Read Ngombale 1 Timotêi 3 Bible Online

1 Timotêi 3 - Ngombale bible

1 Timotêi 3

¹Ə no yi n ngwo ndǎʼ wo lo ə̂ no lə́nə́ʉ: ŋuu lə̌i mə́ ntsâa lə̂ ntə́ʉ tû-mbi cər cûʼtə pye Kəlísto, a jî ńgó a tsâa gháʼá faʼ yi ə́ pǒŋ.

²Ə́ pə́ ntúŋú ńgó ŋuu yi a tə̂ʉ tû-mbi cər cûʼtə pye Kəlísto, pə́ ŋuu yi káa lâʼ pə́ ntô yé məlǒʼ mé, ə́ mbə́ ŋuu yi a ghwǒ pə́ tâʼ məngyě moʼ, ə́ ngʉ̂ zə̂u ntsəm pə́ yi ə́ kuʼú-kuʼú, ə́ nkwaŋ no mboŋə́ ghʉ̌, ə́ mbə́ ngaŋ cǐ shʉʼʉ, ə́ mbə́ ŋuu yi a pə̂i lə̂ mpfú pəghəʉ nzéʼ zʉ́, ə́ nkǔʼ lə̂ njyéʼ pye zə̂u.

³Koo a pə̂ ŋuu yi a meʼ mbəʉ ye lə̂ məluʼ, koo a pə̂ ngaŋ nkor, ə́ pə́ ntúŋu ńgó a pə́ ŋuu yi a pworə́, ə́ mbǒu nâʼ, lə́u ncóghʼ yé ntə̂ʉ yé lə̂ nkâp po;

⁴ə́ pə́ ntúŋú ńgó a pə́ ŋuu yi a jǐ ntʉ́ŋtə́ nzeʼ yé, ə́ mbou njyéʼ ghəpə́ yé lə̂ ngí pə́ zûʼ ntsʉ yé, ə́ mə́ ŋə̂ məkuʼ mé.

⁵Ŋuu lə̌i ndə́iʼ kǔʼ lə̂ ntʉ́ŋtə́ nzeʼ yé po, a tʉ̂ŋtə cûʼtə pye Sê?

⁶Káa pə́ ntúŋu yé ńgó a pə́ ŋuu yi a kə pyér mbə̂i no Kəlísto pə̌i, ə́ mbóghʼ lə́ pə́ yi mboʼ a cî ndə̂ ŋaʼtə́ wó, ləŋâʼtə wêi ghʉ̂ Sê tâghʼ ngwôʼ tû zʉ́ ghíʼ a lə tághʼ tû Sə́tə lə̂.

⁷Ə́ nkə́ ncí mə́ ntúŋu ńgó pye pi káa gháp pə̂ gháp pye Kəlísto pə́ kʉ̂ʉ yé shʉʼʉ, ə́ mbóghʼ lə́ pə́ yi mboʼ pə́ wâghʼ yé, mbaa mbóghʼ lə́ pə́ yi mboʼ a pfûŋ lə̂ ləkei Sə́tə.

⁸Ə́ kə́ mbə́ pə́ yə́rə́ mbó pye pi gháp pfûtə lə̂ fâʼ məfaʼ cər cûʼtə pye Kəlísto, gháp ghwo lə̂ mbə́ pye pi mboʼ ŋə̂ məkuʼ máp, ə́ mbə́ pye no lə́nə́ʉ, ə́ mbə́ pye pi gháp laʼ no tə myâghʼ ntə̂ʉ gháp. Koo gháp pə̂ pye pi gháp meʼ mbəʉ záp lə̂ məluʼ, koo gháp pə̂ pye pi gháp laghʼ məfutə́ ńgwô nkâp;

⁹ə́ pə́ ntúŋu ńgó gháp lâghʼ tâʼ ntə̂ʉ, ə́ ngwǒ no lə́nə́ʉ yi Sê lə lǎʼ wághʼə lə̂ no pə̂i-ntə̂ʉ nzəm Kəlísto.

¹⁰Ə́ pə́ ntúŋu ńgó pə́ zʉ́ʼ gháp, ə́ njwô zap mbə̂u, pə́ lə̌i ndə́iʼ jwó lǒʼ záp po, pə laghʼ gháp ńgʉ́ pye pi gháp pfûtə lə̂ fâʼ cər ndə̂ Sê.

¹¹Ə́ kə́ mbə́ pə́ yə́rə́ lə́ pəngyě pi gháp pfûtə pye lə̂ fâʼ məfaʼ cər cûʼtə pye Kəlísto, ə́ poŋ ńgó gháp pə́ pəngyě pi pə́ ŋə̂ məkuʼ máp. Ə́ mbə́ pye pi mboʼ gháp nyâŋ nkʉ̂ʉ gháp pəcó pye tə́poŋ po. Ə́ mbə́ pye pi gháp ghʉ pə̂ məno mi ə́ kuʼú-kuʼú. Ə́ mbə́ pi mboʼ pə́ tə̂m nzəm ńŋə́ lə́ páp lə̂ zə̂u tsəm.

¹²Ə́ pə́ ntúŋu ńgó wǒwó lə́ pye pi gháp pfûtə pye lə̂ fâʼ məfaʼ cər cûʼtə pye Kəlísto ghwô pə́ pəghaŋə tâʼ məngyě, ə́ mbə́ pye pi gháp pə́ nâŋtə ghəpə́ záp shʉʼʉ, ə́ mbou mə́ ntʉ̂ŋtə nzeʼ zap shʉʼʉ lə́wó.

¹³Pye pi gháp pfûtə lə̂ fâʼ məfaʼ cər cûʼtə pye Kəlísto, pi gháp pə́ faʼ faʼ záp shʉʼʉ, pə́ ghwo lə̂ ŋə́ məkuʼ máp. Gháp póu sâa-sǎa ntsár tə́ pôghʼ có zə̂u ńté pə̂i-ntə̂ʉ záp nzəm Yěso Kəlísto.

¹⁴Timotêi, n ngí pə́ ŋwaʼa ŋwaʼa wo lə̂ ŋə́ lə́ gho, ə́ mə́ nkwâŋ ńgó ngwo ntóghʼ ńtó njwô gho.

¹⁵Lə́ n ndə̌i ndə́iʼ ntóghʼ tó po, ŋwaʼa wo pə̂ nyárə gho ghíʼ o wo pə́ ŋə̌i cər cʉŋə-ndə̂ Sê. Cʉŋə-ndə̂ Sê zêi pə̂ Cûʼtə pye Tǎa Sê yi a pə̌ ntəʉ, ə́ cûʼtə zêi ə̂ ntôu yi Nkəʉ Shʉʼʉ zápə ndəu wó, ə́ mbou mbə́ yi pyěʼ no lə́nə́ʉ.

¹⁶Ə̂ŋ ə̂ kwaʼ lə́nə́ʉ ńgó, tə́koʼ no yi ə́ lə pə́ ləlwǒ lə́ Yěso Kəlísto, Sê kə ghʉ̂ paghʼə jî, ə́ pə̂ yi ə́ náŋtə́ no yo paghʼə pə̂i zěi nzəm Yěso Kəlísto. Yěso lə shərə́ ncʉ́ʼ ŋuu-məsoŋ pə́ jwô yé. Zəghʼə Ndêi-lěi lə tsuŋu nyárə́ ńgó â ŋuu no lə́nə́ʉ. Pəcwôʼ Sê lə jwó yé. Pye lə lâʼ cər ngoŋ tsəm Pye pou mbə́i no yé cər ngoŋ tsəm. Sê lâghʼ yé ńkóʼ lə̂ lə́pû, ə́ ngʉ̌ a nyâŋ cər ləghûʼ ye.