Read Ngombale 1 Tesalonîkə 3 Bible Online

1 Tesalonîkə 3 - Ngombale bible

1 Tesalonîkə 3

¹Ghíʼ nji zei lə kə́ mə́ nzáŋə wághʼ záŋə́ lə̂, paghʼ jwó ńgó ə́ poŋ ńgó paghʼ cʉ́ʼ nyáŋ túsoŋ Atênə pə́ paghʼ lə́ paghʼ.

²Ə́ pə̂ yə́rə́, paghʼ tə̂u fə̌r waghʼə Timotêi lə́ pei. Pei pə̌ njî ńgó gháp Sê faʼ faʼ lə̂ ntsətə́ Nkəʉ Shʉʼʉ Yěso Kəlísto. Ə́ ntə̂u yé yə́rə́ gháʼá ńgó a tó cóghʼ mətəʉ méi mbou ngʉ́ pə̂i-ntə̂ʉ zéi nzəm Yěso Kəlísto tə̂itə́,

³ńjí ńgó ngwôʼ yi pei jwô ghʉ yé tə cǒ ŋuu wei ghwo yé ləpôghʼ po. Ńté no pei pə̌ njî ńgó mboʼ paghʼə cî wághʼə ndəu ndesé yaʼa tə́ pə́ njwô ngwôʼ po.

⁴Ə́ lə pə́ mpfu yi paghʼ lə́ pə́ lâʼ pei, ə́ nzáʼ nzʉ̂ ə́ ndǎʼ wéi ńgó ngwôʼ ghʉ̌ kə́u wághʼə, pei tsuŋu mə́ njí ńgó paghʼ lə lâʼ, ə́ kə́ nkwǎr yə́rə́.

⁵Ə̂ zə̂u yi lə ghʉ̌, n shə̂ghʼ kə́káŋ, ə́ ntə́u Timotêi lə́ pei ńgó a tó ńjwó ńgó kəʉ pei pyěr ngwǒ pə̂i-ntə̂ʉ nzəm Yěso Kəlísto. N ndə ghí tə́u yé yə́rə́, m mə́ mbôghʼ ńgó mboʼ Sə́tə lə cʉ̂ʼ nzəm nkwâʼtə wéi, pei pfûŋ cər nkwaʼtə yé, ə zághʼ faʼ yi paghʼ lə fǎʼ təcər pei lei fe.

⁶Timotêi fǔ lâʼ pei ə́ mbə̂ʉ ntó pə́ mpfu wo, ə́ mə́ ndâʼ wághʼ kwaʼ no shʉʼʉ ńgó pei kə̌ mbyér ngwô pə̂ pə̂i-ntə̂ʉ nzəm Kəlísto, ńgó pei kə̌ mbyér ngwô pə̂ nkoŋə təcər pei; ə́ nkə́ ncí ndâʼ wághʼ ńgó pei pə̂ mpfu tsəm, ə́ mə́ nkʉ̂ʉ wághʼ pə̂ shʉʼʉ, ə́ mbou mə́ ntsâa lə̂ nkə́ ncí njwó wághʼ, ə́ ndʉŋ-ndʉŋ ghíʼ paghʼ zághʼ tsâa lə̂ nkə́ ncí njwó wéi.

⁷Ə̂ zə̂u yi ə́ ghʉ̌ pəfə̌r, paghʼ lə pə́ tə mə́ njwô ngwôʼ ə́ mbou mə́ nfʉ̂ gháʼate, lə́ ə́ nděi tə nzúʼ ńgó pei kə̌ mbyér ngwô pə̂ pə̂i-ntə̂ʉ nzəm Yěso Kəlísto, ə́ ghʉ ntə̂ʉ wághʼ kə̂u,

⁸paghʼ pou mbə́ mpfu wo, ə́ nzúʼ ə́ mbə́ shʉʼʉ, ńté no pei tsuŋu ndǎr mbəʉ zei lə́ Nde.

⁹Pei lə̂ ghʉ paghʼ ghwô lətsei mbi Nde waghʼə, paghʼ lə̌i mbə́i ńŋə́ nkhwo lə́ zʉ́ ńté wéi tə nkə́u pə́ ghó, ə́ kûʼ yé po.

¹⁰Paghʼ pə̂ ntə̌ʉ-nəu gháp lətwûʼ, ə́ mə́ sʉ̂ʉtə Sê tə́ kâa, ńgó a ghʉ́ paghʼ kə́ ncí njwó wéi pə́ tû-mbəʉ zághʼ, ə́ ndə́ghʼə́ zə̂u yi ə́ pyér mə́ mbûŋ lə̂ pə̂i-ntə̂ʉ zéi nzəm Yěso Kəlísto.

¹¹Ńgó Sê tû-mbəʉ yé, zʉ́ yi a pə̌ tə́ wághʼə gháp Nde waghʼə Yěso tsóʼ laŋə́-ndə̂u, paghʼ tó ńjwó wéi.

¹²Ńgó Nde ghʉ̂ ə nkoŋə yi pei ghwǒ təcər pei mbaa nzəm ŋuu ntsəm zə́r nzáa, ə́ ndʉŋ-ndʉŋ ghíʼ nkoŋə yi paghʼ ghwǒ nzəm pei.

¹³Ńgó Sê ghʉ́ pei kə́ mə́ ngwô pə̂ shəghʼ-ntə̂ʉ, ńjí ńgó pei ghʉ ntə́ʉ mbi zʉ́ yi a pə̌ Tə́ waghʼə, ə́ mbə́ pətə-lǒʼ leʼé yi Nde waghʼə Yěso Kəlísto gháp pə pye pé ghʉ̌ tó. [Ə̂ pə́ yə́rə́.]