Read Ngombale 2 Timotêi 4 Bible Online

2 Timotêi 4 - Ngombale bible

2 Timotêi 4

¹Ə́ táa pə̂ có leʼé, Yěso Kəlísto pə̂ʉ ntó, ə́ nzáʼ kôr yi a wə́ təcər páp pə pye pi gháp pyér ntəʉ, mbaa təcər páp pə pəpfû sê, n ntə̌ʉ mbi zʉ́ mbaa mbi Sê, ə́ mə́ ndâghʼ lə́ pə́ yi a ghʉ̌ pə̌ʉ tó ə́ sáʼ nzʉ̂, ə́ mə́ ndâʼ lə́ gho ngô:

²Leʼtə́ Nkəʉ Shʉʼʉ, ə́ ndeʼtə́ tə́ kâa, ə́ ndeʼtə́ mpfu yi pye pə́ nkoŋ lə̂ nzʉ́ʼtə́ mbaa mpfu yi gháp pə́ ndəʼ lə̂ nzʉ́ʼtə́; ə́ ndeʼtə́ lə̂ ndághʼ ndǎʼ pye məno mi gháp pə́ faa měi, ə́ ndeʼtə́ lə̂ ndághʼ ńcwotə́ pye, ə́ ndeʼtə́ lə̂ ndághʼ ńcóghʼ mətəʉ pye. Ə́ ngǐ pə́ leʼtə́, ə́ ngwǒ shəghʼ-ntə̂ʉ lə̂ ndághʼ njyéʼ pye zə̂u.

³N ndaʼ yə́rə́ ńté ńgó ə́ táa pə̂ cǒ mpfu, pəcó pye kə́ kôŋ gháp lə̂ nzúʼ no lə́nə́ʉ yi ə́ pə́ lə́ Yěso po. Lə́ cʉ́ʼ koŋ pə́ lə̂ ŋə̂i ghíʼ məkwaŋtə máp pə́ ndǎʼ. Ghíʼ gháp kǒŋ lə̂ nzúʼ məno gháʼate lə̂, gháp lôu pəcícye tə ə́ zâa zǎa pi gháp wo jyéʼ gháp məzə̂u mi gháp pə́ nkǒŋ lə̂ nzúʼ.

⁴Ə̂ pə́ yə́rə́, gháp ghuʼu mətuŋú máp lə̂ ndághʼ ńzúʼ məno mi pə́ lə́nə́ʉ, ə́ ncʉ́ʼ ntághʼ mətuŋú máp pə́ lə̂ ndághʼ ńzúʼ pə̂ məno pə́uʼ-kap.

⁵Lə́ ngwǒ lə́ gho, kə́ mə́ ngʉ̂ pə̂ məno mi ə́ kuʼú-kuʼú lə́ maa zə̂u tsəm, ə́ shə̌ghʼ ngwôʼ, ə́ ndéʼtə́ Nkəʉ Shʉʼʉ ghíʼ ə́ pə́ ntúŋú, ə́ ngʉ̌ faʼ Sê lə̂ ntə̂ʉ tsəm.

⁶Ə́ ngwǒ lə́ məŋ, mə́i mpfu yi pə́ wo lǎghʼ ghâa ńnuŋú poʼ Sê* kuʼ mə́; ə́ mbə́ mpfu yi n ngwo fú cər nzʉ̂ yo lə̌r.

⁷N nkə lwóʼo ntso shʉʼʉ lə̂ faʼ Sê, m myaghʼ mə́ndʉ, n nkə̌ mə́ nkúʼtə pə̂ pə̂i-ntə̂ʉ zâa nzəm Yěso Kəlísto.

⁸Lə̂ fú mpfu wo, m mə̌ nzʉ̂ʼtə ntsoʼó-faʼ yi ŋuu lə̌i ŋə̂i ghíʼ Sê pə̌ nkǒŋ, a ghwô. Ə ntsoʼó-faʼ zêi, ə̂ yi Nde yi a feʼ kôr pye-mə́soŋ pə̂ ndʉŋ-ndʉŋ ghʉ̌ ŋə́ lə́ məŋ, ə́ leʼé yi a pə̌ʉ tó lə̂ nzáʼ kôr pye-mə́soŋ. A ghʉ̌ ŋə́ pə́ ndaʼ lə́ məŋ po, a ghʉ̌ ŋə́ mbaa lə́ ŋuu ntsəm yi a pə̌ ntsâa lə́ tâʼ ntə̂ʉ lə̂ ngʉ́ njwó yé.

⁹Sáʼ mətəʉ lə̂ ntóghʼ ntó ńcə́r ghâa.

¹⁰Ńté no Demásʉ méʼ ghâa ndə̌r lə̂ túsoŋ Tesalonîkə ńté ńgó a côghʼ ntə̂ʉ yé lə̂ məzə̂u nzʉ̂ tə ə́ lei. Kərəsáŋsʉ lə̂r yé lə̂ cər paghʼə-ngoŋ Galasî, Tîtə lə̂r yé lə̂ cər paghʼə-ngoŋ Daləmatî.

¹¹Paghʼ Lúʼkáasʉ ndaʼ lə́ cʉ́ʼ mbə́ yaʼa. Pei Máakúsʉ nâa ntó, ńté ńgó a wo pfútə́ ghâa lə̂ faʼ Sê gháʼate.

¹²N ntə̌u Tishîkə, ə́ túsoŋ Efêzə.

¹³O lə̌i mə́ ntó, o lâghʼ ndǐ fwôghʼ zâa yi ndə nyér túsoŋ Tərowásʉ ə́ nzeʼ Karəpwísʉ ńtó; ə́ ndǎghʼ mbaa pəŋwaʼa pâa ńtó, tə́ lyəghʼə́ pi pə́ lǎghʼ məngəp pəmə́nye ńtsuŋú.

¹⁴Alezâŋdələ yi a pə̌ taalaa kə ghʉ̂ məno tə́poŋ lə́ məŋ gháʼate; Nde ghʉ̌ pʉ̌ŋ mbəu məno tə́poŋ mi a kə ghʉ̌ lə́ məŋ lêi.

¹⁵Mbaa gho zô lə́wó lwóʼtə́ yé, ńté no a lə lə̂ʼ no yi paghʼ jyêʼ pye zěi tə mbúʼ mbaʼ.

¹⁶Ə́ lə pə́ ghíʼ n ndə pə́ nzôŋ tû zâa kôr lə́ nduŋ-mbi mpfu, kâa cǒ ŋuu pfûtə yé ghâa, ŋuu tsəm nâa mêʼ ghâa. Lə́ Sê lyəghʼə́ ŋə́ lə́ páp!

¹⁷Gháp lə meʼ ghâa, Nde pápə́ ghâa, ə́ fú ntsʉ nye-njwi ə́ nkwárə́ ghâa, ə́ ŋə́ ghâa mətəʉ n ndâghʼ ntsúŋú ńdeʼtə́ Nkəʉ Shʉʼʉ ghíʼ ə́ yǎa mə́ ntúŋú, tə pye pə́tsəm pi káa gháp pə́ gháp pəyúda zûʼ.

¹⁸Nde táa kə́ cí fú lə̂ məno tə́poŋ mbə̂u lə̂ mbə̂u kwarə́ ghâa, ə́ ghʉ̌ n ncwór ə́ nkə́u cər no Ləfou yé tʉ̌-lə́pû. Ləghûʼ pə́ mbó zʉ́ lə̂ mənguʼ mənguʼ! Ə̂ pə́ yə́rə́.

¹⁹Tsêʼtə́ Pərəsîlə, gháp Akilásʉ mbaa pye pi gháp cî nzeʼ Onezifôr ə́ ŋə́ lə́ məŋ.

²⁰Erâstə kə nyâŋ yé túsoŋ Korêŋtə. N nkə nyér Tərofîmə ə́ túsoŋ Milê ńté ńgó a kə pə́ ngôu.

²¹Fátə́ ntó tə mpfu məghǎa ghí kǔʼ. Embulúsʉ, mbaa Pwidéŋsʉ, mbaa Linyúsʉ, mbaa Kəlódya, ə́ ngʉ̌ pəcó pəfə̌r pə́tsəm tsêʼtə gho.

²²Ńgó Nde pə́ lə́ gho! Ńgó Sê ghʉ̂ məno shʉʼʉ lə́ pei pə́tsəm.