Read Ngombale Kolósʉ 2 Bible Online

Kolósʉ 2 - Ngombale bible

Kolósʉ 2

¹M mə̌ nkoŋ ńgó pei jí mbə̂u yi n ndaghʼ ńtáŋə́ ńté tû zéi, ńté tû pye Lahodisê, mbaa ńtê tû pye pi gháp laa kə́ sâp gháp ləjôghʼ lə́ məŋ.

²M mə̌ ntsâa ńgó ntə̂ʉ wéi tə̂i, ə́ pei ghwô nkoŋə təcər pei, ə́ mbóu ngwǒ mbə́i tə́ mʉ̂ŋtə nzəm Kəlísto ghíʼ pye pi gháp ghwǒ jîno yi ə́ pə́ lə́nə́ʉ. Ə̂ lêi yə́rə́, ə́ pei jî ntsəm Sê yi a kə ghʉ̌ paghʼ jî zěi, ə ntsəm Sê zêi pə̂ Kəlísto zʉ́ tû-mbəʉ yé:

³Zə̂u tsəm yi ə́ ghwǒ lətəi-ndwuŋ ghíʼ jîno, ghíʼ njí tsâr Sê tsəm ə́ lwo pə́ lə́ Kəlísto.

⁴Məŋ ndaʼ wéi məno mwo gháʼá, ə́ mbóghʼ ńgó mboʼ ŋuu tô ńdághʼ mətsâr ngwâŋ fwoŋə́ tû zéi.

⁵Ə̂ no lə́nə́ʉ ńgó káa m mbə̂ ghâa təcər pei lə̂ mbəʉ zâa, lə́ kwaŋtə zâa kə̂ ntə́ʉ pə́ lə́ pei; n ngwô lətsei lə̂ njwó ńgó no yi pei lə pə́i zěi nzəm Kəlísto, ə́ nkúʼtə́ tə́ ə təi, pei kə̌ mbyér nkûʼtə zěi kúʼtə́.

⁶Ə́ pə̂ yə́rə́, ghíʼ pei lə pə́i ńgó Yěso Kəlísto ə̂ Nde wei lə̂, pei lâr mbəʉ zei lə́ zʉ́, pei pə pǎp tə̂mtə́ ə́ mbə́ tâʼ.

⁷Pei lâr məŋaŋə méi lə́ zʉ́ ə́ mbou nkə́r ləcǐ-mbî wei ndəu zʉ́ ghíʼ pə́ kə̂r ndə̂ ndəu cû zěi lə̂. Pei ghwô pə̂i-ntə̂ʉ maa mpfu tsəm, ə́ ntághʼ ku zéi lə̂ no yi pə́ lə jyéʼ wéi zěi, ə́ mbou mə́ ŋə̂ nkhwo lə̂ Sê lə̂ məno mə́tsəm mi a ghʉ lə́ pei.

⁸Pei páa lə́ pə́ yi mboʼ ŋuu lâghʼ mətsâr pənjino pi ndəu nzʉ̂ pwo fwoŋə́ tû zéi. Ə jîno zêi ə̂ yi məlaa, ə́ mbə́ fwǒ zêi; zêi jîno fû pə́ lə̂ nôghʼ-lâʼ yi pye-mə́soŋ nuŋú; ə́ fú lə̂ mətəʉ tə́poŋ mi ə́ sâʼ nzʉ̂ yo, lə́u ə́ mbə̂ yé mi ə́ fû mbó Kəlísto po.

⁹N ndaʼ yə́rə́, ńté no ə́ lə̌i mbə́ yi Sê pə́ gháʼá, mə́i Kəlísto kə̌ mbə̂ yé pə́ yə́rə́ tə mbaa pə́ ghíʼ a lə ghwǒ mbap mbəʉ lə̂.

¹⁰Pei leitə́ ghíʼ pei kə lǎr mbəʉ zei lə́ Kəlísto lə̂, ə́ ngwǒ məzə̂u shʉʼʉ mə́tsəm, ə̂ zʉ́ yi a zǎp pô tû zə̂u tsəm yi ə́ ghwǒ mətəʉ ə́ mə́ sâʼ nzʉ̂ yo.

¹¹Pei pə Kəlísto lə lei tə tə̂mtə́ ə́ ncʉ́ʼ tâʼ gháʼá, pei cʉ̂ʼ mbə́ ghíʼ pye pi pə́ púʼ gháp, lə́ káa pye-mə́soŋ lə̂ pûʼ wéi; Kəlísto lə̂ pǔʼ wéi, Kəlísto kə lêi lə̂ mbə̂u mbə́uʼ zêi ə́ fú ndəu pei nkwárə́ zə̂u yi ə́ cʉ́ŋə wéi pei ghʉ̂ məfaa[1].

¹²Pei lə lei tə mpfú nci, ə́ cʉ̂ʼ mbə́ pə́ ghíʼ pei pə Kəlísto naa nkə́u ləshi lə̂, ə́ mbou nkə́ nâa nzʉ́ʉ lə̂ ləwʉ̂ lə̂, ńté ńgó pei lə pə́i ńgó Sê yi a lə ghʉ̌ a zʉ̂ʉ lə̂ ləwʉ̂ ghwo mətəʉ.

¹³Pei lə pə̂ cǒ mpfu ə́ mbə́ mbi Sê, ə́ mbə́ ghí pəpfû-sê, ńté məfaa wei, mbaa ghíʼ ə́ lə ghí pə́ mə́i pə́ kə́ pûʼ yé wéi. Lə́ ə́ pou mbə́ mpfu wo, ə Sê ghʉ pei pə Kəlísto zʉ̂ʉ lə̂ ləwʉ̂. Ə́ lei yə́rə́, a lyəghʼə məfaa waghʼə ntsəm.

¹⁴Ləpə̌ʉ lə cʉ́ŋə wághʼə paghʼə ghʉ məfaa, pə́ pou ŋwáʼa məfaa wêi cər ŋwaʼá ńdághʼ ḿbútə́ wághʼə; lə́ Sê lə laghʼ ghíʼ pə́ lə kʉ̌ʉ Yěso lə̂ mbʉ̂ŋtə, ə́ mvə́rə́ məfaa wêi.

¹⁵Ə́ lə leitə́ pə́ ghíʼ Yěso lə kwʉ́ lə̂ tʉ̌-mbʉ̂ŋtə, Sê pfû mətəʉ mbó zə̂u tsəm yi sâʼ nzʉ̂ yo, ə́ mpfú mbó pəfou; ə́ nkóʼó gháp ghíʼ pəghaŋə-tsâŋ ńtághʼ zǎa, ə́ ntə́m sə̂ʉ tû páp mbi lâʼ lə̂ ndághʼ ńnyarə́ ńgó Môu ye lə mâʼ ntso ńzʉ́.

¹⁶Ghíʼ ə́ kə́ mbə́ yə́rə́ lə̂, koo pei pə̂i cǒ ŋuu fêʼ wéi, ńté zə̂u yi pei zʉ̂, mbaa yi pei nô, kəʉ ńté no yi káa pei zʉ̂ wéi cǒ lətsei yi ləpə̌ʉ pə́ ndâʼ ńgó pə́ ghwo lə̂ nzʉ́ lo; kəʉ ńté pə̂ no yi káa pei zʉ̂ wéi lətsei yi a naŋtə́ saŋ shwî, kəʉ ńté pə́ ńgó pei ghʉ có zə̂u leʼé njî pəyúda lo.

¹⁷Zə̂u pei tsəm lə pə́ pə̂ fəiʼtə məzə̂u mi ə́ ghʉ̌ tó, lə́ kwaʼ zə̂u yi ə́ lə ghwǒ lə̂ ntó pə̂ Kəlísto.

¹⁸Koo pei pə̂i pye lâʼ ńgó káa pei lə mâʼ ńzʉ́; mbə̂u pye zêi ghʉ pə́ ghíʼ mpfu yi gháp kúʼtə no Sê gháʼate, ə́ shíʼ ńkʉ̂ʼtə sê mbi pəcwôʼ Sê ńgúʼtə gháp. Ə́ ncôghʼ ntə̂ʉ gháp lə̂ məzə̂u mi gháp lê njwo ńjwó; gháp pə́ ŋáʼtə́, lə́ ə́ mbə́ pəno-fefe. Ə́ ndaghʼ məzə̂u mi gháp ghʉ pə́ páp tə tághʼ Sê mbi ńŋáʼtə́.

¹⁹Káa gháp lâr gháp mbə̂ʉ zap lə́ Kəlísto yi a pə̌ tû, ə pye Kəlísto pə̂ nkáŋ-mbəʉ. Yěso lə̂ ghʉ ńgó mbəʉ ghwo zə̂u yi ə́ yǎa mə́ mbûŋ yé. Kəlísto pə́ ghíʼ ləlʉŋə́ mbəʉ yi ə́ zʉŋ yʉʼ mbəʉ lə̂ có, ə́ mbə́ ghíʼ məŋaŋə mi ə́ zʉŋ məlʉŋə́ mbəʉ, ə Sê lə̂ pou ngʉ̂ ńgó mbəʉ zêi ghúʼ.

²⁰Pei pə Kəlísto lə naa nkwʉ́ gháʼá, ə́ laghʼ ḿbə́ ńgó a kwarə́ mə́ wéi lə̂ mətəʉ tə́poŋ mi ə́ sâʼ nzʉ̂ yo. Ghíʼ ə́ kə́ mbə́ yə́rə́ lə̂, koo pei kə̂ ŋə̂i lə̂ nôghʼ-lâʼ yi pye-mə́soŋ lə́ nuŋú; koo pei kə̂ nyáŋ ghíʼ nôghʼ-lâʼ yi pye-mə́soŋ lə́ nuŋú pə́ ndǎʼ; ə́ pə́ ndâʼ ngô:

²¹«Koo o pyê zə̂u yo», «Koo o zʉ̂ʼ yi», «Koo o pə̂i kə̂u zə̂u yi kə̌u».

²²Nôghʼ-lâʼ gháʼá náŋtə́ pə̂ məzə̂u mi pə́ lə̌i ndéi tə ndághʼ ńtʉ́ŋtə́ no, ə́ cʉ̂ʼ mê yé mě. Məno mêi ə̂ mi pye-mə́soŋ lə́ kwaŋtə́ kwaŋtə́ ńdáʼ, ə́ mbou njyêʼ měi.

²³Kwaʼ lə́nə́ʉ pə́ nâŋ mənôghʼ-lâʼ, ə́ shwî pə́ ghíʼ jîno pə́ cər wó. Ńté no měi pə́ ndâʼ no, ə́ ncwíʼi pə́ lə̂ cǒ mbə̂u yi pə́ laghʼ ńgúʼtə Sê, ə́ pə̂ yi gháp kwǎŋ pə́ pǎp ńdǎʼ. Ńté no ə́ pə́ ndâʼ no lə̂ cǒ mbə̂u yi mboʼ pə́ laghʼ shúʼú mbəʉ ŋə́ se, mbaa mbə̂u yi mboʼ ŋuu laghʼ ńgághʼə́ mbəʉ ye. Lə́ mənôghʼ-lâʼ káa ghwo yé mətəʉ tə ə́ pə̂ yi mboʼ ə́ pfûtə ŋuu lə̂ ndə̂ʼ lə̂ ngʉ́ zə̂u yi mbəʉ ye pə̌ ncʉ́ŋə yé lə̂ ngʉ́.