Read Ngombale Kolósʉ 1 Bible Online

Kolósʉ 1 - Ngombale bible

Kolósʉ 1

¹Məŋ Pôl yi Sê lə lǎghʼ ləkoŋtə ye ə́ ngʉ́ n ncʉ̂ʼ ngaŋə-ntə̂u Yěso Kəlísto, paghʼ fə̌r waghʼə Timotêi ŋwaʼá ŋwaʼa wo,

²ə́ ŋə́ lə́ pye Sê pi gháp pə́ túsoŋ Kolósʉ, ə́ mbə́ pəfə̌r pághʼə pi gháp lǎr mbəʉ lə́ Yěso Kəlísto, ə́ mbou mbə́ nzəm zʉ́ lə̂ ntə̂ʉ gháp tsəm. Ńgó Tə́ waghʼə Sê ghwô poŋə-ntə̂ʉ yi tə́ ndaghʼə nzəm pei, ə́ ncóghʼ mə́shwítə məntə̂ʉ pei.

³Ə́ pə̂ mpfu tsəm yi paghʼ pə̌ ngʉ sʉ̂ʉtə ńté wéi, paghʼ pə̂ ŋə̂ nkhwo mbó Sê, ə́ Tə́ pə Nde waghʼə Yěso Kəlísto.

⁴Ńté no paghʼ kə zûʼ mbə̂u yi pei lǎghʼ ńgwǒ pə̂i-ntə̂ʉ nzəm Yěso Kəlísto, mbaa mbə̂u yi pei lǎghʼ ńgwǒ nkoŋə nzəm pye Sê pə́tsəm.

⁵Ə́ lə pə́ mpfu yi Nkəʉ Shʉʼʉ lə tó tə nkə́u lâʼ pei lə́ nduŋ-mbi mpfu, ə́ mbə́ tsâr no-lə́nə́ʉ, pei zûʼ zə̂u yi Sê lə tsuŋtə́ ńtághʼ lə́ pei tʉ̌-lə́pû, ə́ mbou nyáŋ ə́ mə́ njî tə́ mʉ̂ŋtə ńgó pei táa ghwǒ zěi.

⁶Nkəʉ Shʉʼʉ zêi naa sar yʉʼ cər ngoŋ tsəm, ə́ mbǒu nzə́m məntǎa, ə́ ndʉŋ-ndʉŋ ghíʼ zěi lə zə́m məntǎa təcər pei, tə fú leʼé yi pei lə zúʼ zěi lə́ wei nduŋ-mbi mpfu, ghíʼ pə́ laʼ no ńté məzə̂u shʉʼʉ mi Sê lə ghʉ̌, pei pôu njwó měi, ə́ pə̂ no lə́nə́ʉ.

⁷Epafərásʉ, ngaŋə-ku waghʼ yi lətəi-ndwuŋ cər faʼ lə̂ kə jyéʼ wéi Nkəʉ Shʉʼʉ zêi; â ngaŋə-faʼ Kəlísto yi mboʼ pə́ tə̂m nzəm ńŋə́ lə́ zʉ́, zʉ́ kə́pə́ tû zághʼ təcər pei.

⁸A kə laʼ wághʼ mbə̂u yi Zəghʼə Ndêi-lěi kə lǎghʼ ńgʉ́ pei ghwô nkoŋə təcər pei pəfə̌r.

⁹Ə̂ zə̂u yi ə́ ghʉ̌, káa paghʼ pə́ tî wághʼ tə́ sʉ́ʉtə́ Sê tû pei, tə fú leʼé yi paghʼ lə zúʼ pə́ kʉ̂ʉ wéi shʉʼʉ. Paghʼ pə̌ sʉ̂ʉtə Sê ńgó â ŋə́ wéi jîno yi ə́ fû mbó Zəghʼə yé, ńjí ńgó pei sâa-sǎa njí ləkoŋtə ye.

¹⁰Ńjí ńgó ə́ lei yə́rə́, pei ghwô cǐ yi ə́ nyárə ńgó pei kuʼ lə̂ mbə́ pye Nde, ə́ ndaghʼ nzə́m məntǎa shʉʼʉ, ə́ mbou nkʉʼʉ́ njí ŋuu yi a pə̌ zʉ́ ńdaghʼ ńdə́r lə̂ mbi.

¹¹Paghʼ pə̌ sʉ̂ʉtə yé ńgó a lâghʼ mətəʉ mé mi ghwǒ ləghûʼ, ə́ ncóghʼ mətəʉ méi lə̂ məsʉ̂ mə́tsəm, ńjí ńgó pei sâʼ təʉ, ə́ nkǔʼ lə̂ shə̂ghʼ ngwôʼ ntsəm yi mboʼ cə̂r wéi.

¹²Pei lághʼ lətsei ŋə́ nkhwo mbó Tǎa Sê: a lə ghʉ pei kûʼ lə̂ nkə́u cər nkeʼ, lə́ pə́ yi a wo ŋə̂ méi məzə̂u shʉʼʉ mi a ŋə̂ lə̂ pye pé.

¹³Ńté no a lə fú cər mətəʉ nzə̌m ə́ nkwárə́ wághʼə, ə́ ngʉ̌ paghʼə kə̂u cər ləfou Môu ye, a koŋ Môu ye wêi gháʼate.

¹⁴Sê lə leitə́ pə́ lə́ zʉ́, ə́ ntsǔʼ wághʼə lə̂ no tə́poŋ, ə́ mbou ndyəghʼə́ məfaa waghʼə.

¹⁵Ŋuu laa kə́ jwô yé Sê, lə́ Môu ye Kəlísto yi pə́ lə jwó mə́ yé, fǔ mbə́ pə́ zʉ́ tə mé. Â nduŋ-mbi lə̂ zə̂u tsəm yi Sê lə tsuŋú, ə́ mbou ndêi měi mə́tsəm.

¹⁶Ńté no Sê lə lei lə́ zʉ́, ə́ ntsuŋu zə̂u tsəm, ə́ zə̂u tsəm yi ə́ pə́ tʉ̌-lə́pû mbaa ndəu ndesé, ə́ zə̂u tsəm yi pə́ pə́ njwó mbaa yi káa pə pə́ njwó yé, ə́ zə̂u tsəm yi ə́ sâʼ nzʉ̂, ə́ zə̂u tsəm yi ə́ ghwǒ mətəʉ laghʼ ńsáʼ lâʼ, ə zə̂u tsəm yi ə́ ghwǒ mətəʉ laghʼ ńnôʼtə pye, ə́ ngʉ̌ mətəʉ laghʼ ńsáʼ lâʼ. Sê lə lei lə́ zʉ́ ə́ ntsuŋú zə̂u tsəm, měi pou mbə́ pə̂ mi Kəlísto.

¹⁷Sê lə ghí tsuŋú zə̂u tsəm, a yâa mbə́ pə́ wó, zə̂u tsəm pou ngí pə́ wó, ə́ ndeitə́ pə́ lə́ zʉ́.

¹⁸Ə cûʼtə pye Kəlísto ə̂ nkáŋ-mbəʉ, a pə̂ tû zěi; zʉ́ lə́ pə́ ləjitə́ ləcǐ-mbî yi shwî, â nduŋ-mbi lə̂ zə̂u tsəm yi Sê lə tsuŋú, ə́ mbə́ nduŋ-mbi ŋuu yi Sê lə ghʉ̌ a zʉ̂ʉ lə̂ ləwʉ̂ təcər pəpfû-sê, ə́ pə̂ yə́rə́, a pə̂ nduŋ-mbi lə̂ zə̂u tsəm.

¹⁹Ə́ pə́ lə́nə́ʉ ńgó Sê lə koŋ ńgó a lə̌i mbə́ ghíʼ a pə̌, Môu ye kə̂ mbə̂ yé pə́ yə́rə́,

²⁰a lə koŋ lə̂ ndêitə́ lə́ Môu ye wêi, ə́ myǎghʼ sǎʼ yi ə́ pə́ təcər páp pə pye-mə́soŋ. Sê lə lei lə̂ ləwʉ̂ Môu yé lə̂ tʉ̌-mbʉ̂ŋtə, ə́ ngʉ̌ ə poŋə́ záp pə pye-mə́soŋ pə́tsəm ndəu ndesé mbaa tʉ̌-lə́pû kə̂u ndə̂.

²¹Pei zéi lə́wó, ə́ lə pə̂ cǒ mpfu, káa pei pə Sê nâatə wéi mbə́, pei lə pə́ pəghaŋə mbəu Sê, ńté no tə́poŋ yi pei lə kwaŋ lə̂ ngʉ̂, ə́ nkə́ ngʉ̂.

²²Lə́ lə̂ mpfu wo, ə́ lə leitə́ ghíʼ Môu ye lə shərə́ ńcʉ́ʼ ŋuu-məsoŋ ńkwʉ́, ə Sê myâghʼ sǎʼ yi ə́ lə pə́ təcər pei pə pǎp, ńjí ńgó pei ghʉ ngǐ tə́ʉ mbi zʉ́, ə́ mbə́ pye pi gháp pə́ ŋəi ghíʼ Sê pə̌ nkǒŋ, ə́ mbə́ pətəlǒʼ, ə́ mbə́ lə̂ mbə̂u yi mboʼ ŋuu côghʼ yé fər paa pei po.

²³Ə́ pə́ ntúŋu ńgó pei kúʼtə́ no yi pei lə pə́i zěi nzəm Yěso tə ə̂ tə̂i, ə́ nkúʼtə́ ə̂ tə̂i ghíʼ ndə̂ yi pə́ lə póu, ə cû zěi təi; pei ghʉ́ yə́rə́ ə́ ndághʼ ńdə́r lə̂ mbi; pei páa lə̂ ncwî zə̂u yi pei cî ntsáa ńgó Sê ghʉ́ ŋə́ lə́ pei tə fú leʼé yi pei lə pə́i Nkəʉ Shʉʼʉ. Pə́ lə tsətə́ Nkəʉ Shʉʼʉ zêi lə́ maa ŋuu ntsəm ndəu ndesé; məŋ Pôl, m mbôu ncʉ́ʼ ngaŋə-faʼ Sê lə̂ ntsə́tə́ zěi.

²⁴Lə̂ mpfu wo, m mə̌ ntsěi ńté ngwôʼ yi m mə̌ njwó ńtê wéi. M mə̌ njwô ngwôʼ ńté cûʼtə pye Kəlísto yi ə́ pə́ mbəʉ ye, ghíʼ Kəlísto lə kə́ njwô yé ngwôʼ lə́wó. N njwô yə́rə́ lə̂ ndághʼ ḿmyaghʼtə́ faʼ yi Kəlísto lə jǐ zěi.

²⁵Məŋ ncʉ̌ʼ ngaŋə-faʼ Sê lə̂ ntsə́tə́ Nkəʉ Shʉʼʉ mbó məcûʼtə pye Kəlísto, ə́ pə̂ faʼ yi Sê lə cóghʼ mbó məŋ ńté wéi: ńgó məŋ ntó lâʼ pei, ə́ ndâʼ tsâr Sê tsəm tə́ nyêr có,

²⁶ə́ pə̂ no yi Sê lə lwǒ mənyôghʼ pye-mə́soŋ pə́tsəm tə fú mənguʼ mənguʼ, lə́ ə́ pou ngǐ tə́ʉ mpfu wo, a ghʉ̂ pye pé jî zěi.

²⁷Sê lə koŋ lə̂ ngʉ́ gháp jî zêi no yi ə́ pə́ ləlwǒ lêi, ə́ njí ńgó ə́ ghwô lətəi-ndwuŋ, ə́ ngwǒ ləghûʼ; ə́ mbou njí yə́rə́ nou pye pi káa gháp pə̂ gháp pəyúda. Ə ntsəm zêi pə́ ńgó Kəlísto pə́ təcər pei, ə́ mə́ ngʉ́ pei sâa-sǎa njî ńgó pei ghʉ̌ ghwo zéi yʉʼ lə̂ ləghûʼ Sê.

²⁸Ə̂ Kəlísto wêi yi paghʼ lâʼ pye-mə́soŋ pə́tsəm ŋuu yi a pə̌ wěi. Paghʼ laghʼ pə̂ jîno yi Sê ŋə̌ lə́ paghʼ, ə́ nkwêitə tû záp, ə mbou njyêʼ gháp zə̂u, ə́ ndaghʼ ńdôu ńgó wǒwó kúʼtə́ Kəlísto kwaʼ shʉʼʉ, ə́ mbə́ ghíʼ Sê pə̌ nkǒŋ.

²⁹Ə̂ zə̂u yi ə́ ghʉ̌, n ngî pə́ fǎʼ ə́ pǒu pə́ lwóʼó, mətəʉ mi ə́ fû lə́ Kəlísto pə̂ ndəu məŋ mə́ ncʉ́ŋə ghâa lə̂ ngʉ́ yə́rə́.