Read Ngombale Tîtə 1 Bible Online

Tîtə 1 - Ngombale bible

Tîtə 1

¹Məŋ Pôl ngaŋə-faʼ Sê, ə́ mbə́ ngaŋə-ntə̂u Yěso Kəlísto, Sê lə tə́u ghâa lə̂ ngwó ngʉ̌ pye pi Sê lə tsóʼ gháp ghwo pə̂i-ntə̂ʉ nzəm Yěso Kəlísto, ə́ mbǒu ngʉ́ gháp jí no lə́nə́ʉ yi ə́ pə́ lə Yěso, lə̂ ndághʼ ńnyáŋ ghíʼ Sê pə̌,

²ə́ njí ńgó gháp ghí nyáŋ yə́rə́, ə́ ngwǒ kwaŋtə ńgó gháp ghʉ̌ ghwǒ ləcwôr tə me. Sê yi kâa pə́ ntâŋ yé məlaa lə yaa ngʉ̌ ndaʼá lə̂ ngʉ́ ŋə́ ləcwôr tə me wêi lə́ paghʼə, tə mbyér pə́ tə tsuŋú nzʉ̂;

³mpfu lə kuʼ, a ghʉ̂ pə́ jî ləcwôr tə me wêi, ə́ ndeitə́ lə̂ tsâr yé. Ə́ ndeitə́ lə̂ Nkəʉ Shʉʼʉ yi Sê yi a ghʉ paghʼə cwôr lə cóghʼ mbó məŋ ńgó n ŋáa ndêʼtə́.

⁴Məŋ ŋwáʼá wo ŋwaʼa ə́ ŋə́ lə́ gho Tîtə kwaʼ môu ghâa yi lətəi-ndwuŋ cər pə̂i-ntə̂ʉ nzəm Yěso yi a təmtə́ wóghʼə. Ńgó Tə́ wághʼə Sê gháp Yěso Kəlísto Nzaʼ-nkʉ wághʼə ghwô poŋə-ntə̂ʉ yi tə́ ndaghʼə nzəm gho, ə́ ncóghʼ mə́shwítə ntə̂ʉ gho.

⁵N ndə nyér gho cər ngoŋ Kərêtə gháʼá ńgó o cʉ́ʼ myaghʼə́ məfaʼ mi ə́ pyér tə́ ghʉ, lǎghʼ məntǎghʼ mi n nkə ŋə́ lə́ gho, ə́ ntsóʼ pəkə̌m ndə̂ Sê cər məcûʼtə pye Kəlísto lə̂ mətúsoŋ mə́tsəm.

⁶Ə́ poŋ ńgó nkə̌m ndə̂ Sê yi o wo ntsóʼ zʉ́ pə́ ŋuu yi káa pə́ pə́ ntô yé məlǒʼ mé, ə́ poŋ ńgó a ghwô pə́ tâʼ məngyě, ghəpə́ yé pə́ pye Kəlísto, ə́ ngwǒ cǐ shʉʼʉ, ə́ mbou mə́ nzûʼ ntsʉ pətə́ páp.

⁷Ŋuu yi a tə̌ʉ tû mbi lə̂ cághʼə́ cûʼtə pye Kəlísto ə́ mbou mbə́ ŋuu yi a tʉ̂ŋtə məzə̂u ndə̂ Sê kâa ghwô yé lə̂ mbə́ ŋuu yi pə́ nyâŋ ntô məlǒʼ mé: Koo a pə̂ ngaŋə-ŋâʼtə, koo a pə̂ ngaŋə záŋə́ lóŋ, koo a pə̂ nó-nó məluʼ, koo a pə̂ ŋuu yi a tə̂u lə̂ no tə̌u, koo a pə̂ ŋuu yi a laghʼ pə́ píʼí ngwô məzə̂u.

⁸A ghwo lə̂ mbə́ ŋuu yi a pə̂ pfû ŋuu ntsəm nzeʼ zʉ́, ə́ mbə́ ŋuu yi a nkǒŋ lə̂ ngʉ́ məno shʉʼʉ. Ə́ pə́ ntúŋu ńgó a pə́ ŋuu yi a kwaŋ no mboŋə́ ghʉ̌, ə́ mbə́ ngaŋə no-lə́nə́ʉ, ə́ mbə́ ŋuu Sê, ə́ mbə́ ŋuu yi a ghwotə mbəʉ yé lə̂ zə̂u tsəm.

⁹A ghwo lə̂ sâa-sǎa ncóghʼ ntə̂ʉ yé lə̂ tsâr yi ə́ kwar cər ŋwaʼa Sê, ə́ mbə́ yi pə́ ghwǒ lə̂ mbə́i, ə́ mbǒu ŋəi ndʉŋ-ndʉŋ ghíʼ paghʼ jyêʼ pye; ə̂ lêi yə́rə́, a poŋə́ kǔʼ lə̂ ndághʼ tsâr no lə́nə́ʉ zêi ńcóghʼ mətəʉ pəcó pye, ə́ mbǒu ngʉ́ pye pi gháp pə́ ndə̂ʼ tsâr no lə́nə́ʉ zêi jwó məlǒʼ máp.

¹⁰Pəghaŋə tə̂i tû záa, ə́ mbə́ pye pi gháp lâʼ məno mi kâa pə̂ yé měi, ə́ ndaghʼ ńfútə pəcó, lələʉ pə̂ pəyúda pi gháp pə́i no Kəlísto.

¹¹Ə́ pə́ ntúŋu ńgó o náʼá gháp, ńté ńgó gháp pə́ njyêʼ məno mi kâa pə̂ yé měi, ə́ ndaghʼ ńcôŋ məcʉŋə-ndə̂, ə́ ngʉ̂ yə́rə́ ə́ ndaghʼ ńfûtə pye ngwô zə̂u.

¹²Cǒ ŋuu Kərêtə wêi, yi a wə́ mbó páp, ə́ mbə́ ghíʼ tâʼ ntsətə-nkəʉ Sê lə laʼ ngô: «Pye Kərêtə lə fû leʼé ə́ mbə́ pə̂ pəghaŋə məlaa, ə́ mbə́ pye ə́ mbéi ghíʼ pəmə́nye, ə́ mbə́ pəlǒŋ, məkwaŋtə máp tə̂ʉ pə́ lə̂ no məzʉ̂.»

¹³Ə no yi a lâʼ lêi pə̂ kwaʼ no-lə́nə́ʉ. Ə̂ zə̂u yi ə́ ghʉ̌, ə́ pə́ ntúŋu ńgó o sáʼ gháp tə gháp jí ńgó lôŋ gho pə̌ nzáŋ ńtê gháp, ńjí ńgó lei yə́rə́, gháp poŋə́ ghwǒ pə̂i-ntə̂ʉ yi lə́nə́ʉ nzəm Yěso Kəlísto

¹⁴mbou lə́u nkə́ ncôghʼ gháp ntə̂ʉ gháp lə̂ məno pə́uʼ-kap pəyúda po, lə́u nkə́ nzûʼ məntǎghʼ pye pi gháp lə meʼ mə́ laŋə́-ndə̂u no lə́nə́ʉ po.

¹⁵Zə̂u tsəm poŋ mbó pye pi gháp ghwǒ ntə̂ʉ shʉʼʉ mbi Sê; ə́ ngwǒ lə́ pye pi gháp ghwǒ ntə̂ʉ tə́poŋ, kâa có no shʉʼʉ pə̂ yé mbó páp, ńté ńgó gháp pətəpə̌i-no Sê, ə́ mbə́ pye pi məno tə́poŋ kə zʉ́ mə́ ntə̂ʉ záp gháp pə məkwaŋtə záp.

¹⁶Gháp pə́ ndaʼ ńgó gháp pə́ njî Sê, lə́ ngʉ̌ məno gháp pə́ njî yé. Gháp ghʉ̂ pə̂ məno mi ə́ wo ghʉ̌ pə́ cʉ́ʼ nyə́ghʼə gháp nyə́ghʼə́, gháp pə́ pə̂ pəghaŋə təi tû mbó Sê, káa gháp kûʼ gháp lə̂ ngʉ́ có no shʉʼʉ.