Read Ngombale 1 Tesalonîkə 2 Bible Online

1 Tesalonîkə 2 - Ngombale bible

1 Tesalonîkə 2

¹Pəfə̌r pâa nzəm Kəlísto, pei tsuŋu mə́ njî ńgó káa paghʼ kə tô wághʼ lâʼ pei fefe.

²Ə́ nkə́ ncí mə́ njî ńgó pə́ zoutə wághʼ; ə́ mbou ŋə́ wághʼ ngwôʼ túsoŋ Filîpə. Paghʼ tô tə nkə́u lâʼ pei, pə́ pə̂ tə mə́ ndə̂ʼ no zághʼ lə̌ʼ lə́, ə Sê ŋə̂ wághʼ mətəʉ tə paghʼ kə̂ ntsə́tə́ pə̂ Nkəʉ Shʉʼʉ ye lə́ pei.

³Ə tsâr yi paghʼ lâʼ lə̂ ndághʼ tóutə pye, káa pə̂ yé məlaa; káa kə́ pə̂ yé lə̂ ndâghʼ ńdôu có zə̂u ndeʼe, káa kə́ pə̂ yé tsâr píʼí.

⁴Lə́, ə Sê lə zʉ́ʼ wághʼ tə njwó ńgó paghʼ kuʼtə, ə́ ncóghʼ Nkəʉ Shʉʼʉ yé mbó paghʼ, paghʼ cʉ̂ʼ mə́ ŋáa ndéʼtə́ zěi, káa pə́ lou pə́ ńgó pye-mə́soŋ kôŋ wághʼ, lə́ ə́ ndou pə́ lə̂ ngʉ́ tə poŋə́ Sê, zʉ́ yi a pə̌ njî zə̂u yi ə́ pə́ məntə̂ʉ paghʼ.

⁵Pei tsuŋu mə́ njî ńgó paghʼ laa kə́ tsâr wághʼ có tsâr, ə́ ndaghʼ ńdyaghʼtə́ cǒ ŋuu, káa kə́ tsâr wághʼ có tsâr yi paghʼ lou lə̂ ndághʼ ńzʉ́ pəi; ə Sê pə̌ njí.

⁶Paghʼ laa kə́ lôu ńgó ŋuu ŋə́ məkuʼ mághʼ, kəʉ pei, kəʉ pəcó pye lo;

⁷mboʼ paghʼ lə lâghʼ no yi paghʼ pə̌ pəghaŋə-ntə̂u Yěso Kəlísto, ə́ ntúŋú wéi zə̂u tsəm yi paghʼ kǒŋ; lə́ káa paghʼ lə ghʉ̂ wághʼ yə́rə́, tə ncʉ́ʼ yə́rə́, paghʼ lâghʼ pə̂ mbwórə mbə́ təcər pei, ghíʼ mə́ pə ghəpə́ nâŋtə ghəpə́ yé lə̂.

⁸Ntə̂u wághʼ lə fú mbə́ lə́ pei tə́ ə́ pə̂ yi mboʼ paghʼ lə ŋə̂ wághʼ wéi pə̂ ndaʼ Nkəʉ Shʉʼʉ po, lə́ paghʼ lə tə́ʉ lə̂ ŋə́ tû zághʼ ńté wéi; ńté mbə̂u yi nkoŋə yi paghʼ kə ghwǒ nzəm pei kə lǎghʼ ńgúʼ.

⁹Pəfə̌r, pei tsuŋu mə́ nkʉ̂ʉtə ghíʼ paghʼ lə pə́ lâʼ pei ə́ mə́ tsə̂tə nkəʉ Sê, ə faʼ pə̂ fâr wághʼ, paghʼ táŋə gháʼate. Paghʼ lə faʼ ntə̌ʉ-nəu gháp lətwûʼ, ə́ mbôghʼ lə̂ mbə́ pyeʼ mbó cǒ wei.

¹⁰Pêi pənzǔʼ-njwó lə̂ cǐ yi paghʼ kə ghwǒ təcər pei, ə Sê kə mə́ njî yé lə́wó: Ə cǐ yi paghʼ kə ghwǒ təcər pei pye Kəlísto lə pə́ cǐ shʉʼʉ, ə́ mbə́ ndʉŋ-ndʉŋ, ə́ mbou mbə́ tə́ lǒʼ.

¹¹Pei kə̌ ncí mə́ njî ńgó paghʼ lə pápə́ wǒwó təcər pei ghíʼ tə́ pə ghəpə́ pápə ghəpə́ yé lə̂.

¹²Paghʼ lə côghʼ ntə̂ʉ wéi, ə́ mbou ncóghʼ mətəʉ méi; ə́ mbou ŋə́ wéi ntǎghʼ ńgó pei ŋə̂i lə̂ mbə̂u yi Sê pə̌ ntúŋú, zʉ́ yi a pə̌ fûŋ wéi ńgó pei ntó ńkə́u cər ləfou yé mbaa cər ləghûʼ ye.

¹³Ə có no kə́ ncí mbə́ wó yi ə́ cʉ́ŋə wághʼ lə̂ ŋə́ nkhwo mbó Sê tə́ kâa ńté wéi, ə́ mbə́ ngô: Ə́ lə pə́ ghíʼ paghʼ lə tó ndáʼ tsâr Sê mbó pei, pei zûʼ, ə́ kə̂u tû pei, pei kûʼtə; káa ə́ kûʼtə wéi ghíʼ tsâr pye-mə́soŋ, lə́ ə́ kúʼtə́ ghíʼ kwaʼ tsâr Sê. Ə́ pə̂ yə́rə́, zěi pə̂ ngʉ́, pei pye Kəlísto pə̂ nzə̂m məntǎa shʉʼʉ.

¹⁴Pəfə̌r, ə ngwôʼ yi məcûʼtə pye-Kəlísto mi ə́ pə́ Yudêi lə jwô, pei lə kə́ njwô zéi pə́ zěi; páp pi gháp pə́ pye Sê, ə́ mbou mə́ mbə̂i no Yěso Kəlísto. Pəfə̌r péi lə ŋə́ wéi ngwôʼ, ə́ ndʉŋ-ndʉŋ ghíʼ pəyúda lə ŋə̂ záp ngwôʼ mbó məcûʼtə pye Kəlísto mi ə́ pə́ Yudêi.

¹⁵Pəyúda pêi lə jwí Nde Yěso gháp pə pətsətə́-nkəʉ Sê, ə́ mbou ŋə́ wághʼ ngwôʼ. Káa gháp lə ghʉ̂ gháp zə̂u yi ə́ poŋə́ Sê, gháp pou mbə́ pəghaŋə mbəu pye-mə́soŋ pə́tsəm!

¹⁶Gháp pə́ nkə̂ʼtə wághʼ lə̂ ndáʼ tsâr Sê mbó pye pi káa gháp pə̂ gháp pəyúda, lə́ pə́ yi mboʼ ə́ ghʉ gháp cwôr; gháp ghʉ yə́rə́ mpfu tsəm, ə́ ndaghʼ ńkʉ́ʼʉ məno tə́poŋ lə̂ mi gháp lə yaa mə́ ngʉ́. Lə́ ə́ ghǐ lyəghʼtə́, ə Sê záŋə-lóŋ lə́ páp.

¹⁷Pəfə̌r pâa nzəm Kəlísto, ə́ ngwǒ lə́ paghʼ, tə fú ghíʼ paghʼə kə sěi lə́ mə́ceʼé mpfu tə káa pyér pə́ jwô wághʼə məsʉ̂, lə́ ə́ nkə́ ngwô pə́ tâʼ nkwaŋtə lə̂, paghʼ pə̌ ndôu məsʉ̂ lə̂ ntó tə paghʼə nkə́ ncí njwó məsʉ̂, ńté no nji zei pə̌ nzáŋə wághʼ gháʼate.

¹⁸Paghʼ lə pə́ nkôŋ lə̂ nkə́ ncí mbə̂ʉ lâʼ pei, məŋ Pôl, n ndwu mə́ məmpfu tə nzáa lə̂ nkə́ ncí ntó; lə́ Sə́tə zâʼ məku mâa.

¹⁹Paghʼ kə pə nkôŋ lə̂ ntó ńté no káa cǒ ŋuu ndeʼe kə́ mbə̂ yé wó tə ndyéʼ wéi yi pei ghʉ paghʼ fû mə́ njî ńgó paghʼ ghʉ̌ ghwǒ zə̂u yi paghʼ pə̌ ntsâa zěi; pei lə̂ ghʉ paghʼ ghwô lətsei, pêi zaghʼ nkaghʼə ləmǎʼ-nzʉ́ yi paghʼ ghʉ̌ lǎghʼ tə́ʉ mbi Nde Yěso ə́ ŋáʼtə́ leʼé yi a ghʉ̌ kə́ cí tó.

²⁰Ə̂ŋ, pêi zághʼ zə̂u laghʼ ńŋáʼtə́, pei lə̂ ghʉ ńgó paghʼ tsêi.