʼ wéi pə́ ńgó, ə́ pə̂ mpfu yi nzʉ̂-ndə̂ pyěr nkhwóghʼ, gháp puʼ pə̂ pə́ tâʼ zə̂u, tə mbaa ghíʼ məzə̂u mə́tsəm mi tə́ yé nyěr pə́ pə̂ mé.

²Ə́ pə̂ mpfu yi a pyěr nkhwóghʼ, a ghwô lə̂ nzúʼ ntsʉ pye pi gháp tôutə yé mbou mə́ ntsûŋtə məno mé, ə́ kə́ láʼ ghʉ pə́ yə́rə́, tə láʼ nkə́u mpfu yi a ghwǒ ndwuŋ mənguʼ mi tə́ ye lə tághʼ ńgó a lə̌i ndáʼ ngwô pə́ nyêr zə̂u tsəm lə́ zʉ́.

³Ə́ kə́ mbə́ pə́ yə́rə́ lə́ paghʼə, ə́ lə pə́ mpfu yi paghʼə lə pyér ghəpə́, ə́ mbə́ məpuʼ mbó mətəʉ zəghʼə tə́poŋ yi ə́ sâʼ nzʉ̂ yo.

⁴Lə́ mpfu lə lei tə nkûʼ ghíʼ Sê lə tághʼ, a tə̂u Môu ye ndəu ndesé: a ghi tó, məngyě jî yé, a pə̂ ŋə̂i lə̂ ləpə̌ʉ Mə̌usə̂i.

⁵A lə tə̂u yé yə́rə́, lə́ pə́ yi a wo tsǔʼ tû pye pi gháp lə pə́ məpuʼ ləpə̌ʉ zêi, ńjí ńgó ə́ lei yə́rə́, paghʼə cʉ̂ʼ ghəpə́ Sê.

⁶Ə zə̂u yi pə́ nyarə ńgó pêi ghəpə́ Sê pə́ ngô: Sê lə côghʼ Zəghʼə Môu yé məntə̂ʉ paghʼə, ə̂ Zəghʼə zêi yi ə́ ghʉ paghʼə ghêʼtə ńfûŋ Sê ngô: «Ába, ə́ ndaghʼ ńdâʼ ńgó Tǎa!»

⁷Ə́ pə̂ yə́rə́, káa o kə́ mbyêr gho puʼ có zə̂u, lə́ ə́ ncʉ́ʼ mbə́ pə́ môu Sê. Ghíʼ o kə mə́ ncʉ́ʼ môu Sê lə̂, a ghʉ̌ ŋə̂ zô zə̂u yi a loʼó lə̂ ngʉ́ ŋə́ lə̂ ghəpə́ yé.

⁸Ə́ lə pə̂ cǒ mpfu, káa pei pə́ njî wéi Sê, ə́ mbə́ məpuʼ məzə̂u mi pə́ ghûʼtə fûŋ ńgó məsê, lə́ káa měi pə̂ yé Sê.

⁹Lə́ ə́ pou mbə́ mpfu wo yi pei pə mə́ njî kwaʼ Sê, mboʼ pə́ pəi ndáʼ ńgó Sê pə mə́ njî wéi. Ə́ pou nděi gháʼá, pei kə̂ ncí mə́ ntsə̂ʉ nzəm məzə̂u mêi mi kâa ghwô yé məcó mətəʉ, káa kə́ kuʼ yé lə̂ mpfútə́ ŋuu lə̂ có zə̂u? Pei pə̌ ndou mbyə́ghʼə́ mbə́ məpuʼ máp mo?

¹⁰Pei pə̌ ncôghʼ ngəwoghʼ lə̂ məcó məleʼé ghíʼ məleʼé lətsei, lə̂ pəcó pəsaŋ-mbî, lə̂ məcó məmpfu mbî mbaa lə̂ məcó mənguʼ-mbî!

¹¹M mə̌ mbóghʼ məzə̂u mi pei ghʉ lə̂! Ńgó ndeʼ có faʼ yi n ndə fǎʼ təcər pei lei fefe!

¹²Pəfə̌r pâa nzəm Kəlísto, m mə̌ sʉ̂ʉtə wéi ńgó pei ghʉ̂ ghíʼ məŋ, ńté ńgó n ndə pə́ təcər pei, ə́ kə́ ngʉ zâa ghíʼ pei. Káa pei lə ghʉ̂ wéi có no tə́poŋ lə́ məŋ.

¹³Pei pə̌ njî zə̂u yi ə́ lə ghʉ̌ n ndeʼtə wéi Nkəʉ Shʉʼʉ lə́ nduŋ-mbi mpfu: ə́ lə pə́ yə́rə́, ńté no n ndə pə́ ngôu.

¹⁴Ə ghou lə fú nzʉ́ ghâa tə mbəʉ zâa shwôr, lə́ pei kə̂ mpfu ghâa pfǔ təcər pei, káa nyə́ghʼə wéi ghâa. Pei lə cʉ́ʼ lə̂ ngʉ́ yə́rə́ lə́ məŋ, ə́ mpfu ghâa pfǔ ghíʼ tâʼ cwôʼ Sê, ghíʼ pə́ pfû Yěso Kəlísto.

¹⁵Ə́ lə pə́ mpfu wêi, pei ghwo lətsei gháʼate, ə́ poŋə́ wéi tə mboʼ pei lə tsôʼ nyôghʼ méi ńŋə́ lə́ məŋ; n ndə jwô. Ə́ pou nděi gháʼá, lətsei wei wêi poŋə́ mě?

¹⁶Ńjí ńgó n ncʉ̌ʼ ngaŋə-mbəu wei mpfu wo ńté no m mə̌ ndaʼ wéi no lə́nə́ʉ?

¹⁷Pəcó pye pə́ nyárə ńgó gháp pə́ koŋ wéi, lə́ kwaŋtə yi gháp ghwǒ nzəm pei kâa pôŋ yé, gháp lou pə̂ fú nzəm məŋ kwárə́ wéi, pei cʉ̂ʼ nkôŋ pə́ gháp.

¹⁸Ə zə̂u yi ə́ pǒŋ pə́ ńgó, ə poŋ ńgó pye záŋə mbəʉ lə̂ ngʉ́ no shʉʼʉ, lə́ ə́ mbǒŋ lə̂ ngʉ́ yə́rə́ maa mpfu tsəm, tə lə́u ngʉ̌ pə́ ndaʼ mpfu yi m mbə̌ təcər pei po.

¹⁹Ghəpə́ zâa, n nkə̌ ncí mə́ njwô ngwôʼ ńtê wéi pə́ ghíʼ məngyě yi môu pə̌ ndə̂u yé mpfu yi a wo njí wó lə̂. N nkə́ jwô pə́ yə́rə́ tə wǒ kə́u mpfu yi pei kǔʼ lə̂ ŋə̂i lə̂ məku Kəlísto.

²⁰M mə̌ ntsâa ńgó m mboʼ ə́ tə̂i ngí pə́ mpfu wo gháʼa, m mbə̂ pə́ təcər pei, ə́ njí mbə̂u yi n ngwo lǎghʼ lǎʼ wéi no. Ńté ńgó n ndei tə mə́ nkwâŋ məno mi pei pə̌ ngʉ měi mpfu wo, n ncʉ́ʼ ntə́pə təpə́.

²¹Pei pi pei koŋ ńgó ləpə̌ʉ sáʼ wéi, pei lâʼ ghâa: káa pei pə́ nzûʼ no yi ləpə̌ʉ zêi laʼ mo?

²²Pə́ lə ŋwáʼá cər ŋwaʼa Sê ńgó Ábələhâm lə ghwo ghəpə́ pwô, tâʼ pə̂ yi a lə jí lə́ məngyě yi a pə̌ puʼ, ləjôghʼ yé pə̂ Agâa; cǒ pə̂ yi gháp məngyě yi a lə pyághʼə́ yé lə jí, ləjôghʼ yé pə̂ Sará.

²³Môu yi məngyě yi a lə pə́ pûʼ lə jí, a lə kə́ njí wěi pə́ ghíʼ ŋuu mbiŋə gháp məngyě yaa njî môu; ə́ ngwǒ lə́ môu yi kwaʼ ngwě ye lə jí, a pə̂ môu yi Sê lə ghʉ̌ ndaʼá mə́u lə̂ ngʉ́ ŋə́ lə́ Ábələhâm.

²⁴No zêi yo ə̂ tâʼ saghʼ-ləghaa: pəngyě pêi pwo pə́pwô laghʼ ńnyárə məkaa mə́mbwô. Agâa laghʼ mbə̂ ləiʼi kaa yi Sê gháp Mə̌usə̂i lə wǎr ndəu ləkôr Sinayî; ghəpə́ pi gháp fû lə́ zêi kaa pə́ pə̂ məpuʼ.

²⁵Agâa laghʼ ḿbə̂ ləkôr Sinayî yi ə́ pə́ cər ngoŋ Arabî; ə́ ndághʼ ḿbə̂ túsoŋ Yelúsalêm yi mpfu wo, ńté ńgó gháp pə pye pé pə́tsəm nǎa mbə́ məpuʼ.

²⁶Có túsoŋ Yelúsalêm kə́ mbə́ tʉ̌-lə́pû kâa pə̂ yé puʼ, zʉ́ lə́ pə̌ mə́ waghʼə.

²⁷Ŋwaʼa Sê yaa mbə̌i mə́ ndâʼ ngô: «Pə́ cər lətsei gho nkə̌i məngyě, ə́ gho yi o laa kə́ jí ghô môu! Tsêi tə nji zô wô tʉ́, gho məngyě yi o laa kə́ zûʼ ghô ghíʼ môu lə̂u məngyě! Ghəpə́ məngyě yi pə́ lə meʼ yé ghʉ̌ záa lěi ghəpə́ məngyě yi a ghwǒ ndə̂u.»

²⁸Ə́ ngwǒ lə́ pei, pəfə̌r pâa, pei gháʼá mbə́ ghəpə́ yi pə́ lə ghí jí wéi ə́ laghʼ ḿbə̂utə lə̂ no yi Sê lə ghʉ̌ ndaʼá mə́u, ə́ ndʉŋ-ndʉŋ ghíʼ Ísaghʼ.

²⁹Ə́ lə pə́ ntsəmbi, môu yi pə́ lə jí yé ghíʼ ŋuu mbiŋə gháp məngyě yaa njî môu ŋə̂ môu yi pə́ lə ghí jí yé, ə́ laghʼ ḿbə̂utə lə̂ no yi Zəghʼə Sê lə lǎʼ ńgó pə́ poŋə́ jí yé, ə́ ngwôʼ; ə́ pə̂ mpfu wo, ə́ nkə́ mbə́ pə́ yə́rə́.

³⁰Lə́ ŋwaʼa Sê yaa mbə̌i mə́ ndâʼ ńgó ho? A pə̌ ndaʼ ngô: «Zǔŋ məngyě yi a pə̌ puʼ gháp môu ye; ńté ńgó kâa môu puʼ ghwô yé lə̂ ngwô có zə̂u lə̂ məzə̂u mi tǎaló lə nyér, ghíʼ môu məngyě yi pə́ lə pyághʼə́ yé.»

³¹Ə́ pə̂ yə́rə́ pəfə̌r pâa, káa paghʼə pə̂ wághʼə ghəpə́ məngyě yi a pə̌ puʼ, paghʼə pə̌ pə̂ ghəpə́ məngyě yi pə́ lə pyághʼə́ yé.