Read Ngombale 2 Tesalonîkə 3 Bible Online

2 Tesalonîkə 3 - Ngombale bible

2 Tesalonîkə 3

¹Pəfə̌r pâa nzəm Kəlísto, ə no yi paghʼ laghʼ ńgwô ńdyəghʼtə́ wó pə́ ńgó pei sʉ́ʉtə́ Sê tû paghʼ, ə́ njí ńgó tsâr Nde fátə́ sǎr yʉʼ tsəm, ə́ mbóu ngwǒ məkuʼ, ə́ ndʉŋ-ndʉŋ ghíʼ ə́ kə pə́ təcər pei ə́ mbə́ lə̂.

²Pei kə́ ncí mbóu sʉ́ʉtə́ Sê tû paghʼ ńgó a pápə́ wághʼ lə̂ pəghaŋə-sôu, gháp pi gháp pə́ pye tə́poŋ. Ńté no káa ŋuu ntsəm lə̂ pə́ mbə̂i yé no Sê.

³Lə́ Nde, laʼ ńgʉ́. A wo cóghʼ ntə̂ʉ wéi, ə́ pǒu pápə́ wéi tə Fou məno tə́poŋ ghʉ̂ yé có no tə́poŋ lə́ pei po.

⁴Ə́ ngwǒ lə́ pei, mə́i Nde ghʉ pei pə̂ njî zə̂u tsəm yi paghʼ laʼ ńgó pei ghʉ́, ə́ pə̂ yi pei pə́ mə́ ngʉ̌, ə́ láʼ kə́ ghʉ pə́ yə́rə́ ə́ lǎghʼ lə̌r lə̂ mbi.

⁵Ńgó Nde tsûŋtə́ məntə̂ʉ méi, pei kʉ́ʼʉ́ nkǒŋ Sê, ə́ mbou mpfútə́ wéi lə̂ shə̂ghʼ ngwôʼ ghíʼ Kəlísto.

⁶Pəfə̌r, paghʼ lâʼ lə̂ ləjôghʼ Nde Yěso Kəlísto lə́ pei ńgó pei nkhʉ̂ pye pi gháp maʼ pə̂ lǒŋ, káa pə́ ŋəi gháp lə̂ məntǎghʼ mi paghʼ lə ŋə́ lə́ pei.

⁷Pei zéi tsuŋu mə́ njî ghíʼ mboʼ pei pyê fəiʼ lə́ paghʼ. Ńté no paghʼ lə pə́ təcər pei, káa pə́ ghʉ wághʼ lǒŋ.

⁸Káa paghʼ lə pə́ ndôu wághʼ məzʉ̂ mbó cǒ ŋuu; tə ncʉ́ʼ yə́rə́, paghʼ pə̂i lə̂ njwó ngwôʼ, ə́ fǎʼ ntə̌ʉ-nəu gháp lətwûʼ tə nkáa, ə́ ndaghʼ ńdə̂ʼ lə̂ mbə́ pyeʼ mbó cǒ ŋuu wéi.

⁹Paghʼ lə ghí ghʉ̌ yə́rə́ kâa pə́ pə́ ńgó káa paghʼ lə yáa ngwǒ lə̂ ngʉ́ pei zághʼə́ wághʼ, lə́ paghʼ lə lou pə̂ nyárə́ wéi tâʼ fəiʼ yi mboʼ pei ŋə̂i mə́u.

¹⁰Koo pei pə̂ pəlǒŋ, ńté no paghʼ lə pə́ təcər pei, ə́ ntághʼ ləpə̌ʉ ngô: «Ŋuu lə̌i ndə́iʼ pə́ kôŋ lə̂ fáʼ po, koo a zʉ̂ yé zə̂u.»

¹¹Paghʼ lə pou nzúʼ ńgó pəcó pye pə́ təcər pei ə́ ngʉ̂ pə̂ lǒŋ, záp faʼ pə̂ pə́ lə̂ nzúʼ məno pye, ə́ ntyár ńkə́u mə́u.

¹²Ə́ ngwǒ lə̂ mbə̂u pye pêi, paghʼ lâghʼ ləjôghʼ Nde Yěso Kəlísto ŋə́ gháp ntǎghʼ ngô: gháp pwórə́ ndôu záp zə̂u pə́ páp ə́ nzʉ́.

¹³Ə́ ngwǒ lə́ pei pəfə̌r, koo pei kâa lə̂ ngʉ́ no shʉʉ.

¹⁴Ŋuu lə̌i ndə̂ʼ lə̂ nzúʼ məntǎghʼ mi paghʼ ŋə̂ lə́ pei cər ŋwaʼa wo, pei ghʉ̂ tə pə́ jí, ə́ khʉ̌ yé njí ńgó sə̂ʉ kó yé.

¹⁵Koo pei cʉ̂ʼ ngʉ́ lə́ zʉ́ pə́ ghíʼ â ngaŋə-mbəu wei, pei cwotə́ yé cwotə́ ghíʼ pə́ cwotə tâʼ fə̌r.

¹⁶Ńgó Nde, zʉ́ yi mbwórə fû pə́ mbó zʉ́, zʉ́ tû-mbəʉ yé pə́ ncôghʼ mbwórə lə́ pei maa mpfu tsəm, mbaa lə̂ məsʉ̂ mə́tsəm. Ńgó Nde pə́ lə́ pei pə́tsəm.

¹⁷Məŋ Pôl, n ndaghʼ pə́ ndʉ̌ʉ-ndʉʉ pô ghâa ŋwaʼá yo tsêʼtə ə́ ŋə́ lə́ pei: Yo mbə̂u yi n ndaghʼ ńcôghʼ ləiʼi lə̂ pəŋwaʼa pâa pə́tsəm; yo pô ŋwaʼa zâa.

¹⁸Ńgó Nde waghʼə Yěso Kəlísto cóghʼ mbwórə lə́ pei pə́tsəm.