Read Ngombale Filîpə 2 Bible Online

Filîpə 2 - Ngombale bible

Filîpə 2

¹Tə mbə̂u yi pei pə Kəlísto lǎghʼ ńtəmtə́ ḿbə́ tâʼ lo, ə́ gháʼa káa pə́ ŋə̂ wéi mətəʉ? Tə mbə̂u yi a lǎghʼ ńkǒŋ wéi gháʼa lo, kâa pə́ ncôghʼ ntə̂ʉ wéi? Tə káa pei pə Zəghʼə Ndêi-lěi nâa mbə́? Tə káa pei ghwo nkoŋə gháp poŋə-ntə̂ʉ təcər pei?

²Ghíʼ ə́ kə́ mbə́ yə́rə́ lə̂, pei ghʉ̂ n ngwô lətsei tə lə́u có zə̂u pûŋ yé mə́u po; pei kə́ ngwô pə́ tâʼ ntsʉ, ə́ nkə́ ngwô pə́ tâʼ nkoŋə moʼ, ə́ nkə́ ngwô pə́ tâʼ ntə̂ʉ moʼ, ə́ nkə́ ngwô pə́ tâʼ kwaŋtə moʼ.

³Koo pei ghʉ̂ có zə̂u lə̂ lʉŋtə kəʉ pə́ lə̂ mbə̂u yi pei laghʼ ńdôu ńgó pə́ jwó wéi, lə́ pei shúʼu-mbəʉ zéi ńŋə́ sê, ə́ njwó pəcó pye pə́ ghíʼ mpfu yi gháp lei wéi lə̂.

⁴Koo ŋuu tâghʼ yé tû pə́ lə́ ndʉʉ no ye, â náŋtə́ mbaa məno mi pəcó pye.

⁵Pei ghwô kwaŋtə yi Yěso Kəlísto lə ghwǒ.

⁶A lə fû leʼé ə́ mbə́ Sê, lə́ káa laghʼ yé təʉ kapə́ lə̂ no yi gháp Sê pəu tə ə́ pə̂ yi gháp zʉ́ kə́ nyâŋ pə́ tâʼ yʉʼ.

⁷Lə́ a lə nyêr zə̂u tsəm yi a lə ghwǒ, ə́ ncʉ́ʼ mbə́i pə́ ngaŋə-faʼ, ə́ ncʉ́ʼ ŋuu-məsoŋ, pə́ jî yé ghíʼ pə́ jî pye-mə́soŋ lə̂;

⁸a lə pə́i lə̂ shúʼú mbəʉ ye ŋə́ sê, ə́ mbǒu nzúʼ ntsʉ Sê tə pə́ kʉʉ yé lə̂ tʉ̌-mbʉ̂ŋtə, a kwʉ̂.

⁹Ə̂ zə̂u yi ə́ lə ghʉ̌, Sê kóʼo yé, ə́ ngʉ̌ a nyâŋ lə̂ lənyǎŋ jwǐ, ə́ mbǒu ŋə́ yé ləjôghʼ yi ə́ lěi mənyôghʼ mə́tsəm.

¹⁰A lə ghʉ ńgó ŋuu lə̌i nzúʼ ləjôghʼ zêi: ə́ mbə́ pə́ tʉ̌-lə́pû, ə́ ndəu ndesé, kəʉ tə cʉŋə ndesé, a kʉ̂ʼtə sê, ə́ ngúʼtə́ ləjôghʼ zêi,

¹¹ńjí ńgó ə́ lei yə́rə́, ŋuu tsəm laʼ ngô: «Yěso Kəlísto Nde!» ə́ ndaghʼ ńŋə́ ləghûʼ mbó Tǎa Sê.

¹²Ə̂ zə̂u yi ə́ ghʉ̌ pəsə̌u pâa pi lətəi-ndwuŋ, ə́ ndʉŋ-ndʉŋ ghíʼ n ndə pə́ təcər pei, pei pə̂ nzûʼ ntsʉ Sê lə̂, pei kə́ mə́ nzûʼ pə́ yə́rə́ lə̂ mpfu wo yi kâa m mbyér ghâa təcər pei lo. Pei sáʼ təʉ, koo ŋuu ghʉ̂ məghaa, ə Sê ghʉ mə́ pei cwôr, pei fâʼ məfaʼ mi pə̌u lə́ pye pi gháp cwór mə́,

¹³ńté no Sê pə̌ faʼ cər ntə̂ʉ pei, lə́ pə́ yi pei wo kǒŋ məzə̂u mi ə́ pǒŋ, ə́ pǒu ghʉ̌ mêi məzə̂u.

¹⁴Pei fâʼ zə̂u tsəm tə́ tsâtə, tə́ ghʉ̌ məzoŋə təcər pei,

¹⁵ə̂ lêi yə́rə́, pei pə́ tə́ lǒʼ, lə́u ŋuu pôu njwô yé có laŋə́-ndə̂u yi mboʼ a lêi mə́u, ə́ ncóghʼ fər paa pei po; ə́ pei cʉ́ʼ mbə́ ghíʼ ghəpə́ Sê pi gháp pə́ pətə-lǒʼ təcər pye nzʉ̂ pwo pi gháp pə́ pətáŋ-mə́laa, ə́ mbə́ pəghʉ̌ məno tə́poŋ. Pei ghwo lə̂ mbə́ nkeʼ təcər páp ghíʼ pəcwôʼ-saŋ pə́ mənkeʼ tʉ́ ləfaŋ lə̂,

¹⁶ńté tsâr yi ə́ ŋə̂ ləcwôr yi pei jyêʼ gháp zěi. Ə̂ lêitə́ yə́rə́, ə̂ ghʉ́ mbə́ leʼé yi Yěso Kəlísto wo kə́ cí tó, m mbə́ cər lətsei ńté wéi, ńté ńgó faʼ zâa gháp pə ngwôʼ yi n ndə jwó ńté wéi kâa lə lêi fe.

¹⁷Pə̂i-ntə̂ʉ zéi nzəm Kəlísto gháʼá ndaghʼ mbə̂ wéi poʼ yi pei nuŋu mbi Sê. Pə́ lə̌i njwí ghâa, mə́i ə́ wo pə̂ ghâa poʼ yi n nuŋu mbi Sê. Ə́ nkə́u mbə́ yə́rə́, m mbə̂ ndʉʉ-mboŋ, paghʼə nâa mbə́ cər lətsei.

¹⁸Tə mbaa pei zéi, pei tsêi; paghʼə pə́tsəm nâa ntsěi.

¹⁹M mə̌ ntsáa lə̂ ntóghʼ ńtə́u Timotêi lə́ pei ghíʼ Nde Yěso lə̌i mbə́i; â tó njwó ghíʼ pei pə̌, ə́ mbə̌ʉ ndáʼ ghâa; ə́ ndaghʼ ńcóghʼ ntə̂ʉ ghâa.

²⁰Kwaʼ lə́nə́ʉ, â ndaʼ ŋuu yi paghʼ zʉ́ tsâr lə̂ məno mi ə́ pə́ lə́ məŋ, ə́ mbou mə́ nâa nzʉ́ŋ ńtê mi ə́ pə́ lə́ pei.

²¹Pəcó pye pə̂uʼ mbəʉ záp pə́ lə́ ndʉʉ məno ghap, káa pə́ tsôʼtə gháp lə̂ məno Yěso Kəlísto.

²²Ə́ ngwǒ lə́ Timotêi, mə́i pei pə̌ ntsúŋú njî mbə̂u yi a laghʼ ńcôghʼ ntə̂ʉ lə̂ faʼ nzəm Kəlísto. A kə ŋəi nzəm məŋ ghíʼ môu ŋəi nzəm tə́ ye lə̂, paghʼ zʉ́ ŋâa ntsətə́ Nkəʉ Shʉʼʉ.

²³M mə̌ nkwaŋ ńgó pə́ lə̌i ndêi tə ndáʼ ghíʼ pə́ lǎʼ lə̂ no zâa, n ntôghʼ ntə́u yé lə́ pei;

²⁴m mbou n fú ntsuŋú mə́ njî ńgó Nde Yěso wo ghʉ̌, n ntóghʼ ntó pə́ məŋ tə njwó wéi.

²⁵Lə́ n nyaa mbəi mə́ nkwâŋ lə̂ ngʉ́ fə̌r ghâa Epafərodîtə pə̂ʉ ncə́r wéi, â ngaŋə-ku ghâa cər faʼ, paghʼ zʉ́ pə̂ nâa ndwóʼo ntso lə̂ no Yěso Kəlísto, ə́ zʉ́ yi pei lə tə́u yé, a tô ŋə́ məzə̂u mi ə́ lə pə́ mbûŋ mbó məŋ.

²⁶A pə̌ ntsâa lə̂ nkə́ ncí njwó wéi pə́tsəm, ə no yi pei lə zúʼ ńgó a pə̌ ngǒu pə̂ ngághʼə yé.

²⁷Kwaʼ lə́nə́ʉ, a kə yaa ngǒu tə ə́ pûŋ zə̂u â kwʉ́; lə́ Sê tsâa-mə́jʉ̂ŋ mé, ə́ ntsáa mbaa mâa ńgó koo məŋ mə̂ nzʉ́ŋ, cǒ ləzʉ̂ŋ yi ndeʼe tô nkə́ ncí nkʉ́ʼʉ́ mə́u.

²⁸Ə̂ zə̂u yi ə́ ghʉ̌, n ncʉ̌ʼ mə́ nzûʼ lə̂ ntóghʼ ntə́u yé ńŋə́ lə́ pei, ńjí ńgó pei ghí pə́ tsěi ńté ghíʼ pei kə̌ ncí njwó yé, ntə̂ʉ ghâa kə̂u.

²⁹Ghíʼ ə́ kə́ mbə́ yə́rə́ lə̂, pei pfú yé lə̂ lətsei ghíʼ pə́ pfû tâʼ fə̌r nzəm Nde. Pei ŋə́ məkuʼ lə́ mbə̂u pye ghíʼ zʉ́ lo,

³⁰Ńté ńgó ə́ lə púŋ məyʉʼ, â nkwʉ́ ńté faʼ Kəlísto: A lə kə́u ngʉ zə̂u yi káa pei lə kûʼ wéi lə̂ ngʉ́ lə́ məŋ pə́ pei, ə́ cʉ̂ʼ məyʉʼ a ŋə́ tû yé.