Read Ngombale 2 Timotêi 1 Bible Online

2 Timotêi 1 - Ngombale bible

2 Timotêi 1

¹Mə̂ŋ Pôl, ə́ mbə́ ngaŋə-ntə̂u Yěso Kəlísto. Ə Sê lə kôŋ yé koŋə́, ə́ ndǎghʼ ghâa ńgʉ̌ wěi, ńgó məŋ ŋáa ndéʼtə́ mbó lâʼ ńgó ŋuu lə̌i ncóghʼ ntə̂ʉ ye lə́ Yěso Kəlísto, a ghʉ̂ ngwô ləcwôr tə me yi Sê lə ghʉ̌ ndaʼá mə́u lə̂ ngʉ́ ŋə́ lə́ pye pi gháp lǎr mbəʉ záp lə zʉ́ Yěso.

²Məŋ ŋwaʼa wo ŋwaʼa ə́ ŋə̂ lə́ gho môu ghâa Timotêi yi n nkǒŋ gho gháʼate. Ńgó Tə́ waghʼə Sê gháp Nde wághʼə Yěso Kəlísto ghʉ́ məno shʉʼʉ lə́ gho, ə́ ngwǒ tsâa-mə́jʉ̂ŋ nzəm gho, ə́ mbou ncóghʼ mə́shwítə ntə̂ʉ gho.

³M mə̌ ŋə̂ nkhwo mbó Sê ńté ghô, ə Sê yi n ngûʼtə yé lə́ tâʼ ntə̂ʉ ghíʼ pəmə́ngâa-njʉʼ pâa lə ghûʼtə záp yé lə́wó. Ə́ mə́ ŋə̂ nkhwo mbó zʉ́ ńté ghíʼ m mbə̌ maa mpfu tsəm, ə́ ntə̌ʉ-nəu kəʉ pə́ lətwûʼ ə́ mə́ sʉ̂ʉtə yé, ə́ nkʉ̂ʉ ləjôghʼ zô.

⁴M mə̌ nkʉʉtə ghíʼ paghʼə lə ghí sěi, o pə̂ ntsə́rə́; m mbou mə́ ntsâa gháʼate ńgó n ndə̌i nkə́ ncí njwó gho, ntə̂ʉ ghâa pə̂ cər lətsei.

⁵M mə̌ nkʉ̂ʉtə ńgó o ghwo pə̂i-ntə̂ʉ yi lə́nə́ʉ nzəm Yěso Kəlísto, ə́ pə̂ pə̂i-ntə̂ʉ yi mə́ pə mə́ gho Loyísʉ gháp mə́ gho Enísʉ lə yǎa ngwô záp lə́wó. N ntsúŋu mə́ njî ńgó o kə̌ ngwo zô zěi ghíʼ páp.

⁶Ə̂ zə̂u yi ə́ ghʉ̌, m mə̌ nkʉ̂ʉtə gho ńgó koo o nyêr məzə̂u shʉʼʉ mi Sê lə ncóghʼ ntə̂ʉ gho mpfu yi n ndə zápə́ mbô tû gho lə̂, ə́ lê.

⁷N ndaʼ yə́rə́, ńté no Zəghʼə Ndêi-lěi yi Sê lə cóghʼ məntə̂ʉ paghʼə, kâa pə̂ yé yi ə́ ghʉ paghʼə nyôtə nyotə́; ə́ pə́ pə́ yi ə́ ŋə̂ wághʼə mətəʉ, ə́ ngʉ́ paghʼə ghwô nkoŋə, ə́ mbǒu ngʉ́ paghʼə ghwôtə mbəʉ zághʼə lə̂ zə̂u tsəm.

⁸Ə́ pə̂ yə́rə́, koo o kô sə̂ʉ lə̂ ndâʼ no yi o pə̌ njî lə́ Nde waghʼə; koo o kô sə̂ʉ, ńté ghâa yi m mbə̌ ndə̂-tsâŋ ńté yé. Tə ncʉ́ʼ yə́rə́, poghʼo jwô ngwôʼ lə̂ ngʉ́ Nkəʉ Shʉʼʉ sâr yʉʼ tsəm, ə́ ngǐ pə́ jwô ngwôʼ, ə́ mə́ nkwâʼ lə̂ mətəʉ Sê.

⁹Ə Sê lə ghʉ paghʼə cwôr, ə́ mbou fúŋ wághʼə ńdághʼ ńgʉ̌ pye pé. Káa a lə ghʉ̂ yé yə́rə́ ńté pə̂ məfaʼ shʉʼʉ mághʼə, a lə ghʉ yə́rə́, ńté pə́ ńgó ə́ lə pəu mbó zʉ́; ə́ ndeitə́ lə̂ poŋə-ntə̂ʉ tə́ ndaghʼə yi a ghwǒ nzəm pye-mə́soŋ. A lə zâʼ nzʉ̂ ə́ ndeitə́ lə́ Yěso Kəlísto, ə́ nyárə́ wághʼə poŋə-ntə̂ʉ yé zêi tə mbyér pə́ tə tsuŋú nzʉ̂.

¹⁰Ə́ pou mbə́ mpfu wo, paghʼə pə̂ njwô poŋə-ntə̂ʉ yé tə ndaghʼə zêi ə ndeitə́ ghíʼ Môu ye Yěso Kəlísto nzaʼ-nkʉ waghʼə lə tó ndəu nzʉ̂ tə pə́ jwô yé. Nzaʼ-nkʉ waghʼə wêi lə təi ńděi ləwʉ̂; a lə nyarə́ wághʼə ńgó ŋuu lə̌i nkúʼtə́ Nkəʉ Shʉʼʉ, a ghʉ̂ ngwô ləcwôr tə me, ə́ nkə́ nkwʉ̂ yé po.

¹¹Ə Sê lə tsóʼ ghâa ə́ ndaghʼ ńgʉ́ ngaŋə-ntə̂u yé, ńgó n ŋáa ndéʼtə́ Nkəʉ Shʉʼʉ zêi mbó pye, ə́ mbǒu nkéʼtə́ ə́ ndáʼ gháp.

¹²N njwô ngwôʼ gháʼa, ńté pə̂ Nkəʉ Shʉʼʉ Sê zei, lə́ káa sə̂ʉ pə́ kô yé ghâa, ńté no m mə̌ njî ŋuu yi n ncǒghʼ ntə̂ʉ ghâa lə́ zʉ́, ə́ mbou ntsuŋú mə́ njî ńgó ngaŋ ghwo mətəʉ lə̂ ndághʼ ḿbapə́ Nkəʉ Shʉʼʉ yi a lə cóghʼ mbó məŋ tə láʼ wǒ kə́u leʼé yi a wo pə̌ʉ tó.

¹³Nyér ńgó mətsâr no lə́nə́ʉ mi ə́ lə kwǎr ntsʉ məŋ, ə̂ pə́ fəiʼi no mbó gho lə̂ ndághʼ njyéʼ pəcó pye, ə́ ngǐ pə́ jye gháp, ə́ ngwǒ pə̂i-ntə̂ʉ gháp nkoŋə, ńté ńgó o lar mbəʉ zô lə́ Yěso Kəlísto.

¹⁴Ńgó Zəghʼə Ndêi-lěi yi ə́ pə́ məntə̂ʉ paghʼə pfútə́ ghô lə̂ mbápə́ Nkəʉ Shʉʼʉ yi Sê lə côghʼ mbó gho tə lə́u có zə̂u kə̂p yé mə́u po.

¹⁵O tsuŋu mə́ njî ńgó pye Kəlísto pi cər paghʼə-ngoŋ Azî lə meʼ ghâa, tə mbaa Fijêlə gháp Herəmojênə.

¹⁶Ńgó Nde pápə́ pye pi gháp cî nzeʼ Onezifôr, ńté ńgó a kə pə́ mpfu ntsəm mə́ ntôutə ghâa tə́ kó sə̂ʉ mbi pye ghíʼ m mbə̌ ndə̂-tsâŋ.

¹⁷A lə tó tə nkə́u Rômə yaʼa, ə́ ncʉ́ʼ lə̂ nkó sə̂ʉ ghâa, ə́ nzaŋə́ mbəʉ ŋáa ndôu ghâa tə njwó.

¹⁸Ńgó Nde ghʉ́ leʼé yi a tô lə̂ nzáʼ kôr pye-mə́soŋ ə́ ngwǒ tsâa-mə́jʉ̂ŋ nzəm zʉ́. O ntsuŋu mə́ njî ndwuŋ məfaʼ mi Onezifôr wêi lə pfútə́ ghâa lə̂ faʼ, ə́ túsoŋ Efêzə.