Read Ngombale 1 Tesalonîkə 5 Bible Online

1 Tesalonîkə 5 - Ngombale bible

1 Tesalonîkə 5

¹Pəfə̌r pâa nzəm Kəlísto, ə́ wo lə̂ no yi ə́ náŋtə́ leʼé lâʼ mbaa mpfu yi məno mwo wo mbəutə́ wó mə́u, káa pə kə́ ngwô yé lə̂ ŋə́ ŋwaʼá ńdághʼ ńdǎʼ wéi;

²ńté no pei tsuŋu mə́ njî ńgó ə́ ghʉ̌ pə́ leʼé yi Nde wo ntó wó, a ghápə-ghapə́ ntó; pə́ ghíʼ ntsǒŋ ghápə-ghapə́ ntô lətwûʼ lə̂.

³Pye ghʉ̌ nyáŋ tə pə́ lâʼ ngô: «Ə́ mbwórə pə mə́ cər lâʼ, káa paghʼə pyér mə́ mbôghʼ wághʼə có zə̂u.» Ə ngwôʼ zéʼ ncwə́rə́ lə́ páp tə́ tʉ̂ŋtə ghíʼ ngwôʼ məngyě yi a wo njí wó. Cǒ ŋuu ghʉ̌ lwoghʼ yé po.

⁴Lə́ ə́ ngwǒ lə́ pei pəfə̌r, káa pei pə̂ wéi cər nzə̌m lə́ pə́ yi mboʼ leʼé lâʼ zei ghʉ mə́i wéi mə́i ghíʼ ntsǒŋ lə̂.

⁵Pei pə́tsəm yaa mbəi mbə́ pə̂ pye pi pei ŋəi cər nkeʼ, ə́ mbə́ pye pi gháp ŋə̂i pə̂ ntə̌ʉ-nəu. Káa paghʼə pə́ ŋə̂i wághʼə lətwûʼ, káa kə́ pə́ ŋəi wághʼə cər nzə̌m.

⁶Ə́ ndaghʼ ńdâʼ ngô, koo paghʼə lê ghíʼ pəcó pye; paghʼə nyáŋ mə́ mbâp, ə́ ngʉ̌ zə̂u tsəm ə́ kuʼú-kuʼú.

⁷Pye pi gháp lê, lê lətwûʼ; pye pi gháp nô məluʼ mbʉ́ʉ, kə̂ no mbʉ̂ʉ pə́ lətwûʼ.

⁸Ə́ ngwǒ lə́ paghʼə pi paghʼə ŋəi pə̂ ntə̌ʉ-nəu, paghʼə ghʉ́ zə̂u tsəm ə́ kuʼú-kuʼú; paghʼə lághʼ pə̂i-ntə̂ʉ nzəm Yěso Kəlísto gháp nkoŋə, ə́ ngʉ́ waghʼə kə̂ʼ-ntso yi pə́ lǎghʼ tə̌ʉ ńtsúŋú; paghʼə lághʼ ghíʼ paghʼə pə̌ nzʉ̂ʼtə zə̂u yi Sê lə ghʉ̌ ndaʼá mə́u lə̂ ngʉ́ ŋə́ lə́ paghʼə, zei zə̂u pə̂ ləcwôr, ə́ ngʉ̂ zaghʼə nkaghʼə-ntso yi pə́ lǎghʼ tə̌ʉ ńtsúŋú.

⁹Ńté no káa Sê lə fúŋ yé wághʼə lə̂ ntâghʼ ngwôʼ tû paghʼə, lə́ a lə fúŋ wághʼə pə́ ńgó paghʼə lêitə́ lə̂ zə̂u yi Yěso Kəlísto lə ghʉ̌, zʉ́ Sê ghʉ́ paghʼə cwór.

¹⁰Kəlísto lə kwʉ́ ńté tû zághʼə lə́ pə́ yi ə́ ghʉ̌ pə́ leʼé yi a pə̌ʉ ntó, paghʼə pyér ntəʉ kəʉ mbə́i nkwʉ́ kwʉ̂, paghʼə lâghʼ ghíʼ paghʼə lǎr mbəʉ lə́ zʉ́, ə́ mbə́ wó.

¹¹Ghíʼ ə́ kə́ mbə́ yə́rə́ lə̂, pei cóghʼ mətəʉ méi təcər pei, ə́ ntôutə mbəʉ zêi təcər pei, ə́ ndǎghʼ pə̂i-ntə̂ʉ zéi nzəm Yěso Kəlísto ńdə́r lə̂ mbi ghíʼ pei yaa mə́ mbə̌i mə́ ngʉ́ lə̂.

¹²Pəfə̌r pâa nzəm Kəlísto, paghʼ pə̌ ndâʼ ńgó pei ŋə́ məkuʼ pye pi gháp pə́ njwô ngwôʼ ńfâʼ təcər pei, ə́ pye pi Sê tsǒʼ gháp ə́ tághʼ mbi, gháp pə̂ ncághʼə́ wéi lə̂ ləjôghʼ Nde, ə́ mbou mə́ ncwôtə wéi.

¹³Pei tsuŋú ŋə́ məkuʼ máp, ə́ mbóu nkôŋ gháp ńté faʼ yi gháp faʼ zěi. Pei nyáŋ təcər pei lə̂ mbwórə.

¹⁴Pəfə̌r pâa nzəm Kəlísto, paghʼ sʉʉtə́ wéi ńgó pei kwêitə́ tû pye pi gháp ghwǒ lənyâŋ tə́poŋ, ə́ ncóghʼ məntə̂ʉ pye pi məntə̂ʉ pyér mə́ mbwór. Ə́ ntóutə́ pətyáp, ə́ ngwǒ shəghʼ-ntə̂ʉ nzəm ŋuu ntsəm.

¹⁵Pei páa lə̂ ndághʼ no tə́poŋ mbʉ̂ŋ có, lə́ pei pə́ mpfu ntsəm ə́ sáʼ təʉ pə́ lə̂ ngʉ́ shʉʼʉ təcər pei mbaa lə́ ŋuu ntsəm.

¹⁶Pei kə́ nyâŋ wéi pə́ lə̂ lətsei,

¹⁷pei sʉ́ʉtə́ Sê tə́ kâa,

¹⁸pei ŋə́ nkhwo mbó Sê lə́ məno mə́tsəm mi ə́ cə̂r wéi; ńté ńgó ə̂ zə̂u yi Sê pə̌ nkoŋ ńdeitə́ ghí pei lǎr mbəʉ zéi lə́ Yěso Kəlísto.

¹⁹Koo pei kə̂ʼtə Zəghʼə Ndêi-lěi lə̂ ngʉ́ yé faʼ;

²⁰koo pei wághʼtə tsâr yi Sê cǒghʼ ntsʉ ŋuu a lâʼ.

²¹Lə́ pei wó lə́ maa zə̂u tsəm, ə́ ndə́iʼtə́: ə́ nkâŋ yi shʉʼʉ;

²²ə́ mbou nkhʉ́ no tə́poŋ tsəm.

²³Ńgó Sê, zʉ́ yi mbwórə ntsəm fû mbó zʉ́ ghʉ́ pei fú mbə́ pye pé, ə́ mbápə́ ntə̂ʉ wéi, ə́ mbápə́ mə́jʉ̂ŋtə wei, ə́ mbápə́ mbap mbəʉ zei ńjí ńgó ə́ ghʉ mbə́ leʼé yi Nde Yěso Kəlísto wo tó, pei pə̂ tə́ lǒʼ.

²⁴Ə Sê, zʉ́ yi a fǔŋ wéi ńdaghʼ ńgʉ́ pye pé táa ghʉ̌ məno mêi mwo pə̂utə́, ńté no â laʼ ngʉ́.

²⁵Pəfə̌r, pei zéi lə́wó sʉ́ʉtə́ Sê tû paghʼ.

²⁶Pei lâghʼ mbáʼá ntsêʼtə́ pəfə̌r pə́tsəm.

²⁷N sʉʉtə́ wéi lə̂ ləjôghʼ Nde ńgó pei fúŋ ŋwaʼa wo tə pəfə̌r pə́tsəm zúʼ.

²⁸Ńgó Nde waghʼə Yěso Kəlísto cóghʼ mbwórə lə́ pei.