Read Ngombale 1 Timotêi 5 Bible Online

1 Timotêi 5 - Ngombale bible

1 Timotêi 5

¹Tâʼ ntikáŋ ŋuu mbiŋə lə̌i ngʉ́ zə̂u yi kâa pə̂u yé mbó gho, koo páŋə yé páŋə́. Lə́, o pwórə ndâʼ yé no pə́ ghíʼ o laʼ lə́ tə́ gho lə̂. Náŋ ngwəsəu pə́ ghíʼ gháp pəcʉ́ʼ-nzəm pô,

²ə́ náŋ pətikáŋ pəngyě pə́ ghíʼ gháp pəmə́ pô, ə́ náŋ ngwəngou pə́ ghíʼ gháp pəcʉ́ʼ-nzəm pô tə́ ghwǒ kwaŋtə ndeʼe nzəm páp.

³Lǎghʼ məkuʼ náŋtə́ pəpfǒghʼ pəngyě. Ə́ pi o pə̌ njî ńgó káa cǒ ŋuu pə̂ yé wó yi a pə̌ ntôutə gháp.

⁴Lə́ mpfǒghʼ məngyě lə̌i ngwô ghəpə́ kəʉ pə̂ ghəpə́-ghəpə́ yé, ə́ pə̂ ntúŋu ńgó gháp jí ńgó gháp ghwǒ lə̂ tsəmbi nyárə́ pə́ cər cʉŋə-ndə̂ záp, ə́ mbə̂u yi Sê pə̌ koŋ ńgó pə́ laghʼ ńnyáŋ. Gháp ghwo lə̂ náŋ pətə́ páp, kəʉ pə pətə́-pə́tə́ páp, ə́ ndʉŋ-ndʉŋ ghíʼ pətə́ páp lə náŋ gháp záp lə́wó. Gháp lə̌i ngʉ́ yə́rə́, mə́i ə́ wo poŋə́ Sê.

⁵Ə́ ngwǒ lə̂ mpfǒghʼ məngyě yi a kâa ghwô yé cǒ ŋuu yi a pə̌ ntôutə yé, ə́ mbou fú nyâŋ yé pə́ zə́ghʼə́-zʉ́, mə́i kwaŋtə yé pə̂ mpfu tsəm tə̂ʉ yé pə́ lə̂ Sê, a pôu mə́ sʉ̂ʉtə yé ntə̌ʉ-nəu gháp lətwûʼ ńgó a pə́ ntôutə yé.

⁶Lə́ mpfǒghʼ məngyě yi a ghʉ pə́ məzə̂u mi mbap mbəʉ ye cʉ́ŋə yé lə̂ ngʉ́ gháʼá mə́i a kwʉ mə́ ntə́i tʉ́.

⁷Zə̂ məno mi o ghwǒ lə̂ ndâʼ gháp, ə́ njí ńgó ə́ lei yə́rə́, pə́ ncôghʼ yé fər paa páp po.

⁸Ŋuu lə̌i ndə̌iʼ pə́ náŋtə́ pətə́ pé po, ə́ pǒu pə́ tsuŋú náŋtə pye pi gháp wə́ nzeʼ po, ngaŋ jî ńgó káa a pyér mə́ ŋə̂i yé ghíʼ Sê pə̌ nkǒŋ, ə́ laghʼ ḿbə́ ńgó cǐ ye fǔ shwôr tə ndêi yi ŋuu yi a laa kə́ pə̂i yé no Sê.

⁹O lə̌i mə́ ngwô ncôghʼ ləjôghʼ mpfǒghʼ-məngyě təcər mənyôghʼ pəpfǒghʼ pəngyě pi pə́ pə́ ngwo mpfútə́ páp, ə́ pə̂ ntúŋu ńgó â pə́ yi a ghwo mə́ lə̂ fú lə̂ nguʼ mə̂m-ntoghʼó ndə́r lə̂ mbi, ə́ mbou mbə́ yi a laa kə́ zôʼ yé cǒ ŋuu mbiŋə ndeʼe tə ndyéʼ ndaʼ ndə̂u ye.

¹⁰Ə́ pou mə́ ntúŋu ńgó a pə́ məngyě yi pə́ jí yé ə́ ndeitə́ lə́ məfaʼ shʉʼʉ mé. Ə́ mbə́ məngyě yi a lə jî nkóʼtə́ ghəpə́ yé, ə́ mbə́ yi a jî mpfû pye nzeʼ zʉ́, ə́ mbə́ yi a sôghʼ məku pye Sê[1], ə́ mbə́ yi a ntôutə pəghaŋə-ngwôʼ, ə́ mbə́ mbaa yi a ghʉ̂ məfaʼ shʉʼʉ mə́tsəm.

¹¹Lə́, ə́ ngwǒ lə́ pəngyě pi gháp ghí píŋ pfǒghʼ ə́ mbyér ghəpə́, koo pə́ ŋwáʼa mənyôghʼ, ńté ńgó no nzǒʼ lei tə lěsê tû páp, gháp mêʼ faʼ záp nzəm Kəlísto, ə́ ndər ngwó nzôʼ gháp.

¹²Ə́ pə̂ yə́rə́ ə́ mbə́ ńgó gháp wʉ no, ńté ńgó gháp meʼ no yi gháp lə pə́i nzəm Kəlísto.

¹³Pə́ lə̌i ŋwáʼá mənyôghʼ máp, ghíʼ káa gháp ghwô gháp có zə̂u yi gháp pǒu mə́ ngʉ́ lə̂, gháp cʉ̂ʼ ngwô mar lə̂ ŋáa nkə́u məndə̂ məndə̂, lə́ yi ə́ fú shwǒr mə́u pə̂ ńgó gháp cʉ̂ʼ ngaŋə-ngə̂u, ə́ mbə́ pətə-lwǒ-no, ə́ ŋáa sʉ̂ŋ məno mi kâa pə́ nâŋtə yé gháp lə̂ có zə̂u.

¹⁴Ə̂ zə̂u yi ə́ ghʉ̌, m mə̂ nkôŋ ńgó pəpfǒghʼ-pəngyě pi gháp pyér ghəpə́ pyə́ghʼə́ nzóʼ, ə́ njítə́ ghəpə́, ə́ ntsuŋú ntʉ́ŋtə́ məndə̂ máp, ə́ njí ńgó ngaŋə-mbəu kə̌ ngwo ye có no yi mboʼ a lâʼ ńté wághʼə po.

¹⁵N ndaʼ gháʼa ńté ńgó pəcó təcər páp faa mə́ laŋə́-ndə̂u ə́ ntsə́ʉ nzəm Sə́tə.

¹⁶Ŋuu Kəlísto yi məngyě lə̌i ngwô pəpfǒghʼ-pəngyě cər cʉŋə-ndə̂ záp, a pápə gháp shʉʼʉ, ə́ njí ńgó cûʼtə pye Kəlísto kə́ ngwo yé no lə́ páp po, ə́ ncʉ́ʼ náŋtə́ pəngyě pi káa gháp ghwô gháp cǒ ŋuu yi a pə̌ nâŋtə gháp.

¹⁷Ə́ ngwo lə́ pəkə̌m ndə̂ pi gháp pə́ ncághʼə cûʼtə pye Kəlísto, ə́ pə́ ntúŋu ńgó pə ntóutə́ gháp shʉʼʉ, tə mbyə́ghʼə́ ntóutə́. Ə́ ntsuŋú ntóutə́ pi gháp tághʼ tû záp lə̂ ndáʼ tsâr Sê ə́ mbǒu mə́ njyêʼ pye zə̂u.

¹⁸Ńté no ŋwaʼa Sê laʼ ngô: «O lə̌i mə́ ndâghʼ foŋ mbə̂uʼ ngəsâŋ-ncʉ̂ŋ, koo o côghʼ kə̂ʉ ntsʉ zʉ́», ə́ nkə́ ncí mə́ ndâʼ ngô: «Ngaŋə-faʼ ghwo lə̂ mpfú məntsoʼó-faʼ mé.»

¹⁹Ŋuu lə̌i ntó ńdâʼ gho no yi tâʼ nkə̌m ndə̂ Sê ghʉ̌, o lə́iʼ zúʼ ntsʉ pye pə́pwô káa pə́tárə́ po, koo o pə̂i.

²⁰Tâʼ nkə̌m ndə̂ Sê lə̌i ngʉ́ no tə́poŋ, o tə̂ʉ pə́ mbi lâʼ sáʼ yé, ə́ njí ńgó ə́ lei yə́rə́, pəcó pôghʼ lə̂ nkə́ ngʉ̂ záp no tə́poŋ lə́wó.

²¹N ntə̌ʉ mbi Sê, ə́ mbi Yěso Kəlísto mbaa mbi pəcwôʼ Sê pi Sê lə tsóʼ gháp, ə́ sâa-sǎa mə́ ndâʼ lə́ gho ńgó o ghʉ̂ yə́rə́ tə́ peʼe-mbî, tə́ náŋ sʉ̂ ŋuu mboŋə́ tsuŋú no yé.

²²Koo o fâtə nzápə́ mbô tû ŋuu ə́ ndághʼ cóghʼ faʼ Sê mbó zʉ́, ntsə̌mbi náŋtə́ cǐ yé kwaʼ shʉʼʉ, ə́ mbóghʼ lə́ pə́ yi mboʼ a ghi fǎa no, zô pô pə̂ mə́u, páa zə̂u tsəm yi mboʼ ə́ coŋ ndwuŋ gho.

²³Nyér lə̂ nkə́ nyáŋ nô pə̂ ndaʼ nci. Nó məyʉʼ məluʼ ńté ləpəm zô yi ə́ nyâŋ ngághʼə ghô lə̂. Ə̂ lêi yə́rə́, ô nyáŋ nkə́ ngôutə gho po.

²⁴Pəcó pye faa no, pə́ tôghʼ njwó, pə́ tə túŋú gháp məno. Ə́ ngwǒ lə́ pəcó, pə́ ntúŋu gháp məno, ə́ mboŋə́ jwó no yi gháp fǎa zěi.

²⁵Ə́ kə́ mbə́ ndʉŋ-ndʉŋ pə́ yə́rə́ lə̂ məfaʼ shʉʼʉ. O ghʉ no shʉʼʉ məfaʼ shʉʼʉ, pə́ jwô pə́ lə̂ nyôghʼ, məfaʼ shʉʼʉ mi káa pə́ jwó, ə́ pə̂ mi ə́ láʼ tə̂i yé ləlwǒ po.