Read Ngombale Efêzə 6 Bible Online

Efêzə 6 - Ngombale bible

Efêzə 6

¹Ə́ ngwǒ lə́ pei ghəpə́, wǒwó təcər pei zúʼ ntsʉ tə́ gháp mə́ ye lə̂ mbə̂u yi Nde pə̌ nkǒŋ, ńté no ə̂ zə̂u yi ə́ pə́ ndʉŋ-ndʉŋ mbi Sê, pei ghwo lə̂ ngʉ̂ yə́rə́.

²Có ntǎghʼ Sê pə́ ndaʼ ngô: «Ŋə́ məkuʼ tə́ gho gháp mə́ gho», ə́ mbə́ nduŋ-mbi ntǎghʼ yi Sê lə ghʉ̌ ndaʼá mə́u lə̂ ngʉ́ ŋə́ tâʼ ntsoʼó-faʼ mə́u ngô:

³«O lə̌i ngʉ́ yə́rə́, mə́i o wo pə́ ndʉʉ-mboŋ, Sê pôu nkʉʼʉ́ məleʼé lâʼ mô ndəu ndesé yaʼa.»

⁴Ə́ ngwǒ lə́ pei pətə́ ghəpə́, koo pei lâghʼ cǐ zéi shôptə lóŋ ghəpə́ zéi, pei kóʼtə́ gháp lə̂ ntə̂ʉ shʉʼʉ, ə́ ngǐ pə́ kóʼtə gháp mə́ ntâghʼ gháp, ə́ mbou mə́ njyéʼ gháp zə̂u yi Nde pə̌ koŋ zěi.

⁵Ə́ ngwǒ lə́ pei məpuʼ, pei zúʼ ntsʉ pye pi gháp ghwǒ wéi ndəu ndesé yaʼa, ə́ shuʼú mbəʉ zei mbi páp, ə́ ŋə́ məkuʼ máp, ə́ ngwǒ ntə̂ʉ shʉʼʉ nzəm páp, ə́ ndʉŋ-ndʉŋ ghíʼ pei zûʼ ntsʉ Kəlísto.

⁶Koo pei ghʉ̂ yə́rə́ pə́ ndaʼ mpfu yi gháp tə́ʉ mbəʉ pei mə́ nâŋtə wéi, ə́ ndaghʼ ńdôu ńgó ə̂ poŋə́ gháp; lə́ pei lâghʼ ghíʼ pei pə̌ ngaŋə-faʼ Kəlísto, ə́ fâʼ mbó páp lə̂ ntə̂ʉ wéi tsəm ghíʼ Sê pə̌ nkǒŋ.

⁷Pei fáʼ mbó páp lə̂ ntə̂ʉ shʉʼʉ, ghíʼ mpfu yi pei təi faʼ pə́ mbó Nde, tə káa faʼ pə́ mbó pye-mə́soŋ.

⁸Ə́ ngǐ pə́ fǎʼ, ə́ mə́ njî ńgó Sê ghʉ̌ ŋə́ məntsoʼó-faʼ ŋuu tsəm, ə́ mi puʼ kəʉ pə́ mi fou-ndʉʉ, Nde ghʉ̌ leitə́ pə́ lə̂ məfaʼ shʉʼʉ wǒwó, ə́ tsóʼ faʼ yé.

⁹Ə́ ngwǒ lə́ pei pi pei ghwǒ məpuʼ, pei kə́ ngwó məpuʼ méi pə́ lə̂ mbə̂u yi pə́ lou ńgó gháp lághʼ ńgwǒ wéi; koo pei páŋə gháp páŋə́. Pei jí ńgó tâʼ Tə́ moʼ nǎa ngwǒ wéi pə páp, a pə́ tʉ̌-lə́pû, ə́ mbə́ ŋuu yi a ghap zə̂u pə́ tə́ nǎŋ sʉ̂ ŋuu.

¹⁰Ndyəghʼ-nzəm no yi n ngwo lǎʼ lə́ pei pə́ pə́ ńgó, pei lághʼ no yi pei pə̌ pye Nde, ə́ sʉ́ʉtə́ Sê ńgó a wô lə́ mətəʉ tə́ fəiʼ zěi wó mi a ghwǒ, ə́ ŋə̂ məcó lə́ pei.

¹¹Pei wé məzə̂u ntso mi Sê ŋə̂ lə́ pye pé pə̂ mə́tsəm, ńjí ńgó Sə́tə lə̌i ndághʼ pə́ zarə́-zarə́ mbə̂u ńtó, pei kûʼ lə̂ ndwóʼó yé tə ə́ ghi lyəghʼtə́, lə́u pei nyúʼu wéi lə̂ lətə̌ʉ zéi po.

¹²Ńté ńgó káa paghʼə wô pə́ ndwóʼo pye-mə́soŋ. Lə́ paghʼə wo pə́ ndwóʼo məzəghʼə tə́poŋ mi ə́ pə́ tə tʉ̌, ə́ lwóʼó pətə́-ndə̂ páp, ə́ lwóʼó zə̂u tsəm yi ə́ pə́ tə tʉ̌-lə́pû ngwô mətəʉ, ə́ lwóʼó pôu-ntôʼ nzə̌m pi ə́ sâʼ yo nzʉ̂.

¹³Ə̂ zə̂u yi ə́ ghʉ̌, m mə̂ ndâʼ lə́ pei ńgó pei fú mpfu wo, ə́ ngwér məzə̂u ntso mi Sê ŋə̂ lə́ pye pé pə̂ mə́tsəm, ə́ ndághʼ ńtsúŋtə́ mbəʉ zéi ghíʼ leʼé lâʼ tə́poŋ lə̌i ngʉ́ ntó, Sə́tə lâghʼ pə́ zarə́-zarə́ mbə̂u ńtó mə́ ndwóʼo wéi, pei kûʼ lə̂ ndwóʼó yé tə ə́ ghí lyəghʼtə́, lə́u pei nyúʼu wéi lə̂ lətə̌ʉ zéi po.

¹⁴Ghíʼ ə́ pə́ yə́rə́ lə̂, koo pei nyúʼu lə̂ lətə̌ʉ zéi: ə́ ndághʼ no lə́nə́ʉ ńgʉ́ têi zéi, ə́ ngwér lətyêr pei, pei lâghʼ ḿbə́ ndʉŋ-ndʉŋ mbi Sê ə́ ngʉ́ ndǐ ntso zei, ə́ mǎʼ ndəu pei;

¹⁵məlaŋə́ ntso méi pə̂ nzáŋə́ mbəʉ ńtsətə́ Nkəʉ Shʉʼʉ Kəlísto yi ə́ ŋə̂ mbwórə.

¹⁶Ə́ ndǎghʼ pə̂i-ntə̂ʉ nzəm Kəlísto ńgʉ̌ kə̂ʼ-ntso wei: a wo pfútə́ wéi lə̂ mbə́ghʼ mǒghʼ tsəm yi Ngaŋə-mbəu lar lə̂ məkoŋ mé ə́ ndághʼ ḿmâʼ wéi.

¹⁷Pei lâghʼ ḿbə́i ńgó Sê pə̌ ngʉ̌ pei cwôr, ə́ ngʉ̂ zei nkaghʼə-ntso, ə́ mbou ndághʼ tsâr Sê ńgʉ́ wei mə́puʼ-ntso yi Zəghʼə Ndêi-lěi ŋə̂ lə́ pei.

¹⁸Pei lâghʼ sʉ̂ʉtə ńdóu məzə̂u mei mə́tsəm mbó Sê. Pei sʉ́ʉtə́ Sê lə̂ məsʉ̂ mə́tsəm, ə́ ngǐ pə́ sʉ́ʉtə́, ə Zəghʼə Ndêi-lěi pə́ ntôutə wéi. Koo pei lê, pei kə́ ndár mbəʉ zéi pə́ lə́ Kəlísto. Ə́ sʉ́ʉtə́ Sê tû pye Sê pə́tsəm.

¹⁹Pei sʉ́ʉtə́ Sê tû məŋ lə́wó ńgó â cóghʼ tsâr yé ntsʉ məŋ. Ə̂ lêi yə́rə́, m mə̂ ndâʼ no yi ə́ lə pə́ ləlwǒ lə̂ Nkəʉ Shʉʼʉ tə́ pôghʼ.

²⁰M mbə̌ tə mbə́ pə́ ndə̂-tsâŋ lə́, ə́ mbə́ ntə̂u lə̂ ngwó ntsətə́ Nkəʉ Shʉʼʉ zêi yo. Pei sʉ́ʉtə́ Sê ńgó â ŋə́ ghâa mətəʉ n ntsə́tə́ zěi tə́ pôghʼ ghíʼ ə́ yǎa mə́ ntúŋu ńgó məŋ tsə́tə́ yə́rə́.

²¹M mə̌ nkoŋ ńgó pei zéi lə́wó jí ngwôʼ yi m mbə̌ cər wó, ə́ mbou njí zə̂u yi məŋ faʼ zěi. Tishîkə yi a pə̌ fə̌r ghâa, ə́ mbou mbə́ sə̌u ghâa yi lətəi-ndwuŋ, ə́ mbou mə́ fâʼ mbó Nde tə káa pǒu pə́ zûʼ yé no ndeʼe, wo tó lǎʼ wéi no tsəm.

²²N ngí pə́ tə̂u yé, ə́ mə́ njî zə̂u yi n ngʉ zěi, ńgó â tó nkə́u ńdáʼ wéi ghíʼ paghʼ pə̌ yaʼa mbə́, ə́ nkə́u ńcóghʼ məntə̂ʉ méi.

²³Ńgó Tǎa Sê gháp Nde Yěso Kəlísto pə́ ncôghʼ mbwórə, ə́ mə́ ŋə̂ nkoŋə gháp pə̂i-ntə̂ʉ mbó pəfə̌r pə́tsəm.

²⁴Ńgó Sê cóghʼ mbwórə lə́ ŋuu ntsəm yi a ghwǒ nkoŋə tə me nzəm Nde waghʼə Yěso Kəlísto.