Read Ngombale 1 Timotêi 2 Bible Online

1 Timotêi 2 - Ngombale bible

1 Timotêi 2

¹Ə́ pə̂ yə́rə́, nduŋ-mbi no yi m mə̌ ndaʼ lə́ pei, pə́ ńgó pei lə̌i mə́ sʉ̂ʉtə Sê, pei lôu yé zə̂u ńté maa ŋuu ntsəm, ə́ sʉ́ʉté yé lə̂ tû maa ŋuu ntsəm, ə́ mbúʼ mbô mbó zʉ́ lə̂ tû maa ŋuu tsəm, ə́ ŋə́ nkhwo mbó zʉ́ lə̂ tû maa ŋuu ntsəm.

²Ə́ pə́ ntúŋu ńgó pei sʉ́ʉtə́ Sê tû pəfou mbaa tû pye pə́tsəm pi gháp tə́ʉ tû-mbi lə̂ sáʼ lâʼ, ə́ njí ńgó lei yə́rə́, paghʼə nyâŋ lə̂ mbwórə, ə́ nyáŋ shʉʼʉ, ə́ nyáŋ lə̂ mbə̂u yi mboʼ pə́ ŋə̂ məkuʼ mághʼə, ə́ nyáŋ ghíʼ Sê pə̌ nkǒŋ.

³Pə́ lə̌i sʉ́ʉtə́ Sê lə́ zêi mbə̂u, ə́ pə̂ no shʉʼʉ ə́ mboŋə́ Sê yi a pə̌ nzaʼ-nkʉ wághʼə,

⁴a pə̌ nkoŋ ńgó ŋuu ntsəm ghwô ləcwôr, ə́ mbǒu nkûʼ lə̂ njí no lə́nə́ʉ yi ə́ pə́ lə́ zʉ́ Sê.

⁵N ndaʼ yə́rə́, ńté no ə Sê pə̌ pə́ tâʼ moʼ, ŋuu yi a ŋəi kə̌m təcər Sê gháp pə pye-mə́soŋ kə̂ mbə́ pə́ tâʼ moʼ, â ŋuu-məsoŋ, ə́ mbə́ Yěso Kəlísto.

⁶A lə kôŋ yé pə́ zʉ́, ə́ ŋə́ tû yé ndaghʼ ńtsǔʼ tû pye-mə́soŋ pə́tsəm mbó ləwʉ̂, no zêi laghʼ ńnyâr ńgó Sê pə̌ nkoŋ ńgó pye-mə́soŋ ghʉ̂ ncwór, lə̂ mpfu yi a lə tághʼ.

⁷Ə̂ zə̂u yi ə́ lə ghʉ̌ Sê tsə̂ʼ ghâa, ə́ ndǎghʼ ghâa ńgʉ̌ ngaŋə-ntə̂u ye, ə́ ncóghʼ tsâr yé ntsʉ məŋ. A lə tə́u ghâa ńgó n ngwó ńjyéʼ pye pi káa gháp pə̂ gháp pəyúda ńgó gháp ghwô pə̂i-ntə̂ʉ nzəm Yěso Kəlísto, ə́ mbǒu njyéʼ gháp no lə́nə́ʉ yi ə́ pə́ lə́ zʉ́. Məŋ ndaʼ pə̂ no lə́nə́ʉ. Káa m mə́ ntâŋ ghâa məlaa.

⁸N ndaghʼ ghíʼ a lə tsóʼ ghâa lêi, ə́ mə́ nkôŋ ńgó mbiŋə lə̌i nkə́u yʉʼ ntsəm yi pye Kəlísto kəitə́ wó, ə́ ngǐ pə́ sʉ̂ʉtə Sê, gháp pəʼə mbô máp ŋə́ tʉ́, ə ntə̂ʉ gháp pou mbə́ ghíʼ Sê pə̌ nkǒŋ, koo gháp ghwo záŋə-lóŋ, koo məfeʼ pə̂ təcər páp.

⁹Ə́ ngwǒ lə́ pəngyě, m mə̂ ndâʼ lə́ páp záp ńgó gháp wé məndǐ mi ə́ pə́ ntúŋú, gháp wé məndǐ mi ə́ pə̌u pə̌u, koo gháp jûŋtə məndǐ júŋtə́. Gháp páʼ tû záp yi ə́ wo pə́i gháp. Koo gháp wé məzə̂u məsəu mi pə́ lǎghʼ tə̌ʉ-gôl ńtsúŋú, mbaa mi pə́ lǎghʼ tuʼú-cí ńtsúŋú, koo gháp wê məndǐ nkâp.

¹⁰Tə ncʉ́ʼ yə́rə́ gháp laghʼ pə̂ məfaʼ shʉʼʉ ńkwə̂i mbəʉ záp, ghíʼ pəngyě pi gháp ŋəi nzəm Sê ghwǒ lə̂ ngʉ́,

¹¹ə́ lə̌i mbə́ mpfu yi pə́ pə́ njyêʼ pye tsâr Sê, məngyě naʼ ə́ shúʼú mbəʉ ye, ə́ ntsuŋú nzúʼ.

¹²Káa m mbə̂i ghâa ńgó məngyě jyéʼ mbiŋə zə̂u, káa pə́i ńgó məngyě sáʼ mbiŋə, a ghwo lə̂ mbwórə́ nyáŋ, ə́ nâʼ, ə́ nzúʼ no yi pə́ laʼ zěi.

¹³N ndaʼ yə́rə́ ńté no Sê lə tsəmbi mbóu Ádam, ə́ mboŋə́ póu Êvə.

¹⁴Káa pə̂ yé Ádam a lə́ pə́i Sə́tə fútə yé, lə́ məngyě lə̂ lə pə́i a fútə yé, a wʉ̂ ləpə̌ʉ Sê

¹⁵Lə́, Sê táa ghʉ̌ â cwór, ə́ ńté ghíʼ a jítə́ ghəpə́, no pə̂ pə́ ńgó a ghwô pə̂i-ntə̂ʉ nzəm Kəlísto, ə́ ngwǒ nkoŋə nzəm pye-mə́soŋ, ə́ nyáŋ lə̂ mbəu yi ə́ wo poŋə́ Sê, ə́ ngwǒ mbəʉ ye lə̂ məkuʼ.