Read Ngombale 2 Tesalonîkə 2 Bible Online

2 Tesalonîkə 2 - Ngombale bible

2 Tesalonîkə 2

¹Pəfə̌r pâa nzəm Kəlísto, ə́ wo lə̂ no yi ə́ náŋtə́ leʼé yi Nde Yěso ghʉ̌ tó mə́u, mbaa lə̂ mbə̂u yi paghʼə ghʉ̌ kəitə́ mbəʉ zʉ́, paghʼ pə̂ ndâʼ tâʼ no moʼ lə́ pei ngô:

²Cǒ ŋuu lə̌i ntó ńdáʼ wéi ńgó leʼé yi Nde wo ntó wó, ə́ tó mə́, koo tû zéi vúŋu; koo pei pôghʼ; tə mbaa pə́ ghíʼ a lə̌i ndâʼ wéi pə́ ńgó tsâr zêi fú mbó Sê, káa ńgó pye pə́ ndâʼ yə́rə́, kəʉ pə́ ńgó paghʼ lə̂ ŋwaʼá ndaghʼ ńdâʼ wéi, koo pei pə̂i.

³Ŋuu lə̌i ndághʼ pə́ zárə́ mbə̂u ntó lə̂ fútə́ wéi, koo pei pə̂i. Leʼé mbî zêi táa tô yé tə́ ghó pye tə nzáa pə́ mə́ ntə̂i tû ńŋə̂ mbó Sê po; tə́ ghó Fou məno tə́poŋ kwâr ńtə́ʉ, ə́ mbə́ ŋuu yi Sê wo mǎʼ zʉ́ mǒghʼ po.

⁴Fou məno tə́poŋ wêi ghʉ̌ lěsê lǎʼ ńgó a lei məzə̂u mə́tsəm mi pye-mə́soŋ ghûʼtə ə́ fûŋ ńgó məsê; ə́ nděi tə mbaa pə̂ Sê yi a lə tsuŋú lə́pû gháp ndesé. Ə́ pə́ pə̂ tə â wó nyáŋ ndə̂ Sê, ə́ ndǎʼ ńgó zʉ́ lə́ cʉ́ʼ mbə́ kwaʼ Sê.

⁵Káa pei pə́ kʉ̂ʉtə ńgó n ndə laʼ wéi məno mêi, ə́ mpfu yi n ndə pyér mbə́ pə́ təcər pei mo?

⁶Pei pə̂ mpfu wo, ə́ mə́ njî zə̂u yi ə́ mə́ nkə̂ʼtə Fou məno tə́poŋ wêi lə̂ ntó; a ghʉ̌ kə kwǎr pə́ lə̂ mpfu yi Sê lə tághʼ.

⁷Ə́ laghʼ ńdâʼ ńgó ŋuu a lwo, ə́ nkə́ʼtə pye lə̂ ŋə̂i ghíʼ Sê pə̌ nkǒŋ pə mə́ ngʉ faʼ yé; lə́ a ghʉ̌ fú ghʉ̌ faʼ yé zêi pə̂ sâa-sǎa mpfu yi ŋuu yi a kə̂ʼtə yé tsǒʼ saa ńŋə́ lə́ zʉ́.

⁸Ə̂ pə́ yə́rə́, Fou məno tə́poŋ wêi lêi ńtə́ʉ, Nde Yěso lághʼ fwôghʼ ntsʉ ye ə́ njwí yé, ngəwoghʼ yi Yěso lǎghʼ ńtó ḿvə́rə́ yé, â mé.

⁹Ə́ wo lə̂ lətǒ Fou məno tə́poŋ, mə́i a táa ghǐ tó, Sə́tə ŋə́ yé mətəʉ lə̂ ndághʼ ńgʉ̌ mənkəʼə-məno gháp pə məndǎa-jwô-mə́no mbə̂u lə̂ mbə̂u mi ə́ wo futə pye.

¹⁰A ghʉ̌ tó ghʉ̌ məno tə́poŋ mbə̂u lə̂ mbə̂u, ə́ lǎghʼ futə́ pye pi gháp pə́ mə́ lə̂ laŋə́-ndə̂u ləcwî. Gháp kə̂u cwí ńté ńgó gháp lə ləʼ lə̂ nkǒŋ no-lə́nə́ʉ ə́ mbou ndə̂ʼ lə̂ ŋə̂i ghíʼ zěi pə́ ntúŋú; lə́ mə́i no lə́nə́ʉ zêi lə́ lə ghwǒ lə̂ ngʉ́ gháp cwór.

¹¹Ə̂ zə̂u yi ə́ ghʉ̌, Sê ŋə̂ gháp mətəʉ lə̂ ndághʼ ńkʉ́ʼʉ́ ńkə́u cwí; měi ghʉ, gháp cʉ̂ʼ mbə̂i pə̂ məno mi ə́ pə́ məlaa.

¹²Ńjí ńgó ə́ lei yə́rə́, Sê tághʼ ngwôʼ tû ŋuu ntsəm yi a lə lə̌ʼ lə̂ mbə́i no-lə́nə́ʉ ə́ nkə́ ncôghʼ ntə̂ʉ ə́ ngʉ̂ pə̂ məno tə́poŋ.

¹³Pəfə̌r pâa pi Nde kǒŋ wéi, paghʼ pə̌ ŋə̂ nkhwo mbó Sê tə́ kâa ńté wéi ghíʼ ə́ yǎa mə́ ntúŋú; ńté no Sê lə fú lənuŋú ngoŋ ńtsóʼ wéi ndághʼ ńgʉ̌ pye pi a ghʉ̌ ghʉ̌ gháp cwór; ə́ ghǐ ghʉ̌ pei cwór, ə̂ leitə́ lə̂ Zəghʼə Ndêi-lěi yi ə́ pə́ lə́ pei ə́ mə́ ngʉ́ pei pə̂ pye pé, mbaa lə̂ mbə̂u yi pei laghʼ ńŋə̂i ghíʼ no-lə́nə́ʉ pə́ ntúŋú.

¹⁴Yo məno mi ə́ kə ghʉ̌, Sê lêitə lə̂ Nkəʉ Shʉʼʉ yi paghʼ kə tsətə́ lə́ pei, ə́ fúŋ wéi ńdághʼ ńgʉ́ pye pé lə́ pə́ yi pei wo kə̂u zéi cər ləghûʼ Nde waghʼə Yěso Kəlísto.

¹⁵Pəfə̌r, ghíʼ ə́ kə́ mbə́ yə́rə́ lə̂, pei tsuŋú ndǎr mbəʉ zéi lə́ Nde, ə́ nkapə́ lə̂ məno mi paghʼ lə jyéʼ wéi měi; kəʉ mi paghʼ lə lǎghʼ ntsʉ ńdâʼ, kəʉ pə́ mi paghʼ lə ŋwáʼá pə́ cər ŋwaʼa ə́ ntə́u ŋə́ lə́ pei.

¹⁶Ńgó Nde wághʼə Yěso Kəlísto, zʉ́ tû-mbəʉ yé mbaa Tə́ waghʼə Sê, ə́ zʉ́ yi a lə kǒŋ wághʼə ndéitə́ lə̂ tsâa-mə́jʉ̂ŋ yé yi tə́ ndaghʼə yi a ghwǒ nzəm paghʼə, ə́ ncóghʼ mə́shwítə yi tə́ láʼ mé cər məntə̂ʉ paghʼə, ə́ ngʉ̌ paghʼə fú njí ńgó paghʼə ghwo mə́ zə̂u yi a lə ghʉ ndaghʼə mə́u lə̂ ngʉ́ ŋə́ lə́ paghʼə,

¹⁷tóutə́ wéi mbóu ncóghʼ mətəʉ méi lə̂ nkə́ mə́ ngʉ̂ pə̂ məfaʼ shʉʼʉ, ə́ mbou nkə́ ntsâr pə̂ mətsâr shʉʼʉ.