Read Ngombale 1 Timotêi 6 Bible Online

1 Timotêi 6 - Ngombale bible

1 Timotêi 6

¹Pye pə́tsəm pi gháp pə́ məpuʼ ghwo lə̂ ŋə́ məkuʼ pye pi gháp ghwǒ gháp ghíʼ ə́ pə́ ntuŋú, ə́ njí ńgó cǒ ŋuu kuʼ yé lə̂ nkʉ́ʉ ləjôghʼ Sê tə́poŋ po, lə́u ngwâghʼ yé zə̂u yi paghʼə jyêʼ pye zěi po.

²Pye pi gháp ghwǒ gháp lə̌i mbə́ pye Kəlísto, koo gháp nyêr tə́ ŋə́ məkuʼ máp, ə́ ncʉ́ʼ mvə́mtə́ ndáʼ ńgó gháp pə pǎp pəfə̌r. Tə ncʉ́ʼ yə́rə́, gháp faʼ mbó páp tə ndêi ghíʼ gháp kə yǎa mə́ fâʼ, ńté ńgó pye pi gháp zʉ̂ pəi faʼ záp, ə̂ pye Kəlísto pi Sê kǒŋ no záp. Yo zə̂u yi o wo jyéʼ gháp, ə́ pǒu ghʉ̌ gháp ŋə̂i ghíʼ ə́ pə́ ntúŋú.

³Pəcó pye pə́ wó mə́ njyêʼ pye zə̂u yi kâa pə̂ yé zěi. Ə no yi gháp lâʼ zěi kâa pə̂ yé kwaʼ zə̂u yi Nde wághʼə Yěso Kəlísto lə jyéʼ wághʼə, ə mbou káa pəu yé lə̂ zə̂u yi paghʼə jyêʼ pye zěi, lə̂ ndághʼ ńnyáŋ ghíʼ Sê pə̌ nkǒŋ.

⁴Ə̂ pye pi ləŋâʼtə lə fú mə́ nzʉ́ gháp. Káa gháp pə́ njî gháp zə̂u yi gháp jyêʼ pye zěi, ə́ nzóŋə məno gháp pə shə̂r sʉ̂ məno fú mbə́ mbó páp, ə́ mbə́ pə̂ ghou. Ə́ ntághʼ ləjôghʼ lə̂ zə̂u ŋuu, ə nzóŋə́ məno, ə nzôutə́ pye, ə nkâp məno tû pye fû pə́ lə́ mbə̂u cǐ zêi,

⁵məzoŋə tə mê kə̂u təcər páp ńté ńgó jîno záp coŋtə́ mə́, lə́u gháp pyêr njî gháp no lə́nə́ʉ po. Ə́ ncʉ́ʼ nkwâŋ záp pə́ ńgó ə ngwô pə̂i-ntə̂ʉ nzəm Sê ə̂ laŋə́-ndə̂u laghʼ ńgwô zə̂u.

⁶Ə̂ŋ, ə́ yaa mbə́ no lə́nə́ʉ ńgó pə̂i-ntə̂ʉ ə̂ tə́koʼ ləghûʼ, ghíʼ ə́ lə̌i mbə́ yi ngaŋ wo ghwǒ lətsei lə̂ yé zə̂u yi a ghwǒ.

⁷Ńté no paghʼə lə ghí tó ndəu nzʉ̂, káa laghʼ wághʼə có zə̂u tó, ə́ táa ghǐ lə̌r, lə́u ə́ kə́ laghʼ wághʼə có zə̂u lə̌r po.

⁸Ghíʼ paghʼə ghwô zə̂u yi mboʼ paghʼə zʉ̂, ə́ mbou ngwô ndǐ yi mboʼ paghʼə mâʼ, paghʼə tsêi ńté yə́rə́.

⁹Ə́ ngwǒ lə́ pye pi gháp pə́ koŋ lə̂ mbə́ pəghaŋə-zə̂u, Sə́tə lêi tə nkwáʼtə́ gháp, gháp pfûŋ cər nkwaʼtə ghíʼ nye pfûŋ lə̂ ləkei lə̂. Məkwaŋtə tə́poŋ mbə̂u lə̂ mbə̂u pə́ mətû páp, ə́ mbə́ ghəghəʉ məkwaŋtə mi ə́ tə̂m sə̂ʉ tû ŋuu, ə́ mbə́ mi ə́ cʉ́ŋə ŋuu a kə̂u cər ngwôʼ tə lǎʼ mê.

¹⁰Ə zə̂u yi ə́ ghʉ lələʉ məno tə́poŋ pə̂ wó, ə̂ méʼ mbəʉ lə̂ no nkâp. Pəcó pye lə lou nkâp tə nzéʼ ndaghʼə, ə́ měʼ pə̂i-ntə̂ʉ yi gháp kə ghwǒ nzəm Yěso Kəlísto. Ə́ pə̂ yə́rə́ gháp jwô ngwôʼ tə ntûŋ cǒ ngwér lóŋ páp.

¹¹Lə́, ə́ ngwǒ lə́ gho yi o pə̌ ŋuu Sê, o ghwo lə̂ nkhʉ̂ məzə̂u mei mə́tsəm. Pə́ maa mpfu tsəm, ə́ ndǒu lə̂ mbə́ ndʉŋ-ndʉŋ mbi Sê, ə́ nyáŋ lə̂ mbə̂u yi Sê pə̌ nkǒŋ, ə́ ngwǒ pə̂i-ntə̂ʉ nzəm Kəlísto; ə́ ngwǒ koŋə nzəm pye-mə́soŋ, ə́ ngwǒ shəghʼ-ntə̂ʉ mbaa mbwórə lə̂ zə̂u tsəm.

¹²Lwóʼó ntso shʉʼʉ yi pye pi gháp ghwǒ pə̂i-ntə̂ʉ nzəm Kəlísto ghwǒ lə̂ ndwóʼó, pə́ maa mpfu tsəm ə́ nkə́ ndôu pə́ lə̂ ndáʼ ngwô ləcwôr tə me. Sê lə fûŋ ghô ńté pə́ wêi. A lə ghʉ o jî ńgó o ghwǒ wêi, ə́ leʼé yi o lə tə́ʉ mbi lâʼ, ə́ mbə́i ńgó o ghwo pə̂i-ntə̂ʉ nzəm Kəlísto.

¹³Məŋ ntə̌ʉ mbi Sê yi a ŋə̂ ləcǐ-mbî lə́ maa zə̂u tsəm mbaa mbi Yěso Kəlísto yi a lə tə́ʉ mbi Póŋsə́ Piláto, ə́ ndǎʼ no lə́nə́ʉ yé yi a pə̌ njí, ə́ mə́ ndâʼ lə́ gho ngô:

¹⁴«Ghʉ̌ zə̂u tsəm yi Sê lə lǎʼ ńgó o ghʉ́ tə́ lǒʼ, tə́ ghó pə́ côghʼ fər paa gho lə̂ có zə̂u, tə ngwó nkə́u leʼé yi Nde wághʼə Yěso Kəlísto wo pə̌ʉ tó.

¹⁵Ə Sê lə̂ táa ghʉ̌ Nde wághʼə Yěso Kəlísto pə̂ʉ tó lə̂ mpfu yi a lə mə́ ntághʼ. Ə shʉʼʉ tsəm fû pə́ mbó Sê, zə̂u tsəm zûʼ pə́ zʉ́ zə́ghʼə́-zʉ́, ə́ mbə́ Fou pəfou, ə́ mbou mbə́ Nde pənde.

¹⁶Ə̂ ndaʼ zʉ́ yi a pə̌ tə-kwʉ̂, ə́ ncî cər nkeʼ yi mboʼ cǒ ŋuu cʉ́ŋə yé tə mbáatə́ po. Cǒ ŋuu-məsoŋ laa kə́ jwô yé yé, mboʼ cǒ ŋuu yaa njwô yé yé po. Məkuʼ gháp mətəʉ tə́ láʼ mé pə́ pə́ mbó zʉ́! Ə̂ pə́ yə́rə́.»

¹⁷«Lǎʼ lə́ pye pi gháp ghwǒ məzə̂u cər nzʉ̂ yo ńgó koo laghʼ gháp ńŋáʼtə́; ńgó koo gháp cóghʼ ntə̂ʉ gháp lə̂ məzə̂u mi gháp ghwǒ ńté no ə̂ mi mboʼ ə́ me, ńgó gháp cóghʼ ntə̂ʉ gháp pə́ lə̂ Sê. Ə́ zʉ́ yi a ŋə̂ məzə̂u shʉʼʉ tə nzáa lə́ paghʼə ghíʼ ə́ wo pfûtə wághʼə.

¹⁸Lǎʼ lə́ páp ńgó gháp ghʉ́ məno shʉʼʉ lə́ pye, ə́ ngʉ̌ məfaʼ shʉʼʉ ə̂ záa, ə́ ndǎghʼ ntə̂ʉ shʉʼʉ ńŋə́ zə̂u lə́ pye, ə́ mbou ngâp pô tə́ cwǐ ŋuu.

¹⁹Ə̂ pə́ yə́rə́, gháp laghʼ ńtsâp məfuʼ máp mi ə́ pǒŋ, ə́ mbou mbə́ mi mboʼ có zə̂u lâʼ nkə̂u yé po ə́ tʉ̌-lə́pû, ńjí ńgó ə́ lei yə́rə́ gháp nyâŋ lə̂ mbə̂u yi Sê pə̌ kǒŋ.»

²⁰Timotêi ŋuu lətəi-ndwuŋ mbó məŋ, koo o lâghʼ zə̂u yi Sê lə cóghʼ mbó gho ńgʉ́ məghaa. Khʉ̌ tsâr məzoŋə yi káa pə́ mpfûtə yé ŋuu lə̂ có zə̂u, ə́ mbou káa pə́ pəu yé lə̂ no yi paghʼə pə̂i zěi nzəm Kəlísto, lwóʼtə́ mətsâr mi pye tsâr, ə́ kwâŋ ńgó ə̂ mətsâr jîno, ə́ ndaghʼ ńtô məlǒʼ lə̂ no pə̂i-ntə̂ʉ.

²¹Pəcó pye lə kwaŋ záp ńgó gháp jîno lə́ zêi mbə̂u, ə́ ncwí pə̂i-ntə̂ʉ záp. Ńgó Sê ghʉ́ məno shʉʼʉ lə́ pei.