Read Ngombale 1 Tesalonîkə 4 Bible Online

1 Tesalonîkə 4 - Ngombale bible

1 Tesalonîkə 4

¹Pəfə̌r pâa nzəm Kəlísto, ə no yi paghʼ wo lǎghʼ lyəghʼtə́ ə́ pə́ ńgó, paghʼ kə jyéʼ wéi mbə̂u yi mboʼ pei lâghʼ nyâŋ tə ə́ poŋə́ Sê, kwaʼ lə́nə́ʉ pei pə mə́ ngʉ yə́rə́. Lə̂ mpfu wo paghʼ pə̌ ndaʼ lə́ pei ə́ mbou mə́ sʉ̂ʉtə wéi lə̂ ləjôghʼ Nde Yěso ńgó pei lághʼ ńdə̌r lə̂ mbi, ə́ ngʉ́ tə ə̂ pôŋ nděi yə́rə́.

²Pei yaa ntsuŋú mə́ njî məntǎghʼ mi paghʼ lə ŋə́ lə́ pei, ə́ pə̂ mi ə́ fû mbó Nde Yěso.

³Zə̂u yi Sê koŋ zěi pə́ ngô: pei lâr mbəʉ zéi lə́ zʉ́, ə́ mbou mbáa lə̂ mbə̂u nzóʼ.

⁴Ńgó wǒwó təcər pei jí mbə̂u yi mboʼ laghʼ ńgwô ngwě ye, ə́ ngwô yé lə̂ mbə̂u yi ə́ poŋə́ Sê, ə́ ngwǒ yé lə̂ mbə̂u yi mboʼ pə́ jwô ə́ ŋə́ məkuʼ mé.

⁵Koo ŋuu wei nyêr məkwaŋtə mé tə̂ʉ lə̂ no məngyě tə́sə́ʉ ghíʼ pye pi káa gháp pə́ njî gháp no Sê ghʉ yə́rə́.

⁶Koo ŋuu jî mənyaŋ fə̌r ye lə̂ mbə̂u no zêi. Paghʼ lə yaa mə́ nzáʼ nzʉ̂ ndâʼ wéi mbou ncwôtə́ wéi ngô: Nde ghʉ̌ tághʼ ngwôʼ tû ŋuu yi a ghʉ mbə̂u no zêi.

⁷Káa Sê lə fûŋ yé wághʼə ńgó paghʼə pə̂u nzóʼ, a lə fûŋ wághʼə pə́ ńgó paghʼə nyáŋ lə̂ mbə̂u ə́ wo poŋə́ yé.

⁸Ə̂ zə̂u yi ə́ ghʉ̌, ŋuu yi a lə̌ʼ lə̂ ŋə̂i lə́ wêi wo ntǎghʼ, â jí ńgó kâa lə̂ʼ gháʼá pə́ no ŋuu məsoŋ, a ləʼ gháʼá pə́ ntǎghʼ Sê; ə́ zʉ́ Sê yi a ŋə̂ Zəghʼə Ndêi-lěi yé lə́ pei.

⁹Káa paghʼ ghwô wághʼ lə̂ nkə́ mbóu ŋwaʼa cǒ ŋwaʼa ŋə́ lə́ pei ə́ ndaghʼ ńjyéʼ wéi lə̂ nkóŋə́ mbəʉ zéi təcər pei, ńté no Sê kə jyéʼ mə́ wéi lə̂ nkoŋə́ mbəʉ zéi təcər pei pəfə̌r nzəm Kəlísto.

¹⁰Ə́ yaa mbəi mbə́ mbə̂u nkoŋə zêi yi pei ghwo mə́ nzəm pəfə̌r pə́tsəm pi gháp pə́ cər paghʼə-ngoŋ Masedwânə. Pəfə̌r, ghíʼ ə́ kə́ mbə́ yə́rə́ lə̂, pei sáʼ təʉ ə́ ngʉ́ yə́rə́ ńdaghʼ ńdə́r lə̂ mbi.

¹¹Pei pə́ mpfu tsəm, ə́ sáʼ mətəʉ lə̂ nkə́ nyâŋ pə́ lə̂ mbwórə, ə́ náŋtə́ ndʉʉ məno wei, wǒwó sáʼ təʉ fâʼ mboŋə́ zʉ́, ghíʼ paghʼ lə lǎʼ wéi lə̂.

¹²Pei lə̌i ngʉ́ yə́rə́, mə́i pətəpə̌i-no Sê wo jwó lənyâŋ wéi, ə́ fə́tə́ wéi, lə́u pei póu mbə̂ wéi pyeʼ mbó cǒ ŋuu po.

¹³Pəfə̌r pâa nzəm Kəlísto, paghʼ pə̌ nkoŋ ńgó pei jí no-lə́nə́ʉ yi ə́ nâŋtə pye-Kəlísto pi gháp lə kwʉ́tə́ mə́; ə́ mbóghʼ lə́ pə́ yi mboʼ pei nyâŋ mə́ nfʉ̂ ghíʼ pye pi káa gháp pə́ nzʉ̂ʼtə gháp có zə̂u mbó Sê po.

¹⁴Ghíʼ paghʼə pə̌ mbə̂i ńgó Sê lə ghʉ Yěso zʉ́ʉ lə̂ ləwʉ̂ lə̂; ə́ kə́ mbə́ ndʉŋ-ndʉŋ ghíʼ wǒwó yi a lə ghí kwʉ́ ə́ ngwǒ pə̂i-ntə̂ʉ nzəm Yěso, ə Sê ghʉ̌ lěi lə́ Yěso, ə́ ghʉ̌ â kə́ nzʉ̂ yé lə̂ ləwʉ̂ lə́wó.

¹⁵No yi paghʼ wo ndǎʼ pei lo, ə̂ yi ə́ lə nkwǎr ntsʉ Nde: Ə́ ghʉ̌ pə́ leʼé yi Nde wo pə̌ʉ tó, paghʼə pi pyěr ntəʉ pyə̂ghʼ wághʼə mbi zʉ́, pye pi gháp lə kwʉ́tə́ mə́ poŋə́ tó po.

¹⁶Ə́ ghʉ̌ pə́ leʼé wêi, ə Sê láʼ lə́ fou pəcwôʼ Sê, â tóŋ ntaŋ Sê. Tû-mbəʉ Nde fú tʉ̌-lə́pû ńshíʼ ńtó; pye pi gháp lə ghí kwʉ́tə́ ə́ ngwǒ pə̂i-ntə̂ʉ nzəm Kəlísto pyə́ghʼə́ ə́ nzʉ́ʉ lə̂ ləwʉ̂.

¹⁷Ə̂ pâatə, paghʼə pi paghʼə pyěr ntəʉ, ə Sê ghʉ́ paghʼə pə pǎp kóʼ cər məlaa ńgwo ńcə́r Nde ə́ tʉ́, paghʼə pə pǎp lə̂ láʼ nkə́ ncʉ́ʼ mbə́.

¹⁸Ghíʼ ə́ kə́ mbə́ yə́rə́ lə̂, pei lághʼ mwo mətsâr ńtóutə́ mbəʉ zéi təcər pei.