Read Ngombale 1 Tesalonîkə 1 Bible Online

1 Tesalonîkə 1 - Ngombale bible

1 Tesalonîkə 1

¹Məŋ Pôl, ə́ ngʉ́ Silásʉ ə́ nkʉ́ʼʉ́ Timotêi ŋwaʼá ŋwaʼa wo, ə́ ŋə́ mbó pye-Kəlísto pi túsoŋ Tesalonîkə, pêi pye Tǎa Sê, ə́ mbə́ pi Nde Yěso Kəlísto: Ńgó Sê ghwo poŋə-ntə̂ʉ yi tə́ ndaghʼə nzəm pei, ə́ ncóghʼ mə́shwítə məntə̂ʉ pei.

²Paghʼ pə̌ ŋə̂ nkhwo mbó Sê tə́ kâa ńtê wéi pə́tsəm, ə́ mbou káa pə́ tî wághʼ tə́ sʉ́ʉtə́ Sê tû pei.

³Paghʼ tə̂ʉ mbi Tə́ waghʼə Sê mboŋə́ pə́ sʉ́ʉtə́ yé yə́rə́, ə́ mbou mə́ nkʉ̂ʉtə məfaʼ mi pei faʼ ə́ ndeitə lə̂ pə̂i-ntə̂ʉ yi pei ghwǒ nzəm Yěso Kəlísto, ə́ mə́ nkʉ̂ʉtə mbaa məfaʼ mi pei laghʼ ḿpútə pye-mə́soŋ ńté koŋə yi pei ghwǒ nzəm páp; mbaa mbə̂u yi pei laghʼ ḿbâp tə́ kâa leʼé yi Nde Yěso Kəlísto ghʉ̌ tó.

⁴Pəfə̌r, paghʼ pə̌ njî ńgó Sê lə koŋ wéi, ə́ ntsóʼ wéi ndaghʼ ńgʉ́ pye pé.

⁵Ńté no paghʼ lə pə́ ntsə́tə Nkəʉ Shʉʼʉ lə́ pei gháʼá, káa lǎghʼ pə̂ ndaʼ tsâr fefe tsətə́, mətəʉ mi ə́ fû lə̂ Zəghʼə Ndêi-lěi lə pə́ ntôutə wághʼ, paghʼ pôu fú mə́ njî ńgó no yi paghʼ laʼ zěi ə́ pə́ lə́nə́ʉ. Pei pə̌ njî mbə̂u cǐ yi paghʼ kə ghwǒ təcər pei lə̂ ndághʼ ḿpfútə́.

⁶Ə́ ngwǒ lə́ pei, mə́i pei kə ŋə̂i lə̂ məku mághʼ mbaa lə́ mi Nde; pei lə zûʼ tsâr Sê, pye ŋə̂ wéi ngwôʼ gháʼate ńté zěi, lə́ Zəghʼə Ndêi-lěi ŋə̂ wéi mətəʉ lə̂ ndâghʼ lətsei nkúʼtə́ zěi.

⁷Ə́ leitə yə́rə́, pye-Kəlísto pi paghʼə-ngoŋ Masedwânə mbaa pi paghʼə-ngoŋ Akayî cʉ̂ʼ mə́ mbyê fəiʼ lə́ pei.

⁸Ńté ńgó tsâr Nde lə yaa fú pə́ mbó pei, káa sǎr yé yʉʼ pə̂ ndaʼ cər paghʼə-ngoŋ Masedwânə gháp yi Akayî, lə́ ngoŋ ngoŋ pə́ njî ńgó pei côghʼ ntə̂ʉ wéi lə̂ no Sê gháʼate tə káa paghʼ pyér ngwô wághʼ lə̂ ndâʼ pye laʼá.

⁹Pə́ pə́ yʉʼ tsəm mə́ ndêʼtə mbə̂u yi pei lə lǎghʼ ḿpfú wághʼ ghíʼ paghʼ kə tó lâʼ pei, mbaa mbə̂u yi pei lə lǎghʼ ńtə́m nzəm ŋə́ lə̂ məzə̂u mi pə́ lə ghûʼtə měi fûŋ lə̂ məsê, ə́ ntsə́ʉ nzəm kwaʼ Sê yi a pə̌ ntəʉ, ə́ ncʉ́ʼ mə́ ngûʼtə pə́ yé.

¹⁰Pei pə̌ nzʉ̂ʼtə ńgó Môu ye Yěso Kəlísto fú tʉ̌-lə́pû shíʼ ńtó. Ə́ zʉ́ yi Sê lə ghʉ̌ a zʉ̂ʉ lə̂ ləwʉ̂ təcər pəpfû-sê; ə̂ zʉ́ yi a wo pfú tû zághʼə lə̂ záŋə-lóŋ Sê yi ə́ kə təi shíʼ lə́ paghʼə.