Read Ngombale 2 Timotêi 2 Bible Online

2 Timotêi 2 - Ngombale bible

2 Timotêi 2

¹Ə́ ngwǒ lə́ gho môu ghâa, ghíʼ Yěso Kəlísto ghwǒ poŋə-ntə̂ʉ tə́ ndaghʼə nzəm ghô lə̂, nyér â ŋə́ ghô mətəʉ lə̂ ndághʼ fǎʼ.

²Ə no yi o lə zúʼ zěi ntsʉ məŋ mpfu yi n ndə tə́ʉ mbi lâʼ ə́ mə́ njyêʼ pye lə̂, kə́ ngwo njyêʼ zô pəcó pye pi mboʼ pə́ tə̂m nzəm ńŋə́ lə́ páp, ńjí ńgó gháp kûʼ lə̂ nkə́ ngwó njyêʼ záp pəcó pye lə́wó.

³Jwô zô ngwôʼ ghíʼ məŋ lə̂ məfaʼ Yěso Kəlísto ghíʼ tâʼ maʼ-ntso yi shʉʼʉ.

⁴Tâʼ maʼ-ntso yi a pə̌ ndou fâʼ tə ə́ poŋə́ tə́-faʼ ye, kâa ghwô yé lə̂ nkə́ mbóu ngʉ̂ məcó məfaʼ mi ndeʼe.

⁵Ə́ kə́ mbə́ pə́ yə́rə́, nkhʉ mə́ndʉ lə̌i ndə́iʼ khʉ̌ ghíʼ ləpə̌ʉ mə́ndʉ pə́ ntúŋú po, a pfû yé yé ntsoʼó-faʼ po.

⁶Mbaa tâʼ nkhwoʼo-sô yi a lə kwóŋ jiʼi gháʼate lə̂ faʼ ghwo lə̂ mbə́ nduŋ-mbi lə̂ ndôghʼ məzʉ̂ nkâʼ.

⁷Tsuŋu kwáŋə́ tû zô shʉʼʉ lə̂ məno mwo mi n ndǎʼ lə́ gho lo, Nde wo pfútə́ gho lə̂ ntsúŋú nzúʼ měi mə́tsəm.

⁸Kʉ́ʉtə́ ńgó Sê lə ghʉ Yěso Kəlísto zʉ̂ʉ lə̂ ləwʉ̂; Yěso wêi ŋuu ngər-ndə̂ fou Davîd, ə̂ ghíʼ Nkəʉ Shʉʼʉ yi məŋ ntsətə pə̌ ndaʼ yə́rə́.

⁹N njwô ngwôʼ tə pə́ côghʼ ghâa ndə̂ tsâŋ ghíʼ tâʼ ntsǒŋ gháʼa, ńté Nkəʉ Shʉʼʉ zêi; lə́ mboʼ pə́ côghʼ yé Nkəʉ Shʉʼʉ ndə̂ tsâŋ po.

¹⁰Ə̂ zə̂u yi ə́ ghʉ̌, m mə̂ shə̂ghʼ ngwôʼ tsəm, lə̂ ndághʼ ńtóutə́ pye pi Sê lə fúŋ gháp ə́ ndaghʼ ńgʉ́ pye pé, ńjí ńgó ə́ lei yə́rə́; Yěso Kəlísto ghʉ gháp cwôr záp lə́wó; ə́ ncʉ́ʼ nyáŋ cər ləghûʼ tə me ə́ mbəʉ Sê.

¹¹No yi n ngwo ndǎʼ wo lo, ə́ pə́ lə́nə́ʉ: «Ə́ lə̌i mbə́ yi paghʼə pə Yěso kə nǎa nkwʉ́, mə́i paghʼə pə pǎp táa cí pə̂ wó.

¹²Paghʼə lə̌i shə̂ghʼ ngwôʼ ghíʼ zʉ́, paghʼə pə pǎp ghʉ nâa sáʼ ngoŋ; Ə́ mbou múŋú yé, a ghʉ̂ nkə́ múŋú wághʼə zághʼə lə́wó.

¹³Paghʼə lə̌i mbə́i pəməshər-nzəm ə́ nzəm Yěso, mə́i káa â pə̂ yé məshər-nzəm ə́ nzəm paghʼə; ńté no mboʼ a lâʼ yé no, ə́ ntí tə́ ghʉ̌ zěi po.»

¹⁴Kʉ́ʉtə́ məno mwo mbó ŋuu ntsəm, ə́ mbou ntə́ʉ mbi Sê, ə́ sâa-sǎa ndáʼ lə́ páp ńgó gháp páa lə̂ nzóŋə́ mətsâr, ńté ńgó gháp lə̌i ngʉ́ yə́rə́, ə́ pfûtə yé gháp lə̂ có zə̂u po; tə ncʉ́ʼ yə́rə́, měi ghʉ pye pi gháp pə́ nzʉ́ʼtə fû gháp nzəm Sê nkhʉ̌.

¹⁵Sáʼ mətəʉ lə̂ ngí pə́ tə̂ʉ mbi Sê mpfu tsəm, ə́ mbə́ ngaŋə-faʼ yi a wo pə́i no zô. Pə́ tâʼ ngaŋə-faʼ yi káa a pə́ nkô yé sə̂ʉ lə̂ faʼ yé, ə́ tâʼ ngaŋə-faʼ yi a lâʼ tsâr Sê ə́ ndʉŋ-ndʉŋ ghíʼ ə́ pə́ ntúŋú.

¹⁶Páa lə̂ ncóghʼ ntsʉ ghô lə̂ mətsâr mi kâa pə pə́ ndághʼ ńgûʼtə yé Sê. Pye pi gháp tsâr mbə̂u mətsâr mêi táa ghǐ lyəghʼtə́, ə́ fú nzəm Sê nkhʉ̂ gháp.

¹⁷Mətsâr mbə̂u pye pêi zʉ̂ yʉʼ pə́ ghíʼ fʉ̌ŋ yi ə́ cóghʼ mə́ mbər, ə́ ncʉ́ʼ mə́ ngáʼ nzʉ̂ mbəʉ ŋuu. Yimənê gháp Filêtə ə̂ mbə̂u pye pêi.

¹⁸Gháp kə meʼ laŋə́-ndə̂u no lə́nə́ʉ, ə́ ncʉ́ʼ mə́ ntâŋ məlaa ndâʼ ńgó Sê kə láʼ mə́ ngʉ́ pye zʉ̂ʉ lə̂ ləwʉ̂; ə́ ndâʼ yə́rə́, ə́ ndághʼ ńgʉ̌ pye tə nzáa pi gháp lə yaa mə́ ngwó pə̂i-ntə̂ʉ, fû gháp nzəm Yěso Kəlísto ńkhʉ́.

¹⁹Lə́ pye pi gháp ghwǒ pə̂i-ntə̂ʉ nzəm Kəlísto təi ghíʼ məcû ndə̂ mi Sê lə póu; ə́ mbə́ mi mboʼ có zə̂u ghʉ yé tə měi nyuʼu po. Pə́ lə ŋwaʼa lə́ měi ngô: «Nde pə̌ njî pye pé», ə́ nkə́ ncí ŋwáʼá mə́u ngô: «Ŋuu yi a jǐ ńgó a lar mbəʉ ye lə̂ Sê, â nkhʉ̂ no tə́poŋ.»

²⁰Pə́ lə̌i ngwó ndə̂ tâʼ ngaŋə-zə̂u, pə́ jwô məkâŋ mbə̂u lə̂ mbə̂u, məcó pə̂ mi pə́ lǎghʼ tə̌ʉ-gôl ńtsuŋú, məcó pə̂ mi pə́ lǎghʼ tə̌ʉ nkâp ńtsuŋú, məcó pə̂ mi pə́ lǎghʼ nkwə̂i ńkóo, məcó pə̂ mi pə́ lǎghʼ tsaʼá məkhʉŋ mbóu. Pə́ tâghʼ məcó sê pə̂ leʼé lətsei, ə́ ntâghʼ məcó sê pə̂ leʼé tsəm.

²¹Ŋuu lə̌i fú ndəu zʉ́ sóghʼ məno tə́poŋ mwo mə́tsəm mi n nyǎŋ ndaʼ wéi lo, a pə̂ ghíʼ kâŋ yi pə́ kwarə ntâghʼ sê pə̂ leʼé lətsei lə̂, mə́i Sê wo cwǐ faʼ yé, â pə́ mpfútə yé zʉ́ Sê lə̂ məfaʼ shʉʼʉ mə́tsəm.

²²Khʉ̌ məno tə́poŋ mi məmbəʉ nkaŋ-ŋuu cʉ́ŋə gháp lə̂ ngʉ́. Pə́ maa mpfu tsəm, ə́ ndǔ pə́ lə̂ mbə́ ŋuu ndʉŋ-ndʉŋ mbi Sê; ə́ ngwǒ pə̂i-ntə̂ʉ nzəm Kəlísto, ə́ ngwǒ nkoŋə, ə́ nyáŋ lə̂ mbwórə pei pə pye pi gháp sʉ̂ʉtə Sê lə́ tâʼ ntə̂ʉ.

²³Páa məghəghəʉ tsâr, káa měi pə́ mpfûtə yé ŋuu lə̂ có zə̂u. Tsuŋu njí ńgó měi ghí lyəghʼtə́, ə́ ncʉ́ŋə́ pye, gháp púʼu məlaʼ.

²⁴Lə́ Ngaŋə-faʼ Sê kâa ghwo yé lə̂ mbúʼú məlaʼ. Ə́ poŋ ńgó â pə́ ŋuu yi a ghwǒ nkoŋə nzəm pye-mə́soŋ pə́tsəm, ə́ kǔʼ lə̂ njyéʼ pəcó pye zə̂u, ə́ mbou mbə́i ńgó pə tó məlǒʼ mé.

²⁵A ghwo lə̂ ndághʼ mbwórə ńdâʼ no mbó pye pi a laʼ no, gháp kə́pə sʉ̂ wěi, ndeʼ có Sê tâa ngʉ̂ gháp meʼ məkwaŋtə tə́poŋ máp, ə́ mbə́i no lə́nə́ʉ ə́ ntsə́ʉ nzəm zʉ́.

²⁶A ghʉ̂ gháp fû lə̂ məkei Sə́tə, ə́ nkwâtə, ə́ ncʉ́ʼ mə́ ŋə̂i lə̂ laŋə́-ndə̂u shʉʼʉ. Ə́ nyér lə̂ nkə́ ŋə̂i lə̂ mbə̂u yi gháp kə laghʼ ńŋə̂i mpfu yi gháp kə pyér cər məkei Sə́tə, ə́ mə́ ŋə̂i ghíʼ a pə̌ nkǒŋ.