Read Ngombale 1 Timotêi 4 Bible Online

1 Timotêi 4 - Ngombale bible

1 Timotêi 4

¹Zəghʼə ndêi-lěi pə́ tsúŋu ndâʼ ngô: ə́ táa pə́ lə́ pəlyəghʼ-nzəm məleʼé, pəcó pye méʼ pə̂i-ntə̂ʉ záp nzəm Yěso Kəlísto, ə́ ntsə́ʉ nzəm məzəghʼə tə́poŋ mi ə́ futə pye, mbaa nzəm məzə̂u mi məzəghʼə tə́poŋ cʉ́ŋə pye gháp jyêʼ pye měi.

²Pye pêi ghʉ̌ wáʼá mbəʉ zap pəghaŋə nkoŋə mənyôghʼ, ə́ mbə́ pəghaŋə məlaa ghʉ̂ gháp fâa laŋə́-ndə̂u. Pəghaŋə nkoŋə mənyôghʼ pêi, ə̂ pye pi tû záp kə coŋtə́ mə́, ghíʼ zə̂u yi pə́ tǒu mǒghʼ ə́ sʉ̂ tə mbâŋ lə̂; tə ə́ pə̂ yi məkwaŋtə máp lə̌i mbə́i mə́ sə̂u gháp sə́u gháp kə̂ njî gháp po.

³Pəghaŋə məlaa pêi tâŋ məlaa ndâʼ ńgó koo pə́ kə̂ nzóʼ, ə́ mbou mə́ tôʼ pye lə̂ nzʉ́ məcó məzʉ̂. Lə́, ə́ pə̂ məzʉ̂ mi Sê lə tsúŋú ńgó pye Kəlísto pi gháp jî no lə́nə́ʉ nyáŋ ngí pə́ zʉ́, ə́ mə́ ŋə̂ nkhwo lə́ zʉ́.

⁴Ə́ yaa ngǐ pə́, zə̂u tsəm yi Sê lə tsuŋú ə́ poŋ. Có zə̂u yi mboʼ pə́ meʼ kâa pə̂ yé wó, ə́ pə́ ntúŋu pə̂ ŋə́ nkhwo mbó Sê lə̂ zə̂u tsəm yi a ŋə̂ lə́ paghʼə.

⁵Zə̂u pei tsəm poŋ ńté no tsâr Sê gháp sʉ̂ʉtə ghʉ ńgó ə̂ pôŋ mbó Sê.

⁶Jyéʼ pəfə̌r pə́tsəm no zêi, ə̂ lêi yə́rə́ o pə́ ngaŋə-faʼ Yěso Kəlísto yi shʉʼʉ. Ô lâghʼ měi ńnyarə́ ńgó o ŋəi pə́ ghíʼ tsâr Sê yi paghʼə ghwǒ tə ə́ təi pə́ ndǎʼ. Ghwǒ zə̂u tsəm yi pə́ lə jyêʼ gho zěi tə ə̂ tə̂i.

⁷Lə́, měʼ məno púʼ-kap, kâa pə́ mpfútə yé ŋuu lə̂ no pə̂i-ntə̂ʉ yé nzəm Yěso Kəlísto. Sáʼ təʉ lə̂ nkə́ mə́ nyâŋ pə́ ghíʼ Sê pə̌ nkǒŋ.

⁸Ə shítə́ mbəʉ poŋ, lə́ pfútə́ pə̂ ndaʼ mbəʉ. Ə nyáŋ ghíʼ Sê pə̌ nkǒŋ lə́ pfûtə lə̂ məndyəghʼə́ mə́tsəm. Ńté no ŋuu lə̌i nyáŋ ghíʼ Sê pə̌ nkǒŋ, mə́i Sê wo pə́ pápə ləcǐ-mbî ngaŋ yi mpfu wo, ə́ ghʉ̌ pǒu ŋə́ yé ləcwôr tə me.

⁹Zə̂ kwaʼ tsâr no lə́nə́ʉ, yi wǒwó ghwǒ lə̂ mbə́i tə́ mʉ̂ŋtə.

¹⁰Poghʼo pə̂uʼ mbəʉ zóghʼo ə́ fâʼ tə nkwôŋ jiʼi gháʼá, ńté no poghʼo pə̌ njî ńgó zə̂u tsəm yi paghʼə zʉ̂ʼtə mbó Sê yi a pə̌ ntəʉ, a ghʉ̌ ŋə́. Â Nzaʼ-nkʉ ŋuu ntsəm, lə́ ə́ sâa-sǎa mbə́ yi pye pi gháp ghwǒ pə̂i-ntə̂ʉ nzəm zʉ́.

¹¹Zə̂ no yi o wo jyéʼ pye zěi, gháp póu ŋə̌i mə́u.

¹²Koo ŋuu wâghʼ yé gho ńgó o pyěr môu-ngwəsəu. Lə́ nyarə́ pye Kəlísto ńgó mboʼ pə́ pyê fəiʼ lə́ gho. Nyarə́ gháp lə̂ tsâr zô, lə̂ lənyâŋ gho, lə̂ nkoŋə yi o ghwo nzəm pye-mə́soŋ, lə̂ pə̂i-ntə̂ʉ zô nzəm Kəlísto, mbaa lə̂ ndwóʼtə́ məshwi-shwí məno.

¹³Ô ghi pə́ zʉ̂ʼtə mpfu yi n ngwo tó, ə́ ntághʼ tû zô lə̂ mə́ ntə̂ʉ mbi lâʼ fûŋ tsâr Sê, ə́ mə́ njyêʼ gháp, ə́ mbou mə́ ncôghʼ məntə̂ʉ máp lə̂ ŋə́i ghíʼ ə́ pə́ ntúŋú.

¹⁴Kʉ́ʉtə́ ńgó Sê lə ŋə́ mətəʉ lə́ gho tə́ pfû có zə̂u. A lə leitə́ lə̂ no yi pətsətə́-nkəʉ Sê lə lǎʼ ńté gho mbaa ghíʼ pəkə̌m ndə̂ Sê lə zápə́ mbô tû gho, ə́ ncóghʼ měi lə́ gho.

¹⁵Cóghʼ ntə̂ʉ gho lə̂ məno mêi, ə́ ŋə́ mbəʉ zô ntsəm lə̂ faʼ zô; ńjí ńgó ə́ lei yə́rə́, ŋuu ntsəm jwô ńgó o pə̌ ngûʼ cər pə̂i-ntə̂ʉ nzəm Yěso Kəlísto.

¹⁶Laghʼə́ tû zô lə̂ ləŋəi mbaa lə̂ no yi o jyêʼ pye zěi. Sáʼ təʉ ə́ ndághʼ ńdə̌r lə̂ mbi. O lə̌i ngʉ́ yə́rə́, mə́i Sê wo ghʉ̌ o cwór, pye pi gháp pə́ nzûʼ ntsʉ gho kə́ ncwôr záp lə́wó.