Read Ngombale 2 Timotêi 3 Bible Online

2 Timotêi 3 - Ngombale bible

2 Timotêi 3

¹Timotêi, tsuŋu njí ńgó ə́ táa pə́ lə́ pəlyəghʼ-nzəm məleʼé lâʼ, ə yʉʼ tə̂i gháʼate.

²N ndaʼ yə́rə́ ńté no ə́ ghʉ̌ pə́ mpfu wêi, pye cʉ́ʼ mbə́ pə̂ pəghwuʼó, ə́ ncóghʼ ntə̂ʉ gháp lə̂ nkâp gháʼate, ə́ pye jwó mbəʉ záp gháʼate, ə́ ncʉ́ʼ ngaŋə-ŋâʼtə, ə́ ncʉ́ʼ pəzoutə́ Sê; gháp cʉ́ʼ ngaŋə-təi-tû mbó pətə́ páp, lə́u nkə́ kûʼ gháp lə̂ ŋə́ nkhwo lə̂ no shʉʼʉ yi pə́ ghʉ̌ lə́ páp po, lə́u nkə́ mə́ ŋə̂ gháp məkuʼ Sê po;

³ə ntə̂ʉ gháp tə̂i ghíʼ ləghǒ, gháp cʉ́ʼ pətə-tsǎa-mə́jʉ̂ŋ ŋuu, ə́ ncʉ́ʼ pəkʉ́ʉ pye tə́poŋ, ə́ ncʉ́ʼ pətə ghwotə́ mbəʉ záp, ə́ ncʉ́ʼ məfwôr, ə́ ncʉ́ʼ pəghaŋə mbəu no shʉʼʉ;

⁴gháp ghʉ̌ cʉ́ʼ pəfəi-ngoŋ, ə́ cʉ́ʼ pye pi gháp ghʉ no pə́ tə kwaŋ, ləŋâʼtə póu nzʉ́ gháp, ə́ nyér lə̂ nkôŋ Sê, ə́ cʉ́ʼ nkôŋ pə̂ məzə̂u mi məmbəʉ máp tsâa měi;

⁵pə́ náŋ gháp lə̂ nyôghʼ, gháp pə̂ ghíʼ pye pi gháp pə ŋəi ghíʼ Sê pə̌ nkǒŋ, lə́ ə́ mbə́ pye pi gháp ləʼ mətəʉ Sê. Lwóʼtə́ mbə̂u pye zêi.

⁶Pəcó pye təcər páp pə́ ŋâa nkə̂u məndə̂ pye, ə́ ndâghʼ mətsâr ńfûtə pəngyě pi gháp pə́ pəpə́i-pə́i ńgó gháp pə́i zə̂u yi gháp jyêʼ zěi. Pəngyě pêi pəghaŋə məfaa, mbəʉ záp cʉ́ŋə gháp lə̂ ngʉ́ məno mbə̂u lə̂ mbə̂u;

⁷pəngyě pêi nyâŋ mpfu tsəm, ə́ mə́ nkôŋ ńgó pə jyéʼ gháp məno shwî, lə́ gháp laa kə́ póu njí zə̂u yi no lə́nə́ʉ pə́ zěi.

⁸Ə́ ndʉŋ-ndʉŋ ghíʼ Janésʉ gháp Jambərésʉ lə lə̌ʼ zə̂u yi Mə̌usə̂i lə jyêʼ pye zěi, ə pye pêi pə́ ndəʼ no lə́nə́ʉ. Ghâp pye pi jîno záp lə coŋtə́ mə́, ə́ mbə́ pye pi káa lə tsúŋú ncôghʼ gháp ntə̂ʉ gháp lə́ Yěso Kəlísto.

⁹Lə́ mboʼ gháp laghʼ zêi mbə̂u faʼ ńdə̂r gháp tə ndǐ saghʼ po. Ńté no pye tə nzáa wo jwó ńgó káa gháp pə́ njî gháp có zə̂u, ə́ ndʉŋ-ndʉŋ ghíʼ ə́ lə pə́ yə́rə́ mbó Janésʉ gháp Jambərésʉ.

¹⁰Lə́ ngwǒ lə́ gho, mə́i o lə ŋəi lə̂ məku mâa lə̂ zə̂u yi n ndə jyêʼ pye zěi, ə́ njwó cǐ yi n ndə ghwǒ, ə́ njí zə̂u yi n ndə ghí pə́ fǎʼ ə́ mə́ ntsáa, ə́ njwó mbə̂u yi n ndə lǎghʼ ńgwô pə̂i-ntə̂ʉ nzəm Kəlísto, ə́ njwó ghíʼ n ndə ghwǒ shəghʼ-ntə̂ʉ, ə́ njwó ghíʼ n ndə ghwǒ nkoŋə nzəm pye-mə́soŋ, ə́ njwó mbə̂u yi n ndə laghʼ ńfâʼ tə́ kâa.

¹¹O pə̌ njî mbə̂u yi pə́ lə lǎghʼ ńgaghʼə́ ghâa ə́ mbou ŋə́ ghâa ngwôʼ ə́ túsoŋ Antyǒshə, ə́ túsoŋ Ikonyôm, ə́ túsoŋ Lístələ. N ndə jwô ngwôʼ wó gháʼate, lə́ ə́ pə̂ maa mpfu tsəm, Sê kə̂ fû cər wó nkwárə́ ghâa kwarə́.

¹²Ə́ yaa ngǐ pə́, ŋuu tsəm yi a pə̌ nkoŋ ŋə̂i ghíʼ Sê pə̌ nkǒŋ, ə́ nděi lə́ ghíʼ a lǎr mbəʉ yé lə́ Yěso Kəlísto, mboʼ pə́ tî yé tə́ lwóʼó yé po.

¹³Lə́ ə́ ngwǒ lə́ pye tə́poŋ gháp pə pəghaŋə məfutə́, gháp láʼ kə laghʼ faʼ tə́poŋ záp lər pə́ lə̂ mbi, ə́ pə́ fûtə pəcó pye, pə póu mə́ fûtə gháp záp lə́wó.

¹⁴Ə́ ngwǒ lə́ gho, kúʼtə́ zə̂u yi paghʼ lə jyéʼ gho zěi, o pə̂i ńgó ə̂ no lə́nə́ʉ. Kúʼtə́ zěi tə ə̂ tə̂i. O pə̌ ntsuŋu njî pye pi gháp lə jyéʼ gho zěi.

¹⁵O pə̂ njî tsâr Sê tə fú ghíʼ o lə pyér mənkhʉ̂; zěi kuʼ lə̂ ŋə́ gho jîno, o ghwô pə̂i-ntə̂ʉ nzəm Yěso, ə Sê ghʉ̂ o ncwôr.

¹⁶Zə̂u tsəm yi pə́ lə ŋwaʼá cər ŋwaʼa Sê lə kwar pə́ ntsʉ Sê, ə́ mbə̌u lə̂ ndághʼ ńjyéʼ pye no lə́nə́ʉ, lə̂ ndághʼ ńdǎʼ pye məfaa yi gháp pə́ ngʉ̌, lə̂ ndághʼ ńshítə́ məlǒʼ mi ə́ pə́ lə́ pye, lə̂ ndághʼ ńtághʼ pye ńgó gháp nyáŋ lə̂ mbə̂u yi Sê pə̌ nkǒŋ.

¹⁷Tsâr Sê pə́ yə́rə́, lə́ pə́ yi ngaŋə-faʼ Sê wo lǎghʼ zěi tsuŋtə́ mbəʉ yé, ə́ kǔʼ lə̂ ngwô zə̂u tsəm yi mboʼ a lâghʼ ńgʉ́ məno shʉʼʉ.