Read Ngombale 2 Tesalonîkə 1 Bible Online

2 Tesalonîkə 1 - Ngombale bible

2 Tesalonîkə 1

¹Məŋ Pôl, ə́ ngʉ̌ Silásʉ, ə́ nkʉ́ʼʉ́ Timotêi ŋwaʼá ŋwaʼa wo ńŋə́ mbó cûʼtə pye Kəlísto pi túsoŋ Tesalonîkə, ə́ mbə́ cûʼtə Tə́ waghʼə Sê mbaa yi Nde waghʼə Yěso Kəlísto:

²Ńgó Tə́ wághʼə Sê gháp Nde wághʼə Yěso Kəlísto ghwô poŋə-ntə̂ʉ yi tə́ ndaghʼə nzəm pei, ə́ ncóghʼ mə́shwítə məntə̂ʉ pei.

³Pəfə̌r pâa nzəm Kəlísto, paghʼ ghwo lə̂ ŋə́ nkhwo mbó Sê tə́ kâa ńté wéi. Ə́ yaa mbǒŋ ńgó paghʼ ghʉ̂ yə́rə́ ńté no pə̂i-ntə̂ʉ zéi pə́ sâa-sǎa ngúʼ, nkoŋə yi pei pə́tsəm pǒu ngwǒ təcər pei pə̂ ndə̂r lə̂ mbi.

⁴Ə̂ zə̂u yi ə́ ghʉ̌, ə́ pə̂ mpfu tsəm yi paghʼ kə̌u cər məcûʼtə pye Sê, ə́ ngí pə́ kʉ̂ʉ wéi, ə́ ngwǒ lətsei məntə̂ʉ paghʼ, ńté ńgó pye kə pə́ tə mə́ ŋə̂ wéi ngwôʼ gháp məngaghʼə, lə́ pei kə̂ mə́ shə̂ghʼ shəghʼə́, ə́ nkə́ ngwô pə́ pə̂i-ntə̂ʉ nzəm Yěso Kəlísto.

⁵Ə ngwôʼ zei gháp məngaghʼə mêi gháʼá mbə́ tâʼ ləiʼi yi nyárə ńgó Sê ghʉ̌ ghǐ pə́ feʼ pye, ə́ lǎghʼ ghíʼ a pə̌ ndʉŋ-ndʉŋ ə́ fěʼ pye; ńté ńgó pei wo leitə́ pə́ lə̂ ngwôʼ zêi, ə́ poŋə́ pə́ pye pi pei kǔʼ lə̂ nkə́u cər Ləfou Sê yi pei pə̂ mpfu wo, ə́ mə́ njwô ngwôʼ ńté zěi.

⁶Ə́ yaa mbə́ ndʉŋ-ndʉŋ ńgó Sê tâghʼ tû pye pi gháp ghʉ pei jwô ngwôʼ,

⁷ə́ pǒu ghʉ̌, pei pi pei pə̌ njwô ngwôʼ mpfu wo ghwô mə́shwítə; mbaa paghʼ zághʼ lə́wó. Zêi yo no táa lěi leʼé yi Nde Yěso Kəlísto gháp pə pəcwôʼ pé ghʉ̌ fú tʉ̌-lə́pû shíʼ tó, pəcwôʼ pé pêi ghwô mətəʉ gháʼate.

⁸A ghʉ̌ tó cər tə́koʼ mǒghʼ, ə́ tághʼ ngwôʼ tû pye pi gháp ləʼ lə̂ mbə́i no Sê, ə́ páp pi gháp ləʼ lə̂ ŋə̂i ghíʼ Nkəʉ Shʉʼʉ Nde wághʼə Yěso Kəlísto pə̌ ndǎʼ.

⁹Ə ngwôʼ yi gháp ghʉ̌ jwó, pə́ ńgó gháp ghʉ̌ fú mě mě; ə́ ndaghʼ ńdâʼ ńgó gháp ghʉ̌ pə́ ndǐ təsə lə̂ yʉʼ yi Nde waghʼə pə̌ wó; ə́ pə́ ndǐ təsə lə̂ nkə́u cər ləghûʼ ye.

¹⁰Mêi mwo məno ghʉ̌ lěi leʼé yi Nde waghʼə wo láʼ tó. Ə́ ghʉ̌ pə́ leʼé wêi, pye pé pə́tsəm pi gháp lə pə́i no yé pə́ ŋə̂ məkuʼ mé ə́ mbou mə́ fə́tə́ yé; pei zéi lə́wó ghʉ̌ pə́ lə̂ nou gháp, ńté no pei lə pə̂i no yi paghʼ lə lǎʼ wéi zěi.

¹¹Ə̂ zə̂u yi ghʉ̌, paghʼ pə̂ sʉ̂ʉtə Sê tû pei tə́ kâa. Paghʼ pə̌ sʉ̂ʉtə Sê zaghʼə ńgó a ghʉ̂ pei kûʼ lə̂ nyáŋ lə̂ mbə̂u yi a lə fúŋ wéi ńdághʼ ńgʉ̌ pye pé ńgó pei nyáŋ yə́rə́. Paghʼ kə̌ ncí mə́ sʉ̂ʉtə yé ńgó a lâghʼ mətəʉ mé ńtóutə́ wéi lə̂ ngʉ́ maa no shʉʼʉ tsəm yi pei pə̌ ntsâa lə̂ ngʉ́; ə́ mə́ sʉ̂ʉtə yé ńgó a ghʉ́ pei lághʼ məfaʼ shʉʼʉ mi pə̂i-ntə̂ʉ zéi pə́ ncʉ́ŋə́ wéi ńgó pei ghʉ́, ə́ ndaghʼ ńdə́r lə̂ mbi.

¹²Ə̂ pə́ yə́rə́, pye lêitə́ lə́ pei, ə́ ngúʼtə́ ləjôghʼ Nde wághʼə Yěso; ə́ pə póu ndeitə́ lə́ zʉ́ ńŋə́ məkuʼ méi. Ə̂ pə́ yə́rə́, Sê zághʼə gháp Nde wághʼə Yěso Kəlísto lághʼ nyarə́ poŋə-ntə̂ʉ záp yi tə́ ndaghʼə yi gháp ghwǒ nzəm paghʼə.