Read Ngombale 1 Timotêi 1 Bible Online

1 Timotêi 1 - Ngombale bible

1 Timotêi 1

¹Məŋ Pôl ŋwáʼá ŋwaʼa wo, ə́ mbə́ ngaŋə-ntə̂u Yěso Kəlísto. Ə Sê gháp Yěso Kəlísto lə lǎghʼ ghâa ńgʉ̌ wěi. Ə Sê ŋuu yi a ghʉ paghʼə cwôr, Yěso Kəlísto pə̂ ŋuu yi a ghʉ ńgó zə̂u tsəm yi paghʼə zʉ̂ʼtə zěi mbó Sê pə̂utə́.

²N ŋwáʼá ŋwaʼa wo, ə́ ŋə̂ lə́ gho môu ghâa Timotêi yi lətəi-ndwuŋ cər pə̂i-ntə̂ʉ nzəm Yěso Kəlísto. Ńgó Tǎa Sê gháp Nde wághʼə Yěso Kəlísto ghwô poŋə-ntə̂ʉ yi tə́ ndaghʼə nzəm gho, ghwô tsâa-mə́jʉ̂ŋ nzəm gho, ə́ mbou ncóghʼ mə́shwítə ntə̂ʉ gho.

³N ndə ghí lə̌r lə̂ cər paghʼə-ngoŋ Masedwânə, ə́ ndǎʼ lə́ gho ńgó o nyáŋ túsoŋ Efêzə; lə̂ ntôʼ pye lə̂ nkə́ mə́ njyêʼ pye zə̂u yi kâa pə̂ yé zěi lə̂ no Sê.

⁴Lâʼ lə́ páp ńgó gháp nyér məno púʼ-kap, gháp pə məno mi ə́ náŋtə́ məngər pəmə́ngâa-njʉʼ pághʼə mi gháp shuŋ, ə́ saghʼ ndə̂r pə́ tə́ lə lyəghʼtə lə̂; měi maʼ pə̂ məzoŋə təcər páp, kâa pə́ pfûtə yé gháp lə̂ ngʉ̂ zə̂u yi Sê pə̌ nkǒŋ. Ə ngʉ̂ zə̂u yi Sê pə̌ nkǒŋ fû lə̂ pə̂i-ntə̂ʉ.

⁵N ndaʼ yo no gháʼá ńgó o láʼ gháp, ńjí ńgó gháp koŋ pəcó pye. Ə́ pə́ ntúŋu ńgó wǒwó ghwô ntə̂ʉ lěi, ə kwaŋtə yé póu mə́ fêʼ yé yé lə̂ có zə̂u po, ə́ mbou ngwô kwaʼ pə̂i-ntə̂ʉ nzəm Sê, ə́ mboŋə́ koŋ pəcó pye.

⁶Pəcó pye təcər páp kə fâa laŋə́-ndə̂u no lə́nə́ʉ, ə́ měʼ məno shʉʼʉ mêi mwo, ə́ ncʉ́ʼ njwóghʼ nzóŋə pə̂ məno mi kâa pə́ mpfûtə yé ŋuu lə̂ có zə̂u.

⁷Gháp pə́ ndaʼ ńgó gháp pəkeʼtə́-lə́pə́ʉ Sê, lə́ káa pə́ zûʼ gháp no yi gháp lâʼ zěi, ə́ mbou káa pə́ jî gháp ləcʉŋ no yi gháp tâghʼ nkwəi ndêʼtə pye zěi lêi.

⁸Paghʼə tsúŋu mə́ njî ńgó ləpə̌ʉ Sê poŋ ghíʼ pə́ lə̌i ŋə́i ghíʼ ə́ yǎa mə́ ntúŋú.

⁹Paghʼə tsuŋú mə́ njî ńgó káa Sê lə tâghʼ yé ləpə̌ʉ ńté pə̂ pye pi gháp pə́ ndʉŋ-ndʉŋ mbi zʉ́, lə́ a lə tâghʼ ńté pə́ pye pi gháp ləʼ lə̂ ŋə̂i ghíʼ a pə̌ nkǒŋ, ə́ ntê pəghaŋə təi tû mbó zʉ́, ə́ ntê pətəpǒghʼ yé, ə́ ntê pəghʉ̌-mə́faa, ə́ ntê pətə-ŋə̌-mə́kuʼ mé, ə́ ntê pəcǒŋ-ndwuŋ məzə̂u Sê, ə́ ntê pye pi gháp jwîtə pətə́ páp káa pəmə́ páp, ə́ ntê pəjwítə́-pye,

¹⁰ə́ ntê pəpə̌u-nzóʼ gháp pə mbiŋə pi gháp shərə nzôʼ pəcó mbaa pəngyě pi gháp shərə nzôʼ pəcó, ə ntê pətáŋ məpuʼ, ə́ ntê pətáŋ-mə́laa, gháp pə pye pi gháp laʼ no yi kâa pə̂ yé zěi tə nkâa, tə mbaa ńté ŋuu tsəm yi a lâʼ məno lə̂ ndághʼ ḿvə́rə́ no lə́nə́ʉ yi pə́ lə̂ tsâr Yěso.

¹¹Məno mwo mi n njyêʼ wéi lo, ə̂ mi kwar cər Nkəʉ Shʉʼʉ yi Sê lə cóghʼ mbó məŋ. Ə Sê ŋuu yi a ghwǒ ləghûʼ, ə́ mbou mbə́ ŋuu yi a ghwǒ məzə̂u shʉʼʉ mə́tsəm paghʼə.

¹²N ŋə̌ nkhwo lə́ Nde wághʼə Yěso Kəlísto ghíʼ a lə ŋə́ ghâa mətəʉ lə̂ ndághʼ ńfǎʼ faʼ yé. A lə jwó ńgó məŋ kuʼ ŋuu yi mboʼ a tə̂m nzəm yé ńŋə́ lə́ zʉ́, ə́ tsóʼ ghâa ndaghʼ ńgʉ́ ngaŋə-faʼ ye,

¹³lə́ mə́i n ndə pə́ cǒ mpfu, ə́ ntsár tə́poŋ ńté yé, ə́ nzoutə́ yé, ə́ ndwóʼó yé. N ndə pə́ tə ngʉ́ yə́rə́ lə́ Sê kə̂ ngwó pə́ tsâa-mə́jʉ̂ŋ lə́ məŋ. N ndə ghʉ yə́rə́ kâa pə́ jî ghâa zə̂u yi n ngʉ zěi, ńté ńgó ə́ kə ghí pə́ mə́i n nkə́ ghwô ghâa pə̂i-ntə̂ʉ nzəm Kəlísto.

¹⁴Nde waghʼə lə ghwo poŋə-ntə̂ʉ yi tə́ ndaghʼə nzəm məŋ, ə́ ngʉ̌ n ngwô pə̂i-ntə̂ʉ nzəm zʉ́, ə́ ngʉ̌ n ngwo zâa nkoŋə ghíʼ pye pi gháp lǎr mbəʉ záp lə́ Kəlísto.

¹⁵Ə tsâr yi n ngwo ndǎʼ wo lo ə́ pə́ lə́nə́ʉ, ə́ mbə́ yi ŋuu ntsəm ghwǒ lə̂ mbə́i lə́ tâʼ ntə̂ʉ: Yěso Kəlísto lə tó ndəu nzʉ̂ lə̂ ngʉ́ pəghaŋə məfaa cwôr. M mbôu mbə́ tâʼ ngaŋə-məfaa yi tə́ fəiʼi yé wó.

¹⁶Tə mbaa ghíʼ n ndə pə́ yə́rə́ lêi, ə Sê kə̂ ngwô pə̂ tsâa-mə́jʉ̂ŋ nzəm məŋ. A lə ghʉ yə́rə́, lə́ pə́ yi Yěso Kəlísto wo lěi lə́ məŋ yi m mbə̌ ngaŋə-məfaa tə́ fəiʼi yé wó, ə́ nyarə́ ńgó a ghwo shəghʼ-ntə̂ʉ gháʼate. Ə́ pə̂ yə́rə́, ə́ mbə́ ńgó mə̂ŋ fəiʼ no mbó pye pi gháp ghʉ̌ ghwǒ pə̂i-ntə̂ʉ nzəm zʉ́, â ghʉ́ gháp ghwô ləcwôr tə me.

¹⁷Ńgó ŋuu tsəm ŋə́ məkuʼ Sê, ə́ ngúʼtə́ yé lə̂ mənguʼ mənguʼ. Â Fou yi a láʼ cí pə̂ pə́ wó, â tə-kwʉ̂; káa ŋuu pə́ njwô yé yé, zə́ghʼə́-zʉ́ lə́ pə́ Sê! Ə̂ pə́ yə́rə́!

¹⁸Môu ghâa Timotêi, məŋ côghʼ faʼ yo mbó gho, ə́ laghʼ ḿbə̂utə lə̂ mətsâr mi pətsətə́-nkəʉ Sê lə lǎʼ cǒ mpfu ńté gho. Kʉ́ʉtə́ měi shʉʼʉ, ə́ wo ŋə́ gho mətəʉ ô lághʼ ńdwóʼó ntso yi shʉʼʉ,

¹⁹Ô ghí pə́ lwóʼó, ə́ ncóghʼ ntə̂ʉ gho lə̂ Sê, lə́u kwaŋtə zô pə́ fêʼ yé ghô lə̂ có zə̂u po. Pəcó pye kə pə́i, məno ghʉ, məkwaŋtə máp jí lə̂ fêʼ gháp, pə̂i-ntə̂ʉ záp nzəm Kəlísto cwî.

²⁰Himənê gháp Alezâŋdələ pə́ lə̂ nou pye pêi, n nkə fú nou pye Kəlísto ə́ nkwarə́ gháp ńŋə́ mbó Sə́tə, ńjí ńgó gháp fú mə́u, ə́ njyéʼ lə̂ nkə́ nzôutə gháp Sê po.