Read Ngombale Kolósʉ 4 Bible Online

Kolósʉ 4 - Ngombale bible

Kolósʉ 4

¹Ə́ ngwǒ lə́ pei pi pei ghwǒ məpuʼ, pei pə́ pye ndʉŋ-ndʉŋ, ə́ mbou ndághʼ no lə́nə́ʉ ńgwô məpuʼ méi. Pei zéi, koo pei lyəghʼə ńgó pei ghwo tâʼ Tə́ tʉ̌-lə́pû.

²Pei sʉ́ʉtə́ Sê tə́ kâa, koo pei lê, ə́ ngǐ pə́ sʉ̂ʉtə yé, ə́ mə́ ŋə̂ nkhwo lə́ zʉ́.

³Pei lə̌i mə́ sʉ̂ʉtə yé, pei ghʉ sʉ̂ʉtə tû paghʼ zághʼ lə́wó; ńjí ńgó a lei mə́u, ə́ ntsóʼ laŋə́-ndə̂u ńŋə́ lə́ paghʼ, paghʼ laghʼ ńdeʼtə́ tsâr yé; ə́ nkə́u fú mə́u ə́ ndeʼtə́ no yi ə́ lwǒ lə́ Kəlísto, ə Sê ghʉ̂ pə́ jî zěi. Ńté no m mbəi mbə́ ndə̂-tsâŋ gháʼa ńté pə́ no zěi.

⁴Pei sʉ́ʉtə́ Sê tû məŋ, ńgó a ghʉ̂ məŋ ndâʼ no zêi ghíʼ ə́ yǎa mə́ ntuŋú, lə̂ mbə̂u yi pə́ wo zûʼ.

⁵Pei lâghʼ jîno ńnyáŋ təcər pye pi káa gháp pə̂ gháp pye-Kəlísto, saa kwâr mbi pei, pei pfûtə gháp.

⁶Pei tsár pə̂ mətsâr shʉʼʉ mi mboʼ pə́ zʉ̂ pəi zěi; ŋuu lə̌i ntúŋú wéi no, pei pwôr lə̂ mbə̂u yi shʉʼʉ.

⁷Tishîkə, yi a pə̌ ngaŋə-ku waghʼə, ə́ mbə́ fə̌r waghʼə yi lətəi-ndwuŋ yi mboʼ pə́ tə̂m nzəm ńŋə́ lə́ zʉ́ tə́ pôghʼ có zə̂u, ə́ zʉ́ yi paghʼ pə pǎp naa fâʼ nzəm Nde, wo tó lǎʼ wéi zə̂u tsəm yi ə́ pə́ náŋtə ghâa.

⁸N ntə̂u yé lə́ pei gháʼá lə̂ nkə́u ndâʼ wéi ghíʼ paghʼ pə̌ yaʼa mbə́, mbaa lə̂ nkə́u ńcóghʼ mətəʉ méi.

⁹Gháp Onezîmə wo tó, â tâʼ fə̌r yi lətəi-ndwuŋ yi mboʼ pə́ tə̂ nzəm ə́ ŋə́ lə́ zʉ́ tə́ pôghʼ có zə̂u; ə́ mbə́ ŋuu lâʼ wei. Gháp wo lǎʼ wéi ghíʼ zə̂u tsəm leitə yaʼa.

¹⁰Aristâkə laʼ ńgó məŋ tsêʼtə́ wéi, paghʼ zʉ́ pə́ ndə̂-tsâŋ yaʼa, mbaa Máakúsʉ, fə̌r Pənə́páasʉ kə̌ ntsêʼtə wéi yé lə́wó. Pə́ kə mə́ ndâʼ wéi mbə̂u yi pei wo lǎghʼ ghwǒ Máakúsʉ; a lə̌i ntó lâʼ pei, pei pfû yé shʉʼʉ.

¹¹Yěso yi có ləjôghʼ yé ə̂ Jwistwísʉ kə̌ mə́ ntsêʼtə yé wéi lə́wó. Pye pwo pə́tárə́ ə̂ ndaʼ pye-Kəlísto pi gháp pə́ pəyúda pi paghʼ pə pǎp pə́ nâa fâʼ lə̂ no Ləfou Sê; gháp kə pə́ mbó məŋ, ə́ mbə́ pô zâa yi təʉ.

¹²Epafərásʉ kə̌ mə́ ntsêʼtə wéi yé lə́wó, a kə̌ mbə̂ yé ŋuu lâʼ wei lə́wó; zʉ́ yi a pə̌ ngaŋə-faʼ Yěso Kəlísto, káa a pə́ tî yé tə́ sʉ́ʉtə́ Sê tû pei, a ghʉ yə́rə́ lə́ pə́ yi pei wo kə pə́ təitə təitə́ lə̂ no pə̂i-ntə̂ʉ nzəm Yěso, ə́ kʉʼʉ́ ghúʼ cər no Sê, ə́ pə́ mpfu tsəm, ə́ pə́ ghʉ̂ pə̂ zə̂u yi Sê pə̌ nkoŋ ńgó pei ghʉ̂ zěi.

¹³N njwo mə́ mbə̂u yi a laghʼ ńjwô ngwôʼ ə́ fáʼ ńtê wéi, ə́ fǎʼ ńté mbaa pye Sê pi ə́ pə́ túsoŋ Lahodisê, mbaa pi gháp pə́ túsoŋ Hierapolísʉ.

¹⁴Sə̌u waghʼə Lúʼkáasʉ yi â lóghʼtə tsêʼtə́ wéi, Demásʉ kə̂ ntsêʼtə́ wéi yé lə́wó.

¹⁵Pei tsêʼtə́ pəfə̌r pi gháp pə́ túsoŋ Lahodisê, mbaa Nimfâa gháp pə pye-Kəlísto pi gháp kəitə ndə̂ zʉ́.

¹⁶Pei lə̌i fúŋ ŋwaʼa wo, pei kə̂ ncághʼə́ wéi ńŋə́ tə pə́ fûŋ cər cûʼtə pye Kəlísto yi ə́ pə́ túsoŋ Lahodisê lə́wó; pei zéi lə́wó kə́ fúŋ yi pə́ fú túsoŋ Lahodisê ntə́u ńŋə́ lə́ pei.

¹⁷Pei lâʼ lə́ Arəshîpə ńgó koo a lâghʼ faʼ yi Nde lə cóghʼ mbó zʉ́ ńgʉ́ məghaa. Ńgó a fâʼ zěi kwaʼ shʉʼʉ.

¹⁸Yo tsêʼtə yi məŋ Pôl, n ndǎghʼ ndʉʉ pô ghaa ŋwaʼá. Koo pei lyə́ghʼə ńgó m mbə́ ndə̂-tsâŋ. Ńgó Sê ghʉ̂ məno shʉʼʉ lə́ pei.