Read Ngombale Kolósʉ 3 Bible Online

Kolósʉ 3 - Ngombale bible

Kolósʉ 3

¹Pei pə Kəlísto lə naa nzʉ́ʉ lə̂ ləwʉ̂. Ghíʼ ə́ kə́ mbə́ yə́rə́ lə̂, pei ntsáa pə̂ məzə̂u mi ə́ pə́ tʉ̌-lə́pû, ə́ yʉʼ yi Kəlísto pə̌ wó ə́ nyáŋ lə̂ ndyə́ghʼə́ pô Tǎa Sê yi təʉ.

²Pei tághʼ tû zéi pə́ lə̂ məzə̂u mi ə́ pə́ tʉ̌-lə́pû, koo pei tâghʼ lə̂ mi ə́ pə́ ndəu ndesé.

³Ńté no pei pə Kəlísto lə naa nkwʉ́; ghíʼ ə́ kə́ mbə́ yə́rə́ lə̂, ləcǐ-mbî wei lwo lə̂ Sê.

⁴Kəlísto ə̂ kwaʼ ləcǐ mbî wei, leʼé yi a ghʉ̌ kwǎr, pei kə́ nkwâr zéi, pei pə pǎp nâa mbə́ cər ləghûʼ ye.

⁵Ghíʼ ə́ pə́ yə́rə́ lə̂, pei mêʼ cǐ tə́poŋ tsəm yi ə́ pə́ yi cər nzʉ̂ yo. Pə́ laʼ gháʼá məno ghíʼ mbə̂u pə̌u nzóʼ, ghíʼ məno coŋ ndwuŋ, məno ghíʼ ŋuu lə̂ ntághʼ ntə̂ʉ yé lə̂ zə̂u tə ndyə́ghʼə́ mbəʉ ye, ghíʼ ə́ ngwô cǒ mbə̂u ntsâa məzə̂u yi tə́poŋ, ghíʼ ŋuu lə̂ ntsóʼ ntóŋ yé lə̂ məzə̂u tə́sə́ʉ; ńté ńgó ŋuu tsôʼ ntôŋ yé lə̂ məzə̂u tə́sə́ʉ, ə́ ngǐ lyəghʼtə́, ə́ ncʉ́ʼ ngúʼtə́ měi pə́ ghíʼ sê ye lə̂.

⁶Məno mêi, ə̂ məlǒʼ mi ə́ ghʉ ə Sê záŋə-lóŋ lə́ [pye pi gháp təi tû ə́ ŋə̂ lə́ zʉ́.]

⁷Yô mbə̂u lənyâŋ yi pei lə ghwǒ cǒ mpfu. Ə́ lə pə́ mpfu yi no tə́poŋ lə pə́ sâʼ wéi, pei pə̂ ngʉ̂ məno mêi ə́ ndagh ńfâa no mbó Sê.

⁸Lə́, lə́ mpfu wo, pei méʼ mbə̂u lənyâŋ tə́poŋ zêi. Ghíʼ záŋə-lóŋ, ghíʼ ŋuu lə̂ nyáŋ sâʼ saʼá, ghíʼ ŋuu lə̂ nyáŋ ngwô ntə̂ʉ shʉŋə́; koo məshwi-shwí mətsâr kəʉ pə̂ mənzou nyâŋ nkwátə ntsʉ pei.

⁹Pei páa məlaa təcər pei, ńté no pei kə fú lə̂ ndwuŋu lənyâŋ ńkwár, ə́ méʼ məno tə́poŋ mi pei kə ghʉ měi cər wó;

¹⁰pei cʉ̌ʼ mbə́ pə́ pye shwî. Ə́ pye shwî pi Sê yi a lə tsuŋú wághʼə pə̌ maa mpfu tsəm, ə́ mə́ ngʉ̂ ńgó pei kə́ mə́ shwî pə́ yé. Ə́ ngʉ yə́rə́, ə́ ndághʼ ńdou ńgó pei sâa-sǎa njí yé.

¹¹Ə́ pə̂ yə́rə́, káa pei ghwo wéi lə̂ nkə́ mbóu ndǎʼ ńgó wo ŋuu, â ŋuu pəyúda; wo lə, káa pə́ yé ŋuu pəyúda. Káa kə́ ghwo wéi lə̂ ndáʼ ńgó wo ŋuu, â ŋuu yi pə́ lə pə́uʼ yé, wo lə pə̂ ŋuu yi káa pə lə pə́uʼ yé yé. Káa kə́ ghwo wéi lə̂ ndáʼ ńgó wo ŋuu, â ŋuu tə́u məghěi, wo lə pə̂ yi a nyâŋ túsoŋ. Káa kə́ ghwo wéi lə̂ ndáʼ ńgó wo ŋuu puʼ, wo lə pə̂ ndʉʉ-nə̂r; lə́ Kəlísto lə̂ cʉ̌ʼ mbə́ no péi tsəm, ə́ mbou mbə́ cər ntəʉ ŋuu tsəm yi a pə̌i no yé.

¹²Pei gháʼá mbə́ pye Sê, a lə tsóʼ wéi, ə́ mbou nkóŋ wéi. Ghíʼ ə́ kə́ mbə́ yə́rə́ lə̂, pei ghwô tsâa-mə́jʉ̂ŋ nzəm pəfə̌r pei; ə́ ntóutə́ gháp, ə́ shúʼú mbəʉ zéi ńŋə́ se, ə́ mbə́ ngaŋə mbwórə, ə́ mbou ngwô shəghʼ-ntə̂ʉ.

¹³Pei tóutə́ mbəʉ zéi təcər pei, cǒ ŋuu wei póu mə́ nzáŋə́ lóŋ ńté fə̌r ye lə̂ no yi a ghʉ̌ lə́ zʉ́, ŋuu lyəghʼə́ yi fə̌r ye ŋə́ lə́ zʉ́, ŋuu lyəghʼə́ yi fə̌r ye ŋə́ lə́ zʉ́; ə́ ndʉŋ-ndʉŋ ghíʼ Nde Yěso lə kə́ ndyə́ghʼə wei məfaa lə́wó ńŋə́ lə́ pei.

¹⁴Pei wó lə̂ məno mə́tsəm, ə́ ntághʼ pə̂ nkoŋə mbi; ə nkoŋə zêi lə̂ pə̌ nkʉ yi ə́ wo nâatə́ wéi kə́r ə́ lǎghʼ ghʉ̌ tâʼ ləkaʼá.

¹⁵Ńgó mbwórə yi fû mbó Kəlísto zʉ́ məntə̂ʉ méi. Ə Sê lə fûŋ wéi ńdaghʼ ńgʉ pye pé gháʼá, lə́ pə́ yi pei wo nyáŋ lə̂ mbwórə zêi, ə́ təmtə́ ə́ cʉ́ʼ tâʼ ŋuu. Pei pə́ maa mpfu tsəm, ə́ mə́ ŋə̂ nkhwo mbó Sê.

¹⁶Ńgó tsâr Kəlísto gháp pə məzə̂u shʉʼʉ mə́tsəm mi ə́ pə́ mə́u pə́ məntə̂ʉ pei maa mpfu tsəm. Ə̂ ŋə́ wéi jîno pei lághʼ ńjyéʼ pye tsâr Sê, ə́ mbou ndághʼ ńtághʼ mbəʉ zéi təcər pei. Pei zâp mənci lə̂ ntə̂ʉ wéi tsəm ńdághʼ ngúʼtə́ Sê, ə́ nzâp ńdaghʼ ńŋə́ nkhwo mbó zʉ́, pei zâp məzap-nci mi ə́ pə́ cər ŋwaʼa Sê, ə́ nzâp zap pye Kəlísto, ə́ nzâp məzap mi Zəghʼə Ndêi-lěi pə́ ncôghʼ məntə̂ʉ pei.

¹⁷Pei lə̌i mə́ ngʉ̂ pə̂ hó, kəʉ ə́ mə́ ndâʼ pə̂ hó, pei ghʉ̂ lə̂ mbə̂u yi pye pi gháp lǎr mbəʉ zap lə́ Nde Yěso ghwǒ lə̂ ngʉ́, ə́ mbou ndêitə lə́ zʉ́, ə́ ŋə̂ nkhwo lə́ Tǎa Sê.

¹⁸Pei pəngyě, pei shúʼú mbəʉ zéi ŋə́ se mbi pələ̂u pei, ə̂ ghíʼ ə́ yǎa mə́ ntúŋu ńgó pəngyě pi gháp lǎr mbəʉ záp lə́ Nde ghʉ́ yə́rə́.

¹⁹Pei mbiŋə, wǒwó kôŋ ngwě ye, koo pei ŋə̂ gháp ngwôʼ.

²⁰Pei ghəpə́, pei zúʼ ntsʉ pətə́ péi lə̂ maa zə̂u tsəm, ńté no ə̂ zə̂u yi Nde kǒŋ zěi.

²¹Ə́ ngwǒ lə́ pei pətə́ ghəpə́, koo pei páŋə ghəpə́ zéi paŋə́, ə́ mbóghʼ lə́ pə́ yi mboʼ mbô máp pwôr.

²²Pei məpuʼ, pei zúʼ ntsʉ pətə́-faʼ péi pi cər nzʉ̂ yo lə̂ maa zə̂u tsəm. Koo pei zûʼ ntsʉ gháp pə́ mpfu yi gháp tə́ʉ mə́ nâŋtə wéi, ə́ ndághʼ ḿvə̌p nyôghʼ máp lə̂ ndághʼ ńdǒu ńgó ə̂ poŋə́ gháp; lə́ pei zúʼ ntsʉ gháp lə́ tâʼ ntə̂ʉ, ńté no pei pə̌ ŋə̂ məkuʼ Nde.

²³Pei lə̌i mə́ fâʼ pə́ zarə́ faʼ, pei fâʼ lə́ ntə̂ʉ wéi tsəm; ə́ mə́ fâʼ, pei fâʼ pə́ ghíʼ ə́ wo poŋə́ Nde, koo pei fâʼ pə́ ghíʼ ə́ wo poŋə́ pye-mə́soŋ.

²⁴Pei lə̌i mə́ fâʼ, pei jí ńgó Nde ghʉ̌ tsóʼ faʼ zéi: pei ghʉ̌ ghwo zéi zə̂u lə̂ məzə̂u shʉʼʉ mi a laghʼ ḿbâp pye pé. Ńté no kwaʼ tə́-faʼ yi pei faʼ mbó zʉ́ ə̂ Kəlísto.

²⁵Lə́ ŋuu póu mə́ fâʼ faʼ tə́poŋ, a jî ńgó Sê ghʉ̌ tághʼ ngwôʼ tû zʉ́, ńté no káa Sê pə́ ntûŋ yé ntyêr.