Read Ngombale Filîpə 4 Bible Online

Filîpə 4 - Ngombale bible

Filîpə 4

¹Pəfə̌r pâa pi lətəi-ndwuŋ, m mə̌ ntsâa gháʼate lə̂ nkə́ ncí njwó wéi! Pêi zə̂u yi ə́ ŋə̂ ghâa lətsei, ə́ mbə́ ləfu ngǔʼ zâa! Ə́ pə̂ yə́rə́ pəsə̌u pâa, ə́ mə̂ ndâʼ lə́ pei ńgó pei laghʼ lənyâŋ wei ńnyárə́ ńgó pei kûʼtə no Nde tə ə́ təi.

²Evodí, pei Seŋtîshə, tə́sə́u, m mə̌ sʉ̂ʉtə wéi ńgó pei ghwô tâʼ ntsʉ, ńté ńgó pei pye Nde.

³Ə́ ngwǒ lə́ gho, yi o pə̌ kwaʼ ngaŋə-ku ghâa yi shʉʼʉ cər faʼ, m mə̂ ndâʼ lə́ gho ńgó ô pfútə́ pəngyě pêi pə́pwô; ńté no gháp lə tóutə́ ghâa paghʼ pə pǎp ŋâa ndwóʼó ntso Nkəʉ Shʉʼʉ; mbaa Kələmâŋ, gháp pə có ngaŋə-ku zâa pi mənyôghʼ máp pə́ cər ŋwaʼa ləcwôr lə kə́ mpfútə́ záp ghâa lə́wó.

⁴Pei kə́ nyáŋ ngwô pə́ lətsei ntə̂ʉ pei, ńté no pêi pye Nde. N ndaʼ tə mbyə́ghʼə́ ndâʼ ńgó pei kə́ nyáŋ ngwô pə́ lətsei ntə̂ʉ pei!

⁵Pei ghʉ́ tə ŋuu ntsəm jí ńgó pei pwórə. Nde tó mə́ tə mbáatə́.

⁶Koo pei pə̂uʼ mbəʉ zei lə̂ có zə̂u; tə ncʉ́ʼ yə́rə́, pei tə́ʉ pə́ lə́ zarə́ no, pei sʉ̂ʉtə Sê, ə́ mbúʼ mbô mbó zʉ́, ə́ ndǎʼ yé zə̂u yi pei pə̌ ntsáa; ə́ mbou ŋə́ nkhwo lə́ zʉ́.

⁷Ə̂ lêi yə́rə́, ə mbwórə Sê yi lěi zə̂u tsəm yi ńgó mboʼ pei kwâŋ zěi, ə̂ lóʼo kwaŋtə zéi gháp ntə̂ʉ wéi; ə́ ngʉ̌ ə̂ kə́ ntə́ʉ pə́ lə́ Yěso Kəlísto.

⁸Pəfə̌r pâa, n ngǐ lyəghʼtə́, ə́ pə́ laʼ lə́ pei ńgó pei ghʉ́ kwaŋtə zéi tə́ʉ pə́ lə̂ zə̂u tsəm yi ə́ pǒŋ, ə́ zə̂u tsəm yi mboʼ pə́ fə́tə: n ntsuŋu ndâʼ gháʼá no tsəm yi ə́ pə́ lə́nə́ʉ, ə́ yi mboʼ ə́ ŋə̂ məkuʼ ŋuu, ə́ yi ə́ pə́ ndʉŋ-ndʉŋ, ə́ yi ə́ pə́ tə́ lǒʼ, ə́ yi ə́ pye kǒŋ, ə́ yi mboʼ pə́ fə́tə, ə́ yi mboʼ ə́ pfûtə ŋuu, ə́ yi mboʼ ə́ ghʉ pə́ shitə ŋuu.

⁹Pei ghʉ̂ zə̂u tsəm yi n ndə jyéʼ wéi, ə́ yi pei lə zúʼ ntsʉ məŋ, mbaa yi pei lə jwó n ngʉ̂. Pei ghʉ́ pə jwo lə́ pei, ə̂ léi yə́rə́, ə Sê yi a ŋə̂ mbwórə pə́ lə́ pei.

¹⁰M mə̌ ŋə̂ nkhwo mbó Nde, ə́ mbou mə́ ntsêi gháʼate, ńté no pei kə̌ ncí ngwô saa lə̂ ndághʼ ńnyárə́ ńgó pei kə̌ mə́ nkʉ̂ʉtə ghâa kʉʉtə́. Tə fú pei yaa nkə́ mə́ nkʉ̂ʉtə ghâa kʉʉtə́, lə́ mbúŋ pə́ saa lə̂ ndághʼ ńgʉ̌ tə məŋ njî.

¹¹Kâa n ndâʼ yə́rə́, ə́ ndághʼ ńdâʼ pə́ ńgó có zə̂u pə́ mbûŋ mbó məŋ; ńté no n nkə mə́ njyéʼ lə́ pə́ yi n ndə̌i ngwô zə̂u ə́ záa, kəʉ nkhwóghʼ, n nkə̂ mə́ ntsêi ghâa tsěi.

¹²M mə̌ njî ghíʼ mboʼ n nyâŋ mpfu yi m mə̌ mbúŋ mbaa mpfu yi n ngwǒ ə́ zâa. N nkə mə́ njyéʼ lə́ pə́ yi n ndə̌i m mbə́ pə́ ghó kəʉ n ntə́ʉ pə́ lə́ zarə́ mbə̂u no, n nkə̂ mə́ ntsêi ghâa tsěi, kəʉ mpfu yi n nzʉ̌ tə njwə́r, kəʉ mpfu yi ləpəm zâa tə́ʉ fe, kəʉ mpfu yi n ngwǒ tə ə́ zêʼ, kəʉ mpfu yi kâa m mbə́i ngwo ghâa có zə̂u, m mbôghʼ ghâa po.

¹³N ndə̌i ntə́ʉ pə́ mbi zarə́ mbə̂u məngaghʼə, n nkûʼ mə́u, ńté mətəʉ mi Kəlísto ŋə̂ lə́ məŋ.

¹⁴Lə́, ə́ poŋ ghíʼ pei lə pə́i, paghʼə nâa njwó ngwôʼ zaa lə̂.

¹⁵Pei pye Filîpə, tû-mbəʉ zéi tsuŋu mə́ njí ńgó ə́ lə pə́ mpfu yi no ntsə́tə́ Nkəʉ Shʉʼʉ lə pyér njî-jǐ, n fû Masedwânə mə́ ndə́r lə̂ ŋáa ntsə́tə́ Nkəʉ Shʉʼʉ, pei pə̂ ndaʼ cûʼtə pye Kəlísto yi ə́ lə tôutə ghâa. Ndaʼ pei lə́ lə lǒu lə̂ njí zə̂u yi ə́ pə́ mbûŋ mbó məŋ mbaa yi faʼ zâa pə́ ŋə́.

¹⁶Ə́ lə yaa mbəi mbə́ mpfu yi n ndə pə́ Tesalonîkə, pei tə̂u məzə̂u mi ə́ lə pə́ mbûŋ mbó məŋ ńŋə́ lə́ məŋ; ə́ ŋə́ yə́rə́ məku tə nzáa.

¹⁷Kâa pə̂ yé ńgó m mə̌ ndou ńgó pei ŋə́ məzə̂u lə́ məŋ, n ndou pə́ ńgó Sê fú mə́u ncóghʼ mbwórə lə́ pei.

¹⁸M mə̌ ndaʼ wéi ńgó n nkə jwô zə̂u tsəm yi pei lə tə́u ńŋə́ lə́ məŋ; měi lə kuʼ tə nzéʼ. Lə̂ mpfu wo ghíʼ Epafərodîtə kə lǎghʼ məzə̂u mi pei kə tə́u ńtó ńŋə́ lə́ məŋ, kâa có zə̂u pyér mə́ mbûŋ yé mbó məŋ. Məzə̂u mei pə́ ghíʼ məzə̂u poʼ Sê mi ə́ ghwǒ jaghʼə́ shʉʼʉ, ə́ mbə́ poʼ Sê, ə̂ pə́ poʼ yi Sê pə̌i no mə́u, ə́ pou mboŋə́ yé.

¹⁹Sê zaa, zʉ́ yi a ghwǒ məfuʼ lətəi-ndwuŋ mə́tsəm, ghʉ̌ leitə́ lə́ Yěso Kəlísto, ə́ ŋə́ zə̂u tsəm yi ə́ pə́ mbûŋ wéi ə́ mbó pei.

²⁰Ləghûʼ pə́ mbó Tə́ waghʼə Sê lə̂ mənguʼ mənguʼ. Ámeŋ.

²¹Pei tsêʼtə́ pye pə́tsəm pi gháp lə lěi lə́ Yěso Kəlísto ə́ ncʉ́ʼ pye Sê. Pəfə̌r nzəm Kəlísto pi paghʼ pə pǎp pə́ yaʼa pə́ ntseʼtə wéi záp lə́wó.

²²Pye Kəlísto pə́tsəm pi gháp pə́ yaʼa tseʼtə́ wéi. N ndaʼ gháʼa tə́ lyə́ghʼə́ tseʼtə pye Kəlísto pi gháp pə́ cər ntôʼ fou pəlóma.

²³Ə Nde Yěso Kəlísto pə́ ncôghʼ mbwórə lə́ pei.