Read Ngombale Galâtə 5 Bible Online

Galâtə 5 - Ngombale bible

Galâtə 5

¹Kəlísto lə zâʼ nkʉ puʼ lóŋ paghʼə, ńjí ńgó paghʼə kə̌ mbyér mbə̂ wághʼə məpuʼ ləpə̌ʉ po. Ghíʼ ə́ kə́ mbə́ yə́rə́ lə̂, pei tə̂itə́, koo pei pə̂i pə́ kə̂ ncí ndághʼ wéi ńgʉ́ məpuʼ.

²Məŋ Pôl, məŋ ndaʼ wéi ńgó pei lə̌i mbə́i pə́ púʼ wéi, mə́i pei laghʼ ḿbə̂i gháʼá ńgó zə̂u yi Kəlísto lə ghʉ̌ ńté tû zéi kâa pyér mə́ mpfûtə yé wéi lə̂ có zə̂u.

³N nkə̌ ncí mə́ ndâʼ lə́ ŋuu tsəm yi a pə̂i pə́ pûʼ yé, ńgó a ghwo lə̂ ngʉ̂ zə̂u tsəm yi ləpə̌ʉ Mə̌usə̂i pə́ ntúŋú.

⁴Pei pi pei kwaŋ ńgó Sê ghí fúŋ wéi ńgó pye ndʉŋ-ndʉŋ mbi zʉ́, ə́ lêi pə́ lə́ ghíʼ pei pə̌ ŋəi ghíʼ ləpə̌ʉ Mə̌usə̂i pə́ ntúŋú, pei jí ńgó pei fú mə́ gháʼá nzəm Kəlísto nkhʉ̂, ə́ ncwí məzə̂u mi Sê lə ghwǒ lə̂ ngʉ́ lə́ pei.

⁵Ə́ ngwó lə́ paghʼ, mə́i paghʼ pə̌ nzʉ̂ʼtə ńgó Sê ghʉ́ fúŋ wághʼ ńgó pye ndʉŋ-ndʉŋ mbi zʉ́, ńté ńgó paghʼ ghwo pə̂i-ntə̂ʉ nzəm Kəlísto; ə Zəghʼə Ndêi-lěi lə́ ghʉ paghʼ zʉ̂ʼtə zěi, ə́ mbou mə́ ntsâa ńgó ə̂ tóghʼ ntó.

⁶Ə́ laghʼ ńdâʼ ńgó ŋuu lə̌i ndêi tə ndâr mbəʉ ye lə́ Yěso Kəlísto, pə́ púʼ yé kəʉ ndə́iʼ púʼ yé po, ə́ pfûtə yé yé lə̂ có zə̂u po: ə təʉ no yi a pə́ mə́u pə̌ pə́ ńgó â ghwô pə̂i-ntə̂ʉ nzəm Yěso Kəlísto, ə̂ cʉ́ŋə́ yé â ghwô nkoŋə nzəm pəfə̌r.

⁷Pei lə ji tə ə́ pə̂ mbôŋ! Wǒ ŋuu kə tsághʼə́ laŋə́-ndə̂u mbó pei, ə́ mbou ntôʼ wéi lə̂ nkə́ mbə́i no lə́nə́ʉ?

⁸Məno mi pə́ kə lǎʼ ə́ ndághʼ ńgʉ́ pei mêʼ laŋə́-ndə̂u zéi, kâa kə pə̂ yé məno mi ə́ fû mbó Sê yi a fûŋ wéi, ə́ ndaghʼ ńgʉ̂ pye pé.

⁹Cǒ saghʼ-ləghaa pə̌ ndaʼ ngô: «Məyʉʼ mvuŋ pə̌ ngʉ̌ faalə̂i tsəm kôʼ.»

¹⁰Ghíʼ paghʼə pə́tsəm lǎr mbəʉ zághʼə lə́ Nde lə̂, n ntə̂m nzəm zaa ŋə́ lə́ pei: ə́ fú mə́ njî ńgó mboʼ pei kə̂ nzâp wéi có laŋə́-ndə̂u yi ndeʼe, tə ndyéʼ yi n ndə nyárə́ wéi po. Lə́ ŋuu yi a maʼ tághʼə́ təcər pei, Sê ghʉ̌ tághʼ ngwôʼ tû zʉ́ tə ghíʼ a lə̌i mbə́i mbə́ pə̂ wǒ.

¹¹Ə́ ngwǒ lə́ məŋ, pəfə̌r pâa, n ntə̌i mbə́ ghíʼi ə́ mbyér mə́ njyêʼ pye pə́ ńgó gháp wó ngʉ̌ pə púʼ gháp, mə́i pə́ pou mbyér ŋə̂ ghâa ngwôʼ ńté hó? Ə́ tə́i ngíʼi mbə́ yə́rə́, mə́i no yi n ndêʼtə mbó pye ńgó pə́ lə kʉʉ Kəlísto lə̂ tʉ̌-mbʉ̂ŋtə, káa pyér mə́ ngághʼə cǒ ŋuu.

¹²Ńgó pye pi gháp maʼ taghʼə́ təcər pei lêi cʉ́ʼ lə̂ ngʉ́ pə́ pûʼ gháp, ə́ mbə́i fú ngʉ́ pə́ shû gháp shú!

¹³Lə́ ngwǒ lə́ pei, pəfə̌r pâa, mə́i Sê lə fúŋ wéi ńdaghʼ ńgʉ́ pye pé lə́ pə́ yi pei wo kə́ pə̂ wéi məpuʼ ləpə̌ʉ po. Ə no pə́ pə̂ ńgó koo pei lâghʼ no yi pei cʉ̌ʼ pəndʉʉ-nə̂r, ə́ ngʉ́ məzə̂u mi mbəʉ zéi cʉ́ŋə wéi ńgó pei ghʉ̂. Tə ncʉ́ʼ yə́rə́, pei lâghʼ nkoŋə yi pei ghwǒ, ə́ mpfútə́ mbəʉ zéi təcər pei.

¹⁴Ńté ńgó ə no yi pə́ lǎghʼ ńkə́r lətû ləpə̌ʉ tsəm pə́ ngô: «O ghwo lə̂ nkôŋ ŋuu-məsoŋ ntsəm ghíʼ o koŋ tû-mbəʉ zô.»

¹⁵Lə́ pei lə̌i mə́ ngʉ̂ ghíʼ mənye ləghěi mi pəcó shərə ndə̂utə pəcó, pəcó shərə mpfâr pəcó; ə́ pə́ yə́rə́, pei laghʼə́ tû zéi: mə́i ə́ ghǐ lyəghʼtə́, pei shərə́ ə́ mbə́ghʼ mbəʉ zéi pə́ pei.

¹⁶Ə no yi n ngwǒ lə̂ ndâʼ wéi ə̂ yo: pei pə́i Zəghʼə Ndêi-lěi pə́ ncághʼə ləcǐ-mbî wei, lə́u pei kə́ mə́ ngʉ̂ wéi məno mi məmbəʉ méi lə́ cʉ́ŋə wéi lə̂ ngʉ́ po.

¹⁷Ńté ńgó məno mi mbəʉ ŋuu cʉ́ŋə yé lə̂ ngʉ́ kâa pə̂ yé mi Zəghʼə Ndêi-lěi pə́ nkoŋ ńgó pə ghʉ̂; məno mi Zəghʼə Ndêi-lěi koŋ ńgó paghʼə ghʉ̂ kâa kə́ mbə̂ yé mi mbəʉ zághʼə cʉ́ŋə wághʼə ńgó paghʼə ghʉ̂: gháp pə̂ mpfu tsəm mə́ ndwóʼo lwóʼo, ə̂ zə̂u yi ə́ ghʉ ńgó paghʼə ghʉ́ zə̂u yi káa paghʼə yáa mə́ nkoŋ wághʼə lə̂ ngʉ́.

¹⁸Lə́ pei lə̌i mbə́i Zəghʼə Ndêi-lěi pə́ ncághʼə wéi, ləpə̌ʉ kə̂ sâʼ yé wéi po.

¹⁹Pə́ tsúŋu mə́ njî məno mi mbəʉ zághʼə cʉ́ŋə wághʼə paghʼə ghʉ̂ měi: ə ngʉ́ məghap, ə́ mbə́ məno ncoŋ ndwuŋ, ə́ mbə́ ncóghʼ ntə̂ʉ lə̂ məno mpfuʼ,

²⁰ə́ mbə̂ ngúʼtə́ məzə̂u ə́ fúŋ ńgó Sê gháp pə ngʉ̂ məkaŋ. Ə́ mbə̂ njî mbəu, ə́ mbə̂ nkə̂m məlaʼ mbou ngwô ŋwə́itə́, ə́ mbə̂ záŋə-lóŋ gháp lʉŋtə. Ə́ mbə̂ ncóghʼ ngâptə təcər pye-mə́soŋ, ə́ mbə̂ cóghʼ ngaptə təcər məcûʼtə;

²¹ə́ mbə̂ njwô zə̂u ŋuu, ə́ ndou ńgó mboʼ ə́ tə̂i mbə́ pə̂ záp, ə́ mbə̂ nó məluʼ mbʉ́ʉ, ə́ mbə̂ ŋáa ŋə̂i nzʉ́ mbou nó, ə́ mbə̂ ngʉ́ məcó məno mi ə́ pə́ ghíʼ mei mwo. M mə̌ nkweitə tû zéi mpfu wo ghíʼ n nkə mə́ nyáa nkweitə́: pye pi gháp ghʉ mbə̂u məno mwo láʼ ghwo gháp záp yʉʼ cər Ləfou Sê po.

²²Lə́ məntǎa-ntʉ́ mi Zəghʼə Ndêi-lěi ghʉ paghʼə zə̂m měi, a pə̌ ngʉ ŋuu ghwo nkoŋə, ə́ ngwo lətsei, ə́ ngʉ pə́ nyâŋ lə̂ mbwórə, ə́ ngʉ ŋuu ghwô shəghʼ-ntə̂ʉ, ə́ ngʉ́ ŋuu pfûtə pye, ə́ ngʉ ŋuu ghwô poŋə-ntə̂ʉ, ə́ ngʉ́ ŋuu tə̂m nzəm yé ńŋə́ lə́ ŋuu tə́ pôghʼ có zə̂u,

²³ə́ ngʉ́ ŋuu pə̂ ngwaŋ-lóŋ, ə́ ngʉ́ ŋuu jî ngwôtə́ mbəʉ yé. Kwaʼ lə́nə́ʉ, ləpə̌ʉ kâa tôʼ yé məzə̂u mei mwo!

²⁴Pye pi gháp lǎr mbəʉ záp lə́ Yěso Kəlísto lə naa mbəʉ záp gháp pə məno tə́poŋ mi gháp lə ghʉ, ə́ ngʉ̌ məzə̂u mi mbəʉ zêi lə tsâa, ə́ nkʉ̌ʉ lə̂ tʉ̌-mbʉ̂ŋtə.

²⁵Ghíʼ Zəghʼə Ndêi-lěi lə ghʉ paghʼə pə̂ wó lə̂, paghʼə nyér yé â cághʼə́ ləcǐ-mbî wághʼə.

²⁶Koo paghʼə ŋâʼtə, koo paghʼə nyâŋ kə̂m məlaʼ təcər paghʼə, koo paghʼə nyâŋ ngwô ŋwə́itə́ təcər paghʼə.