Read Ngombale Filîpə 3 Bible Online

Filîpə 3 - Ngombale bible

Filîpə 3

¹Pəfə̌r pâa, lə̂ mpfu wo, pei tsêi ńté ghíʼ pei kə tsə́ʉ nzəm Nde. Mboʼ n nkâa ghâa lə̂ ŋwáʼá zə̂u yi n ndə yaa mə́ ŋwáʼá ńŋə́ lə́ pei po, ńté ńgó ə́ wo pfútə́ wéi.

²Pei nkhʉ̂ pye pi gháp ghʉ məno tə́poŋ, ə́ ngwʉ̂ zə̂ pi gháp jyêʼ pye ńgó pə́ lə̌i ndə́iʼ púʼ ŋuu po, a ghwô yé ləcwôr po lə̂.

³Ə́ yaa ngǐ pə́, paghʼə lə̂ pə̂ pye pi pə́ lə púʼ gháp ghíʼ ə́ pə́ ntúŋú, ńté ńgó ə́ pə̂ mpfu yi paghʼə pə̌ ngúʼtə Sê, Zəghʼə yé lə́ pə̂ ncághʼə wághʼə, paghʼə ghwo lətsei ńté ghíʼ paghʼə pə̌ nzəm Yěso Kəlísto, ə́ mbou káa pə́ côghʼ wághʼə ntə̂ʉ wághʼə lə̂ məzə̂u mi pye-mə́soŋ laghʼ ńtsêi, ə́ fûŋ ńgó nôghʼ-lâʼ gháp.

⁴Lə́ məŋ lə̂ mbə̌ ŋuu yi mboʼ n ntə́i mə́ nkôŋ, mə́i n ndaghʼ məzə̂u mêi mi pye laghʼ ńtsêi, ə́ fûŋ ńgó nôghʼ-lâʼ gháp lêi; tə pə́ yi ŋuu lə̌i ndáʼ lə́ məŋ ńgó a jî no mə́u, n ndâʼ lə́ zʉ́ ńgó n njǐ ńděi yé.

⁵Pə́ lə jí ghâa, ə́ lei leʼé ləfǎa, pə́ pûʼ ghâa. Mə̂ŋ ŋuu Ísə́lahêl tə fú leʼé lə́jí, lə̂ ngər-ndə̂ Benjamêŋ, ə́ mbə́ ŋuu Hebələ̂ tə pətə́ pâa kə̂ mbə́ pə́ pye Hebələ̂. N ndə pə́ ŋuu Falísia, ə́ mbou ŋə́i ghíʼ ləpə̌ʉ pəyúda pə́ ntúŋú,

⁶ə́ ntə̌i mə́u tə mə́ ntsoʼó ku pye Kəlísto tə́poŋ. Ə́ ngwǒ lə̂ mbə̂u yi pə́ lə ŋwáʼá lə̂ ləpə̌ʉ Mə̌usə̂i ghíʼ mboʼ pye laghʼ ńnyáŋ, m mbə̂ mə́u mbə́ tə́ lǒʼ.

⁷N ndə pə́ ngʉ̂ məno mêi, ə́ shwî ghâa pə́ ghíʼ m mə̌ nzʉ̂ pəi mə́u gháʼate, n ndə pou nděi tə ntsə́ʉ nzəm Yěso Kəlísto, ə́ njwó, ə́ cʉ̂ʼ mbə́ pə́ cwí.

⁸N ndei tə mə́ njwó Nde ghâa Yěso Kəlísto yi a pə̌ zə̂u lətəi-ndwuŋ mbó məŋ, zə̂u tsəm cʉ̂ʼ mbə́ mbó məŋ ə́ mbə́ pə̂ no fe, ə́ zʉ́ yi n ndə nyér məno mâa mə́tsəm, ə́ ntsə́ʉ nzəm zʉ́; ə́ ncʉ́ʼ njwô zə̂u pei tsəm pə́ ghíʼ mətyʉŋə, Kəlísto lə̂ cʉ̂ʼ mbə̂ zâa pəi,

⁹ə́ mbou fú ndár mbəʉ zaa lə́ zʉ́. Káa m mbyér n ngwô ghâa tû məŋ ńgó m mbə́ ndʉŋ-ndʉŋ mbi Sê ńté pə́ ghíʼ m mə̌ ŋəi ghíʼ ləpə̌ʉ pəyúda pə́ ntúŋú. M mbə́ ndʉŋ-ndʉŋ mbi zʉ́ ńté pə̂ pə̂i-ntə̂ʉ yi n ngwǒ nzəm Yěso Kəlísto, ə́ pə̂ ghíʼ Sê lə tsuŋtə́ ńgó wǒwó yi a cǒghʼ ntə̂ʉ yé lə́ Kəlísto wo pə́ ŋuu no lə́nə́ʉ.

¹⁰Ndaʼ zə̂u yi m mə̌ ntsáa, pə́ pə́ lə̂ njí ŋuu yi Yěso Kəlísto pə̌ wěi mbaa mətəʉ mi ə́ lə ghʉ̌ a zʉ̂ʉ lə̂ ləwʉ̂, ə́ njwô zâa ngwôʼ ghíʼ zʉ́, ə́ mbə́i lə̂ ŋə́ tû zâa, ə́ nkwʉ́ ghíʼ a lə kə́ ŋə̂ yé nkwʉ́ lə́wó,

¹¹ə́ ngǐ ŋə́, ə́ fú mə́ njî ńgó ə́ lə̌i ndə́iʼ pə́ pə̂ hó po, mə́i Sê ghʉ̌ ghʉ̌ n nkə́ nzʉ̂ʉ zâa lə̂ ləwʉ̂ ghíʼ Kəlísto.

¹²Kâa m mə́ ncôghʼ ghâa tû məŋ ńgó n ndər mə́ tə nkə́u, kəʉ ńgó n fu mə́ mbə̌u tə káa có zə̂u pyér mə́ mbûŋ yé lə́ məŋ lo. Lə́ m mbyěr mə́ sâʼ pə̂ təʉ ńkhʉ̂ ndʉ lə̂ ngwó mpfú məntsoʼó-faʼ mâa, ńté ńgó tû-mbəʉ Yěso Kəlísto lə́ lə ghǒu ghâa.

¹³Ə ngə́ pəfə̌r, kâa n nkwâŋ ńgó n ngwo mə́ məntsoʼó-faʼ mâa; lə́ tâʼ zə̂u yi n ngwǒ lə̂ ngʉ́, pə̌ lə̂ ndyə́ghʼə́ zə̂u yi n ngʉ mə́, ə́ ncʉ́ʼ nzúŋtə́ pə́ yi ə́ pə́ mbi.

¹⁴Ghíʼ ə́ pə́ yə́rə́ lə̂, m mə̂ nkhʉ̂ məndʉ lə̂ ngwó mpfú məntsoʼó-faʼ mi Sê lə leitə́ lə́ Yěso Kəlísto, ə́ fúŋ wághʼə lə̂ ngʉ́ ngwǒ měi tʉ̌-lə́pû.

¹⁵Paghʼə pə́tsəm pi paghʼə pə mə́ pətikáŋ cər no Sê, paghʼə nâa ngwǒ kwaŋtə zêi yo. Lə́ ə́ nkə́ mbə́ yi pei ghwo kwaŋtə ndeʼe, mə́i Sê wo tsóʼó tû zéi, ə́ ghʉ̌ pei jî zéi.

¹⁶Ə́ lə̌i mbə́ pə́ gháʼá, paghʼə kə̂ mə̂ nzâp pə́ laŋə́-ndə̂u yi paghʼə lə pyé tə ntó ńkə́u mpfu wo.

¹⁷Pəfə̌r pâa, pei pə́tsəm pyé fəiʼ lə́ məŋ. Paghʼ lə nyarə́ wéi ku ləŋəi; ghíʼ ə́ kə́ mbə́ yə́rə́ lə̂, pei tsə́ʉ nzəm pye pi gháp pə́ ŋəi yə́rə́.

¹⁸N ndaʼ mə́ wéi yə́rə́ məmpfu tə nzáa, lə́ m mbou ngǐ pə́ laʼ mpfu wo, ə́ ncʉ́ʼ mə́ ntsə́rə tsərə́. Pye tə nzáa pə́ təcər paghʼə pi cǐ záp pə́ nyárə ńgó gháp nyə́ghʼə ləwʉ̂ yi Kəlísto lə kwʉ́ wěi lə̂ tʉ̌-mbʉ̂ŋtə nyəghʼə́.

¹⁹Məleʼé lâʼ máp táa mě ndəu ndesé, gháp kə́u cwí; ə zap sê ləpəm záp, gháp laghʼ záp pə̂ məzə̂u mi sə̂ʉ təi kô gháp mə́u kó, ə́ ntsêi; ə́ mbou ntâghʼ tû záp pə́ lə́ məzə̂u ndəu nzʉ̂.

²⁰Ə́ ngwǒ lə́ paghʼə, mə́i ngoŋ wághʼə pə́ tʉ̌-lə́pû, ə́ yʉʼ yi paghʼə pə̌ nzʉ̂ʼtə ńgó Nde waghʼə Yěso Kəlísto fú wó ntó; zʉ́ ghʉ paghʼə cwôr.

²¹A ghʉ̌ tó yə́rə́, ə́ lǎghʼ mətəʉ mi a laghʼ ńgʉ́ zə̂u tsəm cʉ̂ʼ nzûʼ pə́ mbó zʉ́, ə́ ghʉ̌ mbəʉ zaghʼə yi kâa pə̂ yé có zə̂u lo, shə́rə́ ńcʉ́ʼ mbə́ pə̂ mbəʉ yi ghwǒ ngəwoghʼ.